02/17/2024
💯‼️😱
Бага насны хүүхдүүд жиндээ хүрэхгүй туранхай байвал тэжээлийн доройтол гэж үзэж эмчилгээ хийдэг. Тэжээлийн доройтол гэхээр Африкийн ядуучууд ихэнх хүмүүсийн санаанд бууж байгаа байх. Гэтэл барууны хөгжингүй орнуудын хүмүүст тэжээлийн доройтол маш элбэг байна гэж эрдэмтэд дүгнэдэг болсон. Харахад тарган цатгалан хоол хангалттай иддэг хүмүүс яагаад ийм болчихов гэж гайхаж магадгүй. Тэгвэл иддэг хүнсэнд нь организмд хэрэгтэй витамин, минерал, аминхүчил болон бусад антиоксидант бодисууд маш бага болсон байдаг. Хичнээн их идсэн ч тэр нь таргалуулахаас өөр ямарч нөлөөгүй болсон. Тиймээс хүний эд эс маань өлсөж, аврал гуйж байдаг.
Америкийн газар-тариалангийн болон махны улсын комиссын гишүүн, Калифорний Их Сургуулийн хоол-тэжээлийн тэнхимийн профессор Dr. George M Briggs: Америкчууд маш муу хоол иддэг ба хоолонд нь ямарч витамин, минерал байдаггүй, хэрэв гахай үхрийг өнөөдрийн америкчууд шиг хоолловол махны бизнес эрхэлдэг бүх хүмүүс аль хэдийн дампуурах байсан гэж хэлсэн байдаг.
1955 оноос Америкт химийн бордоо, шавьж устгалын бодисуудыг хэрэглэж эхэлснээс хойш жил бүр ногоо жимсэнд байдаг минерал, витамин нь багасч ирсэн ба одоо бүр эрүүл мэндийг хамгаалж чадахгүй хэмжээнд хүрсэн гэж үздэг. Үүний хажуугаар өнгө, амт, үнэр оруулагч бодисууд, удаан хадгалах зориулалтын бодисууд гэх мэт маш олон нэмэлт химийн бодисуудыг хүнсэнд хольдог. Энэ нэмэлт бодисуудыг жилд 1 хүн дунджаар 8-10 кг авдаг гэж тооцоолсон байна. Үүн дээр агаарын бохирдол болон ундны усаар хорт бодисууд хүний организмд байнга ордог. Ийм олон химийн бодис бидний биед ороход минералууд байхгүй болж, биед байгаа жоохон витамин маань энэ химийн бодисуудыг саармагжуулах гээд байдаг нөөцөө шавхчихдаг тул витамины дутагдал элбэг байдаг болсон. Витамин, минерал нь байхгүй болохоор дархлааны эсүүд үүргээ бүрэн гүйцэт биелүүлж чадахгүй болдог ба үүнээс болж бодисын солилцооны үлдэгдлээ организмаас зайлуулж чадахгүй болж хорт бодисын хуримтлал ихэсдэг.
Лимфоцит хангалттай их байгаа ч вирус, бактери болон хавдрын эсийг устгаж чадахгүй байх нь элбэг байдаг ба үүний шалтгаан нь кадм, никель, мөнгөн ус, арсен-н аль нэг нь организмд бага хэмжээтэй байхад л лимфоцит үүргээ биелүүлж чадахгүй болж байхгүйтэй адил болдог байна.
Ходоодны хүчил хориглодог эмнүүд нь минерал болон В6, В9,В12 витамины дутагдлыг улам ихэсгэж шигдээс болон цус харвалт болох магадлалыг эрс ихэсгэдэг ба ходоодны болон бусад хавдраар өвчлөх магадлалыг ихэсгэдэг.
