Romance Guitar Center

30/06/2025

ဟမ့်

15/05/2025

😍😍😍

14/05/2025

ထင်းရှူးဂစ်တာ

01/05/2025

တူရိယာတစ်ခုကို လေ့ကျင့်တဲ့အခါ 🔺
=========================
တူရိယာတစ်ခုကို လေ့ကျင့်တဲ့အခါ "လေ့ကျင့်တယ်" ဆိုတာထက် "ပျိုးထောင်တယ်" ဆိုတဲ့စကားကို ပိုသဘောကျတယ် ။ ဟုတ်ပါတယ် ။ ဂစ်တာလေ့ကျင့်တယ်ဆိုတာ ဂစ်တာနဲ့ ပတ်သတ်တဲ့ အလေ့အကျင့်ကောင်းတွေကို ပျိုးထောင်တာပါ ။ ဒီလိုနားလည်ထားမှလည်း လေ့ကျင့်တဲ့အချိန်တွေကို မငြီးမငွေ့ ဖြတ်သန်းနိုင်မှာပါ ။ ( ကျွန်တော်က ဂစ်တာသမားဖြစ်တဲ့အတွက် ဒီတူရိယာလေ့ကျင့်နည်းကို ဂစ်တာကို ဥပမာထားပြီး ရေးသွားပါမယ်)

၁ ။ မလေ့ကျင့်မီ အကြောလျော့ပေးပါ
===========================
ဂစ်တာစကျင့်တော့မယ်ဆိုရင် လက်တစ်ချောင်းလုံး (ဖြစ်နိုင်ရင်တစ်ကိုယ်လုံး) အကြောလျော့ပေးပါ ။ တချို့က မလိုအပ်ဘူးလို့ ထင်ကောင်းထင်မယ် ။ အကြောလျော့ခြင်းနဲ့ စိတ်ရဲ့relaxဟာ ခင်ဗျားကို မောင်းတင်ပေးမယ့် ခွန်အားတွေပါ ။

၂ ။ warm up အမွဲလုပျပါ ။
====================
Fi*****ng, chromatic scale, fi*****ng stretching တွေထဲက ခင်ဗျားအတွက် ပေါ့ပါးလွယ်ကူမယ့် တမျိုးမျိုးကို နာရီဝက်လောက် အရင်တီးလိုက်ပါ ။ လက်ချောင်းတွေ သွေးပူလာဖို့ ၊ လွတ်လပ်စွာလှုပ်ရှားဖို့ ၊ finger stamina ကောင်းဖို့ ၊ ဒဏ်မဖြစ်ဖို့ ... warm up မလွဲမသွေတီးရပါမယ် ။

၃ ။ Metronomeနဲ့ အမြဲကျင့်ပါ ။
========================
Metronomeနဲ့ မကျင့်ခဲ့ရင်Bandနဲ့တီးတဲ့အခါ၊ Studioမှာအသံသွင်းတဲ့အခါ အဆင်မပြေမှုတွေ ဖြစ်လာပါမယ် ။ ကိုယ့်ရဲ့ tempoကို ကိုယ်သတိထားမိဖို့ ခက်ပါတယ် ။ စိတ်ကြွလာရင် tempoတက်လိုက် ၊ စိတ်မပါရင် tempo ကျလိုက် ဖြစ်တတ်ပါတယ် ။

၄ ။*very important* အနှေးဆုံးကိုတီးပါ ။
===============================
လေ့ကျင့်နေတဲ့အချိန်မှာ speedကိုခေါင်းထဲ ဝင်မလာပါစေနဲ့ ။ မလောပါနဲ့ ။ speedဟာ ဂစ်တာသမားတိုင်း တပ်မက်တဲ့ ရှိရမယ့် အရည်အချင်းဆိုပေမယ့် ... သူ့ကို အရူးအမူးနဲ့ လိုချင်ပြီးလေ့ကျင့်ပြီ ဆိုတာနဲ့ လမ်းတဝက်မှာ ပြတ်ကျန်ခဲ့ဖို့ သေချာသလောက်ရှိပြီ ။ တခါတလေ ... အနှေးဆုံးတွေကို တီးနေရင်း ခင်ဗျား ငြီးငွေ့လာမယ် ။ သေချာတယ် ။ ဒါကြောင့် ပြောခဲ့ပါတယ် ။ တူရိယာတစ်ခုကို လေ့ကျင့်တယ် ဆိုတာထက် ပျိုးထောင်နေတယ်လို့ ခံယူထားပါ ။ ဒါတွေဟာ ခင်ဗျား မလွဲမသွေ ဖြတ်ကျော်ရမယ့် လှေကားထစ်တွေပါ ။

၅ ။ မှန်ဖို့သာလိုပါတယ် ။
===================
လက်အနေအထား ၊ ကိုယ်တီးတဲ့ noteတိုင်းဟာ ပီသကြည်လင်ပြီး ပြည့်ဝတဲ့toneမျိုး ထွက်နေရပါမယ် ။ မှန်အောင် ၊ အသံထွက်ကောင်းအောင်သာ အာရုံစိုက်ပြီးကျင့်ပါ ။ speedဟာ ခင်ဗျားနောက်က ထပ်ချပ်မကွာ လိုက်လာလိမ့်မယ် ။ ကိုယ်မြန်လို့မြန်နေမှန်းတောင် မသိအောင် အံ့သြစရာကောင်းတယ် ။

