16/11/2020
Waa'ee mootummaa Ce'umsaa Biyyoolessa Oromiyaa (MCBO) ABO'n labsamee KFO dabalatee Oromoon marti ofitti fudhatee jiruu! Maal beekna? Maal irra gaheera? Maaf barbaachisa? Mootummooti addunyaa dhimma kana ilaalchisee maal jedhan?
Hubannaa gahaa akka argattaniif barruu qophaa'e har'a haareffamee maxxanfame kana dubbisaa!π
==============
Mootummaa Ce'umsa Biyyoolessaa Oromiyaa ilaalchisee; Furtuun nagaa uummata qabsaa'ota isaa dhaga'u harka jira!
Qalbeessaa Dhangi'aatiin
Sadaasa 9,2020
Dhimma Mootummaa ce'umsaa biyyoolessa Oromiyaa irratti gaaffilee ka'aa jiraniif deebii laatamuu yaale.
1. MCBO (Mootummaa Ce'umsaa Biyyoolessa Oromiyaa) hundeessuun maaliif barbaachise? Akkamitti hundaa'a?
2. MCBO yoom hundaa'aa?
3. MCBO Hundaa'uuf; deggarsa akkami Oromoo irraa, hogganaaf Qondaala ABO/KFO ykn hoggana paartilee mormituu Oromoo irraa, Miseensa ABO irraa, Deggaraa ABO irraa maal barbaachisa? Guutummaan Oromoon akkamiin utubata?
4. Amma tarmii (step) deemuu qabu deemeeraa?
5. Hundaa'uuf abdiin kenname jiraa? Biyyoota alaa irraa yaadni tti laatameeraa?
Qabxiilee ykn gaaffilee shanan kana deebisuufan yaala. Hanga dhumaatti obsaan dubbisaa.
1. MCBO (Mootummaa Ce'umsaa Biyyoolessa Oromiyaa) hundeessuun maaliif barbaachise? Akkamitti hundaa'a?
Nama ajjeesuun seeraaf heera biyyattiin dhorkaadha. Nama ajjeesuu kan dhorkame guutummaa lammiilee biyyattii Impaayera Xoophiyaati. Kun waraana sirna EPRDF durii PP har'aa dabalatee jechaadha. Qaamni uummata nagaa, sanuu qe'eef araddaa isaa irratti itti dhukaasee ajjeesuun biyya seeraaf Heerri dagaage keessatti yakka guddaaf olaanaa nama adabsiisudha.
Har'a garuu; Impaayera Xoophiyaa keessatti qaamolee paartii Badhaadhina PP tumsan nama yoo ajjeesan, qaama PP mormu adamsanii akka fedhan yoo godhan, yoo mana uummata Sivili guban, yoo uummata meesha maleeyyii mana keessa guban seerri akka isaaniif ayyamutti fudhatamee jira. Kana irrayyuu darbee ilmaan Oromoof saba keenya Oromoo ajjeesuun seeraa PP'n waan ayyamame fakkaata. Kana kan jennuuf yakkoonni ciigasiisaan uummata Oromoo meesha maleeyyii irratti humnoota paartii Badhaadhinaa (EPP) ofiin jedhaniin yoggaa raawwatu miidiyaaleen Impaayera Biyyattii keessaas ta'ee qaamoleen seeraaf dhaabbataniif dhimmi mirga dhala namaa kabachiisuu dirqamni itti laatame callisuu yoggaa filatan keessa jirra. Faallaa kanaa Asoosama kijibaan gaafa EPP'n ebelu ebelu ajjeese jedhee miidiyaatti baasu ammoo wal harkaa fuudhanii afarsuu, wal harkatti maqaaf lakkoofsa taatoo Asoosama sana keessatti ajjeefamee utuu wal harkatti harkisanii gaafi kukkutanii, gaafii yaasanii lakkoofsa wal dhahaa kijibaan biyya fudhachiisu.
Haala kana keessatti uummatni keenya gamtoomee, wal ta'ee humma hidhatee isa waraanaa jiru, kan aangoon biyya bulchuu Heeraaf Seera biyyattiin irraa fuudhame lagachuun mootummaa nageenya isaa eegsisu dhaabbachuun dirqama Oromoo ta'ee argame. Hanga mootummaa mataa ofii dhaabbatanitti yeroo Ce'umsaa fudhatee uummati keenya Ce'umsa nageenya isaa mirkaneessuun ba'ee galuu fi bobba'ee nageenyi isaa mirkanaa'uu akka qabu yaadame.