Ходоодыг хүчилгүй болгоход организмын бохирдол эрчимтэй нэмэгддэг байна. Хорт бодисоос гадна дархлаа муудсан үед организмд өдөр бүр үүсдэг хөгширсэн, үхсэн эсүүдээ цэвэрлэж чадахгүй болж уургийн хаягдал их болоход үрэвсэл үүсгэдэг цитокин ихсэж бүх төрлийн үрэвслийн процесс ихэсдэг. Хоногт 10 тэрбум цусны улаан эс үхэж мөн тийм хэмжээний эсүүд шинээр үүсдэг ба үхсэн эсүүд организмаас гарч чадахгүй цусанд хуримтлагдаж цусыг өтгөрүүлэх нэг шалтгаан болдог болохыг 60-70-д жилийн өмнө эмч нар мэддэг байсан. Оросын алдарт эмч А.Залманов цус нь үхсэн улаан эсийн оршуулгын газар шиг болсон байдаг ба энэ үхсэн цусны эсүүд нь организмыг хордуулж уургийн хордлого үүсгэж , үрэвсэл үүсэх нэг шалтгаан болдог гэж хэлсэн байдаг. Энэ үед цус өтгөрч, эд эсүүд хүчилтөрөгчийн дутагдалд орж эсийн амьдрах хугацаа эрс богиносч өвчлөл ихэсдэг байна.
Гэтэл эмч нар бид энэ тухай юу ч мэдэхгүй, зөв хооллочихвол эрүүл байна гэж яриад байдаг. Үнэндээ яг ингэж хоолловол эрүүл хооллолт гэж үзнэ гэдэг тодорхойлолт байдаггүй тул эрүүл хооллолтыг янз бүрээр ойлгодог.
Зүрх судасны өвчнүүд, шигдээс, цус харвалт, чихрийн өвчин, бамбайн үрэвсэл, үе мөчний үрэвсэл, хорт хавдар гээд олон өвчний үндсэн шалтгаан нь организмд тэжээлийн бодис дутагдсанаас болдог. Ж/нь С-витамины дутагдал нь судасны хатуурлыг үүсгэж зүрхний шигдээс, цус харвалт, чихрийн өвчин болон хорт хавдрын нэг үндсэн шалтгаан болдог.
Бамбай булчирхай хэвийн ажиллахад йод зайлшгүй хэрэгтэй.
Архаг стрессийн үед бодисын солилцоо эрс удааширдаг ба үүний хамт С-вит, тосны хүчил, цинк, магни, кали организмд дутагддаг тул эдгээрийг ихээр хэрэглэх шаардлагатай болдог. Үүнээс гадна стрессийн үед адреналин ихээр ялгарч гэдэсрүү шимэгдэж гэдэсний ашигтай бактериудыг үхүүлдэг. Үүн дээр нь бид антибиотик хэрэглэхэд ашигтай бактери улам цөөрч дисбактериоз болоход өвчлөл гэрлийн хурдаар ихэсдэг.
Организмын бодисын солилцоо болон дулааныг зохицуулдаг бамбай булчирхайд селен дутагдалтай үед хэвийн ажиллагаа нь алдагддаг.
Цинк нь организмд 300 гаруй фермент үүсэхэд оролцдог тул цинк дутагдалтай үед эдгээр энзимууд үүсэж бий болохгүй, бодисын солилцоо явагдахад саадтай болдог. Цинк магнитай хамт эсийн митихондрыг янз бүрийн хорт бодисуудаас хамгаалж байдаг ба үүний үр дүнд ДНК үүсэх урвал тасралтгүй явагдаж амьдрал хэвийн үргэлжилдэг.
Цинк, селен, зэс, манган, төмөр, молибден, хром нь олон фермент үүсэхэд оролцдог ба эдгээр бодисууд дутагдахад ферментүүд үүсэж чадахгүй болж бодисын солилцоо хэвийн явагдахгүй болдог.