၆ ။ *သံမဏိစည်းကမ်း*မှားခဲ့ရင် ၁ ပြန်စပါ ။
===============================
ဥပမာ chromatic scaleကို 1 to 6 strings , up and down , fret 1 ကနေစတီးတယ် ။ fret 12 ရောက်မှ တစ်လုံးမှားတယ် ။ ဒါဆိုရင် ပြန်စလိုက်တော့ ။ ကိုယ့်ကိုယ်ကိုယ် မညာနဲ့ ။ မညှာနဲ့ ။ အဲဒါမှမမှားအောင် ကိုယ်နိုင်နင်းတဲ့ tempoကို တီးဖြစ်မယ် ။ စိတ်ငြိမ်သက်အောင် အားထုတ်ဖြစ်မယ် ။ ထူးဆန်းစွာပဲ အမှားတစ်ခုဟာ ထပ်တလဲလဲမှားတတ်ပါတယ် ။ ဒါကိုကျော်လွှားရပါမယ် ။

၇ ။ လေ့ကျင့်တဲ့အခါတိုင်း relaxဖြစ်နေပါစေ ။
================================
အရေးကြီးလို့ တစ်ခေါက်ပြန်ပြောပါရစေ ။ အံကြိတ်ထား တင်းထားတဲ့စိတ်ဟာ ပိတ်နေတဲ့ရေမြောင်းကြီးလို ခင်ဗျားရဲ့စီးဆင်းမှုတွေကိုရပ်တန့်စေလိမ့်မယ် ။ ဒါကြောင့် စိတ်ရောကိုယ်ပါ relaxဖြစ်ဖို့ အထူးသတိထားပါ ။ relax ဖြစ်တဲ့အခါ ခင်ဗျားမျက်နှာက ပြုံးယောင်သန်း လာလိမ့်မယ် ။ ဒီလိုအကြံပေးတဲ့အခါ တစ်ချို့က ခေါင်းခါတတ်တယ် ။ "နိုင်ငံခြားဂစ်တာသမားတွေ ကြည့်ပါအုံး ... စင်ပေါ်မှာ မဲ့ရွဲ့ပြီး တီးနေတာ .." ။ ဟုတ်ပါတယ် ။ အဲဒါက performence လုပ်နေတာ ။ သူတို့တီးတဲ့ ဂီတရဲ့စီးမျောမှုမှာ ပျော်ဝင်နေတာ ။ လေ့ကျင့်တဲ့ အချိန်မှာတော့ ဘယ်သူမှ အံကြိတ်ပြီး မလေ့ကျင့်ခဲ့ပါဘူး ။ ကြိုက်တဲ့ lessonခွေကို ကြည့်လိုက်ပါ ။ လေ့ကျင့်ခန်းသရုပ်ပြတီးတာနဲ့ စင်ပေါ်ကမျက်နှာအနေအထား တူသလားလို့ ။ သူတို့ရဲ့မျက်နှာက ဒီတီးကွက်တွေပေါ်မှာ ဘယ်လောက် သက်တောင့်သက်သာရှိကြောင်း အထင်းသား ပေါ်လွင်နေပါတယ် ။ လေ့ကျင့်ချိန်မှာ သက်တောင့်သက်တာ ဖြစ်ခဲ့တာတောင် ... ပရိသတ်ရှေ့ စင်မြင့်ပေါ်ရောက်တဲ့အခါ စိတ်လှုပ်ရှားမှုကြောင့် အမှားဆိုတာ ဖြစ်နိုင်ပါသေးတယ် ။ အဲဒါကြောင့် ... စင်မြင့်ပေါ် ပရိတ်သတ်ရှေ့မှာ တီးတဲ့အခါ ဂစ်တာသမားဟာ ကိုယ်တီးနိုင်တာရဲ့ ၅၀%သာ တီးသင့်ပါတယ် ။ ဒါမှလည်းအမှားကင်းကင်း စိတ်သက်သက်သာသာနဲ့ ဖန်တီးနိုင်မှာပါ ။ အဲဒီအတွက်လည်း လေ့ကျင့်ချိန်မှာ ၁၀၀%ဖြစ်နေရပါမယ် ။

