Samalikha, 783 IRC Compound General Luis, Paso de Blas, Valenzuela (2026)

24/05/2026

Gabay at Aral sa Couple's Retreat
John Abel Villa, Tarlac

Noong nakaraang araw, kami ng aking asawa ay napiling dumalo sa isang Couple’s Retreat. Ito ay naging isang masaya at makabuluhang karanasan para sa amin. Marami kaming natutunan mula sa aming mga kapwa kalahok at sa mga speakers na nagbahagi ng kanilang kaalaman at karanasan.

Nagkaroon din ng pagkakataon na magbahagi ang bawat isa ng kanilang kwento tungkol sa kanilang relasyon. Bukod dito, nagkaroon din ng photoshoot kung saan kami ay naka-couple na kasuotan—isang simpleng alaala ngunit may malaking kahulugan.

Sa retreat na ito, mas nakilala namin ang aming sarili at ang isa’t isa, pati na rin ang aming mga tungkulin bilang mag-asawa. Natutunan din namin na kahit pare-pareho ang mga pagsubok na pinagdaraanan ng mag-asawa, nagkakaiba-iba pa rin ang paraan kung paano ito hinaharap at nilulutas.

Pinakatumatak sa amin ang kahalagahan ng komunikasyon. Hanggang ngayon ay patuloy namin itong isinasabuhay. Naniniwala kami na mas nagiging matibay ang samahan kapag may bukas na pag-uusap, pag-unawa, at agarang paghahanap ng solusyon sa problema. Higit sa lahat, napagtanto namin na mahalaga ang presensya ng Diyos sa aming relasyon upang lalo itong mapagtibay.

Sa kabuuan, ang Couple’s Retreat na ito ay nagpatibay pa lalo sa aming pagsasama bilang mag-asawa. Hindi man maiiwasan ang mga problema, ngunit sa pamamagitan ng pagkakaunawaan, komunikasyon, at gabay ng Diyos, naniniwala kaming mas tatagal at titibay pa ang aming samahan.

23/05/2026

Dugong Panday
Khea Kassandra, Junction Luna

Ngayong buwan, kabilang ako sa Kultura ng Tagumpay ng Pandayan Bookshop. Noong una, kinakabahan ako dahil wala akong kasabay sa pagbiyahe at ito rin ang unang beses kong bumiyahe nang mag-isa sa malayong lugar. Hindi ko maiwasan mag-isip na baka maligaw ako. Gayunpaman, ligtas naman akong nakarating sa lugar kung saan kami susunduin. Dito, napagtanto ko sa aking sarili na kaya ko naman palang bumiyahe nang mag-isa dahil kay Pandayan.

Dahil likas din akong mahiyain at hindi ko pa kilala ang aking mga makakasama sa venue, may pangamba akong baka hindi nila magustuhan ang aking ugali o hindi nila ako tanggapin. Ngunit nagkamali ako. Pagdating ko pa lamang sa pick-up place, ramdam ko na agad ang pagiging bukas at palakaibigan ng bawat kapwa Panday. Dahil dito, unti-unting nawala ang aking kaba at pagkamahiyain.
Sa unang gabi pa lamang namin sa Arete, pakiramdam ko ay matagal na kaming magkakakilala. Naging magaan ang aming samahan, at nagawa pa nga naming mag-TikTok nang magkasama kinabukasan.

Natural sa bawat kapwa Panday ang pagkakaroon ng dugong Panday, dugong marunong makisama, umunawa, at tumanggap ng kapwa. Hindi man kami magkakakilala noong una, parang may koneksyon na agad na nagbubuklod sa amin. Dito ko napagtanto na ang pagiging isang Panday ay hindi lamang tungkol sa trabaho, kundi sa pagkakaroon ng pusong bukas para sa iba. Dahil pare-pareho kaming Dugong Panday, nagiging madali ang pakikipagkaibigan at pagbuo ng samahan saan man kami dalhin.