Давснаас айлгах сурталчилгаа сүүлийн 30 жилд их явагдаж америкчуудын давсны хэрэглээ 65% багассан боловч даралт ихтэй хүний тоо багассан уу гэвэл багасаагүй үзүүлэлт гарсан. Байгалийн давсанд олон минерал агуулагддаг ба давсаа багасгаснаар чихрийн өвчин, бодисын солилцооны өвчин, зүрхний дутагдал болон үе мөчний өвчин ихэссэн гэж эрдэмтэд дүгнэсэн байна.
Хөрсөнд нь бор ихтэй Турк, Изриаль улсад үе мөчний үрэвсэл хамгийн бага байдаг ба хөрсөнд нь бор багатай орнуудын хүмүүс үе мөчний архаг өвчнөөр их өвддөг байна. Манайд үе мөчний өвчлөл ихтэй байгаа нь борын дутагдал их байгаатай холбоотой нь ойлгомжтой. Гэтэл үе мөчинд бор уух ёстой гэж сонссон эмч хэд байна?
Хүмүүсийн ихэнх нь цагаан гурил, цагаан будаа зэрэг нүүрс уснаас өөр ямарч минерал, витамингүй хоол иддэг ба энэ нь калороос өөр юмгүй тул таргалалтыг дэмжиж, өвчлөлийг ихэсгэдэг.
Их Британи улсад Dr. Michael Wadsworth сүүлийн жилүүдэд эрүүл мэндийн үзүүлэлт муудсан болохыг судалгаагаар батлан харуулсан байна. 1946 онд төрсөн 5000 хүнийг тэдний хүүхдүүд, ач зээ нартай нь харьцуулсан судалгаа хийхэд 4-с доош насны хүүхдийн эмнэлэгт хэвтэх нь эрс ихсэж, астм 3 дахин, экзем, чихрийн өвчин 6 дахин олон болсон ба эмгэг таргалалт 2 дахин ихэссэн үзүүлэлт гарсан байна.
Байдал ийм байхад эмч нар витамин аюултай, С-вит их уувал ходоод цоорно ч гэх шиг худлаа ярьж витамин уулгахгүй сурталчилгаа хийж өвчлөлийг улам ихэсгэж байгаа нь нууц биш.
Ийм байдалтай байвал өвчлөл улам ихсэж монголчуудын эрүүл мэндийн ирээдүй маш бүрхэг, харанхуй болох нь ойлгомжтой. Ирээдүйн анагаах ухаан өвчнөөс урьдчилан сэргийлдэг болно гэдэгт би итгэхгүй болоод удаж байна.
Хүүхэд, том хүнгүй бүгд С-вит, Д3-вит, В-вит комплекс, А, Е, К2, В3-витамин, тосны хүчил, антиоксидант бодисууд болон минералуудыг хангалттай хэрэглэж, ходоодыг хүчиллэг болгож, элгийг цэвэрлэж, гэдэсний бактерийг байнга сэргээж байвал организмыг цэвэрлэж, дархлааг сэргээж олон өвчнөөс хамгаалах ба байгаа өвчинтэйгээ тэмцэх чадварыг нэмэгдүүлнэ.
Монголд натурал витамин байхгүй тул гадаадаас авахаас өөр арга байхгүй. Гэтэл гадаадаас витамин авбал оруулахгүй, оруулбал заавал татвар төлдөг нь хэний төлөө хийж байгаа үйлдэл вэ? Ёвропын улсууд өөртөө байхгүй витамины бэлдмэлийг гадаадаас авахад ямарч саадгүй оруулдаг. Манай улс өвчлөлийг дэмжих бодлого бариад байна уу, багасгах бодлого бариад байна уу? Өвчлөл ийм их байхад иргэддээ витамин хүссэн улсаасаа авах боломж олгож яагаад болохгүй гэж.
Үндсэн хуулинд монгол хүн бүр эрүүл амьдрах эрхтэй гэж заасан нь хэвээрээ байгаа биздээ ???
БАДРАХЫН БАЯРСАЙХАН КРАКОВ хот 2023-03-22.
Bayarsaikhan Badrah