၈ ။ လေ့ကျင့်ချိန်
=============
စတိဗ်ဗိုင်းက တစ်နေ့ ၁၄နာရီ ၊ ပါကနီးနီးက ၁၅နာရီ လေ့ကျင့်ခဲ့တယ် ။ တူရိယာတစ်ခုကို အကျွမ်းဝင်ဖို့ သူတို့ရင်းနှီးခဲ့ရတဲ့ အချိန်တွေပါ ။ တူရိယာရှင်တစ်ယောက်ဖြစ်ဖို့ တစ်နေ့ ၈နာရီဟာ လေ့ကျင့်ချိန်စံနှုန်းတစ်ခုပါ ။ ဒါပေမယ့် ... တချို့က ဖောင်ဖျက်နိုင်ပေမယ့် တချို့လည်း ငဲ့ကွက်ရတာတွေ ရှိတယ် ။ ပြီးတော့ ... တစ်နေ့ ဘယ်နှစ်နာရီ လေ့ကျင့်တယ်ဆိုတာထက် ၊ ဒီနေ့ ၅နာရီလေ့ကျင့်လိုက်တာ ငါ ဘာတွေ တိုးတက်လာလဲ ဆိုတာက ပိုအရေးကြီးပါတယ် ။ ကိုယ့်ရဲ့ အားနည်းမှု ၊ အားသာမှုတွေကို အမြဲတမ်း ပြန်သုံ့သပ်ဖို့လိုတယ် ။ အဲဒီသုံ့သပ်မှုပေါ်မှာ ရတဲ့အဖြေကိုမူတည်ပြီး လိုအပ်တဲ့အပိုင်းအတွက် အချိန်ဇယားချရပါမယ် ။ တစ်ခုသတိထားဖို့က မပြတ်လေ့ကျင့်ဖို့ပါ ။ ၆နာရီတီးလိုက် ၃ရက်လောက် ပစ်ထားလိုက် ဆိုတာမျိုးနဲ့စာရင် ၊ နေ့တိုင်း တရက် ၃နာရီ ပုံမှန်လေ့ကျင့်တာက ပိုခရီးရောက်ပါတယ် ။

၉ ။ အချိန်ဇယားဖြင့် လေ့ကျင့်ပါ
=======================
ဂစ်တာကို တောက်လျောက် မထတမ်းတီးတဲ့ အလေ့အကျင့်မျိုး ရှောင်ပါ ။ Finger stamina ကောင်းဖို့အတွက် fi*****ng , scale pattern တွေကို metronomeနဲ့ run တဲ့အခါမျိုးမှာတောင် နာရီဝက်ထက် မပိုပါစေနဲ့ ။ လေ့ကျင့်ခန်းကဏ္ဍတစ်ခုပြီးတိုင်း နားချိန်ရှိရမယ် ။ အကောင်းဆုံးက ၁၅မိနစ်တီး ၊ ၃-၅မိနစ်နားပဲ ။ အချိန်ဇယားဆိုတာလည်း ခင်ဗျားကိုယ်တိုင် လုပ်ထားတာ ။ ဒီလေ့ကျင့်ခန်းကို အားမရရင် နောက်တစ်ကြိမ်ထပ်တီး နိုင်တယ် ။ ဒါပေမယ့် တစ်ခုတည်းကို tension များပြီး စွတ်မကျင့်ပါနဲ့ ။ ဥပမာ ခင်ဗျားက sweep picking ကို အလေးပေးပြီး လေ့ကျင့်နေတယ် ။ အဲဒီအခါ sweep picking ၁၅မိနစ် > fi*****ng ၁၅မိနစ် > sweep picking ၁၅မိနစ် > vamp ၁၅မိနစ် > sweep picking ၁၅မိနစ် ... ဆိုပြီး ခင်ဗျားအတွက် လွယ်ကူသက်သာတဲ့ လေ့ကျင့်ခန်းမျိုးကို ကြားညှပ်ပြီး လေ့ကျင့်ပေးပါ ။ ၁၅မိနစ်စီ ခွဲခွဲပြီး လေ့ကျင့်လို့ အကျိုးများပါ့မလားလို့ တွေးကောင်းတွေးမိတယ် ။ အကျိုးများပါတယ် ။ အဲလိုလေ့ကျင့်သင့်ပါတယ် ။ တစ်ခုတည်းကို လေ့ကျင့်ပြီး အားမရတဲ့အခါ ဦးနောက်ပင်ပန်းပြီး ပရက်ရှာဝင်လာလိမ့်မယ် ။ အဲဒီမှာ တီးတာတွေ စိတ်တိုင်းမကျ ကချော်ကချွတ်ဖြစ်လာမယ် ။ မှားလာမယ် ။ အဲဒါမကောင်းပါဘူး ။ ဘာကြောင့်လဲဆိုတော့ ဦးနောက်က ကိုယ်လေ့ကျင့်သမျှကို အသေးစိတ်မှတ်သားနေတယ် ။ မှတ်သားထားလိုက်တယ် ။ အဲဒီအကျိုးဆက်က ဘယ်မှာသွားပြီးသက်ရောက်လဲဆိုတော့ ... နောက်တစ်ခါ ပြန်တီးတဲ့အခါလည်း ကချော်ကချွတ်ပြန်ဖြစ်ပါတယ် ။ အဲဒါကြောင့် ဦးနောက်ပင်ပန်းအောင် ဆက်တိုက်ကြီး မလုပ်ပါနဲ့ ။ အနားယူချိန်ထားပြီး သက်တောင့်သက်သာ ပုံမှန်ပဲ လေ့ကျင့်သွားပါ ။

