17/04/2026
တူတယ်လို့ ကိုယ်တစ်ယောက်တည် ထင်ခဲ့တာ တကယ်ကြီးလည်း တူတာနော် ဖတ်ဖူးသူရှိရင် သိကြလိမ့်မယ်
နာမည်ကြီး BL ဝက်ဘ်တွန်းနဲ့ ဆင်တူရိုးမှားဖြစ်နေတယ်လို့ စွပ်စွဲခံနေရတဲ့ ‘The Last Duel'
One31 ရုပ်သံလိုင်းကနေ ထုတ်လွှင့်ပြသနေလျှက်ရှိတဲ့ ‘The Last Duel' ဇာတ်လမ်းတွဲဟာ လတ်တလောမှာ အလွန်လူကြိုက်များရေပန်းစားနေပါတယ်။ အားလုံးသိပြီးသား ဟံသာဝတီခေတ်မှ မဟာဥပရာဇာ (မင်းကြီးစွာ) နဲ့ ဗြနရဲ (နရဲစွမ်) တို့အကြောင်းကို မှီငြမ်းပြီး ပုံဖော်ထားတာဖြစ်လို့ မြန်မာပရိသတ်တွေလည်း အထူးတလည် စိတ်ဝင်တစား အားပေးနေကြတာကို တွေ့မြင်ကြရမှာပါ။
ဒါပေမယ့် လက်ရှိမှာတော့ ဒီဇာတ်လမ်းတွဲဟာ စာရေးဆရာမ Amulin ရဲ့ နာမည်ကြီးဝက်ဘ်တွန်းတစ်ပုဒ်ဖြစ်တဲ့ "อโยธยาเอยาวดี (Ayutthaya Oh Yaowadee)" နဲ့ ဆင်တူရိုးမားဖြစ်နေတယ်လို့ စွပ်စွဲခံနေရပါတယ်။ ဒီဝက်ဘ်တွန်းကလည်း ဟံသာဝတီနဲ့ အယုဒ္ဓယတို့ကြားက သမိုင်းကြောင်းကို အခြေခံထားတာဆိုပေမယ့် သူရဲ့ အဓိကဦးတည်ချက်ကတော့ မင်းသားနှစ်ပါးကြားက စိတ်ကူးယဉ် အချစ်ဇာတ်လမ်းဖြစ်ပါတယ်။ ဒါကြောင့် ဇာတ်ကောင်အမည်တွေကိုတော့ သမိုင်းထဲကအတိုင်း အသုံးမပြုထားပါဘူး။
ဝက်ဘ်တွန်းဖန်တီးသူက သူ့လက်ရာအောင်မြင်ပြီးနောက် ဇာတ်ညွှန်းရေးပညာရှင်တစ်ဦးဟာ စီးရီးအဖြစ်ရိုက်ကူးနိုင်ဖို့ မူပိုင်ခွင့်လိုင်စင်ဝယ်ယူချင်တယ်ဆိုပြီး ဆက်သွယ်ခဲ့ဖူးကြောင်း ပြီးခဲ့တဲ့ ရက်ပိုင်းလောက်က ပြောဆိုလာပါတယ်။
သူရဲ့ အဆိုအရ နှစ်ဦးနှစ်ဖက် ပထမဆုံးအကြိမ်ဆွေးနွေးမှုတော့ အောင်မြင်ခဲ့ပေမယ့် နောက်တစ်ကြိမ်ကျ ဇာတ်ညွှန်းရေးသူဘက်က သဘောတူညီမှုကို ရပ်နားဖို့ ဆုံးဖြတ်လာခဲ့တာပါ။ အဲဒီလိုလုပ်ရခြင်းကလည်း ဖန်တီးသူရဲ့ လက်ရာဟာ သူတို့ရည်ရွယ်ထားသလိုနဲ့ မတူညီဘဲ BL (Boys' Love) နဲ့ သက်ဆိုင်လွန်းနေတာကြောင့် ဖြစ်ပါတယ်။
