https://www.facebook.com/889623581076654/

Ahmed Hosni - Writer, Roxi, Cairo, NY (2026)

10/31/2024

ذكر ابن الجوزي فى الفصل 69 من كتابه "مناقب الامام احمد" قصة الامام مع السجان فى ايام المعتصم فى فتنة خلق القرآن..
***********
قال أبو بكر المروذى: لما سجن أحمد بن حنبل جاء السجان فقال له:
- يا أبا عبد الله.. الحديث الذى روى فى الظلمة وأعوانهم صحيح؟
- قال: نعم,
- قال السجان: فأنا من أعوانِ الظلمة؟
- قال أحمد: فأعوان الظلمة من يأخذ شعرك ويغسل ثوبك ويصلح طعامك ويبيع ويشترى منك.. فأما أنت فمن أنفسهم.
***********
لحد هنا والقصة خلصت.. الناس كلها عارفه القصة دى وكله بينشرها على سبيل تلقيح الكلام.. ذكرت المصادر فتنة خلق القرآن بالتفصيل وعارفين كلنا حصل فيها ايه.. بنحكى القصة على سبيل تذكر بطولة الامام وموقفة القوى.. حتى الكتاب اللى ذكرها عنوانه كده.. مناقب الامام..
لكن للأسف لم تذكر المصادر مصير الحارس اللى كان قلقان على نفسه ليكون من اعوان الظلمة وطلع هو من الظلمة انفسهم.. معرفناش حصل ايه للعبد المأمور اللى كان بينفذ اوامر اسياده.. محدش اتكلم عن امين الشرطة اللى كان واقف على زنزانة ابن حنبل علشان يكسر نفسه ويذله وهو بينفذ اوامر ظابط المباحث ولا حد اتكلم عن المخبر اللى خبص عليه وبلغ عنه علشان شغلته كده.. محدش اتكلم باستفاضة عن القاضى اللى حكم عليه والمجتمع اللى شاف ظلم الامام وسكت علشان خايف..
من كان يوم قريت تعليق رغم قصره الا انه اكثر شيء اثار رعبى فى حياتى كلها بعد الاية الكريمة "وَإِنْ مِنْكُمْ إِلَّا وَارِدُهَا".. التعليق بيقول "11 سنة بندفع تمن فاتورة مذبحة رابعة.. امال فاتورة غزة هنعمل فيها ايه!!!"
مش باينلها اى مخرج الا رحمة ربنا بالمستضعفين..

10/28/2024

سنة 2017 قعدت في بروكلين في نيويورك 4 شهور.. كنت مأجر شقة في الجزء اليهودي من الحي.. اليهود زيهم زى اى اقلية في بلد اجنبي.. عايشين جمب بعض.. 5 او 6 شوارع بالطول وبالعرض تحس فيهم انك مش في أمريكا خالص.. نفس الكلام في الحي الصيني او الحي العربي.. كل شيء في الحى ده عبرى من اول محلات الاكل لحد المعابد وأسماء الشوارع الموازية.. واهم ما فيه طبعا.. السكان.
اول حاجه لفتت نظري بعد مستوى الحي المرتفع هو نسبة الانجاب..
بدون اى مبالغة.. اقل اسرة يهودية مخلفة من زواج شرعي سليم قانونيا ودينيا مش اقل من 5 أطفال.. كنت بشوفهم كل ما انزل الشارع عائلات ماشيه مع بعض.. الرجالة لابسه ابيض في اسود مع البرانيط والضفاير.. والستات لابسه الكاروه المقلم المحتشم.. لا دراع باينه ولا رجل مكشوفة ولا لحم بيتهز مع كل خطوة.. كل اسرة معاها عربيتين او 3 عربيات أطفال من بتاعة التوائم.. ده غير العيال اللى ماشيه جمبهم على الأرض.
الصيف اللى فات كنت في فيينا.. عرفت انى في الحي اليهودي لما شفت نفس المنظر.. عائلات ماشيه في الشارع معاها أطفال بالهبل.. مفيش 20 متر من اول الشارع ولقيت اليفط العبري علشان تأكدلي الانطباع اللى اخدته عنهم في 2017 في بروكلين.
الراجل ده اسمه شاؤول مويال.. عنده 47 سنة.. اتقتل في جنوب لبنان من كام يوم.. عد معايا كده في كام راس في الصورة غيره؟؟
10 عيال.. وامهم.. اللى تقريبا لو نظري لسه كويس.. شكلها كده حامل.
من الصورة نقدر نخمن ان اصغر الأطفال عمره في حدود 10 سنين.. يعنى الفطيس ده بطل خلف لما كان سنه 37 سنة.. يعنى تقريبا اتجوز وهو في وسط العشرينات ونفخ مراته كل سنة عيل.. وزى ما هو واضح في الصورة.. لا في حد عريان ولا فيها اى شيء مخجل.
هو انا ليه مهتم بتوضيح التفاصيل دى؟؟ هناسبهم مثلا!!!
هي دى الاسرة اليهودية العادية في كل مكان يا سيدي الفاضل.. هو ده النموذج اللى ينفع تعمم عليه اى كلام عن حياتهم الاجتماعية.. زوج وزوجة وأطفال بالهبل.. نسب طلاق قليلة.. اسر مترابطة جدا.. نسوان طول ما هي عايشه.. بتخلف.
ليه بيعملوا كده؟
لأنهم وقعوا على إحصائية في التسعينات بتقول ان متوسط اعمار الفلسطينيين 17 سنة في مقابل 34 سنة متوسط اعمار اليهود.. بالمنطق البسيط هيبقى المستقبل للشباب.. الفلسطيني..
طيب فين الأفكار الحلوة اللى بيصدروها للعالم بتاعة زواج نفس النوع والحاتم رشيد والسنجل مازر والاسترونج اندبندنت وانتى بطلة قصة حياتك والكلام اللطيف ده؟؟
معقول معندهمش قايمة وتمكين ونفقات وقوانين تسحل الراجل على بوذه في المحاكم!!
يعنى باعولنا الفكرة.. وهما نفسهم مش بيعملوها!!!
اه عادى جدا.. دى بضائع للبيع والتصدير مش للاستهلاك المحلي.. صانع السجائر هو اخر واحد ممكن يدخن على فكره.. السجائر دى للعبط اللى بيصدقوا وبيشتروا اى كلام.
وصلت؟؟