၁၀ ။ စာအုပ်တစ်အုပ် (သို့) courseတစ်ခုကို ပန်းတိုင်ထားကျင့်ပါ ။
=================================
ဆရာများရင် သားသေတတ်ပါတယ် ။ စာအုပ်ပုံကြီးအလယ်မှာ ဟိုဟာတီးရကောင်းနိုး ဒီဟာတီးရကောင်းနိုးနဲ့ ဘာမှမပြီးဘဲ တစ်အုပ်၁၀ရွက်တီး ဖြစ်သွားတတ်ပါတယ် ။ အကျင့်ဖြစ်သွားရင်မကောင်းပါ ။ မတိုးတက်ရုံမက ကိုယ့်ကိုယ်ကိုယ် ယုံကြည်မှု လျော့နည်းစေပါတယ် ။

၁၁ ။ စာအုပ်တစ်အုပ်ကို လေ့ကျင့်တဲ့အခါ
=============================
sight reading ကို အဓိကထားပြီး လေ့ကျင့်ရပါတယ် ။ တစ်ဘားချင်းကျက်ပြီး တီးတဲ့ အလေ့အကျင့်ကို ရှောင်ပါ ။ နုတ်တစ်လုံးချင်းကို ကိုယ်လက်တန်းတီးနိုင်တဲ့ tempo ကနေစပြီး လေ့ကျင့်ရပါတယ် ။ အနှေးဆုံးtempoနဲ့ တစ်အုပ်လုံး ဆုံးအောင်တီးပြီးပြီ ၊ အမှားကင်းပြီ ၊ ပိုင်နိုင်ပြီဆိုရင် ... နောက်တစ်ခေါက် tempo +5 လောက်တင်ပြီးထပ်ကျင့် ။ ဒါလည်း perfectဖြစ်ပြီဆိုရင် နောက်ပိုင်းအခေါက်တွေကို +10 +20 တင်ပြီး အကြိမ်ကြိမ် လေ့ကျင့်ရပါတယ် ။ အဲဒီလို လက်အသားကျပြီ အမှားကင်းပြီဆိုမှ tempo ကို တဖြည်းဖြည်းတင်သွားရတာပါ ။ပြီးပြည့်စုံတဲ့ လေ့ကျင့်ခန်းစာအုပ်ဆိုတာ မရှိပါဘူး ။ အဲဒီအတွက် ကိုယ့်ဘက်ကလည်း အားစိုက်မှုတစ်ချို့ကို ပြုလုပ်ရပါတယ် ။ စာအုပ်ကပေးထားတဲ့ လေ့ကျင့်ခန်းတစ်ခုကို ကိုယ်ပိုင် sequenceတွေ ဖန်တီးသင့်ပါတယ် ။ ကိုယ်ပိုင် sequenceတွေ ဖန်တီးပြီး လေ့ကျင့်လို့ရလာမယ့် အကျိုးတရားတွေကတော့ ရေးချလို့မကုန်ပါဘူး ။ reading , writing , creation skills တွေ တိုးတက်လာမယ် ။ များများလေ့ကျင့်လာတဲ့အခါ ခင်ဗျားရဲ့ လက်ထဲမှာ ခင်ဗျားကိုယ်ပိုင် sequenceတွေ ပြည့်လာလိမ့်မယ် ။ style & idea ဆိုတာ jamming လုပ်တဲ့အခါ အဓိက သော့ချက်တွေပါ ။ chord progression တစ်ခုကို jamming လုပ်တဲ့ ဂစ်တာသမားချင်းအတူတူ .. ခင်ဗျားက တပန်းသာနေပါလိမ့်မယ် ။ အားလုံးဟာ ခင်ဗျားကိုယ်ပိုင် စစ်စစ်တွေချည်းပဲလေ ...

၁၂ ။ လေ့ကျင့်ခန်းတွက် ရေးပေးထားတဲ့ စာတွေကို ကြိုးစားပြီးဖတ်ပါ
===============================
ပေးထားတဲ့ noteတွေကို တီးသလို ရေးထားတဲ့ စာတွေလည်းဖတ်ပါ ။ နိုင်ငံခြားစာအုပ်တွေဖြစ်လို့ ဘာသာစကား အခက်အခဲရှိတယ်ဆိုပေမယ့် ဂီတသမားဟာ ဂီတဝေါဟာရတွေနဲ့ ရေးထားတဲ့ စာအုပ်ကိုတော့ အလွယ်တကူနားလည်နိုင်ပါတယ် ။ မဖတ်ဘဲ မလေ့လာ မသုံ့သပ်ဘဲ စွတ်တီးနေမယ်ဆိုရင် ကျင့်လို့မဆုံးတော့ပါ ။ ကိုယ်ပိုင်ဟန် မတည်ဆောက်နိုင်ပါ ။ ဒါကြောင့် စာအုပ်ထဲက ရှင်းလင်းချက်တွေကို အချိန်ပေးဖတ်တဲ့ အလေ့အကျင့်လုပ်ပါ ။