ဒါပေမယ့် ဖန်တီးသူဘက်ကို ရွေးချယ်စရာနှစ်ခုတော့ ပေးခဲ့ပါတယ်။ ထိုက်တန်တဲ့ အခကြေးငွေလက်ခံပြီး ပရောဂျက်နဲ့ ပတ်သက်မှုမရှိသလိုနေဖို့ သဘောတူမလား၊ ဒါမှမဟုတ် ဝက်ဘ်တွန်းထဲမှာ ပါဝင်တဲ့အကြောင်းအရာတွေ အသုံးမပြုဘဲ နဂိုကတည်းက စိတ်ကူးထားသလို သူတို့ဘာသာပဲ ဆက်လက်ပုံဖော်သွားမှာမို့ ဆွေးနွေးမှုကို လုံးဝရပ်နားလိုက်တော့မလား စသဖြင့်ပေါ့။ ဖန်တီးသူကတော့ ဒုတိယတစ်ချက်ကို ရွေးချယ်ခဲ့ကြောင်း ဖော်ပြထားပါတယ်။
ဒီနေရာမှာတင် ပြီးဆုံးသွားတာတော့ မဟုတ်ပါဘူး။ တစ်ဖက်က ဖန်တီးသူရဲ့ နစ်နာခဲ့ရတဲ့အချိန်တွေအတွက်ဆိုပြီး အခကြေးငွေ ပြန်ပေးလာခဲ့ပါတယ်။ ဒါပေမယ့် ဒီငွေစာရင်းကို “တိုင်ပင်ဆွေးနွေးခ” ဆိုပြီး မှတ်တမ်းတင်ထားခဲ့တာဖြစ်လို့ ဖန်တီးသူကိုယ်တိုင်လည်း ရှုပ်ထွေးခဲ့ရတာပါ။
အခုလိုမျှဝေပေးရခြင်းက တခြားဖန်တီးသူတွေအနေနဲ့ ပိုပြီးဂရုတစိုက်ရှိတတ်ကြဖို့ ဖြစ်ကြောင်း ဆိုထားပြီး ‘The Last Duel' နဲ့ ပတ်သက်နေတယ်လို့တော့ တရားဝင်မပြောကြားထားပါဘူး။ ဒါပေမယ့် ပရိသတ်တွေဘက်ကတော့ ဒီဇာတ်လမ်းတွဲကို ရည်ညွှန်းနေကြောင်း နားလည်သဘောပေါက်ခဲ့ပါတယ်။
ဒါ့အပြင် ‘The Last Duel' မှာ မင်းကြီးစွာနဲ့ နရဲစွမ်တို့ကြားက ညီအစ်ကိုသံယောဇဉ်တွေကို အသားပေးပြသထားတဲ့ တချို့ဇာတ်ဝင်ခန်းတွေဟာ ဝက်ဘ်တွန်းထဲက ရေးသားထားသလိုနဲ့ ခပ်ဆင်ဆင်တူညီနေကြောင်းလည်း သတိထားမိလာရတာမို့ ဝေဖန်မှုတွေစတင်ခဲ့တာပေါ့။
ဒီနေ့ ဧပြီလ ၁၄ ရက်နေ့မှာတော့ One31 ရုပ်သံလိုင်းဘက်က ဒီပြဿနာနဲ့ ပတ်သက်ပြီး ရှင်းပြခဲ့ပါပြီ။ ဒီပရောဂျက်ဟာ လူမှုဒရာမာအမြင်ကနေ သမိုင်းကို တင်ဆက်ချပြနိုင်ဖို့ ရည်ရွယ်ချက်နဲ့ စတင်ခဲ့တာဖြစ်ကြောင်း ပြောပြထားပါတယ်။ ဒါကြောင့်ပဲ သမိုင်းကြောင်းအထောက်အထားတွေကို အခြေခံပြီး မင်းကြီးစွာနဲ့ နရဲစွမ်တို့ရဲ့ ဆက်ဆံရေးကို အဓိကအနေနဲ့ ဖန်တီးခဲ့တာပါ။