10/22/2024

الست دى اسمها جوردانا كاتلر.. كانت رئيس الأركان في السفارة الإسرائيلية في واشنطن لحد سنة 2016.. بعدها بقت مديرة السياسة العامة لإسرائيل والشتات اليهودي في فيس بوك.. دلوقتى بقت المسئول العام عن المحتوي الإسرائيلي الفلسطيني في شركة ميتا كلها.. يعنى فيس بوك وانستجرام وواتس اب.
يعنى لو كان المحتوي المؤيد للقضية الفلسطينية بيتمسح قيراط.. دلوقتى هيتمسح 24 قيراط.. لو كنا بناخد بلوكات علشان صورة وللا اسم محظور.. يبقى دلوقتى الحسابات هتتحذف علطول.. واحنا عارفين ان اللى بيتمسح في الفيس بوك مش بيرجع تانى.. يعنى تقعد تبنى في الاكاونت سنين علشان يكبر.. وفى لحظة.. تقرر الست جوردانا انها ترميه في الزبالة لو قلت كلمة مش على مزاجها.
ولو.. مش مهم..
اشوف الموقف ده كرد فعل مباشر انهم خسروا الحرب الإعلامية بالضربات القاضية.. الصحافة القذرة التقليدية بملياراتها وكاميراتها وبرامجها ومذيعينها ومحلليها مقدروش يحسنوا صورتهم الهمجية في عيون العالم.. سقطت البى بى سى والسى ان ان وسكاي نيوز وواشنطن بوست وديلى ميل والايكونوميست في مستنقع فقدان المصداقية.. الناس مبقتش تصدق اى كلمه بيقولوها بالرغم من سيطرتهم على كل وسائل الاعلام ونشرهم الاف الأفلام المزورة وعشرات الالاف من ساعات التوك شو برسايلها المسمومة اللى بيشغلها اعلاميين تقال لهم متابعين بالملايين حول العالم.. بالرغم من تكرار الأكاذيب والتعتيم الإعلامي وكتم الأصوات الناس عرفت الحقيقة.. الطلبة في الجامعات حوالين العالم رفضت اللى بيحصل وخرجت المظاهرات في كل مكان داعمه للقضية.. غصب عن بوذ بيرس مورجان وبين شابيرو وجوليا هارتلي قدر مصطفى البرغوثي وباسم يوسف ومحمد حجاب ومهدي حسن وحسام زملط وغيرهم انهم يوصلوا للعالم صوت الناس اللى بتموت بالمئات كل يوم.. رغم ان معاهم الفلوس والامنجية في المناصب المهمة.. رغم سيطرتهم حتى على وسائل الاعلام المحلية في بلادنا ورغم تحيز حكوماتنا للمجرمين المحتلين.. الا ان ربك يشاء انه يجعل من نفس ادواتهم وسيلة لتمجيد وتوثيق استشهاد البطل يحيي أبو إبراهيم.. الراجل اللى جننهم حي ربنا جعلهم سبب في خلوده شهيد.
هيحطوا معايير جديدة.. هنخترع لغة جديدة.. مش هنغلب يعنى..

10/19/2024

أحب مدى غباء إسرائيل في بعض الأحيان. كان بإمكانهم بسهولة دفن لقطات/تفاصيل وفاته ونشر قصة كاذبة عن الاختباء خلف المدنيين أو شيء من هذا القبيل. بدلاً من ذلك، سوف يلهم ذلك مقاتلي المقاومة للأجيال القادمة. معركة أخيرة ايقونية، أبعاد أسطورية
"مايكل بريسنر- ناشط سياسي أمريكي اشترك في حرب العراق"
هناك شيء غير عادي في الثقافة الإسرائيلية. فمهما كان رأي الناس في "يحيي أبو ابراهيم"، فقد مات موت بطل هوليوود. كان آخر رجل يقف وحيدًا بين رفاقه القتلى، مغطى بالغبار، بالكاد على قيد الحياة، في مواجهة صعوبات ساحقة، مستخدمًا ذراعه المتبقية لرمي أقرب سلاح يمكنه الوصول إليه نحو الطائرة بدون طيار التي يديرها جبان يختبئ خلف الآلة. إنه مثل فيلم "المدمر" ولكنه حقيقي. ويعتقد الإسرائيليون أنهم يهينون "يحيي أبو ابراهيم" والمقاومة الفلسطينية من خلال جعل هذا الأمر علنيًا. هناك خطأ عميق في المجتمع الإسرائيلي.
"جاكي ووكر – صحفية وناشطة انجليزية مضادة للعنصرية"
مات ابو ابراهيم كما اراد