22/05/2026

Higit sa Isang Kahilingan: Tunay na Halaga ng Pagsasanay
Greta Lei Cabalonga, Ilagan

Noong una, inisip ko na ang Basic Red Cross Training ay isa lang requirement sa lahat ng kompanya. Pero sa dalawang araw namin na pagsasanay, doon ko naunawaan ang tunay nitong halaga. Hindi lang pala ito tungkol sa pagkatuto ng first aid o tamang pagresponde sa emergency, kundi tungkol ito sa pagiging handa na makapagligtas ka ng buhay.

Napagtanto ko na mahalaga ang kaalamang ito hindi lang sa loob ng trabaho, kundi pati sa araw-araw na buhay lalo na sa aking pamilya. Sa simpleng kaalaman, maaari kang maging dahilan ng kaligtasan ng iba.

Mas lalo kong na-appreciate ang kompanya dahil sa pagbibigay nila ng ganitong oportunidad. Ipinapakita nito na hindi lang nila iniisip ang trabaho namin, kundi pati ang aming kaligtasan at kakayahan bilang indibidwal. Sa huli, ang Basic Red Cross Training ay hindi lang benepisyo, ito ay isang mahalagang kaalaman na dala ko saan man ako magpunta, at maaaring magamit sa oras na pinaka-kailangan.

21/05/2026

Panaginip na Nagkatotoo sa China
Rolando Legaspi, Cauayan

Isa sa hindi ko makakalimutang karanasan ay ang makapunta sa ibang bansa – lalo na sa bansang China. Akala ko ay isang panaginip lamang ang makaranas ng ganito, at hindi ko akalain na matutupad ito sa ganitong bilis. Labis ang aking ligaya nang ibigay ito sa akin ng Pandayan. Ang limang araw na tour sa China ay nagdulot sa akin ng labis na kasiyahan at pagkabigla, dahil alam kong maraming magagandang lugar ang aming mapapasyalan.

Sa unang araw namin sa Shanghai, parang pumunta ako sa ibang mundo. Ito ang unang pagkakataon kong makakita ng ganitong lugar – napakataas ng mga gusali at talagang nakikita mo kung gaano katanyag ang lungsod ng Shanghai. Marami kaming kasama sa tour, at kahit na hindi kami magkakakilala noon, sobrang bait ng bawat isa. Ramdam mo na ikaw ay kasama at pinapahalagahan sa paraan ng kanilang pakikitungo sa isa't isa.

Sa mga limang araw na akong nasa China, pakiramdam ko ay nabuhay akong hari. Natutulog kami sa napakaganda at komportableng hotel, at paggising ay nakakakain kami ng lahat ng gusto namin mula sa napakaraming pagpipilian ng pagkain. Pagkatapos ay mamamasyal kami sa mga magagandang destinasyon – parang panaginip ngunit totoo namang nararanasan. Hindi ko makakalimutan ang lahat ng lugar na aming binisita: ang Ancient Water Town, The Bund, City God Temple Area, Salt Lake Oriental, ang palabas na Xiaoyao You, Florentia Village Outlet, at higit sa lahat – ang Disneyland, na tinatawag na pinakamasayang lugar sa mundo. Sobrang dami ng aming napuntahan at talagang sulit ang lahat ng ito. Tunay na ligaya ang naramdaman ko sa tour na ito sa China.

Sana ay patuloy na iparanas ng Pandayan sa mga kapwa empleyado ang ganitong karanasan, para maramdaman din nila kung gaano kasaya ang makapunta sa ibang bansa at maranasan ang kaginhawahan at saya na tila parang hari at reyna.

08/05/2026

Ang Benepisyo ng Emotional Intelligence
Lemuel Liberato, Roxas

Isa sa magandang benepisyo sa atin ng Intellicare ay ang mga Wellness Program Lecture. Bilang Pinuno ng aming Kopon ay pinili ko ang Emotional Intelligence na topic upang mas maunawaan at maisabuhay ko ito sa pang-araw-araw lalo sa ating ginagampanang tungkulin.

