05/05/2026
#မှာယူနိုင်ပါပြီ
📚 သီလဖလုပ္ပတ္တိကျမ်း
✍️ ညောင်ကန်ဆရာတော် ဦးဗုဓ်
📖 လွန်ခဲ့သော နှစ် ၇၀ ခန့်က ပထမအကြိမ် ထွက်ရှိခဲ့ပြီး ယခု မြင်တွေ့ရန်ပင် မလွယ်သော ကုန်းဘောင်ခေတ် ဆရာတော်ကြီးဦးဗုဓ် ပြုစုခဲ့သည့် ကျမ်းကို လူပညာရှိ ပိဋကတ်ဆရာမြိုင် တည်းဖြတ်သော စာအုပ် ဖြစ်သည်။ နန်းမတော်မယ်နု လှူဒါန်းသော အင်းဝအုတ်ကျောင်းကြီး၌ သီတင်းသုံးခဲ့သည့် ဆရာတော်ဦးဗုဓ်သည် မြန်မာပြည်သာသနာတွင် နေလိုလလို ထင်ရှားသော အကျော်ဇေယျ ဆရာတော်ကြီးတစ်ပါး ဖြစ်သည်။ စကားနည်းသလောက် အအိပ်အနေလည်းနည်းကာ ပိဋကတ်ကျမ်းများကို အပတ်တကုတ် ဖတ်ရှုပြုစုခြင်းဖြင့် သာသနအကျိုး သယ်ပိုး ဆောင်ရွက်ခဲ့သူလည်း ဖြစ်၏။ ယခုပြုစုရေးသားသော ကျမ်းတွင် သီလလက်ကိုင်ထားပြီး သီလတရားအား မြဲမြံစွာ စောင့်ထိန်းအပ်သော သူတော်ကောင်းတို့၏အကြောင်းကို ပိဋကတ်တော်ထဲမှ ထုတ်နုတ်ကာ စီရင်ရေးသားခဲ့ရာ လေးနက်သော ကျမ်းအဖြစ်သာမက သီလ၏ အစွမ်းထက်မြက်ပုံကိုပါ သိရှိနားလည်နိုင်ပါသည်။
📖 ကျမ်းတွင် သီလ၏အကျိုးကိုပြသော အကြောင်း၊ သရဏဂုံ ဆောက်တည်ခြင်းကိုပြသော အကြောင်း၊ သီလ သရဏဂုံဆောက်တည်ခြင်း၊ ပျက်ပြားခြင်းတို့ကြောင့် ရရှိသော အကျိုးနှင့်အပြစ်ကို ပြသော အကြောင်း၊ အပရိဟာနိယတရား ခုနစ်ပါးကို ပြဆိုခြင်း၊ ဥပသကာဂုဏ်ဆယ်ပါးကို ပြဆိုခြင်း စသည့် အခန်းများ ပါရှိသလို သီလစောင့်ထိန်းသူ နဂါးမင်းနှင့် စည်းစိမ်စွန့်လွှတ်ခဲ့သူ အလောင်းတော်သင်္ခပါလတို့၏ ဘဝဇာတ်ကြောင်းကိုပါ ဖတ်ရှုရ ပါမည်။
📖 မြွေအလိမ္ပာယ်ဆရာ နှိပ်စက်မှုကို သည်းခံကာ သီလ မပျက်ပြားစေအောင် စောင့်ထိန်းခဲ့သော စမ္ပေယျ နဂါးမင်းအကြောင်း တစ်နေရာတွင် .... ထိုဘုရားလောင်း နဂါးမင်းကို ထိုအလိမ္ပာယ် ပုဏ္ဏားသည် အမြီး၌ ကိုင်ပြီးလျှင် ဝင်၍ အလျားဖြင့် အိပ်စေ၍ ဆိတ်ခြေသဏ္ဌာန်နှင့်တူသော လှံကန်ဖြင့် နှိပ်လျက် အားနည်းသည်ကို ပြုပြီးလျှင် ဦးခေါင်းကို မြဲမြံစွာ ကိုင်၍ နှိပ်၏။ ဘုရားလောင်း ခံတွင်းသည် ပွင့်၏။ ထိုအခါ ဘုရားလောင်းခံတွင်း၌ တံတွေးကို ထွေးသဖြင့် ဆေးကို၎င်း၊ မန္တရားကို၎င်း ပြု၍ သွားတို့ကို ချိုး၏။ ခံတွင်း၌ သွေးဖြင့် ပြည့်၏။ ဘုရားလောင်းသည် မိမိသီလပျက်ခြင်းမှ ကြောက်သောကြောင့် ဤသို့ သဘောရှိသော ပြင်းစွာသော ဆင်းရဲကို သည်းခံလျက် မျက်စိကို ဖွင့်၍ ကြည့်ခြင်းကိုမျှလည်း မပြု။ ထိုအလိမ္ပာယ်ပုဏ္ဏားသည်လည်း နဂါးမင်း အားနည်းသည်ကို ပြုအံ့ဟု အမြီးမှစ၍ ဘုရားလောင်း နဂါးမင်း၏ အရိုးတို့ကို မုန့်မုန့်ညက် ချေသကဲ့သို့ အလုံးစုံသော ကိုယ်ကို နင်းနယ်၍ အဖျားရစ်သော ရစ်ခြင်းကို ရစ်ပတ်စေ၏။ ယက်ကန်းသည်တို့ ချည်စာနင်းသကဲ့သို့သော နင်းနယ်ခြင်းကို နင်းနယ်၏။
📖 အမြီးကို ကိုင်၍ ခဝါသည်တို့ ပုဆိုးဖွပ်သကဲ့သို့ ပုတ်ခတ်၏။ ဘုရားလောင်း၏ ကိုယ်အလုံးသည် သွေးဖြင့် လိမ်းကျံသည်ဖြစ်၏။ ထိုဘုရားလောင်းသည် ကြီးစွာသော ဝေဒနာကို သည်းခံတော်မူ၏။
သို့ ဘုရားလောင်း အားနည်းသော အဖြစ်ကိုသိ၍ နွယ်ပခြုပ်ကိုရက်ပြီးလျှင် ထိုပခြုပ်၌ ဘုရားလောင်း နဂါးမင်းကိုထည့်၍ ပစ္စန္တရာဇ်ရွာသို့ ဆောင်ယူပြီးလျှင် လူများအလယ်၌ က,စေ၏ ... ဟု ဖော်ပြထားရာ ကုန်းဘောင်ခေတ် စကားပြေအရေးအသားနှင့် ဆရာတော်ဦးဗုဓ်၏ ရသမြောက်သော အရေးအဖွဲ့ကို သိရှိနားလည်ရပါသည်။ ရှေးဟောင်းကျမ်းမြတ်တစ်ဆူ ဖြစ်သည်နှင့်အညီ ဗုဒ္ဓဘာသာဝင်များ ဖတ်ရှုလေ့လာအပ်သော စာအုပ်ဖြစ်ပေသည်။
စာမျက်နှာ - ၂၁၈
စာအုပ်တန်ဖိုး - ၁၃၀၀၀ကျပ်