Qaamoleen maqaa Mootummaa ofiin jedhuun biyya humnaan bulchinaan daguuggaa sanyii Oromoof saboota Cunqurfamoo Impaayera biyyattii irratti raawwataa jiran adaba seeraa akka godhataniif Mootummaa Ce'umsa Biyyooleessaa Hundeessuun barbaachise. Walabummaa paartilee siyaasaa fi walabummaa miidiyaa mirkaneessinee biyyattii keessatti dimokiraasii utubaa sibiilaa taasifnee dhaabuuf MCBO barbaachise. Qaamni aangoo siyaasaa tohatee jiru waraana biyyattii kan dhuunfaa isaa taasisee mormitoota isa afoo dhaabbatan kaan ajjeesee kaan hidhuun yakka gurguddaa raawwataa waan jiruuf waraana uummataa daangaa biyyaa tiksuu barsiisuuf hundeessuun qaamolee yakka akkanaa raawwatan seeraan barnoota laachuufiin waan feesiseef MCBO labsame.
Uummati keenya qaama Heeraaf Seera biyyattii irra ejjetee itti dhufe fudhachuu diduun, qaama seeraaf heera malee itti dhufeef abboomamuu diduun seera cabe bakkatti deebisuu waan ta'eef, mirga uumamaaf diimookiraasiin qabu kan murna EPP tiin dhabe deebifachuuf kadhaa tokko malee wal ta'ee labsii MCBO kana cina dhaabbatee labsii guyyaa guyyaan kennamu hordofuun milka'ina isaaf of kenniinsa guddaan qabsaa'uu qaba.
Mootummaa Ce'umsa Biyyooleessa Oromiyaa yakkoota waraanaan adeemaa jiranitti daangaa gochuun, seeraaf heeraan buluutti biyyattii kan geessu ta'uu amannee fudhachuun barbaachisaadha.
MCBO akkamiin hundaa'a?
MCBO Oromiyaa qooda fudhatiinsa qaamolee hawwaasaa maraan hundaa'a. Lammiileen Oromiyaa marti kan keessatti qooda fudhatan, Ce'umsa nageenya du'ee jiru kanatti lubbuu horutu hundeeffama. Kunis hanga Mootummaa Dimokiraataawaa ijaarrachuudhaan, uummati mootummaa mataa isaa hanga filatutti nageenya Amansiisaa biyyattii mootummaa deebisudha. Mootummaa Ce'umsa Biyyoolesssaan booda paartilee siyaasaa Oromoon filateen Oromiyaan bulti.
Uummati keenya akkamitti mootummaa Ce'umsaa raggaasifanna kan jedhuuf nagaa saba bal'aaf saba tokkoome harka jira. Kun ammoo qabsaa'ota haqaa isaa dhaggeeffatee, waan nagaa isaa bakkatti deebisu akka hojiirra oolchuuf labsii labsamu hojiirra oolchuudhaan mirkanaa'a.
Ummatni qaamota hawaasaa hunda kan hirmaachiseen ammaan booda sirni kun nu gaha jedhee sagalee tokkoon yoo fincile Mootummaa gadaa isaa fixate uummatni aangoo seerri kennuufitti dhimma bahee buqqaasee mootummaa sirnaa nii dhaabbata.
Seerri aangoon kan uummataati jedha. Kun ammoo yoo uummatichi itti fayyadame, waan seerriif heerri jedhuun uummatni waloon yoo deeme dhugooma. Uummatni keenya biyyattii kana keessatti aangoon kan uummataa ta'uu mirkaneessuun ammaaf amma ta'uun eeraaf.
2. MCBO yoom hundaa'aa?
Gaafa ummatni Oromoo qabsoo isaan gubbaa irraa hanga gaditti dirqama Mootummaa gadaa isaa fixate irraa ajaja fudhachuu didee kan isaaf tahu of keessaa filee bakka buufate wal gaggeesse, bulchiinsa uummataa gaafa gadi dhaabbate, gaafa sana hundaaya malee guyyaa kana kan jedhu hin jiru.
Kun ta'uuf ammoo uummati dantaa Murni EPP irraa barbaaduuf irraa fayyadamu guutuufii diduu qaba. Kana yoggaa jennu, mootummaa seeraawaa ofii filate waan hintaaneef, sanuu mootummaa nageenya isaa eegaafii hinjirre daranuu nageenya Oromiyaa goolessee jiruuf, kan uummata "irraan dhaladhe!" Jedhuuf uummata nan bulcha jedhu qaama daguugee ajjeesuutti fuulleeffateef, mootummaa tajaajila hawwaasaa eegee guutaa hinjirreef boorsaa isaa keessaa baasee, sabbata isaattii hiikee Gibiraa fi Qaraxa, Baatii fi baasii mootummaa garaagaraa kaffaluu dhaabuu gaafa danda'edha. Meeshaalee mootummaan uummatatti daldalus irraa bituu gaafa dhaabe dhugooma.
