27/11/2025
စာဖတ်ခြင်းက သင့်ကိုဘယ်လိုထူးခြားတဲ့စွမ်းအင်တွေပေးနိုင်တယ်လို့ ထင်ပါလဲ။???
စာပေဗဟုသုတရှိသူသည် စာပေဗဟုသုတမရှိသူထက် အမြဲတမ်းခေါင်းတစ်လုံး မြင့်နေတတ်ပါတယ်။
အနောက်တိုင်းသားများက အရှေ့တိုင်းသားများထက် နေရာတိုင်းတွင် သာနေရခြင်းမှာ စာဖတ်ခြင်းကြောင့်ပင်ဖြစ်တယ်။
အင်္ဂလန်၌ ရပ်ကွက်တစ်ခုဖော်တိုင်း မဖြစ်မနေပါရသောအရာမှာ “စာကြည်တိုက်” ပင်ဖြစ်တယ်။
ရပ်ကွက်စာကြည်တိုက်ပင် ဖြစ်သော်လည်း ထိုစာကြည်တိုက်တွင် ကမ္ဘာ့ဂန္ထဝင်စာအုပ်အားလုံး ရှိနေရသည်။
ထိုစာပေဗဟုသုတအားကြောင့်လည်း ကျွန်းနိုင်ငံလေးတစ်ခုသာဖြစ်သော အင်္ဂလန်သည် တစ်ကမ္ဘာလုံးနီးပါးကို အုပ်ချုပ်နိုင်ခဲ့ခြင်းဖြစ်တယ်။
စာဖတ်ခြင်းက ဗဟုသုတတိုးပွားဖို့အတွက်ပဲလို့ ထင်နေကြပါတယ်။ တကယ်တော့ စာဖတ်ခြင်းကနေ ဗဟုသုတတိုးပွားရုံ
သာမက သင်မသိသေးတဲ့ အခြားကောင်းမွန်တဲ့ရလဒ်တွေအများကြီး ရှိပါသေးတယ်။
ဒါကြောင့် အားလပ်ချိန်တွေမှာ စာအုပ်လေးတွေဖတ်ပေးပါ။
စာဖတ်ခြင်းက -
(၁) ဦးနှောက်ကို ပိုမိုလှုံ့ဆော်ပေးနိုင်တယ်။
စာဖတ်ခြင်းဟာ သင့်ရဲ့ဦးနှောက်ကို အလုပ်လုပ်စေပါတယ်။ ဦးနှောက်ဟာ ခန္ဓာကိုယ်ရဲ့ တခြားကြွက်သားတွေလိုပဲ သင်လေ့ကျင့်ခန်းလုပ်လေ သင့်ရဲ့ကြွက်သားတွေ ကြီးထွားလာလေ ဖြစ်ပါတယ်။
(၂) စာဖတ်ခြင်းက အာရုံစူးစိုက်မှုအားကောင်းစေပါတယ်။
ဘ၀မှာတစ်ခုခုကို အောင်မြင်ချင်တယ်ဆိုရင် အာရုံစူးစိုက်မှုရှိနေဖို့က အရမ်းအရေးကြီးပါတယ်။
သင်ဟာ စာအုပ်တစ်အုပ်ကို ဖတ်နေတဲ့အခါမှာ စာရွက်ပေါ်က စာလုံးတွေတိုင်းအပေါ်ကို အာရုံစူးစိုက်ထားပြီး ဇာတ်လမ်းထဲမှာ မျောပါနေတတ်ပါတယ်။ စာဖတ်ခြင်းဟာ သင့်ရဲ့အာရုံစူးစိုက်မှုအကျင့်ကို အလွယ်တကူပြုစုပျိုးထောင်ပေးနိုင်ပါတယ်။
(၃) ဗဟုသုတများစွာ ကြွယ်ဝစေတယ်။
စာအုပ်ဖတ်ခြင်းဟာ ဗဟုသုတကြွယ်ဝစေပြီး အတွေးအခေါ် မြင့်တက်လာစေနိုင်ပါတယ်။
စာအုပ်လေးဘယ်လောက်ပါးပါစေ သင်တစ်ချိန်ချိန်မှာ ပြန်လည်အသုံးပြုရမယ့်အသိပညာတွေပါ၀င်ပြီး သင်စာများများဖတ်နိုင်လေ သင့်အတွက်ပိုအကျိုးများလေဖြစ်ပါတယ်။
(၄) စိတ်ဖိစီးမှုလျော့ကျစေတယ်။
စာအုပ်ကောင်းကောင်း ၊ ၀တ္ထုကောင်းကောင်းတစ်အုပ်ဟာ သင့်ကို တခြားကမ္ဘာတစ်ခုဆီ ဆွဲခေါ်သွားနိုင်ပြီး သင့်လက်ရှိဘ၀ရဲ့စိတ်ဖိစီးမှုတွေကို ကုသဖို့အတွက်အကောင်းဆုံးနည်းလမ်းတစ်ခုဖြစ်ပါတယ်။
(၅) စာဖတ်ခြင်းက နှစ်နှစ်ခြိုက်ခြိုက် အိပ်ပျော်စေနိုင်ပါတယ်။
စာအုပ်တစ်အုပ်ကိုင်လိုက်တာနဲ့ အိပ်ပျော်သွားတဲ့သူတွေ
များစွာရှိတတ်ပါတယ်။ စာဖတ်တဲ့အလေ့အကျင့် မရှိသေးကြလို့ဖြစ်ပါတယ်။
ဒါပေမယ့် သင်ဟာအိပ်ယာမ၀င်ခင် စာအုပ်ကိုနည်းနည်းပဲဖြစ်ဖြစ် ဖတ်တတ်တဲ့အကျင့်ရှိမယ်ဆိုရင် သင့်အိပ်စက်ချိန်မှာ
