01/06/2026
Aaj kal Facebook kholun to har doosri post kisi na kisi tashaddud ki kahani hoti hai. Kahin baap apne bachche ko maar raha hai, kahin maa apne hi jigar ke tukre par zulm kar rahi hai, kahin hala, mamu, padosi, teacher ya malik apni taqat ka ghalat istemal kar raha hai. Har roz itni dardnaak videos aur tasveerain dekh kar dil bojhal ho jata hai. Kabhi kabhi lagta hai ke hum ek aisi society ki taraf ja rahe hain jahan insaniyat ki jagah gusse, nafrat aur tashaddud ne le li hai.
Sab se zyada takleef is baat ki hoti hai ke bachche, jo sab se kamzor aur masoom hote hain, aaj apne hi gharon mein mehfooz nahin rahe. Jin haathon ko unki hifazat karni chahiye, kai jagahon par wahi haath un par uth rahe hain. Bachcha jab apne maa baap، rishtedaron aur apne ghar ke logon se hi khauf khane lage to phir us ke liye aman ki jagah kahan bachti hai?
Mujhe samajh nahin aata ke hum itne tashaddud pasand kyun hote ja rahe hain. Kya hum itne be-sabar ho gaye hain ke har masle ka hal sirf zor aur maar peet mein nazar aata hai؟ Bike lag jaye to lathiyan chal jati hain، gaari ko halka sa dhakka lag jaye to log jaan lene par utar aate hain۔ Kisi se ikhtilaf ho jaye to baat cheet ke bajaye gaali aur tashaddud shuru ho jata hai۔
Ajeeb baat ye hai ke jahan sach bolna chahiye، jahan zulm ke khilaf khara hona chahiye، wahan aksar hum khamosh rehte hain۔ Lekin jahan koi hum se kamzor mil jaye، koi bachcha، koi ghareeb، koi mulazim ya koi aisa shakhs jo jawab na de sake، wahan hum waqt ke Firaun ban jate hain۔ Humein apni taqat dikhane ka shauq ho jata hai، jaise doosron ko neecha dikhana hi hamari bartari ka saboot ho۔
Sach to ye hai ke tashaddud taqat ki nishani nahin، kamzori ki nishani hai۔ Jo shakhs apne gusse ko qaboo nahin kar sakta، jo baat ko baat se hal nahin kar sakta، jo har masle ka jawab haath uthana samajhta hai، woh taqatwar nahin balki andar se kamzor hota hai۔
Humein khud se ek sawal poochna chahiye: Hum kis taraf ja rahe hain؟ Kya hum waqai itne beraham ho gaye hain ke doosre insaan ka dard mehsoos karna hi bhool gaye hain؟ Kya hamara bas chale to hum sirf apni marzi ki duniya bana kar baqi sab ko mita dein؟ Kyun hum har us shakhs ko saza dene lagte hain jo hum se kamzor ho؟
Aaj zarurat is baat ki hai ke hum apne bachchon ko sirf taleem nahin، rehmat، sabr، mohabbat aur insaniyat bhi sikhayen۔ Unhein yeh batayen ke taqat kisi ko rula dene mein nahin، kisi ko bacha lene mein hoti hai۔ Kisi ko dara dena bahaduri nahin، kisi ko mehfooz mehsoos karwana bahaduri hai۔
Allah na kare ke woh din aaye jab bachcha ghar ke darwaze se andar aate hue bhi khauf mehsoos kare۔ Bachche gharon ki zimmedari hote hain، ghussa nikalne ka zariya nahin۔ Agar hum ne apne rawaiyon ko na badla to hum ek aisi nasl tayar kar rahe honge jo mohabbat se zyada khauf ko pehchanti hogi۔
Aur jis muashray mein bachche mehfooz na hon، wahan mustaqbil bhi mehfooz nahin hota۔ 💔
Jo tasveer ya video maine is post mein share ki hai, woh bhale hi Pakistan ki nahin balki India ki hai. Lekin dard, zulm aur masoomiyat ki koi sarhad nahin hoti. Ek dedh saal ka bachcha na Hindu hota hai, na Musalman, na kisi siyasat ka hissa. Woh sirf ek masoom bachcha hota hai jo mohabbat, hifazat aur rehmat ka haqdaar hota hai.
Main aapse guzarish karungi ke agar aap ka dil kamzor hai to is video ko na dekhein, aur na hi isay search karne ki koshish karein. Kuch videos sirf aankhon se nahin dekhi jatin, woh rooh par naqsh ho jati hain. Main khud bhi is video ko dekhne ke baad kai ghanton tak uske asar se bahar nahin nikal saki.
Mujhe samajh nahin aata ke koi insaan ek itne chhote, be-zuban aur masoom bachche par itna zulm kaise kar sakta hai. Aakhir kis jurm ki saza thi yeh? Kis baat ka inteqam tha? Ek dedh saal ka bachcha itni takleef, itna dard aur itni be-rehmi kabhi deserve nahin karta.
Kabhi kabhi lagta hai ke hum insaan taraqqi to kar rahe hain, lekin insaniyat kahin peeche chhoot gayi hai. Hum mazhab, qaumiyat aur rang par bahas karte hain, lekin jab ek masoom bachcha zulm ka nishana banta hai to sab se pehle uski masoomiyat nazar aani chahiye, uska mazhab nahin.
Woh bachcha Hindu tha ya Musalman, is se farq nahin padta. Farq is baat se padta hai ke woh ek bachcha tha... aur us par itna zulm hua ke uska tasawwur hi dil ko cheer deta hai.
Allah hum sab ko rehm dil banaye, aur har masoom bachche ko har qism ke zulm se mehfooz rakhe. Ameen.
