https://www.facebook.com/101873458324185/

Tobena, Khartoum North (2026)

12/04/2022

و خلي العيد عيدين
🌼🌼🌼🌼🌼
تخفيضات هااااااائلة عشانك و عشان فرحة العيد تبقى فرحتين
0123892999
اطلبي و ادللي
💚💚💚💚💚💚💚

10/09/2021

تل بالبوهية ووالقلتر و مطعم بالسوارفسك 🤩🤩🤩🤩🤩💎💎💎💎

02/01/2021

جانا العيد وجاب أفراحه 😍♥️
يلا كملو لحدي ما تصلو ( لبس الشال والجلابية ) آي آي جملة العيد البتنفسن بكل الغير متزوجين 😂💔 ، يلا مش لِبس الجلابية طوالي تتطالبي ب *" توب العيد "* حقك وتبقي مفتحة 🙈.
توب العيد وهو حمى وهاجس كبير لكل السودانيات وبتطلب لفة طويلة وحنك ومجهود عشان يتلقي ، والخيار بكون صعب في كمية الأشكال والموضة الطلعت 😅.

قالت مصممة الثياب السودانية رانيا الفاضل : (ثوب العيد يمتاز دائماً بالألوان الزاهية والمبهجة تماشياً مع المناسبة المفرحة وهي العيد ، خصوصاً عند النساء الصغيرات في السن أما عند السيدات الكبيرات في السن يمتاز بالوقار والبساطة مع ألوان هادئة ❤️.
الخامة المعتمدة لكل الأعمار هي التوتل السويسري أو حسب إمكانيات الأسرة المادية ❤️.

27/12/2020

من عادات العرس السودانية و اللّي بتمثل جزء مهم فيه هي " شيلة العروس ".

الشيلة هي عبارة عن هدايا بتقدم مع المهر من أهل العريس لأهل العروس ، وفيها بتكون حاجات تجهزية للعروس ؛ تياب و عطور و غيرها ..

بتختلف عددية الأشياء المقدمة ، و لكن في الأغلب بنلقاها ستة أو اثنى عشر -من كل حاجة - و مع العدد دا بجي تنويع في التياب المقدمة ، بلقى تياب سهرة ، و توتل ، وحرير، و تياب مطرزة ، و سادة ، وغيرها ، غالباً ما بكون اختيارها على ذوق العروس نفسها .

و كمان بنلقى توب أم العروس ؛ و بكون في الغالب سادة أو مطرز حسب ما يتناسب معها .

و كلّ الحاجات دي بتم تجهيزها و تغليفها قبل تقديمها .

ألف مبروك لعروسنا و إن شاء الله بيت مال وعيال .

23/12/2020

لكل مناسبة في توب ، وفي اللمات و العزايم و الأعراس بنلقى دائماً توب مطرز ♡

التطريز عنده أشكال كتيرة ، فبنلقى تطريز بالخيوط ، و دا ممكن نلقاه حاجة بسيطة ممتدة على طرف التوب ، و ممكن نلقى أشكال و زخارف ، وهنا بنلقى تصاميم جميلة و متنوعة .

و كمان بنلقى تطريز بالخرز ، و النوع دا بكون غالباً للأعراس و الحفلات ، و بنلقى فيه تصاميم معقدة بتوريك مدى الإبداع في صناعة التوب ، و غالباً النوع دا من التياب بكون تقيل نسبياً .

تختلف الخامات المستعملة في التوب مع نوع التطريز اللّي فيه ؛ و بنلقى الحرير و التل و التوتل هي أكتر الخامات المستعملة .

21/12/2020

أكيد سمعتو عن أنواع التوب السوداني واللبستو مهيرة واللبستو تاجوج بس نسيتو اللبستو ڤيڤيان ....
و ڤيڤيان يا أحبابنا جنوبية
ضوت لينا الخرطوم
حليلك نوبَة وصوفية
جنب الوادي المجروم