10/16/2024

آداب الموعظة
==========
في كتابه "رحلتي من الشك الى الايمان" حكى الطبيب الاديب الفيلسوف الراحل د. مصطفى محمود عن بداياته كيساري لما نزل مع شلة أصحابه اليساريين علشان يقنعوا الناس بالكلام ده.. وعلشان كانوا شباب حمقي بدأوا دعوتهم من المسجد..
وطبعا كلوا علقة موت..
طبيعي جدا.. كلام زى ده كان ممكن يلاقى صدي في النوادي او على القهاوي.. انت عاوز تكلم الناس اللى علاقتها بالدين ضعيفة.. دول اللى ممكن يسمعوك.. انما رايح لناس في الجامع تقولهم شك وجان جاك روسو وجان بول سارتر ومعرفش مين!!!
ده كلام!!
لو نفسك اكلتك وقررت تلبس ثوب الوعظ والإرشاد يبقى لازم تعرف ان في قواعد للموعظة.. مش علشان طقت في دماغك تزايد على الناس او تعلى على الكل وتقف تقول اى كلام في صورة موعظة يبقى الناس هتتقبله.. اللى حاصل دلوقتى واللى بيحصل دايما ان في رفض ومقاومة باستمرار للنصيحة.. وده طبيعي جدا لأن في اغلب الأحوال المتكلم بيبقي جاهل..
قبل ما تتكلم اسأل نفسك - وطظ في نية حضرتك سواء كانت خير او شر - الأسئلة هنا بتعبر عن حقائق مجرده مش هتغيرها نيتك خالص..
- هل انت مؤهل لنصح الغير؟
- هل اتبعت قواعد النصح والموعظة اللى مفروض تكون حسنة؟
- هل اللى قصادك مستعد يتقبل منك كلام؟
- هل الكلام اللى انت بتقوله أصلا صح؟
- هل توقيت الكلام مناسب؟
- هل المكان مناسب؟
- هل طريقة الكلام مناسبة؟
مش علشان خدت رأى ابوك واصحابك وقالولك ان عنك حق.. يبقى خلاص عندك حق.. جايز جدا – وده اللى بيحصل في الغالب – ان انت وهما حمير خارجين من نفس الزريبة..
انا شخصيا واحد من الناس اى حد بيفكر يوجهلى نصائح بديله في وشه علطول عملا بمبدأ "كان العل** نفع نفسه".. رغم انى شخصيا برضه من اكثر الناس والحمد لله طلبا للنصيحة والإرشاد.. بس الفرق هنا انت بتسأل مين وامتى وفين وعن ايه..
متروحش لشيخ في الجامع تقوله يا مولانا ادرس ايه في كلية الهندسة.. ولا تروح لدكتور تقوله احط فلوسي في البنك وللا تبقى ربا.. مينفعش تيجى لابنك او مراتك وسط الناس ويجيلك اسهال النصائح.. ولا ينفع تقف وسط عزاء والناس مكلومة وبتعيط.. وتقف تطرش اى كلام فارغ وانت فاكر انك بتنصح الاحياء وتفكرهم باخرتهم..
يا اخى خلى عندك شوية دم.. لكل مقام مقال..
مش علشان نيتك طيبة – فرضا يعنى – يبقى كلامك صح.. النية الصالحة لا تصلح العمل الفاسد.. الدبة قتلت صاحبها وهى فاكره انها بتهش الدبان عن وشه.. دى حكاية عرفناها زمان في الابتدائي.. بس يبدو كده ان الناس مكانتش مركزه في حصة القراءة.
الموعظة لها ادب وفقه ورب الكعبة.. ربنا اللى انت بتدعو الناس ليه قال
"ادْعُ إِلَىٰ سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ ۖ وَجَادِلْهُم بِالَّتِي هِيَ أَحْسَنُ ۚ إِنَّ رَبَّكَ هُوَ أَعْلَمُ بِمَن ضَلَّ عَن سَبِيلِهِ ۖ وَهُوَ أَعْلَمُ بِالْمُهْتَدِينَ" وقال كمان
"وَلَوْ كُنتَ فَظًّا غَلِيظَ الْقَلْبِ لَانفَضُّوا مِنْ حَوْلِكَ"..
مفيش اى منطق اقسم بالله انك توعظ الناس ولما يرفضوا تشتمهم بامهاتهم وتنعتهم بأسوأ الالفاظ.. حتى لو هما اغلظوا ليك في القول.. افتكر دايما ان وارد جدا تبقى انت حمار اسلوبك منفر..
اذا كنت انت نفسك معملتش بنصيحة ربنا ليك.. عاوز الناس تتقبل كلامك الاهبل ليه!!!
الكتاب ده ممتاز جدا في آداب الموعظة والنصح والارشاد.. مؤلفه يبقى د. محمد بن إبراهيم الحمد.. عضو هيئة التدريس في قسم العقيدة والمذاهب المعاصرة كلية الشريعة والدراسات الإسلامية فى جامعة القصيم.. يعنى من اهل التخصص.
https://drive.google.com/file/d/1y13gBGe6zzXSw9CaQ5jKAg5vLyuisIDI/view?usp=drive_link
كام واحد قرأ كتاب عن حسن الموعظة وآدابها؟؟
الله.. ولما هو مفيش.. امال دايرين تنصحوا في الناس ليه وكل واحد عامل فيها حسن البنا!!!