Gibirri kan gabbaramu mootummaa ofii filataniif, nageenya sabichaa akka ittiin eegsisuuf, tajaajila hawwaasaa Ibsaa, Daandii, Tajaajila fayyaa gahaa, Bishaan dhugaatiif waan dinagdee hawaasaa cimsu akka ittiin dalaguuf uummatni Gibira mootummaaf gabbara.
Waggaa 2 as garuu; qaamoleen EPP uummata ajjeesuuf hiraarsuun ala tajaajila uummatichaaf guutan tokkollee hinqaban. Tajaajila hawwaasaa guutuun hafee Gibira saba keenya irraa sassaabanii maallaquma uummati keenya kennuufin meeshaa waraanaa bitanii waraana dhaabbii waggaa 2 oliif deemaa jiru Oromiyaatti bananii jiru.
Gibirri kan gabbaramu yoo mootummaa isaa ta'e, mootummaa nageenya isaa ciminaan tiksuuf mootummaa sabichaaf mararfannoo qabu ta'e kan hojiirra ooludha.
Sabni keenya Oromoo fi lammiileen Oromiyaa tajaajila EPP uummata irraa eegu guutummaan diduuf mirga guutuu qabu. Kunis 1ffaa mootummichi mootummaa seeraaf heera biyyattiin kufe waan ta'eef, 2ffaa mootummaa bakka inni qotatutti, bakka inni daldalatutti, bakka inni hojii isaa dalagutti qaama itti dhukaasaa jirutu ani mootummaadha ofiin jedhaa jira waan ta'eef uummatni keenya Gibira gabbaruu diduuf mirga guutuu itti qaba.
Ajajamuufii diduu:
Qaamota irreef humnaan itti dhufaa jiran kanaaf Oromiyaa guutuun ajajamuufii diduun akka Mootummaa Ce'umsa Biyyoolessa Oromiyaa gadi dhaabbatuuf aanjaa uuma. Kunis mootummicha guutummaan lagatanii gaggeessaa bilchina qabu kan nageenya isaa mirkaneessuuf humnaaf beekumsa itti qabu of keessaa filanii Ce'umsa kanaan akka inni isaan gaggeessu taasisuudhaan dhugooma.
Qaamolee uummata ajjeesaniif ajajamuu diduun sirna. Yakkamaa seera cabsee, heera dabsee uummatatti dhufe diduun seera kabajuu ta'uu Oromoof lammiileen Oromiyaa beekuun barbaachisaadha. Kanaafuu Walga'ii inni waamu, leenjii siyaasaa inni kennuuf maqaa garaagaraan sobee sossobee saba waamu lagachuudhaan mirkanaa'a.
3. MCBO Hundaa'uuf; deggarsa akkami Oromoo irraa, hogganaaf Qondaala ABO/KFO ykn hoggana paartilee mormituu Oromoo irraa, Miseensa ABO irraa, Deggaraa ABO irraa maal barbaachisa? Guutummaan Oromoon akkamiin utubata?
Mootummaa Ce'umsa Biyyoolessa Oromiyaa waanuman qabxii 2 keessatti xuqe Oromoo irraa barbaada. Waan qaama ani mootummaadha ofiin jedhu kana fayyadu lagachuudhaan bira dhaabbachuu.
Hojjetaan mootummaa:
Hojjetaan mootummaa daddaffiin gara uummata isaatti madaquu barbaachisa. Keessattuu humnoota waraanaa ilmaan Oromoo keessaa leenji'anii bahan ilmaan abbaa isaanii ajjeesuu irraa of qoqqobuu cinatti, EPP kufee batattisaa jiru ka lubbuun keessaa bahaa jiruuf wabii ta'uu dhaabuu qabu. Yoo kan nii tumsina malee jedhan egereen isaanii Waardiyyaa nama dhuunfaa ta'uuf deema.
Oromiyaan qabsoo ilmaan isheen nii bilisoomti.
Qaamota har'a yakka raawwadhaa, nama ajjeesaa, maatii irratti mana gubaa, hidhaa! Qalaa! jedhanii Finfinnee ta'anii ajajan ajaja isaanii fudhachuu diduudhaan gara qabsoo uummataa nageenya Mootummaa Ce'umsaa Biyyoolessa Oromiyaa tiksuutti haa fuulleffatanin jedha.
Barsiisonni leenjii yakkaan guute tibba kana fudhattanii qaama uummata ajjeesaa jiru kana aangomsuun uummata keessa gadi dhaabuuf tattaafataa jirtan irraa of qusattanii, gara nagaa saba keessanii mirkaneessuuf ifaajuu MCBO utubuuf qabsaa'utti kottaa jenna.