أيوة زي ما قال نور الجيلاني ضوت لينا الخرطوم 😍وست الحسان دي زي ما بنتذكر بتلبس "اللاوا" أو "اللاو" ومعروف برضو "باللاوي" ....
و"اللاوي" دة عبارة عن قطعة واحدة بتتربط في الكتف اليمين إذا إمرأة والكتف اليسار إذا رجل .....
أيوة ما لَبْسَت فيفيان بس وأبوها المك كمان بيلبس اللاوي ... بس غالبا الرجال بيلبسو أحمر أو بنفسجي فاتح خصوصاً كبارات القبيلة ....
أما المك بيلبس لون أبيض وماف زول بيلبس أبيض غيره ودة بيدل على مكانته العالية . ....
تعالو نرجع لي فيفيان بت الشُلُك هي بتحب جداً اللاوي المنقوش والمزركش ....عشان دي هويتها وبيعكس أنوثتها 😍 ودائما بتلبس معاه السّبَحْ والعقود بتاعت الأحجار الكريمة وال من العاج كمان .....
وزي ما عندنا توب حلة وتوب مناسبة وتوب طلعة وتوب بيت .....فيفيان برضو عندها توبين.....😍
عندها "لاوي طيين " ودة بتاع الحلة والبيت وبيمشو بيه الزراعة ...وكلمة طيين يعني صغير
أما النوع التاني اسمه " لاوي دونق " ودونق معناها كبير وهو فعلاً كبير ودة طبعاً للمناسبات والحفلات والإجتماعات ....
اللاوي عند أهلنا في الجنوب كان عند قبيلة الشُلَك بس ،لكن حالياً يعتبر الزي القومي هناك ودخل في العادات والتقاليد بصورة كبيرة ،فبقى في الأعراس واستقبال الضيوف ....و أتأكد تماماً إذا مشيت الجنوب ونزلت عند أي بيت ولبسوك لاوي إذا أنت مرحب بيك ألف 😊

ويلا يا ڤيڤيان ألبسي اللاوي واقدلي وسكتي الخشامة ....

19/12/2020

احيييي ... الجملة دي أنا كبنت بقولها لمن أشوف واحدة ممشوقة القوام لابسة التوب وزابطاهو بي كارينا نفس لون الخط التحت الوردة 🤣

والعجب لو كان سادة ...😍
آي سادة يعني لون واحد ...
يا جماعة في السودان دي الحاجة الوحيدة الكل ما اتغسلت وإتكوت ظبطت أكتر هي التوب مع إنه طريقة لبسة ماليها أي علاقة بالمكوة التعبو فيها 🤭

هل تعلم إنه إذا أمك جاها توب جديد بتكون خائفة الفترة الأولى كلها أنها تغسله 🌝عشان ما يفاجئها ويخرب مرة واحدة ....
وطبعا دة حسب الخامة والقماش 😌

التوب زمان من شدة ما ليهو قيمة كانت أي صورة فوتوغرافية لي جواز أو جنسية لازم تكون بالتوب 😌شفت كيف.
لا وكانت الهيبة كلها لمن تلبس الواحدة توبها وتمشي إجتماع الأمهات أو بيت المناسبة ...والعجب التوب بتاع السفريات الطارئة دة بي طقمو ماف زول بيلمسو 😎لزوم الاستعجال وكدا
..وزي ما بيقولوا أهلنا زمان" يا توب نضيف ويا بص اقيف".

16/12/2020

هل شفت الشكل دة قبل كدة؟🤭😌
أيوة دي بقجة صغنونة...بس ما أي بقجة ..دي لفة طرف التوب✨

وجوّاها دايماً بكون في كنوز 😍
أول ما تشوفها لازم تفتحها ..لأنو الحريم الكبار متعودات يربطن كنوزهن فيها😌
زي القروش مثلاً...الواحدة تكون في الخدار وباقي ليها قروش طوالي بتربطو طرف التوب🤭

مشت ضيفة لي ناس ومدّو ليها ضيافة..بتربطها طرف توبها.

شافع انضرب في عينو..عشان تبردها ليه،بتنفخ على طرف توبها ✨

أها وانتي صغيرة لقيتي شنو في ربطة طرف التوب قل كدة؟🤭

14/12/2020

"تسقط بس "✌🏼

وزي ماعرفنا سابقاً.. التياب السودانية عادة بتكتسب مسمياتها من الأحداث السياسية، والاجتماعية البتمر بيها الدولة ..
يبقى مع حدث الثورة السودانية العظيمة في ديسمبر 2018 لاازم يكون في توب عندو علاقة بالموضوع.. 🙃

ف أكيد طبعا تم اختيار الشعار المركزي للثورة ك اسم للتوب دا... " تسقط بس"..
والمرة دي ما سلبطة ساي ، وحركة مع الموجة... ، لالا عملو توب عديييل بيخص المناسبة دي ، وما اكتفو انو يسموهو تسقط بس وخلاص،. لا ديل كتبو فيو عديل "تسقط بس"..

