16/09/2014
Hulle sê dat die oë die vensters van die siel is! Net so voel ek dat die kombuis die siel van 'n huis is! Ek het van kindstyd af meer van die kombuis gehou as enige ander plek in die huis! Daar kan jy lag, huil, gil, stil wees en bowenal jouself wees! Daarom voel ek 'n kombuis moet weerspieël wie en wat jy is! Dit geld vir dames sowel as alleen mans! Julle (manne) se kombuise kan ook maar wys waarvan julle gemaak is! Hang 'n eierspaan by jou stoof en 'n teelepel by jou ketel! Dis goue reëls, want sowaar as wat die suidwester waai, jy loop altyd sonder 'n lepel ketel toe en die eiers is al blou en rubber teen die tyd wat jy jou spaan uit die laai grawe! Meeste laaie in die kombuise van vandag is eintlik maar begraafplase vir stukkende spane, stomp messe en krom vurke....en dan iets wat jy al 20 jaar het maar nog nooit gebruik het nie of hoegenaamd nie eers weet waarvoor mens dit gebruik nie! Die het ek ook! Maar 'n kombuis is nie 'n kombuis as hy nie hierdie laaie het nie, want hierdie laaie is daar vir herinneringe aan ouma as jy haar suikerlepeltjie raakloop, of 'n vinnige gedagte aan jou dogtertjie/seuntjie toe hy/sy klein was en jy vir hulle ou houtlepels gegee het om op die potte te slaan! Miskien delf jy jou eerste stel steak messe op wat 'n trou geskenk was. Hulle is hoeka stomp en jou ander helfte het een of twee van hulle gebruik vir skroewedraaiers of pyp snyers! Useless vir sy oorspronklike gebruik, maar nie vir jou herinneringe aan jou hubby, seun, oom, vader of oupa nie! Maak hierdie laaie so af en toe oop en gaan daar deur. Geniet dit en decorate jou kombuis met hierdie memories en dingetjies! Geniet julle kombuise, tot 'n volgende keer!