( ဖြစ်ချင်ဇော ၊ လိုချင်ဇောတွေများပြီး စိတ်ငြိမ်သက်မှုမရှိဘဲ တူရိယာတစ်ခုကို လေ့ကျင့်ခဲ့ရင် ပန်းတိုင်နဲ့ ဝေးရပါလိမ့်မယ် ။ ဒါတွေအားလုံး ခင်ဗျားတို့ အမှားကင်းကင်းနဲ့ လိုရာပန်းတိုင်ကို မြန်မြန်ရောက်ဖို့အတွက် ကျွန်တော့်အတွေ့အကြုံ ကိုယ်တွေ့အမှားတွေကတဆင့် သုံ့သပ်ပြီး စေတနာနဲ့ သတိပေးတာပါ ။ သတိထား အလေးပေးပြီး လေ့ကျင့်စေချင်တယ် ။ နောင်များမှာလည်း ရေးသွားပါအုံးမည်)

မူရင်း Crd ပါ

25/04/2025

21/03/2025

တစ်ခါက..ပွဲဆူခဲ့ကြတဲ့..ထူးအိမ်သင်နဲ့ဦးစောနုတို့ရဲ့
မဂ္ဂဇင်းပေါ်ကနေအပြန်အလှန်ဆော်ခဲ့ကြတဲ့ထူးအိမ်သင်ရဲ့ဂီတဝေဖန်ရေးအမြင်ဆောင်းပါးပါ
ဘယ်နစ်လထိရေးခဲ့ကြတယ်ဆိုတာတော့မသိဘူး။ဖတ်ဘူးချင်တာကြာပြီ။အခုတော့..ရှယ်ပေးလိုက်ပါတယ်။
"ထူးအိမ်သင်ရဲ့ဂီတအပေါ် ဝေဖန်ရေးအမြင်"
=====================
ဝေဖန်ရေးနဲ့ ပတ်သတ်လို့ ပထမဦးဆုံးပြောရမယ်ဆိုရင်ဝေဖန်လို့လဲ ဘာမှမဖြစ်ဘူး။ မဝေဖန်လို့လည်း ဘာမှမဖြစ်ဘူး ဆိုတာပဲ။ဘာဖြစ်လို့လဲဆိုတော့ ... ကျွန်တော်တို့ဆီက ဂီတဝေဖန်ရေးဆိုတဲ့ ဥစ္စာက "မှန်ကန်ပြီး စနစ်ကျတဲ့ဝေဖန်ရေး" မဟုတ်လို့ပဲ။
အထူးသဖြင့် သီချင်းတစ်ပုဒ်ကို ချည်းကပ်ပုံမှားယွင်းနေတယ်လို့ ဆိုရမယ်။ သီချင်းတစ်ပုဒ်မှာအဆို (Vocal) နဲ့ အတီး (Music) ရယ်လို့ နှစ်ပိုင်း
ရှိတဲ့အတွက် အတီး (Music) ပိုင်းဖွဲ့စည်းပုံမှာHarmony, Rhythm, Melody တို့ရဲ့ဖွဲ့စည်းမှု(Composition) တို့ရဲ့ ဖွဲ့စည်းမှုရယ် ပြီးတော့
အဆိုသမားရဲ့ ဒီသီချင်းပေါ်မှာဝင်စားမှု Inspiration,Mood, Style စတာတွေကို စနစ်တကျ မှန်မှန်ကန်ကန်ချည်းကပ်ပြီး သုံးသပ်မှု လုံးဝအားနည်းနေပါတယ်။
အထူးသဖြင့် သီချင်းတစ်ပုဒ်ကို ဖွဲ့စည်းမှုရဲ့ ရသပိုင်းဆိုင်ရာတန်ဖိုးဖြတ်မှု (Aesthetic Value) လုံးဝမရှိပဲ Voice Production နဲ့ Breath Control
တို့ကိုပဲ သုံးသပ်ဝေဖန်ရေးမျိုး....။(ဥပမာ - ၁၉၉၂ ခုနှစ်၊ အောက်တိုဘာလထုတ်မဟေသီမဂ္ဂဇင်းပါ "ကိုစောနု" ရဲ့ ဝေဖန်ရေးမျိုး)
နောက်တစ်ခုက ကိုယ်ခံစားရသလို လုံးဝ စနစ်ကျမှုမရှိပဲ ထင်ရာလျှောက်ပြောတဲ့ ပညာရှင်မဆန်တဲ့ဝေဖန်ရေးမျိုး..။(ဥပမာ - သပြေတေးမဂ္ဂဇင်းက "လူလူသူသူ" ရဲ့ဝေဖန်ရေးမျိုး)
နောက်တစ်ခုက သီချင်းနဲ့ ဘာမှမဆိုင်တဲ့ ဂီတဝေဖန်ရေးလို့တောင် ပြောဖို့ခက်တဲ့ ရမ်းကားမှုမျိုး။(ဥပမာ - "ဆူဒိုနင်" ရဲ့ ဝေဖန်ရေးမျိုး)
အဲဒီလိုဝေဖန်ရေးမျိုးတွေကြောင့် မြန်မာပြည်ဂီတလောကကြီး ဘာမှတိုးတက်လာမှာ မဟုတ်ပါဘူး။ဘာမှလည်း ဆုတ်ယုတ်သွားမှာ မဟုတ်ပါဘူး။
