07/06/2026
وانا بعمل الساوردو افتكرت إن في ناس كتير عندهم مشكلة او حساسية من الجلوتين وحسيت إن حاجة مؤذية اووي ان يبقى الtrend دا منتشر وهما بيتفرجوا بس فقررت اعمل ساوردو خالي من الجلوتين الحمدلله بفضل ربنا ضبط من اول مرة
Gluten free sourdough starter
خميرة طبيعية خالية من الجلوتين في ٤ أيام
المكونات :
-دقيق رز اسمر او عادي
-ماية
-تمرة(اختياري)
اليوم الأول:
طحنت رز بني ونخلته كويس عشان يديني ملمس الدقيق، ممكن تشتروه جاهز أسهل.
حطيت في حدود 15 ج دقيق رز.
و 15 ج ماية.
وطبعاً التمرة ونص تغطية بمكان دافي.
اليوم الثاني:
تاني يوم كان في تفاعل بسيط.
كررت نفس الخطوات وغذيتها بنفس وزنها ماية ودقيق رز وغطيتها وسبتها.
دا كان شكلها بعد 10 ساعات بس ما شاء الله من تاني يوم.
بعد 16 ساعة قررت أغذيها بنفس كميتها.
قلبتها كويس وهيا قوامها بيكون رملي كدا.
حطيتها فبرطمان أكبر وضفت التمرة وحطيت الأستك وغطيتها نص تغطية وسبتها فمكان دافي.
اليوم الثالث:
بعد 18 ساعة لقيتها نفشت وهبطت وأنا ماخدتش بالي.
شلت منها هادر وأخدت منها 30 ج وغذيتها 30 ج دقيق رز و 30 ج ماية.
اليوم الرابع:
كررت الخطوات بعد 14 ساعة لأني لقيتها ارتفعت وهبطت تاني.
دا كان شكلها بعد 12 ساعة ما شاء الله.
غذيتها كمان مرتين فنفس اليوم، أول مرة بنفس وزنها وتاني مرة كان ضعف وزنها.
ودي كانت النتيجة بعد 4 ساعات بس ما شاء الله، كدا هيا جاهزة للخبز لأن الخميرة الطبيعية الخالية من الجلوتين ماينفعش معاها اختبار طفو، الاختبار الوحيد إنها توصل للـ Peak بعد 4-5 ساعات تقريباً.
قولولي بقى حابيين تشوفوا نتيجة رغيف الساوردو بيها؟؟
#ساوردو