Paartileen siyaasaa Oromoo ABO fi KFO dabalatee kanneen madaa'uuf deettiin daguugamee awwaalamaa jiraachuun Oromoo isin gaddisiise ajjeechaaf dararama saba keessan irraatti xumura goochuuf qabsoo siyaasaa bifa isinii aanja'een taasisaa jirtan uummata keenya Oromoo kallattii qabsiisuu irratti fuulleffadhaa.
Barbaachisummaa fi galma MCBO Oromiyaa akkam akka ta'uu qabu uummata hubachiisuu fi qabsoo keessanitti firii gochuuf hanga sirni Dimokiraasii mootummaa uummataa gadi dhaabu dhufutti gara MCBO gadi dhaabuutti fuulleffadhaa jenna.
MCBO hundaayuuf ummatni osoo ati qaama Mootummaa turte ati immoo ABO/KFO turte waliin hin jenne wal taanee Mootummaa nuuf tahu kan nagaa Oromoo maraa tiksu hanga filannoon haqaa gaggeeffamee filannutti wal dandahuun MCBO ijaarrachuun barbaachisaadha.
Kana gochuuf immoo miseensota ABO qofaan osoo hin taane lammiilee Oromiyaa hunda akkuma amma hirmaachisaa jirru caalaatti qooda irraa kan fudhattan yoo ta'e abjuun qabsaa'otaa nii dhugooma.
4. Amma tarmii (step) deemuu qabu deemeeraa?
Hanga yaadame deemuu baatus garuu yeroo kanatti ummatni Oromoo keessaa fi alaa MCBO akka hundaayuu qabu ofitti fudhatee jira. MCBO akka deggaru ibsateera. Sun step duraati. Kan itti aanu erga akka hundaayu fudhannee deeggaruun qofa osoo hin taane dirqama nurraa eegamu hundi keenya yoo gumaachinedha.
5. Hundaa'uuf abdiin kenname jiraa? Biyyoota alaa irraa yaadni tti laatameeraa?
Abdii qofa utuu hintaane dhibbaaf dhibbatti MCBO nii ijaarama. Ijaaramees nageenya lammiilee Oromoo nii tiksa. Kana taasisuuf qoodni Oromoon bahataa jiru ragaa gahaadha. Kanaaf Koree Mootummaa Ce'umsaa Biyyoolessa Oromiyaa hundaa'ee jiru tumsuun barbaachisaadha.
Biyyoota alaarraa isa jedhuuf hogganaan AU yaada kana deeggaruun ibsa baasee ture. Kana malees MCBO EU akkasumas kanneen Mirga dhala namaaf falmaniin fudhatameera. Dabalataan Wanti ijoon beekamuu uummatni keenya qaama biraa abdachuun waan barbaadun argadha jechuun of dhamaasunis hagas mara gaarummaa hinqabu.
Qabsoo of irratti hirkannoo keessatti halagaan ykn biyyoonni addunyaa qabsoonkee duuba deebi'uu akka hindandeenyeef dhiibbaa geessisuu danda'uukee mirkaneeffannaan dirqama barbaadee si tumsa.
Sana bira gahuuf ammas uummati keenya waan irraa eegamuun MCBO ijaarrachuu irratti wal haa mari'atu. Kutannoon qooda irraa eegamu namni marti haa bahatu. Miidiyaan Oromoos dirqama irraa eegamu bahatee nagaan Oromoo bakkatti deebi'ee, hidhaman hiikamee ijoon gaaffii Oromoo akka deebii argatuuf murtee MCBO kana ofitti fudhatee irratti haa hojjetu.
Walumaagala Cehumsa kana akka hojiirra ooluuf ummatni keenya Mootummaa jedhee kan aangoorra jiruuf ajajamuu diduu, gibira kaffaluu diduu, gandootaa fi aanota irratti caasaa ummataan filameen akka bulu gochuudhaan yoo hojjetame MCBO ni milkaaya. Milkiin isaa ammoo ajjeechaa Oromoof Oromiyaa keessatti raawwataa jirutti daangaa godha. Nageenya waaraa argamsiisa. Hidhamaan siyaasaa akka hiikamu taasisa. Gaaffii Oromoo jaarraa lamaaf deemaa jiru akka deebii argatu godha!
Maayi irratti Furtuun nagaa uummata qabsaa'ota isaa dhaga'u harka jira!
Injifannoon uummata Oromoof
Qalbeessaa Dhangi'aatiin
Sadaasa 9,2020
Karaa Telegram na hordofuuf Link πhttps://t.me/qalboo/2054π kana saaqi!
