02/03/2026
"अबको लडाइँ 'भोट'को मात्र होइन, 'भरोसा'को हो: उठौँ, जागौँ र नयाँ इतिहास रचौँ!"
आदरणीय लोकतन्त्रका अथक सेनानी एवं गतिशील प्रचार-प्रसार टोलीका साथीहरू,
जय नेपाल!
आज हाम्रो काँधमा केवल एउटा निर्वाचनको जिम्मेवारी मात्र छैन, बरु आगत पुस्ताको भविष्य र यो गौरवशाली पार्टीको पुनर्जागरणको भार छ। विपक्षी साथीहरू एउटै घरमा ३-४ पटक पुगेर मतदाता अल्मल्याउने सूक्ष्म कसरतमा लागेको सूचना प्राप्त भएको छ।
उनीहरूको यो सक्रियताले एउटै कुरा प्रमाणित गर्छ ,उनीहरू नेपाली कांग्रेसको बढ्दो लहरदेखि त्रसित छन्। मैदानमा कांग्रेसको आँधी आएको छ र उनीहरू अत्तालिएका छन्।
तर साथीहरू, विपक्षीको यो छटपटीलाई हामीले नजरअन्दाज गर्नु हुँदैन।
उनीहरू ३ पटक पुग्छन् भने हामी ५ पटक पुग्नेछौँ।
उनीहरू ४ पटक पुग्छन् भने हामी पटक-पटक पुग्नेछौँ।
मन जित्न केवल संख्या होइन, भिजन र भरोसा चाहिन्छ।
हामी केवल एउटा पर्चा बोकेर भोट माग्न मात्र होइन, नयाँ पुस्ताको सपना र समृद्ध नेपालको नक्सा बोकेर जाँदैछौँ।
हामी किन पटक-पटक पुग्ने?
१.भ्रमको पर्खाल भत्काउन: विपक्षीले फैलाएका झूटका खेती र भ्रमहरूलाई सत्य र तथ्यको प्रहारले जरैदेखि उखेल्न।
२.भरोसाको दियो बाल्न: नेपाली कांग्रेस बदलिएको कांग्रेस हो र यसले मात्र देश बदल्न सक्छ भन्ने अटल विश्वास हरेक मतदाताको मुटुमा जगाउन।
३.सम्बन्धको गाँठो कस्न: मतदाताका साना-साना पीर-मर्का सुन्न र कांग्रेस उनीहरूको सुख-दुःखको सधैँको साथी हो भन्ने भावनात्मक आभास दिलाउन।
हामी किन फरक छौँ?
नेपाली कांग्रेस अब पुरानो ढर्रामा होइन, परिवर्तित र परिष्कृत नयाँ शक्तिको रूपमा मैदानमा छ। यो त्यो कांग्रेस हो, जुन:
•नयाँ पुस्ताले खोजेको छ: आधुनिक, प्रविधिमैत्री र युवाको ढुकढुकी।
•जनताले चाहेको छ: सुशासन, रोजगारी र स्थिर भविष्य।देशले मागेको छ: गफ होइन, समृद्धिको ठोस र व्यवहारिक खाका।
हामीले पार्टी बदलेका छौँ, अब देश बदल्ने पालो हाम्रो हो।
विपक्षीहरू एउटै ढोकामा चार पटक पुग्दा उनीहरूको डर देखिन्छ भने, हामी त्यही ढोकामा पटक-पटक पुग्दा हाम्रो समर्पण र सेवाभाव देखिनुपर्छ।
आदरणिय क्रान्तिवीर साथीहरू,
तपाईंको हरेक पाइला, हरेक मुस्कान र मतदातासँगको हरेक संवादले नेपाली कांग्रेसको बहुमतसहितको एकल सरकार को बलियो जग बसाल्दैछ।
याद राख्नुहोस्, तपाईंले बगाएको पसिनाको हरेक थोपाले समृद्ध नेपालको जगमा इँटा थपिरहेको छ।
तपाईंको मेहनतको मूल्य अमूल्य छ।
अबको हाम्रो अभेद्य रणनीति:
१. अदम्य आत्मविश्वास: हामी नयाँ युगको नयाँ कांग्रेस हौँ भन्ने गर्वका साथ मतदाताको आँखामा आँखा जुधाएर कुरा गर्नुहोस्।
२. सुक्ष्म र सघन परिचालन: विपक्षीभन्दा दुई कदम अघि बढेर हरेक टोल र घरलाई आफ्नो किल्ला बनाउनुहोस्।
३. संस्कारयुक्त आक्रामकता: हाम्रो संस्कार शालीनता हो, तर वैचारिक रूपमा हामी विपक्षीलाई परास्त गर्ने गरी आक्रामक बन्नुपर्छ।
इतिहासले तिनैलाई सम्झिन्छ जसले प्रतिकूल समयमा पनि धैर्य नगुमाई अन्तिम विजयसम्म लड्छन्।
तपाईंको यो मेहनतले भोलि देशमा विकासको नयाँ सूर्योदय गर्नेछ।
उठ्नुहोस्, अझै जोस, अझै ऊर्जा र अझै अठोटका साथ अघि बढ्नुहोस्!
यो निर्वाचन केवल एक प्रक्रिया होइन, यो कांग्रेसको पुनर्जागरण र समृद्ध नेपालको प्रस्थानविन्दु हो।
विजेता बन्ने संकल्पका साथ मैदान भरौ , विजय हाम्रो सुनिश्चित छ!
जय नेपाल! जय नेपाली कांग्रेस!