10/12/2024

ركزوا معايا في الصورة دى كده..
ده غلاف مجلة الايكونوميست البريطانية..
الصورة او غلاف المجلة بعنوان "دليل تقريبي للجحيم".. غلاف كاريكاتيري بيسخر من الكوكب وزعماؤه واحداثه.. الغلاف كله مستوحى من الخطايا السبع في المسيحية.. اللى هي الذنوب الكاردينالية اللى استخدمها المبشرين المسيحيين علشان يبعدوا اتباع الكنيسة عن كل ما هو غير أخلاقي.
************
(16) هذه الستة يبغضها الرب، وسبعة هي مكرهة نفسه (17) عيون متعالية، لسان كاذب، أيد سافكة دما بريئا (18) قلب ينشئ أفكارا رديئة، أرجل سريعة الجريان إلى السوء (19) شاهد زور يفوه بالأكاذيب، وزارع خصومات بين إخوة.
سفر الامثال.. الاصحاح السادس..
************
الصورة فيها تخيل الرسام لحال العالم بالربط المباشر بالخطايا السبع.. اللى هي الغرور والحسد والشراهة والشهوة، والغضب، والجشع، والكسل.. جمب كل خطيئة حطيت رقم.. وهنحاول نقرأ الصورة مع بعض.
الخطيئة رقم (1).. الغرور..
هنشوف أوباما فرحان وهو راكب مركب عايمه في نهر دم بيغرق فيه بوتين وبشار الأسد والقذافي واحمدي نجاد.. ممكن تترجم كلمة Pride هنا على انها الغرور او انها شعار تيار الحاتم رشيد اللى شاف ازهي أيامه في عصر أوباما.. نهر الدم ده اكيد اشاره للخوازيق اللى رتبها نظام أوباما للناس دى وهما اتسحلوا فيها لحد النهارده.. قصاد مركب اوباما في رمز اليورو بيغرق.. كأشارة الى انهيار الاقتصاد الأوروبي في نفس بحر الدم.. ناخد بالنا الشيطان هو اللى بيوسع الطريق لاوباما وبيغرق الاقتصاد الأوروبي في نفس الوقت..
الخطيئة رقم (2).. الحسد..
فيها فرنسا وافريقيا وامريكا الجنوبية.. كل منهم منعزل على نفسه ومكتفي بالامتعاض من اللى بيحصل حواليهم.. الحسد هنا ليهم مش منهم.. الحسد لفرنسا انها مستمتعه بثروات افريقيا اللى معندهاش مشاكل غير الحروب الاهلية اللى يادوب بتاكل منهم عشرات الاف.. مش مهم.. دول عبيد يعنى مش بنى ادمين.. وكذلك أمريكا الجنوبية اللى موقعها الجغرافي مأمنها بعيد عن المناطق المشتعلة في الكوكب.
الخطيئة رقم (3).. الشراهة..
أمريكا ظاهره في صورة شخص رأسمالي نايم على ظهره وشافط في كرشه الكبير بترول العالم.. الشيطان هو اللى بيسقيه البترول في بقه.. ورا ظهره يافطه مكتوب عليها وول ستريت مع مشهد قبة الكونجرس طالع منها دخان.. إشارة الى انهيار النظام السياسي الأمريكي بسبب شراهة رؤوس أموال بتوع وول ستريت.. الرسام هنا قرب صورة امريكا بشخص شره شافط في كرشه خيرات العالم وهو تصوير حقيقي جدا.. دولة عندها كثير اوى من كل ثروات الأرض ومع ذلك باصه للى في ايد غيرها.. فى الخلفية مشهد معبد يوناني متكسر وبيقع.. في عالم زى ده تحكمه الرأسمالية مش هيبقي في مكان للدين خالص.
الخطيئة رقم (4).. الشهوة..
أبو بدلة مدنيه اللى عند الخطيئة رقم 4 يبقي سيليفيو بيرلسكوني.. رئيس وزراء إيطاليا السابق.. واللى جمبه يبقى الجنرال الأمريكي برايان روبرتس اللى كان رئيس وحدة التدريب في قاعدة فورت جاكسون في كارولينا الجنوبية.. الاثنين مشهورين بفضائحهم الجنسية.. ظاهر انهم بيجروا ورا واحدة ست مرسومه انها شيطانة سايقاهم علشان يقعوا في نفس نهر الدم مع بوتين وبشار.. الشهوة دايما بيحركها الشيطان علشان يسوق الانسان للهلاك عن طريق اقوى أسلحته على الأرض ضد الرجل.. المرأة.
الخطيئة رقم (5).. الغضب..
في طيارتين شراعيتين.. واحدة سايقها نتنياهو والتانية سايقها اسيادنا ابطال المقاومة.. الرسام مصور الحرب المستمرة بين الطرفين على انها خطيئة بيحركها الغضب.. نقدر نتفهم موقفه كبريطاني مش قادر يتصور ان في طرف ظالم وطرف مظلوم... خد بالك ان الطيارتين مرسومين على انهم شياطين برضه..
الخطيئة رقم (6).. الجشع..
قطر عربيات المناجم مكتوب عليه "رجال البنوك".. القطر يدفعه شيطان علشان يدخله في نفق واضح من بره انه جواه نار وجحيم.. مدخل النفق عباره عن بق وحش كبير عينه حمراء.. البنك زى المنجم.. منبع ثروات.. الشيطان سايق عربيات البنوك للهلاك.. هما بيسموا عربيات البنوك دى أرباح.. واحنا كمسلمين بنسميه النظام الربوي..
الخطيئة رقم (7).. الكسل..
الصورة فيها انجيلا ميركل بتاعة المانية وهى قعدة بتتفرج على اقتصاد أوروبا وهو بيغرق ومكسله تتصرف.. المانيا هي اكبر دولة في الاتحاد اقتصاديا.. الاتحاد مليان مشاكل وهى قاعدة تتفرج.. الرسام هنا افترض ان عليها واجب انقاذ الاتحاد، ولكنها اختارت خطيئة الكسل.. يمكن لانها معندهاش حروب ولا مشاكل من اى نوع.
بالإضافة الى الخطايا السبعة.. في شوية تفاصيل مهمة جدا في الصورة دى..
عندك مثلا..
على يمين الصورة من تحت في مجموعة شياطين قاعدة على أجهزة كمبيوتر مكتوب عليها "Hacker Center".. نقدر نعتبرهم مجموعات القرصنة الالكترونية او الذباب بتاع السوشيال ميديا اليومين دول.. مجرمين مجهولين مستخبيين ورا صور مستعارة.. زى لجان السيسي او الوحدة 8200 بتاعة الموساد.. العيال اللى قاعدة تزرع فتن وقضايا جدلية صفرية مش هنوصل بيها الا للخراب.. ظاهرين في الصورة كشياطين عليها جزء من مسئولية خراب العالم حسب عنوان الصورة.. حقيقي او التعبير ده.
هتلاقي كمان مشهد من بتوع برامج اكتشاف المواهب.. شياطين بتمتحن شيطان.. الفن قد يكون وسيلة للدمار لو استخدم غلط.. حتى لو مفيش موهوبين يسوقوا السم في العسل.. الشيطان بنفسه هيزقك علشان تلاقى حد تسميه موهوب.. افتكر معايا كده ان البرامج دى كلها مطلعتش فنان واحد عليه القيمة.. الموهوب الحقيقي بيلمع لوحده من غير اى مساعدات.
فى اعلى الصورة تحت رسم رجال المقاومة هتلاقى عربية زبالة مكتوب عليها "صحفيين بريطانيين" بتفضي محتوياتها فى نهر الدم فى وجود شيطان واقف يشرف على العملية.. القصد هنا ان عناوين الصحافة البريطانية مسئولة مسئولية مباشرة عن الخراب ده بكم التزوير والتدليس اللى بتنشره.
على الشمال خالص فى صورة 2 عمال بيحطوا فحم فى الفرن.. دول الصين والهند اللى شغالين زى ما هما فى الصناعات الملوثة للكوكب زى ما هو واضح من دخان المدخنة.. ملهمش دعوة بحد وطظ فى الكل.. هما كمان جزء من جحيم الكوكب..
الماستر سين بتاع الصورة هو الشيطان الوقور المرسوم على شمال الصورة وفى ايده مجلة الايكونوميست نفسها مرسوم عليها نفس الصورة دى.. وكأنه ماسك خطة وبيتابع تنفيذها من ارض الواقع وهو راضي كل الرضا عن اللى بيحصل.. على شماله جهاز مكتوب عليه التغير المناخي.. وكأن التغيرات المناخية اللى بتحصل فى الكوكب بيتحكم فيها الشيطان علشان يحول حياة الانسان الى جحيم.. الشيطان ده مدينا ظهره ومش معروف هو مين بالظبط.. اعتقد ان ده مقصود علشان نفهم انه دايما موجود ومش مقصور على شخصية بعينها.. قد يكون ستالين شيطان الامس والسيسي شيطان اليوم وترامب شيطان بكره.. مش مهم هو مين.. المهم انه دايما موجود وبيحرك كل الاحداث عن طريق اولاده اللى موجودين مع الانسان فى كل خطيئة من الخطايا السبعة.. وكأنهم بيطمنوا ان الانسان ماشى تمام على الخط المرسوم ليه.. الخط اللى اخره الجحيم.
المهم بقى ان الصورة دى كانت فى ديسمبر 2012..