ဒါကြောင့် ဝေဖန်လို့လည်း ဘာမှမဖြစ်ဘူး။မဝေဖန်လို့လည်း ဘာမှမဖြစ်ဘူးလို့.. ကျွန်တော်ပြောရတာပါ။
ကိုစောနုဆိုရင် သီချင်းတစ်ပုဒ်ရဲ့ဖွဲ့စည်းမှု သီဆိုသူရဲ့သီချင်းပါအကြောင်းအရာ ခံစားမှုကို ဝင်စားဖော်ထုတ်မှုတွေကို လုံးဝမကြည့်ပဲ Breath Control နဲ့Voice Production ကိုသာ လျှောက်ပြောနေတယ်။ဘယ်နေရာကို ဘာနဲ့ဆိုရမယ် ( ဥပမာ-ရင်ဘတ်နဲ့ဆိုရမယ်၊ နှာခေါင်းနဲ့ဆိုရမယ်၊ လေသွင်းတာမှားတယ်၊လေထုတ်တာမှားတယ် ) အဲဒါတွေကိုသာ အဓိကထားပြီး ပြောနေတယ်။ဘယ်လိုသဘောမျိုးနဲ့တူသလဲဆိုတော့....(ကဗျာဆရာတစ်ယောက်ရေးတဲ့ ကဗျာတစ်ပုဒ်ကိုရသပိုင်း၊ ခံစားမှုရဲ့ အလှအပစသဖြင့် ခံစားသုံးသပ်ရမယ့်အစား..) ကကြီးရေးပုံမှားနေတယ်။ သဝေထိုးကိုအောက်က စ,ရေးရမယ်။ ပစောက်ကို တစ်ဆက်တည်းမရေးရဘူး။ စသဖြင့် လျှောက်ပြောနေတာမျိုးနဲ့တူတယ်။သီချင်းတစ်ပုဒ်ရဲ့ အကြောင်းအရာကို ထိရောက်စွာ
ဖော်ထုတ်နိုင်ဖို့အတွက် အဆိုသမားတစ်ယောက်ဟာလိုအပ်ရင်လိုအပ်သလို အသံထုတ်လုပ်မှုနဲ့ လေထိန်းချုပ်မှုကို မိမိစိတ်ကြိုက် ပြုလုပ်နိုင်တယ်။ ဒီခံစားမှုမျိုးပေးနိုင်ဖို့အတွက် လည်ချောင်းပြွန်သားတွေကိုအသုံးပြုမှ ဖြစ်မယ်ဆိုရင် သူသုံးမှာပဲ။သူပေးချင်တဲ့ရသမျိုးကို ပေးနိုင်ဖို့ ယုတ်စွအဆုံးနားရွက်နဲ့ဆိုမှ ဖြစ်မယ်ဆိုရင်တောင် နားရွက်နဲ့ဆိုမှာပဲ။ ဆိုလိုတာက Breath Control နဲ့Voice Production ကို သီချင်းရဲ့အကြောင်းအရာက
တောင်းဆိုတဲ့အတိုင်း အဆိုသမားတစ်ယောက်အနေနဲ့ အသုံးပြုမယ်လို့ ဆိုလိုတာပါ။
နောက် ဥပမာတစ်ခုအားဖြင့်လည်း ကျွန်တော်တို့Harmony သင်ခန်းစာကို စတင်လေ့လာကြတဲ့အခါမည်ကဲ့သို့ ပြုလုပ်သင့်သည်။ မည်ကဲ့သို့ မပြုလုပ်ရဆိုတဲ့ဥပဒေသတွေကို တွေ့ခဲ့ မှတ်သားခဲ့ရတယ်။ ဆောင်ရန်၊
ရှောင်ရန် စသဖြင့်ပေါ့။ ဒါပေမယ့် Harmony သင်ခန်းစာရဲ့ အဆင်အမြင့်ဆုံးအပိုင်းဖြစ်တဲ့ Counter Point အခန်းကိုရောက်တဲ့အခါ ရှောင်ရန်
တားမြစ်ချက် ဥပဒေသတွေကို ချိုးဖောက်ပြီး Createလုပ်ရတဲ့ သင်ခန်းစာတွေကို တွေ့ရတယ်။ အခြေခံTeachnique နဲ့ အဆင့်မြင့်ဖန်တီးမှုအပိုင်းမှာ
ကွဲလွဲချက်တွေဆိုတာ သဘောပေါက်သင့်ပါတယ်။ကိုစောနု ပြောသလိုဆိုရင်တော့ ကမ္ဘာပေါ်မှာ ကိုစောနု အလိုနဲ့ ကိုက်ညီတဲ့အဆိုတော် မရှိသလောက်ရှားသွားပါလိမ့်မယ်။
ဥပမာအားဖြင့် "အသံထွက်အမှားများ" ဆိုတဲ့ခေါင်းစဉ်အောက်က အမှတ်စဉ်(၁)အမှားကို ကျူးလွန်တဲ့Bee Gees, George Micheal တို့ကို အပြစ်
