12/05/2024
المدونة أمينة منصور تكتب : بجاه ربي نحبك تفهمني و تفسرلي انت تبكي علاه ؟ ماخذ الأستاذية في الانجليزية وتخدم خضار؟
متخرج من كلية منوبة وتسوق في تاكسي؟ متخرج حقوق وتخدم سمسار؟ عرفك في الادارة مستواه الدراسي اقل منك ؟
خدمتك بعيدة على الدار عشرين كيلومتر و لازمك تخرج قبل بثلاثة سوايع باش تخلط في الوقت ؟؟
لميت كل ما تملك أعطيته لولدك باش يحرق وغرق في البحر قبل ما يوصل لإيطاليا ؟
غصرك العيد وما زلت ما شريتش حوايج لأولادك؟ جاء راس الشهر والاساتذة بعثولك على فلوس الايتيد؟
انت تبكي علاه ؟🤔
ماخذ قرض من البانكا ومتورط وما نجمتش تخلصو ؟
عندك شيكات و كمبيالات ما خلصوش ؟؟ مديون و المداينية فاضحتك?؟
جاتك فاتورة الضو والماء و خلصتهمش و خايف لا يقصوه عليك ..؟
حاسس انك غريب و عايش في بلادك هواوي ..؟
مشيت تطلع في ورقة قالولك ارجع غدوة .. و عندك عام ماشي جاي لتوة لا خذيتها... ؟؟
جيت تطالب بحقك هنتلك مسؤول؟؟؟
كل خدمة تحب تخدمها تلقاها بالرخصة و لازمك ملايين جعالة باش تاخوها ؟؟
عندك شكون في العائلة مريض و عطاوك موعد في السبيطار بعد ستة أشهر؟؟؟
بوك و الا امك و الا خوك في الحبس زورا و بهتانا ؟؟ عايش مرعوب لا غدوة يجي عليك الدور ؟؟
انت تبكي علاه؟ فهمنى 🤔
شاهي الحوت والكيلو سردينة وصل 8 آلاف ؟
عندك 3 يقراو في الجامعة وكل واحد كاري في بلاصة ؟
حبيت تشري كيلو لحم لقيتو الكيلو ب50 دينار ؟
شادد كل يوم الصف على الخبز ؟؟ حفيت على باكو سميد ؟؟
تاكل في السلاطة بالزيت النباتي ؟؟
شاهي البانان والتفاح وما نجمتش تشريه؟
التوت هبط للسوق و وفى وانت ما سمعتش بيه؟
فهمني اكهو .. جيست نحب نفهم .. انت تبكي علاه؟🤔
و كان انت بكيت اليوم ؟؟
احنا بكينا بالغصة وقتلي القرودة متع حديقة الحيوانات في بعض البلدان لقحت ضد الكورونا و احنا مازلنا
إنت بكيت اليوم ؟؟
احنا بكينا الدم وقتلي ريناك تبوس في كتف ماكرون و قلت حماية موش استعمار و تونس لا تصلح للاستثمار
انت بكيت اليوم ؟؟
أحنا بكينا بالشهقة وقتلي أولادنا تدفنوا بحوايجهم في جبانة الغرباء
انت بكيت اليوم ؟؟
أحنا بكينا بالغل و من الغلب كل مرة تهز فينا واحد على خاطر كلمة أو موقف او رأي
أحنا بكينا بالقهرة على العلم الي تنكس و على الحال الي وصلنالو
احنا بكينا من الحشمة على الطرد المسموم و تلاقيح الإمارات و النفق الي تحت دار السفير و البليارات و 5 مليون سائح و التسعة بقرات و المليون و ثمانية مائة الف متظاهر في شارع الحبيب بورقيبة و الطيارة الي خرجت و لم تعد
احنا بكينا لين شاحت الدموع على تونس و علي جرى في تونس
جاي تبكي اليوم ؟؟
لا يا بابا ... ما عندكش الحق تبكي .. و تدخل غولة في البلاد والعباد .. و تفرج علينا العالم و الي يسوى و الي ما يسواش .. وانت صوا ديزون جينرال في ساحة الوغى ...
انت آخر واحد لازمك تبكي سيدي ... انت لازمك تتحمل مسؤوليتك .. خليلنا البكاء و النديب لينا احنا .. انت لازمك تكون فاعل ..
القادة لا يبكون