Sa aking natutunan, may limang core parts ang Emotional Intelligence:
• Self-awareness: Ito yung kakayahan maintindihan at maunawaan ang sariling nararamdaman. Na hindi tayo nagpapadala sa bugso ng damdamin.
• Self-regulation: Nag-iisip muna tayo bago mag-react. Isa din ito sa natutunan ko sa Pandayan na pag-isipan muna ng ilang beses bago bumuo ng desisyon. Isa sa aking ginagawa ay ang paghinga ng malalim, na para bang itinataboy ang sanhi ng problema.
• Motivation: Kailangan maging positibo lagi ang ating pananaw maging sa tindahan at lalo na sa ating buhay.
• Empathy: Bilang isang Tagapagpatupad at pinuno ay lagi kong isinaalang-alang ang aking mga Kapwa. Kinakamusta sila kung okay ba sila. Dahil buhay sa ating Kultura ang magmalasakit sa Kapwa.
• Social Skills: Ito din ang aking inaaral sa ngayon dahil isa ito sa aking for improvement.

Sa kabuuan, bilang isang Kapwa ay napakalaking tulong sa akin ang Emotional Intelligence dahil mas namamanage ko nang maayos ang aking emotion hindi lang sa tindahan pati sa aking sariling buhay.

29/04/2026

Malasakit sa Maglola
Marjorie Alcarion, Aparri

Mayroong maglola na tumungo sa aming tindahan dala ang kanilang HP printer para ipaayos dahil hindi daw po ito nagpriprint. Minabuti ko po na i-check kung ano ang maaaring dahilan nito. Dahil hindi ko kabisado masyado ay tumawag ako kay Sir Butch. Sa aming pag-uusap ay napag-alaman namin na maaaring cartridge ang problema dahil nagbi-blink na ang ilaw sa tabi ng cartridge sign.

Tinanong ko kung gaano na po katagal ang printer; nasa five years na din po. Naalala ko po ang isa naming panauhin na nag-inquire din po ng printer at ayon sa kanya ay five years daw po bago nila pinalitan ang cartridge ng kanilang printer. Pumayag naman po ang panauhin na palitan na ang cartridge, ngunit dahil colored lang po ang available sa atin ay lumabas sila para bumili ng black para sana sabay na mapalitan dahil hindi daw nila ito kabisado at taga-Lallo pa po sila.

Pagbalik nila ng tindahan, binigay nila sa akin ang kanilang binili. Nakaplastic lang ito kumpara sa atin na nakabox. Agad kong tinanong kung magkano ang bili nila; 2,250.00 daw po, na 661.00 lang po ang presyo natin. Sobrang naawa ako sa maglola. Sabi ko, “Ma’am, subukan ko pong ibalik itong black at colored na lang po ang bilhin niyo muna na available sa amin, at makiusap po kayo sa pinagbilhan niyo kung maaaring ibalik na lang dahil naayos naman na po ang printer. Pakiusapan niyo na lang po ng maayos.”

Pagbalik ng panauhin sa tindahan pagkatapos ibalik ang items ay 2,000 na lang daw po ang binalik sa kanila. Ganoon pa man, sobrang pasasalamat ng panauhin dahil nakatipid daw po sila dahil sa ating ginawang malasakit sa kanila. Bilang pasasalamat ay nag-aabot sa akin ang panauhin ng pang-meryenda, ngunit agad kong sinabi na kaligayahan ko na makatulong sa kanila at bumalik na lang po sila sa ating tindahan. Bago umalis ay sinabi nilang, “Ma’am, babawi kami sa’yo.” Ngumiti ako at nagpasalamat sa kanila.

15/04/2026

GOOD GOVERNANCE BOARD
Genvy Kaye Fabian, Iba

Nitong nakaraan ay nakapukaw sa isang panauhin ang ating Good Governance Board. Nakita niya kasi ang kanyang sarili na nakapaskil dito. Siya ay si SFO2 Lloyd Casilao Francisco ng Botolan Fire Station dito sa Zambales. Biro niya pa sa akin na dapat ay nasa harapan ang kanyang letrato dahil pride siya ng Zambales.