တင်ရပါလိမ့်မယ်။ ပြီးတော့ .. Bryan Adam,Joe Cooker, C.C.R, Rod Stewared တိုကိုလည်းမလိုအပ်ပဲ လည်ပင်းကြွက်သားတွေ တင်းမာစွာ အသုံးပြုပြီးသီဆိုထားတယ်လို့ အပြစ်တင်စရာ ရှိပါတယ်။ တစ်ယောက်မှ
အပြစ်လွတ် အမှားကင်းတော့မှာ မဟုတ်ပါဘူး။
ကိုစောနု အနေနဲ့ အဲဒါမျိုးတွေ လျှောက်ပြောနေမယ့်အစားသေသေချာချာ ပြည့်ပြည့်စုံစုံနဲ့ မှန်မှန်ကန်ကန် သီချင်းနဲ့ဂီတအပေါ်ချည်းကပ်ဖို့ ကြိုးစားသင့်ပါတယ်။ အဲဒီလိုမဟုတ်လို့ကတော့ ကိုစောနုရဲ့ ဂီတဝေဖန်ရေးဆိုတာလည်း
လေးစားလောက်စရာမရှိတဲ့အပြင် သူပြောသလို စစ်မှန်တဲ့အနုပညာ အနှစ်သာရပြည့်စုံတဲ့ ဂီတကို ရွေးချယ်နားဆင်တတ်ဖို့ ဘာမှအထောက်ကူပြု လမ်းညွန်ပေးနိုင်မှာ မဟုတ်ဘူး။ အချည်းအနှီး ဖြစ်နေဦးမှာပဲ။
ကိုစောနုရဲ့ ဝေဖန်ရေးဟာ အဆိုသင်ခန်းစာကို ကကြီး၊ခခွေးကနေ စသင်ကာစ ကလေးတွေ အတွက်လောက်တော့ အသုံးဝင်ကောင်း ဝင်နိုင်ပါလိမ့်မယ်။
ကြုံလို့ တစ်ဆက်တည်းပြောရမယ်ဆိုရင် "လူလူသူသူ"ရဲ့ Instrument နဲ့ Effect အသံတွေကအစ အမှားယွင်းပေါင်းများစွာနဲ့ ပညာရှင်မဆန်တဲ့ လူပြိန်းဝေဖန်ရေးမျိုးကိုလည်း ကျွန်တေ်ာတို့အတွက် မလိုအပ်ပါဘူး။ သူ့ရဲ့
အမှားအယွင်းတွေ အားလုံးကိုသာပြောနေရရင် ပြီးနိုင်တော့မှာ မဟုတ်တဲ့အတွက် တစ်ခုလောက်ပဲ ဥပမာပေးပါရစေ။
ကျွန်တော့်ရဲ့ "အတ္တပုံဆောင်ခဲ" စီးရီးကို ဝေဖန်တုန်းကဆိုရင် ဂစ်တာအသံတောင်မှမသိပဲ "Rock 'N' Rollအပျိုမ" သီချင်းရဲ့ ရှေ့ Prelude ကို KeyBoard(စီတာ) Effect လို့ ပြောခဲ့ပါတယ်။အဲဒါမျိုး အမှားအယွင်းတွေ မြောက်များစွာ ရှိနေတဲ့အတွက် သီချင်းချစ်သူများ၊ သိချင်သူများ ကျွန်တော့်ဆီ
သီးသန့်လာရောက် ဆွေးနွေးနိုင်ပါတယ်။ ဒီမှာတော့ဆက်မပြောတော့ပါဘူး။ပြီးခဲ့တဲ့လ သပြေတေးမှာ... "အောင်ရင်" ရဲ့ ချိန်းတဲ့ညသီချင်းခွေ ဝေဖန်ရေးမှာ လူလူသူသူ ရဲ့ မဆီမဆိုင်ဆရာလုပ်မှုကို တွေ့ရပါတယ်။
ဂီတလောကနဲ့ ဂီတပညာရှင်တွေအကြောင်း သေချာဂဃနဏ မသိပဲ ဆရာလုပ်တာကတော့ တော်တော်ကိုမကောင်းတဲ့ကိစ္စပါ။အဲဒီ့မှာ "စောအပိုလို" နဲ့ ပတ်သတ်ပြီး သူပြောတာရှိပါတယ်။"အောင်ရင်" ကို ထမ်းတင်ပေးခဲ့တဲ့ ဒေါက်သုံးချောင်းမှာ"စောအပိုလို" ရဲ့ arrangement အားကို ယူသင့်
ပါတယ်။ လူလူသူသူ လုပ်ပြီးပြောပါတယ်။တကယ်တော့ "စောအပိုလို" နဲ့ ပတ်သက်ပြီး "လူလူသူသူ"ဘာမှမသိကြောင်း သူ့စကားက ဖော်ပြနေပါတယ်။