10/09/2024

رحلتي الفكرية "عبد الوهاب المسيري"
=========================
الناس عرفت د. المسيري بموسوعته العظيمة عن اليهود واليهودية والصهيونية.. بس لو بصيت على فهرس الموسوعة هتقدر بسهولة تعرف ان 99% من الناس اللى بتتكلم عنها مقرأتش منها ولا حرف واحد.. ده بافتراض ان الناس تعرفها أصلا.. لو قلنا ان 5% من المجتمع المصري مهتم بالقراءة.. هيبقى اقل من 0.1% من ال 5% دول قرأ موسوعة د. عبد الوهاب او على الأقل عنده فكره عن محتواها.. مع العلم انك ممكن تلاقي منها نسخة في مكتبة كل شخص مهتم بالثقافة في مصر.
ليه كده؟؟
الموضوع صعب اوى بالنسبة لكتابه الأشهر.. ما بالك بقى بسيرة حياته الذاتية ورحلته الفكرية؟
مين مهتم بيها أصلا!!!
ومع ذلك.. بقولك انك لازم تقرأ الكتاب ده لسبب مهم جدا..
عبد الوهاب المسيري بدأ حياته شيوعي ماركسي.. موصلش لدرجة الالحاد لأنه كان بيقول عن نفسه انه ماركسي على سنة الله ورسوله.. في أواخر عمره كان بيعرف نفسه انه كاتب إسلامي..
الجماعة الشيوعيين دول لما ربنا بيهديهم.. بتطلع منهم درر.. وبيكونوا – نتفق او لا نتفق – اقوى من اللى بدأوا حياتهم كتاب او دعاة او منظرين إسلاميين.. رغم ان الفئتين بيتقابلوا في اخر الطريق ويتفقوا على اساسيات، وفروع، وتفاصيل واحدة.. الا ان اللى جايلك من الطريق الشيوعي تحس كلامه اثقل وافكاره اكثر ترابطا ومنطقه اقوى واصلب.. والاهم من كل ده ايمانه بالله والدين بيكون قوى جدا.. ده غير ان منتجهم النهائي في الادب او الثقافة او الفلسفة بيكون على درجة كبيرة من الجودة والخبرة لأنهم ببساطة بيحكوا اللى عاشوه مش اللى نقلوه من كتب التراث.
ايه رأيك في د. محمد عمارة ود. مصطفى محمود رحمة الله عليهم؟
ليه الجماعية الاكس شيوعيين دول بيبقوا بالقوة دى؟
اللى لقي الطريق بعد توهان وعرف الله بالبحث مش بالوراثة.. بيلاقي في الدين إجابات عن كل الاسئلة الوجودية والقضايا المتشابكة المعقدة اللى ياما ارهق مخه في البحث فيها.. ملاحظة ذكية قالها المفكر والباحث المحترم محمد الهامي في تعليقة علي كتاب سيرة د. عبد الوهاب الذاتية ان الدكتور لو عرف الدين في بداية حياته.. كان اختصر من مشواره البحثي 20 سنة على الأقل.. ملحوظة في محلها.. لكن يظل اللى جايلك من قلب المعمعة غير اللى سمع عنها.. اللى تشرب الفكر الشيوعي وعاش مدافع عنه لحد ما أسلحته خلصت واكتشف في النهاية انه واقف على ارض رخوه بتبقى أرضية فكره شديدة الصلابة لما بترسي مراكب افكاره على شط الدين لأن كل الخروم اللى عاش يسدها في الشيوعية وغيرها لقاها مسدوده بالفعل في كتاب ربنا.
هل معني كده ان كل انسان لازم يبقى شيوعي في بداية حياته وربنا يهديه في الاخر؟
اكيد لا.. حظك يبقى حلو لو نشأت نشأة إسلامية ونجا عقلك من الخلاط ده.. ولكن في نفس الوقت مهم جدا تعرف الناس اللى بالحجم ده ليه مواقفهم اتقلبت كده من النقيض الى النقيض..
في سيرة د. المسيري الذاتية اللى سردها في كتابه " رحلتي الفكرية في البذور والجذور والثمر" وقفت عند موقف مهم جدا كان هو البلوت تويست اللى قلب حياته من النقيض للنقيض.. لحظة اكتشاف الحقيقة اللى بتضرب فيها في مخك لمبة الحقيقة اللى كانت حواليك طول الوقت وانت مش واخد بالك منها.
بيحكي الدكتور ان ده كان اخر يوم ليه في أمريكا سنة 1969.. دعوه لمناظرة مع بروفيسور امريكي اسمه جوزيف ناير "راجل يساري من مدرسة الفيلسوف الفرنسي اوجست كونت بتاع السان سيمونيه" موضوع المناظرة كان عن الصهيونية وقضية فلسطين.. لاحظ ان المناظرة كانت سنة 69.. في الوقت ده كان المجتمع الغربي وفلاسفته ومنظريه بيحاولوا يغسلوا الصهيونية من سمعتها السيئة.. خلاص الحرب خلصت ودلوقتى معاد غسيل الادمغة..
د. عبد الوهاب استعد للمناظرة دى كويس جدا بالتركيز على 3 محاور
- المجازر والمذابح الجماعية.. الجماعة دول كانوا بيقولوا ان دير ياسين كانت استثناء وليس القاعدة
- أفكار هرتزل.. قالوا ان كل أفكاره العنيفة والاقصائية كانت في مرحلة شبابه بس لما كبر وعقل ونضج بقي راجل طيب
- العصابات الصهيونية.. كانوا بيحاولوا يصدروا دايما ان عصابات الهاجاناه اللى تحولت الى السياسة بعد 48 دول معتدلين والباقي متطرفين
استعد ازاى دكتور عبد الوهاب للمناظرة دى؟
على السبورة الموجودة في قاعة المناظرة كتب أسماء 14 مذبحة عملها الإسرائيليين في حق الفلسطينيين.. وتعمد إخفاء السبورة.. واخد معاه 5 مجلدات كاملة هي يوميات ومذكرات هرتزل في مراحل عمره المختلفة.. وحط بوك مارك عند كل مقطع كان بيطالب فيه هرتزل بطرد السكان الأصليين من الأرض.. وخد معاه كمان مذكرات بيجين.. الراجل بتاع الهاجاناه اللى بيقولوا انها معتدلة.
بدأ الدكتور جوزيف ناير يحكي السردية الإسرائيلية إياها بتاعة ان مفيش مجازر ولا حاجه وان دير ياسين دى حدث فردي مش نمط متكرر.. وفى وسط ما هو بيتكلم ويعيط على اليهود.. قام دكتور عبد الوهاب وشال الغطاء من على السبورة اللى كتب عليها أسماء ال 14 مذبحة اللى عملهم اليهود.. وهنا توقف الدكتور جوزيف عن الكلام ولسانه بدأ يلجلج.. لكنه تمالك نفسه ونقل علطول على النقطة اللى بعدها.. وهى فكر هرتزل اللى كان عنيف وهو صغير وبقى طيوب لما كبر ونضج..
وفى عز ما الدكتور جوزيف بيتكلم.. قام دكتور عبد الوهاب ومعاه مذكرات هرتزل وبدأ يعرض منها مقتطفات من اراء هرتزل شديدة العنف ضد السكان الأصليين وهو كبير وناضج.. يعنى بالبلدي.. الدكتور جوزيف ده بيهبد وبيكذب.. وللمرة الثانية اتلجلج الدكتور جوزيف، ولكنه قدر يتمالك نفسه برضه وينقل على النقطة الثالثة.. وهى براءة الهاجاناه من دير ياسين..
وهنا شاور دكتور عبد الوهاب لصديق ليه كان معاه مذكرات بيجن اللى بيحكي فيها المصايب اللى عملها وهو مع الهاجاناه في دير ياسين.. هنا فقد الدكتور جوزيف ناير اعصابه وتخلى عن كل العقلانية والهدوء اللى بيتكلم بيهم وظهرت من جواه روح الوثني الهمجي لما لقى الناس اللى قاعدة بتضحك عليه وعلى كذبه واغلبهم كان من تلامذته.. فراح متقدم لمقدمة المسرح وقال بصوت وثني همجي حسب وصف دكتور عبد الوهاب "هذه هي حقوق الشعب اليهودي المقدسة وسوف ندافع عنها بحد السلاح ولن يوقفنا احد".. جايز فقد اعصابه لما اتواجه باكاذيبه وجايز برضه ان الأسلوب الاستعراضي المسرحي اللى اتبعه دكتور عبد الوهاب استفز الراجل وخرجه بره السياق اللى كان ماشى فيه.. في الحالتين قدر دكتور عبد الوهاب انه يحط الراجل في مع اكاذيبه في مواجهة الجمهور اللى استهجن كلام دكتور جوزيف وبدأ يسخر منه..
انا شخصيا مؤمن تماما بكلام دكتور جوزيف.. هي دى القضية والقصة كلها.. حد السلاح.. عنده الف حق.. اى كلام غير كده يبقى هبل في هبل..
ورجع دكتور عبد الوهاب على مصر وانتج لنا بعدها موسوعته "اليهود واليهودية والصهيونية" بعد ما شاف بعينه ان اليسار وأفكاره وسلطاته وبابا غنوجه ما هي الا كذبة كبيرة.. وان كل ما عدا الإسلام باطل والحدوتة كلها في "خلى السلاح صاحي"..
عرفت ليه لازم تقرأ كتب د. المسيري؟
رابط الكتاب في اول تعليق