Tinanong niya rin ako kung ito ba ay nakapost sa Facebook. Ang banggit ko ay sa lahat ng branch ng Pandayan Bookshop ay nakashare every week ang mga posted na halimbawa ng Good Governance. Sa kanyang mukha ay hindi mapagsidlan ang tuwa na kanyang nararamdaman nang makita niya ang kanyang imahe sa ating tindahan.

22/03/2026

Ang Kalooban ng Kapwa Panday
Rhon Aril, Balagtas

Ang aking TPOV sa nagdaang KP ni Boss JVC na pinamagatang “Ang Kalooban ng Kapwa”. Gaano mo nga ba kakilala ang iyong sarili? Makikilala mo ba ito sa iyong pangangatawan, isipan, kalooban o diwa? Para sa akin, darating nga ang panahon ng tayo ang tatanda at manghihina, ngunit mananatili sa ating puso at isipan ang ating paninindigan sa mga pasya natin sa buhay na magsikap at magtagumpay. Gaya nga ng sinabi ng isang matandang mandirigma, “bumagal man ang isipan, humina man ang katawan, di susuko ang kalooban, diwa ang tanging sandalan. Dito naipapakita na kailangan ay hindi tayo sumuko, hindi tayo titigil sa paghahanap sa mga bagay na makakapagpakamit natin sa ating mga mithiin sa buhay. Tulad ng pag pasok natin sa mahal nating kumpanya, ang Pandayan. Dumating man ang araw na tayo ay tumanda at mawala sa Pandayan, mananatili sa ating kalooban ang mga magagandang ala-ala at ang kultura ng Pandayan, lalo na ang Kapwa Factor na Pakikipagkapwa-tao, pagkamakatao at pagpapakatao. Isa din sa binigyan ko ng pansin ay ang nabanggit sa learning session na “Pagkatao ang mahalaga, hindi ang iyong itsura. Maling sukatan ang balat o ang panlabas na anyo ng isang tao, sabi nga “don’t judge the book by its cover. Mas mainam na bumase sa kalooban ng isang tao para kilalanin ito kaya bukod sa ating Kapwa Factor ay kailangan na linangin at hubugi din natin ang ating pag-iisip at pagkilos. Napaka swerte nating mga Kapwa Panday dahil sa ating kumpanya, bukod sa may malasakit sa Kumpanya at mga Boss hinuhubog din nila ang ating pagkatao bilang isang magaling at mabuting Kapwa.

21/03/2026

Liwanag sa Pandayan Book Fair
Christian D. Pacheco, Cabanatuan Mabini Extension

Napakasaya at napakablessed ng araw na naganap ang Pandayan Book Fair! Hindi ko pa rin mapigilang ngumiti kapag naaalala ko kung gaano karaming paaralan ang nagpaunlak sa aming imbitasyon—walong (8) school ang buong pusong sumuporta at nakibahagi sa ating proyekto.

Pero ang pinakanakakatuwang bahagi? Hindi na kami nahirapan maghanap ng schedule dahil mismong mga principal at g**o na ang nagbanggit ng aming book fair sa iba’t ibang paaralan sa paligid ng Cabanatuan! Grabe, ang sarap sa pakiramdam na ang Pandayan ay kinikilala at ipinagmamalaki nila dahil sa ating malasakit at serbisyo.

Sa bawat pagbisita namin, ramdam ko ang tuwa ng mga bata na sabik tumuklas ng mga bagong libro. At siyempre, ang free storytelling ay talaga namang nagpasaya at nagbigay-inspirasyon sa kanila. May ilang g**o pa ngang nagsabi na inaasahan na nila na taon-taon ay makakatuwang nila ang Pandayan sa mga ganitong makabuluhang gawain, at doon ako lalo pang natuwa at na-motivate. Ang saya isipin na nagiging parte tayo ng paghubog ng imahinasyon at katalinuhan ng mga estudyante.