"စောအပိုလို" Arrangement လုပ်တာ သူဘယ်တုန်းကတွေ့ဖူးပါလိမ့်လို့ ကျွန်တော်စဉ်းစားမိတယ်။ တကယ်တော့"စောအပိုလို" ဟာ Arrangement လုပ်နိုင်တဲ့ ဂီတပညာရှင် မဟုတ်ပါဘူး။ သူဟာ တူရိယာပညာရှင်Player သာ ဖြစ်ပါတယ်။ "မင်းမရှိတဲ့နောက်" စီးရီးတုန်းက "လူလူသူသူ" အထင်ကြီးခဲ့တဲ့ Arrangementအားလုံးကို "စောအပိုလို" လုပ်တာ မဟုတ်ပါဘူး။
အဲဒီ Arrangement တွေ အားလုံးကို လီယိုနာဒ်မောင်မောင်လွင်နဲ့ ကျွန်တော်တို့နှစ်ယောက်ပေါင်းလုပ်ခဲ့ကြတာ ဖြစ်ပါတယ်။ "စောအပိုလို" က
ကျွန်တော်တို့ပြောသလို "ဖထီးရေ ဒီနေရာမှာတော့ကလဲရီနက်မှုတ်ပေးပါ၊ ဒီနေရာမှာတော့ ဆက်ဆိုဖုန်း၊ဒါလေးကိုတော့ တယောထိုးပေးပါ" စသဖြင့်....တီးမှုတ်ပေးရုံပါပဲ။
အဲဒီတော့ "လူလူသူ" ပြောသလို ဘယ်လိုလုပ်ပြီး သူ့ရဲ့Arrangement အားကိုယူရမှာလဲ။ ပြီးတော့..."စောအပိုလိုကြီးကို ဖြုတ်ထားတာ ဘဝင်မတွေ့လှဘူး"လို့"လူလူသူသူ" က ဆိုပါတယ်။ဒီနေရာမှာလည်း "လူလူသူသူ" မသိတာ၊ နားမလည်တာကလေမှုတ်တူရိယာ(Wind Instrments) သမား
တစ်ယောက်ရဲ့ စွမ်းဆောင်မှု Skill ဟာ အသက်အရွယ်နဲ့ကျန်းမာရေးပေါ်မှာ အများကြီးမူတည်နေတယ် ဆိုတာပါပဲ။
ဖထီး "အပိုလို" ဟာ အသက်လည်း ကြီးပါပြီ။ ကျန်မာရေးနဲ့သက်လုံလည်း မကောင်းတော့ပါဘူး။ Breathing Power ကျနေပါပြီ။ ဒါကို နားမလည်ပဲ အလကားနေရင်း"လူလူသူသူ" လိုက်ဆရာလုပ်နေတာဟာလည်း ဂီတ
ဝေဖန်ရေးနဲ့ ဘာမှမဆိုင်ပါဘူး။ အလကားနေရင်း လေပေါနေတာပဲ။
အဲဒီတော့ ပြောရရင်....ကျွန်တော်တို့ မြန်မာပြည်ဂီတလောကရဲ့ တိုးတက်မှုဟာဂီတဝေဖန်ရေးတွေနဲ့ ဘာမှမဆိုင်ပါဘူး။အဲဒီ ဂီတဝေဖန်ရေးတွေကြောင့် ကျွန်တော်တို့ ဂီတလောကကြီး တိုးတက်လာတာလည်း မဟုတ်ပါဘူး။
တကယ်တမ်းကျတော့ လက်တွေ့အလုပ်လုပ်နေတဲ့ဂီတပညာရှင်တွေကြောင့်သာ ကျွန်တော်တို့ ဂီတလောကတိုးတက်လာခြင်း ဖြစ်ပါတယ်။
မြန်မာ့ဂီတလောကအတွက် တကယ်တမ်း အလုပ်လုပ်မယ့်လူတွေသာ လိုအပ်ပါတယ်။ အဲဒီလိုမျိုး တောပြော၊တောင်ပြော အပြောသမားတွေ မလိုအပ်ပါဘူး။အဲဒီတော့ ဂီတဝေဖန်ရေးဆရာများကို အကြံပေးချင်တာက
တကယ်တမ်း မြန်မာ့ဂီတလောက တိုးတက်ဖို့ စေတနာရှိရင် တကယ်တမ်းအလုပ်လုပ်ပြကြဖို့ အပြောလျော့ကြဖို့လိုအပ်ပါတယ်။ မှားယွင်းတဲ့ဝေဖန်ရေးတွေနဲ့တော့ကျွန်တော်တို့မြန်မာ့ဂီတလောကကြီး တိုးတက်လာမှာမဟုတ်ပါဘူးလို့ပဲနောက်ဆုံးပြောချင်ပါတယ်။
#ထူးအိမ်သင်
[ဖတ်ဖူးချင်တာ ကြာပြီဖြစ်တဲ့ ဒီဆောင်းပါးကို Rock နှင့် ပတ်ဝန်းကျင် group မှာ KoNaing တင်ထားတာ တွေ့လို့ ပြန်လည်ကူးယူဝေမျှပါတယ်။]
Credit to original uploader

01/03/2025

ဘယ်လောက်ကောင်းလဲ။