صعبيييين احنا صعبين...😎😎

والجاي لسة أزبط كمان وكمان ✌🏼
ف ابقو قراب عشان تشوفو الجاي 🌹

13/12/2020

هل عارفة ي شابة ي سودانية إنو التوب البتلبسيو ومستهينة بيو ده أكبر المصانع البتنتجو موجود في دولة سويسرا؟😌...طيب هل عارفة إنو المصمم السويسري بتابع السوق السوداني عشان يبتكر أرقى وأجمل أنواع الموديلات الحديثة عشان خاطر عيونك وعشان تعجبك؟ 🌚
أي ي بت قايلة التوب ده هيّن ولا لين😌💛.

طيب تعالي أوريك شوية معلومات عن التوب السوداني الأنيق والأقمشة بتاعتو ✨.

البميز التوب السوداني المرونة الواضحة في صناعته من حيث المواد المستخدمة، ومن أنواع الأقمشة عندنا :
-خامات القطن
- البوليستر
-الشيفون
-الحرير
-البودرة
-الهزاز (الحنين المحبب لقلوبنا كلنا🤤)
-التوتال السويسري وده أكترها استخداماً لأنو مناسب مع جو السودان المعروف طبعاً😹.

ف كوني كُلك فخر بالزي الشعبي البتلبسيو لأنو حاجة أنيقة وعظيمة شديد.💛.

10/12/2020

" ندى القلعة " ، " الهمر " ، " الزوجة الرابعة " ، " ميسي " ...؟؟
دي شنو يخوانا الأسماء الما عندها علاقة ببعض دي 🤨 ؟
الحاجات دي جمعها لينا " التوب السوداني" فهي أصلاً أسماء طلعت للتوب في فترة من الفترات لأحداث أو مناسبة معينة خلونا نواصل ونشوف الأسماء دي جات من وين 😅 .

حيحكي لينا أسرار الثياب والأسماء ( العوض الحاج يوسف) تاجر في سوق أمدرمان ، على لسانه فقال إنو الأسماء دي بتجي من الزباين نفسهم 😅 مثلاً :
- " ندي القلعة " ، اسم لتوب مزركش ولامع ظهرت بيو الفنانة في واحدة من حفلاتها قبل سنوات 🌹.
- " الهمر " جاء الاسم مع ظهور العربية المشهورة بالاسم ده .
- وفي اسم بضحك "الزوجة الرابعة" وده النسوان ما بحبو بس بشترو ومعروف إنو أكتر حاجه بكرهوها النسوان سيرة العرس من الراجل 😂😂.
- " ميسي " وده كمان نوع بتزحلق كتير شديد وما بثبت فشبهوهو باللاعب المشهور 😅.

وتتوالى الأسماء ! فيعني يخوانا خلوكم مواكبين الأحداث عشان تعرفوا أي اسم جديد طلع ، وترقبونا مع أسماء غريبة وعجيبة وطريفة 🔐 .

07/12/2020

-ماشة وين لابسة التوب دا ؟

= ماله ؟

-دا توب أبيض ، التوب الأبيض ما بتلبس ساي .

=كيف؟

-التوب الأبيض عنده رمزية ؛ فبنلقاه بعبر عن القدوة على شان كدة المعلمات بلبسوا تياب بيضاء ، و برضو النساء العاملات بلبسوا للشغل تياب بيضاء ، و الحاجة دي قديمة ؛ من الستينات مع بداية ظهور النساء في القطاع العام ، و كمان التوب الأبيض بتلبس كحداد اذا وحدة زوجها مات ؛ فبنلقاها لابساه طول فترة عدتها و حتى بعدها .

=طيب برضو في بنات بلبسوه ، و بتصوروا به كمان !

-أيوة ، لكن دا بكون بس في المناسبات و الإحتفالات الوطنية ؛ يعني في النهاية ما بتلبس ساي عرفتي ، يلا غيريه بواحد تاني .

=طيب .

Tobena

12/04/2022

10/09/2021

02/01/2021

27/12/2020

23/12/2020

21/12/2020

19/12/2020

16/12/2020

14/12/2020

13/12/2020

10/12/2020

07/12/2020

Address

Telephone

Website

Alerts

Shortcuts

Share

Category