10/01/2020
باش نحكيلكم شنوة ل صاير في ليبيا بالدارجة و بالفلاقي و توة تفهمو قداش الشبيحة متاعنا و كل واحد يسب في تركيا قداش صهيوني و يحب على مصلحة الكيان الصهيوني أكهو .
أغنى دولة في الغاز هي روسيا تبيع فيه لأروبا ، اما باش قاز روسيا يوصل لأروبا يلزمو يتعدى على تركيا اللي يحدها البحر الأسود على روسيا ، بالفلاقي تركيا كيف تحب تذل أروبا و تخلي البرد قاتلها و أمورها تحبس الكل تقص عليهم غاز روسيا اللي ما يتعدى كان عليها .
أكبر ثروة متاع غاز موجودة في البحر الأبيض المتوسط و مازل ما استعملو حد ، جات اسرائيل و اليونان و قبرص و عملو تعاون ثلاثي في 2015 و اتفقو على إنشاء خط أنابيب لنقل الغاز من الحقول ل فسط البحر الأبيض المتوسط إلى مصنع لتسييل الغاز في محطة فاسيليكوس للطاقة باليونان ، و المحطة هذي اتفقو البلدان الثلاثة " قبرص ، اليونان ، اسرائيل " يبنوها في 2019 .
الغاز هذا كيف يولي البلدان الثلاثة يتحكمو فيه و يبنو المحطة ، يخلصو أروبا من الذل التركي الروسي ، تولي اليونان و اسرائيل تبيع لأروبا في الغاز و ماعادش محتاجين لغاز روسيا اللي يتعدى كان على تركيا .
جات تركيا و رسمت الحدود البحرية بينها و بين ليبيا و سكرت الثنية متاع البحر بين اليونان و اسرائيل و بين أروبا بحيث ما عاد يتعدى شي لأروبا الا على الحدود اللي عملتها تركيا و ليبيا .
كيف يوصل حفتر يحتل طرابلس اللي جاية على حدود البحر الأبيض المتوسط ، يولي ينجم يتحكم في المياه الاقليمية متاع ليبيا و يولي يفك العزلة على أروبا و يخلي القاز متاع اسرائيل و اليونان يتعدالها و ترتاح من مذلة تركيا و قاز الروس متاع شرق آسيا .
الاتفاق التركي الليبي مع حكومة السراج يسكرو الحدود بيناتهم و ما يخلو شي يتعدى مقابل كل حاجة تطلبها ليبيا من تركيا عسكر فلوس أي دعم تهبط تركيا تحارب حفتر في بلاصة السراج أصل .
تركيا ولات قوة عظمى و في حلف الناتو و عندها اتفاقيات عسكرية مع القوى اللي فيه و بموجب الاتفاقيات اللي يضر تركيا يضر الدول هذي .
اش ولى عنا ؟ نتانياهو يندد بالغزو التركي على ليبيا و فاهمين علاش ، اما الطحانة العريبة لخرين ينددو بالتدخل التركي في ليبيا و هو لا تدخل لا حتى شي اتفاق على ترسيم الحدود البحرية بيناتهم ، لصالح شكون ؟ لصالح باش اسرائيل تخرج القاز من البحر الأبيض المتوسط و تحرر أروبا من الأتراك ، يعني الشبيحة لهنا اللي يحبو موقف من الحكومة على التدخل التركي حشمو باش يقولو نحبو اسرائيل هي اللي تبيع القاز لاروبا باش تتفرهد أروبا و تبقى ديما قوية و محتلتنا .
هذي الحكاية و شوفو الطحانة ل عنا لهنا و تندب على مصالح الكيان الصهيوني أكثر من الصهاينة بيدها . الله لا تباركلهم .
الصورة تزيد توضحلكم أكثر باش تفهمو الطحانة الخونة اللي عنا ما جابش الطحين قدهم .لسعد البوعزيزي