10/06/2024

7 سنوات في بلاد المصريين
=================
ده عنوان الكتاب اللى قررت اقراه اليومين دول بمناسبة شهر أكتوبر اللى اتربينا من صغرنا انه شهر عظيم بيومه السادس واللى كبرنا ولقيناه فعلا شهر رائع بيومه السابع بارك الله فيمن قرر ونفذ وقدم – ولا يزال يقدم - عمره في سبيل دينه وارضه.
الكتاب ده هو مذكرات اخطر سفراء إسرائيل في مصر.. موشيه ساسون.. الراجل اللى قعد في مصر في الفترة من 1981 الى 1988.. في العادة لا اهتم بكتب السير الذاتية في التأريخ لانها بتحكى من وجهة نظر صاحبها.. لكن المذكرات دى مختلفة تماما..
موشيه ساسون هو ثاني سفير إسرائيلي في مصر بعد كامب ديفيد.. الأول كان إلياهو بن إليسار.. اشكينازي اتولد في بولندا وهاجر مع اهله الى فلسطين بعد 48.. راجل خواجه ميعرفش حاجه عن المنطقة.. فكان طبيعي انه ميكملش في منصبه اكثر من سنة.. بينما موشيه ساسون يهودي سوري.. بيتكلم عربي بلغة اهل الشام ويعرف تاريخ اسرته من أيام السبي البابلي – معرفش وصله ازاى – وله صلة قوية بتاريخ اسرته من القرن ال 18 وما بعده.. لما وصل مصر على خطوط العال يوم 18 مايو 1981 وفى اول مؤتمر صحفي للسفير سأله صحفي إسرائيلي عن معرفته كمستشرق باللغة العربية.. هنا قاطعه موشيه ساسون ونفى عن نفسه وصف المستشرق.. لأنه فعلا من اهل المنطقة.
ابوه – الياهو ساسون – كان من اليهود الشرقيين اللى خدموا الفكرة باخلاص قبل 48 من شغله في شركة كهرباء القدس وشغله التاني في تجارة المانيفاتوره.. ولما صدر قرار التقسيم واصبح الكيان المحتل دولة معترف بيها دوليا انضم الى مكتب موشيه شاريت.. تانى رئيس وزراء لإسرائيل بعد بن جوريون.. ومن موقعه في مكتب رئيس الوزراء كان له اتصالات كتير بالدول العربية المجاورة.. ودى نقطة تبدو سطحية في التعرض لسيرة حياة موشيه ساسون نفسه.. الا انه مهم اوى تركز فيها علشان في سرد موشيه ساسون لذكرياته في مصر بعد كده هتلاقى مواقف كتير تقول انه نشأ في بيت كان على تواصل مستمر مع الحكام العرب قبل حرب 48.. والتواصل ده للأسف كان يحتوى ضمنا – حسب كلامه - على اعتراف الحكومات العربية بإسرائيل كدولة لها الحق في التواجد على ارض فلسطين.. وان في شخصية مهمة جدا في التاريخ رغم عدم ذكر اسمها كتير في الكتب اسمه كمال رياض.. ده كان مهندس الاتفاق المصري الإسرائيلي بشأن غزه في أيام الملك فاروق.. قبل حرب 48.. لما دورت شوية في النقطة دى.. لقيت بلاوي اعتقد انها محتاجه تفصيل لوحدها..
هل كانت حرب 48 مسرحية معلومة النتائج الغرض منها فرض امر واقع متفق عليه مسبقاً؟
الياهو ساسون كان الطرف المفاوض مع الملك عبد الله بن الحسين ملك الأردن في موضوع اسرى حرب 48 الإسرائيليين.. عبد الله يبقى ابن الشريف حسين بتاع الثورة "او الخيبة" العربية الكبرى في الحرب العالمية الأولى.. تاريخ اسود مش محتاج حد يشاور عليه.
كيهودي شرقي ابوه دبلوماسي كان موشيه ساسون شخص مثالي لمخابرات عصابات الهاجاناه في القدس.. بعد الحرب اتجه موشيه ساسون للسياسة ومسك سفير في تركيا مكان ابوه.. بعدها اشتغل مع رئيس الوزراء ليفي اشكول كممثل لرئيس الوزراء في الاتصالات السياسية المتعلقة بالعلاقات مع العرب وبعدها مسك سفارتهم في روما لحد سنة 77.. وبعدها جه مصر علشان يبقى ثاني سفراء إسرائيل في مصر.
ليه موشيه ساسون يعتبر اخطر شخص عدى علينا فى صراعنا مع الجماعة دول؟
موشيه ساسون وصل مصر بعد كامب ديفيد وقبل شهور من اغتيال السادات.. كان مطلوب منه اغلاق صفحة الحرب وتحييد السياسة والمجتمع المصري واخراجه بره المعادلة خالص والتقديم للتطبيع باعتباره هو الواقع.. وده اللى قدر يعمله بنجاح وظهر اثره في موقف مصر المخزي من ضرب المفاعل النووي العراقي سنة 1981 واجتياح لبنان سنة 1982..
متعرفش هو كان ذكاء منهم وللا قدر.. لكن وجود موشيه ساسون في المنصة مع السادات يوم 6 أكتوبر اعتبر اكبر دليل على براءة الجماعة دول من تهمة اغتيال السادات.. واصلا مكانش في سبب يخليهم يغتالوه.. هو بالنسبالهم كان كنز استراتيجي ماشي معاهم زى الفل زى صاحبنا الحالي.. ولكن من كلام موشيه ساسون هتشوف بوضوح ان الراجل نفسه حس ان الشارع والمجتمع أصحاب واولياء الدم في وادى.. والسياسة والخارجية والاعلام بتوع الحفلات في وادى تاني خالص.
صعبت عليا زينب اوى..
زينب دى كانت الخدامة اللى جابوها تشتغل في بيت موشيه ساسون في مصر.. فلاحة مصرية اميه فهموها انها هتشتغل عند سفير.. كانت ارمله ومعاها طفلين ابوهم مات في الحرب.. الدولة متعرفش حاجه عن زينب ولا جوزها الشهيد.. هي بس كان بيفضلها 18 جنيه من معاش الراجل بعد استقطاع مصاريف ابوه وامه.. موشيه ساسون نفسه استغرب ازاى الدولة بتعامل زينب – ارملة الشهيد – بالقسوة دى وسايباها تتمرمط كده.. تخيل يا مؤمن ان حال زينب صعب على اليهودي..
ابويا الله يرحمه كان ناصري.. دخل الجيش كظابط سنة 66 وخرج منه سنة 74.. يعنى حضر المعمعة كلها.. دايما كنت اسأله عن شعوره وهو شايف العلم الإسرائيلي في قلب القاهرة بعد شهور قليلة من معارك دفن فيها رفقاء السلاح على الأرض الطاهرة.. مكانش بيرد عليا.. لكن أحيانا بيكون الصمت ابلغ من اى كلام.
بيحكي موشيه ساسون انه حضر عرض مسرحي في القاهرة.. وقابلوه الفنانين ابطال العرض وقتها بالترحاب والشاي والقهوة وهما على علم كامل بشخصيته.. الكلام ده كان أيام حسنى مبارك.. وتاني يوم قرأ في الجرايد ان ابطال العرض لما عرفوا انه هيحضر امتنعوا عن العرض..
موشيه ساسون كان صديق شخصي لشخصيات عامة زى أنيس منصور ونجيب محفوظ.. كان بينهم زيارات دافئة.. وهى العلاقة اللى لم ينفيها ايهم لحد ما ماتوا.. بل ان موشيه ساسون بيحكي انه اشتكى في يوم لنجيب محفوظ من هجوم الكتاب عليهم في الصحافة.. فنجيب محفوظ التمس ليهم العذر لأنهم بيسترزقوا من الكتابة وملهمش مصدر دخل غيرها.. الناس دى خايفه تكتب رأى الشارع الحقيقي فتنقطع ارزاقهم.. بينما هو – نجيب محفوظ – كان مؤمن ماليا.. علشان كده رأيه من دماغه..
المقطع ده من كتاب ساسون.. بالنص.. بيحكى فيه عن لقائه بنجيب محفوظ..
"كان ينهض من مكانه ويصافح ضيوفه بحراره ويقدمنى لكل منهم باسمى كاملا ومنصبى.. وهو العملاق لا ليكتب ليزيد من دخله لأن نجيب محفوظ سيحصل بعد عدة سنوات على جائزة نوبل في الأدب"
الكلام ده قبل ما نجيب محفوظ ياخد الجائزة بسنوات.
بعد 51 سنة من حرب أكتوبر ما زلنا لسه مش عارفين ايه اللى حصل..
هل كنا احنا كمان ضحايا خطة خداع عملها السادات ونظامه وكملها من بعده مبارك وازدهرت واينعت في نظام السيسي لحد ما وصلتنا للوضع الحالي وتمنها كان دم الاف من المساكين اللى اتساقوا للجهادية مجبرين؟
جنرالات الحرب الشرفاء زى الجمسي والشاذلي.. هل كانوا قطع شطرنج في لعبة محسومة مسبقاً؟؟
سليمان خاطر ومحمد صلاح واللى زيهم.. راحت أعمارهم هدر!!
الله اعلم.
رابط الكتاب في اول تعليق.