Sa simpleng paraan, nakita ko kung paano nakakapagdulot ng liwanag ang Pandayan sa mga paaralan. Ang bawat ngiti, tawa, at pasasalamat ng mga bata at g**o ay nagsilbing paalala kung bakit napakahalaga ng ginagawa natin.

20/03/2026

Produktong Kaalaman: Kalakasan ng Kapwa Panday
Daryl Usi, Camarin

Meron po kaming panauhin sa ating tindahan na ang nasabi na lang po ay, “Professional kayong sumagot.” Natanong ko naman po kung bakit po niya ito nabanggit at ang sabi naman po ni panauhin sa atin ay maganda ang kaalaman ng bawat kapwa sa paligid niya dahil sa lahat po nang tinanong niya sa selling area ay alam ang isasagot sa kanya.

Aniya, "Pumunta ako sa N.. upang mamili ngunit kahit mga cashier ay hindi alam ang isasagot sa bawat katanungan ko kung saan gamit ang aking pinamimili dito." Masaya daw pong mamili dito dahil nasasagot natin ang lahat ng katanungan niya sa kanyang pinamili. Ganoon din po nang nagtatanong siya sa amin patungkol sa printer kung ano ang mga dapat gawin at ano ang magandang printer para sa kanila.

Maraming salamat po talaga sa bawat Product Knowledge na aming nadadaluhan o napag-uusapan; nagkakaroon po kami ng kaalaman sa bawat naituturo sa amin. Ganoon din sa aming mga kapwa na walang sawang nakikinig sa aming payo sa pagtitinda. Malaking bagay ang pagpapakilala natin sa ating mga paninda upang matugunan natin ang bawat tanong ng ating mga panauhin, gaya nito na nagkaroon sila ng comparison kung papaano sila ituring ng bawat tao sa tindahan. Ito rin po ang kalakasan ng ating mga tindahan sa ibang competitor kaya maraming salamat po sa mga product knowledge na naituro sa amin.

19/03/2026

Serbisyong Pandayan: Higit Pa sa Pagbabalot
Benson Fronda, Muñoz

Isang araw, may isang babaeng panauhin na nagpabalot ng dalawang unan. Ang kanyang hiling ay kung maaari raw ay pagsikapang magkasya ang mga ito sa iisang kahon. Sa tulong ng tiyaga at maingat na pagbabalot, napagkasya naman namin ang mga ito sa isang kahon na maayos at presentable.

Habang ako ay nagbabalot, pabirong sinabi ng panauhin, "Hindi pala ako puwede sa Pandayan, dapat pala marunong ka munang magbalot ng regalo." Agad namang sumagot ang aking katrabaho na si kapwa Billy at sinabing, "Hindi po, dito na lang din po namin ito natutunan." Natawa ang panauhin at halatang natuwa sa sagot ni kapwa Billy.

Dagdag pa ng panauhin, pabiro ring tinanong kung saan napupunta ang bayad sa gift wrapping. Sinabi pa niya na dapat lang daw na sa amin iyon mapunta dahil kitang-kita raw ang effort namin. Bilang tugon, maayos kong ipinaliwanag na, "Ayos lang po iyon sapagkat higit pa ang ibinibigay ng Pandayan sa amin—marami kaming benepisyo at patuloy na pagkakataong matuto at umunlad."

Dahil dito, napangiti ang panauhin at sinabi, "Ah, nakakatuwa naman." Sa sandaling iyon, aking napagtanto na ang simpleng paglilingkod nang may malasakit at pagpapahalaga sa trabaho ay hindi lamang nagbibigay-saya sa mga panauhin kundi pati na rin sa amin bilang mga kapwa Panday. Ito ang diwa ng pagtatrabaho sa Pandayan Bookshop: ang maglingkod nang may puso at dangal, lalo na sa panahon ng Pasko.

Samalikha

24/05/2026

23/05/2026

22/05/2026

21/05/2026

08/05/2026

29/04/2026

15/04/2026

22/03/2026

21/03/2026

20/03/2026

19/03/2026

Address

Website

Alerts

Contact The Business

Shortcuts

Share

Category