24/10/2024
🙏Amang Makapangyarihan🙏
Lumalapit kami sa Iyo ng may kababaang loob, dinadalangin ang lahat ng naapektuhan ng Bagyong Kristine. Nawa'y Iyong protektahan ang mga nawalan ng tahanan, ari-arian, at mahal sa buhay. Yakapin Mo sila sa oras ng kanilang pangangailangan at bigyan ng lakas upang magpatuloy.
Panginoon, itinataas din namin sa Iyo ang mga magigiting na rescuer at emergency responders na isinasakripisyo ang kanilang buhay para magligtas ng iba. Bigyan Mo sila ng karunungan, tapang, at tibay ng loob sa kanilang mga gawain. Nawa'y samahan Mo sila sa bawat hakbang upang ligtas nilang magampanan ang kanilang tungkulin. Iparamdam Mo sa kanila ang Iyong presensya habang sila'y nagbibigay ng pag-asa at tulong sa mga nangangailangan.
Panginoon, nawa'y yakapin Mo ang lahat ng nasa landas ng bagyo. Pawiin Mo ang kanilang takot, palakasin ang kanilang loob, at pagsama-samahin ang mga komunidad upang magtulungan at magdamayan. Ipagliwanag Mo ang Iyong pagmamahal at biyaya sa gitna ng pagsubok na ito, at ipaalala sa lahat ang Iyong walang hanggang habag at pagkalinga.
Nagtitiwala kami sa Iyong kapangyarihang magpagaling, magprotekta, at magbalik ng sigla.
Sa Iyong pangalan, ito'y aming dalangin.
Amen.