08/31/2024

شفت فى اوزباكستان طبيعة شديدة القسوة.. ما بين صيف بتوصل فيه الحرارة الى 50 درجة مئوية وشتاء جاف قليل المطر حرارته 20 درجة تحت الصفر.. يعنى الحر هيسلخ جلدك والشتاء هينشف عضمك..
من هنا خرج اطفال تمزقت بيوتهم وبلادهم بسيوف المغول اللى مبترحمش.. مكانش فى ملجأ آمن ليهم الا الشام ومصر اللى اتعلموا فيها صحيح الدين واصول الحرب والفروسية علشان يبقوا بعد كده مماليك اشداء جدعان اصحاب ايادى بيضاء فى الاسلام فى اوقات حالكة احاط بينا الاعداء فيها من كل جانب.
لما تقرأ تاريخ المماليك وتلاقى عندهم نزعة دموية بالطبيعة.. متستغربش ومتزايدش عليهم وعلى افكارهم وشخصياتهم.. فى الوقت اللى سندوتش فول زيادة ممكن ينفخلك بطنك ويعطل حواسك كلها عن العمل هما كانوا بياكلوا لحم الخيل وبيشربوا مشروب محلى قوى جدا اسمه القُمُّز "لبن خيل متخمر".. مشروب محتاج معدة حديدية علشان تقدر عليه.. حياتهم كانت قاسية واجسامهم كانت شديدة القوة لأنها معرفتش واحد على الف من الترف اللى اقل واحد فينا عايش فيه دلوقتى.