One31 ဘက်က တာဝန်ရှိသူအဖွဲ့ဟာ ဒီပရောဂျက်အတွက် ဇာတ်ညွှန်းပြင်ဆင်နေချိန်မှာ “อโยธยาเอยาวดี (Ayutthaya Oh Yaowadee)" ဝက်ဘ်တွန်းနဲ့ ဆင်တူရိုးမားဖြစ်နေမှုတချို့ကို သတိထားမိခဲ့ပါတယ်။ ဒါကြောင့်ပဲ သူတို့ဘက်ကအရင် ဖန်တီးသူဘက်ကို ဆက်သွယ်ခဲ့ပြီး အပြန်အလှန်နားလည်မှုရယူဖို့ ကြိုးစားခဲ့တာပါ။
နှစ်ဖက်ဆွေးနွေးမှုပြုလုပ်ပြီးချိန်မှာ ဇာတ်အိမ်အခြေခံက ဆင်တူနေပေမယ့် ဇာတ်လမ်းရဲ့ ချဉ်းကပ်ပုံတွေ ကွဲပြားနေကြောင်း သဘောတူညီမှုရရှိခဲ့ပါတယ်။ One31 ဘက်က ဒီပရောဂျက်ဟာ ဝက်ဘ်တွန်းကနေ တိုက်ရိုက်မှီငြမ်းထားခြင်းမဟုတ်ဘဲ ကိုယ်ပိုင်ဖန်တီးမှုသာဖြစ်ကြောင်း ရှင်းပြခဲ့ပြီး ဒါကို ဝက်ဘ်တွန်းဖန်တီးသူကလည်း နားလည်သိရှိခဲ့ပါတယ်။ ဒါကြောင့် ရုပ်သံလိုင်းအနေနဲ့ ဘယ်လိုအခွင့်အရေးမျိုးကိုမှ ချိုးဖောက်ထားခြင်းမရှိကြောင်း ဖန်တီးသူကိုယ်တိုင် အတည်ပြုပြီးသားပါ။
‘The Last Duel' ကို ထုတ်လုပ်ရေးဘက်ကနေပြီး သမိုင်းအကြောင်းအရာ၊ ပါဝင်နေတဲ့သူတွေနဲ့ ပရိသတ်တွေအပေါ် တာဝန်ယူမှု၊ လေးစားမှုနဲ့ ဂရုတစိုက်စဉ်းစားသုံးသပ်မှုတွေနဲ့ လုပ်ဆောင်ခဲ့တာဖြစ်ပါတယ်လို့ One31 က သေချာရှင်းပြသွားခဲ့ပါတယ်။ နောက်ပြီး ဘယ်လိုလက်ရာမျိုးကိုမှ ကူးယူဖို့ ရည်ရွယ်ချက်မရှိခဲ့ကြောင်းနဲ့ ဆက်လက်ပြီး ဇာတ်လမ်းဖန်တီးမှုအပေါ် သစ္စာရှိသွားမှာဖြစ်ကြောင်းလည်း ကတိပေးထားပါတယ်။
ဒါပေမယ့် အခုချိန်ထိ ပရိသတ်တွေဘက်ကတော့ one31 ရဲ့ အခုလိုဖြေရှင်းချက်အပေါ် စိတ်ကျေနပ်မှုမရှိကြသေးပါဘူး။ ငွေလွှဲမှတ်တမ်းနဲ့ ပတ်သက်ပြီး မဖော်ပြထားသလို ဝက်ဘ်တွန်းကို မကူးယူထားပါဘူးဆိုတဲ့ သက်သေအတိအကျလည်း မပြသထားတာကြောင့်ပါပဲ။
BL Emperor