08/23/2024

خاوية على عروشها
============
اعتقد – وقد أكون مخطئ – ان بخاري بلد مباركة..
يكفيها انها مسقط رأس سيدنا وتاج راسنا الامام البخاري اللى مسبب حرقان للعلمانيين والملحدين حي وحتى بعد مماته ب 1200 سنة.. رحمة الله عليه ورضى عنه وارضاه.
المفروض تتخص ويجيلك صرع لما تسمع اسم بخاري.. اسم بخاري بييجى في الذاكرة معاه صراخ وعويل ودوشة وبكاء وهمج بيسكروا بالخمر ورجال مقهورة اغتصبت نساءها قصاد عينيها.. واللى حاول منهم يدافع عن شرفه.. اتخرط بالسيوف..
جنكيز خان مكانش انسان عادى اطلاقا.. سواء حبيته او كرهته.. الراجل ده كان كتلة من كل الصفات اللى ممكن تعرفها.. كان عنده وفرة في كل شيء.. ولكنه اختار الحياة بوفرة الصفات القبيحة رغم ان كان عنده كل حاجه يتمناها اى ملك في الدنيا في اى وقت.
بعد معارك دامية قرر محمد بن خوارزم شاه التقهقر لخراسان علشان ياخد هدنة صغيرة من الحرب مع جنكيز خان.. الراجل محتاج ينظم صفوفه ويستعد لجولة جديدة مع ناس جيوشهم مش بتخلص وعساكرهم عاملة زى ثعبان هيدرا الاغريقي الأسطوري اللى كل ما تقطعله راس.. يطلع مكانها اتنين.
جنكيز خان شافها فرصة علشان ينزل يلعب شوية على طريق خط الحرير.. خوارزم وبخاري وسمرقند كانت مدن - في الوقت ده - بتبظ منها الفلوس.. وفى نفس الوقت جيوشها مش فاضية للحرب لأنهم مركزين في خط انتاج الجمبري..
على أبواب بخاري بعت جنكيز خان مرسال لأهل البلد من كلمتين.. تسلموا وللا تتعجنوا؟
المشكلة مكانتش في سمعة الجيش المغولى اللى سبقته وحطمت معنويات الناس ولا كانت في صيغة الرسالة المرعبة ولا حتى كانت في القصص المرعبة اللى بيحكيها الناس اللى قدرت تهرب من سيوف المغول في خوارزم..
المشكلة كانت في انقسام الناس في وقت كانت الوحدة مطلوبة في كل شيء قصاد عدو مش محتاج اكتر من خرم ابره علشان يدخل بيتك يجيب عاليه واطيه..
ناس قالت نسلم ونكفى نفسنا شر المغول.. احنا كده كده ماضيين مع جنكيز معاهدة في كامب ديفيد..
وناس قالت جنكيز ملوش امان.. لازم نحارب وندافع.. يا ننتصر يا نموت شهداء.. وفى الحالتين هيبقى معانا ربنا..
هنا هنحتاج رأى عالم اجتماع يفسرلنا ليه دايما الآراء الخايبة هي اللى بتكسب.. ليه اوسخ الناس هو اللى بينجح في الانتخابات.. ليه دايما عقل الناس الجمعي بيتفق على أسوأ واوسخ اختيار متاح؟؟
هل كانت اغلبية الناس في صف تسليم المدينة من غير حرب؟
للأسف اه..
طيب المعارضين موقفهم ايه؟؟
موقفهم زى ما يكون.. هيعمل ايه 400 فارس متحصنين في القلعة قصاد عشرات الالاف من جحافل التتار!!!!
وزى ما يكون ربنا قدر الموقف ده علشان يبقى رسالة للأجيال اللى بعد كده.. ال 400 فارس قتلوا من المغول الاف.. يمكن بسبب تصميم القلعة او صعوبة الاقتحام او لأى سبب آخر.. المهم ان جثث المغول القتلى اشعلت غضب جنكيز خان.. فقرر ان بخاري لازم تبقى عبره لأى حد يفكر.. مجرد بس تفكير.. انه يقول رأيه من غير ما يكون دارس الموضوع ده كويس.
جمع جنكيز خان اهل البلد وطلب منهم يطلعوا كنوزهم المدفونة ويخرجوا بره البلد بالهدمة اللى عليهم.. اللى هيفضل معناها انه عدو.. واللى هيخرج هيموت من الجوع او في افضل الأحوال هيتحول لعبد من عبيد جنكيز خان بعد ما يخلص على المدينة باللي فيها..
الراجل صريح اهو وعداه العيب وازح..
وبرضه صدقوه لما قالهم ان اللى هيخرج من المدينة آمن.. وان احتلال محور فيلادلفيا بتاع بخاري مجرد مرحلة مؤقته..
وخرجوا وسابوله البلد..
بيقول ابن كثير في البداية والنهاية..
"فقتلوا من أهلها خلقًا لا يعلمهم إلاَّ الله عز وجل، وأسروا الذرية والنساء، وفعلوا مع النساء الفواحش في حضرة أهليهن، فمن المسلمين مَنْ قاتل دون حريمه حتى قُتل، ومنهم مَنْ أُسر فعُذِّب بأنواع العذاب، وكثر البكاء والضجيج بالبلد من النساء والأطفال والرجال، ثم أشعلت التتار النار في دور بخاري ومدارسها ومساجدها، فاحترقت المدينة حتى صارت خاوية على عروشها"
خاوية على عروشها!!
الكلمة دى هتقراها كتير اوى في سيرة جنكيز خان..
هتقرأ كمان انهم حرقوا المساجد والبيوت والأسواق وكانوا بيقتلوا اهل البلد في جماعات توفيرا للوقت.. كانوا بيدخلوا المسجد ساحبين البنات من شعورهم.. يغتصبوهم قصاد اهاليهم وبعدها يقعدوا يسكروا بالخمور وهما بيضحكوا..
واهل البلد لا حول لهم ولا قوة..
او انهم اختاروا يبقى لا حول لهم ولا قوة..
وفى يوم 10 مارس سنة 1219م (4 ذي الحجة سنة 616هـــ) بعد حصار 11 يوم اتمسحت من الخريطة مدينة بخاري تماما.. وكأنها لم تكن.. كأن الكوكب ده معداش عليه في يوم بلد اسمها بخاري كانت ملتقى التجار وطلبة العلم واهل الفن والباحثين عن السعادة والاستقرار..
بخاري.. حاضرة الدنيا.. اتبخرت..
اكثر ما يسبب الألم في النفس مش سقوط المدينة.. دوام الحال من المحال وكل ما له بداية له نهاية.. المؤلم في الموضوع هو ان اهل البلد اللى قرروا الاستسلام لجنكيز خان اشتركوا معاه في ردم الخندق المحيط بالقلعة علشان يحميها من اى هجمات وردموا معاه بايديهم الابار والسواقي اللى كانت بتمد القلعة بالمية.. يعنى مش بس رموا السيوف.. لا.. دول رفعوها في وش اخواتهم وابناءهم اللى قرروا الاعتصام بالقلعة علشان يقاوموا.. المغول وفروا عساكرهم للحرب وقرروا استخدام الزبالة اللى استسلموا في شغل الفواعليه..
نفس اللى حصل في حصار طليطلة بعد كده بالظبط..
غرسوا سيوفهم بايديهم في قلوبهم..
وليس هناك من يتعظ..
السؤال هنا..
هل يا ترى الناس اللى اختارت الاستسلام والأمان مع شخص ملوش امان.. فازوا بالأمان فعلا؟؟
علشان تعرف الإجابة.. ارجع لكلمة ابن كثير..
"خاوية على عروشها"..

Ahmed Hosni - Writer

10/31/2024

10/28/2024

10/22/2024

10/19/2024

10/16/2024

10/12/2024

10/09/2024

10/06/2024

08/31/2024

08/23/2024

Address

Telephone

Website

Alerts

Contact The Business

Shortcuts

Share

Category