ပိုပြီး နှစ်နှစ်ခြိုက်ခြိုက်အိပ်ပျော်နိုင်မှာဖြစ်ပါတယ်။
(၆) လူတွေကို ပိုပြီး နားလည်ပေးနိုင်လာတယ်
တခြားလူတွေရဲ့အတွေ့အကြုံတွေ ၊ အခက်အခဲတွေကို ဖတ်ရှုခြင်းဟာ ဘ၀မှာတခြားလူတွေရဲ့အခက်အခဲတွေကို
ပိုမိုသိလာပြီး လူတွေကိုပိုမိုနားလည်တတ်လာပါတယ်။
လူတစ်ယောက်ကို အပေါ်ယံကြည့်ပြီးဝေဖန်ဖို့က လွယ်ပါတယ်။ သို့ပေမယ့် သင်ဟာစာအုပ်တွေထဲကနေ လူအများရဲ့ အတွေ့အကြုံမျိုးစုံကိုဖတ်ထားမယ်ဆိုရင် လူအမျိုးမျိုးကို
ပိုပြီး နားလည်ပေးတတ်နိုင်လာပါတယ်။
မည်သည့်ကျောင်းဆရာမှ တပည့်များအား တစ်သက်လုံး သုံးမကုန်နိုင်လောက်သော ပညာသုတကို ပေးလိုက်နိုင်သည်မဟုတ်။ ကျောင်းသား၏နှလုံးသားကို ပညာမွတ်သိပ်လာအောင်လုပ်နိုင်သူပင်လျှင် အတော်ဆုံးဆရာဖြစ်သည်ဟု ဆာရစ်ချယ်လစ်ဗင်းစတုန်းဆိုသော ပုဂ္ဂိုလ်ကြီးက ပညာရေးသြဝါဒစကား ဆိုခဲ့ဖူးပါသည်။
ထိုနောက်တစ်ဖန် လူငယ်တို့၏ဘဝကို ပညာနှင့်ကိုယ်ကျင့်တရားကောင်းမွန်စေရန် စိတ်အားထက်သန်လေ့ရှိသော ဆရာကြီးဦးအောင်သင်း၏အမှာစကားက ဘယ်သူတွေဘာပြောနေနေ သင့်ကိုယ်သင်ချစ်ရင်ပညာသင်ပါ ၊ စာဖတ်ပါ။ မိဘကိုချစ်ရင်ပညာသင်ပါ ၊ စာဖတ်ပါ။ တိုင်းပြည်နဲ့လူမျိုးကိုချစ်ရင်ပညာသင်ပါ ၊ စာဖတ်ပါ ။
ပညာဆိုတာဘာလဲ။
မေးရင် မသိဘူး။ မမေးရင် သိတယ်။
ပညာသင်တယ်ဆိုတာ အတွေးအကြံနဲ့အတွေ့အကြုံကို လက်ဆင့်ကမ်းခြင်းဖြစ်ပါတယ်။
ဘာကြောင့် စာဖတ်သင့်တာလဲ။
စာအုပ်ဆိုတာ ဝင့်ခွင့်ဖြေစရာမလိုတဲ့တက္ကသိုလ် သို့မဟုတ် ကျောင်းတော်ကြီးဖြစ်နေလို့ပါဘဲ။ ဒါပေမယ့် ကျောင်းဆရာ
မရှိဘူး။ ဝင်ကြေးမပေးရဘူး။
ထို့နောက်တစ်ဖန် လူမျိုးတစ်မျိုး၏အခြေအနေ ၊ အဆင့်အတန်း ၊ အနိမ့်အမြင့်ကိုသိလိုပါလျှင် ထိုလူမျိုးတို့လေ့လာလိုက်စားသောစာပေ ၊ အနုပညာ ၊ ဂီတတို့ကို ကြည့်မှသိနိုင်မည်ဟု မြဝတီမင်းကြီးဦးစက မှတ်တမ်းပြုခဲ့တာကို ကြည့်မည်ဆိုလျှင်လည်း စာအုပ်စာပေသည်ပင်လျှင် လူ့တန်ဖိုး ၊ လူ့အဆင့်အတန်းကို ဖော်ပြနေပေသည်။
တကယ်တော့ စာဖတ်ခြင်းသည် သစ်ပင်စိုက်ပျိုးခြင်းနှင့် တူ၏။ တဖြည်းဖြည်းချင်း လူသားဘဝကို ကောင်းကျိုးပေးသော သဘောရှိ၏။ အချိန်ကြာလေ အကျိုးရှိလေဖြစ်၏။
"စာအုပ်စာပေ လူ့မိတ်ဆွေ ၊ အလိမ္မာ စာမှာရှိ ၊ စာပေစကား နေ့တိုင်းကြားက ထူးခြားလိမ္မာရှိသည်သာ" စတဲ့ ဆောင်ပုဒ်များသည် စာအုပ်စာပေကိုဖတ်စေချင် ၊ မြတ်နိုးစေချင်သော
စာရေးဆရာကြီး ၊ ပညာရှိကြီးတို့၏ စေတနာ အမှာစကားများပင် ဖြစ်တော့သည်။
စာ ဘာကြောင့် သင်ရတာလဲ?
တကယ်တော့စာသင်တာ စိတ်ထားတတ်ဖို့ပါ။ စာသာတတ်ပြီး စာမဖတ်ရင် စိတ်မထားတတ်တော့ပါ။ စိတ်မထားတတ်ရင်
ပညာတတ် လူပေါကြီးတွေ ဖြစ်သွားတတ်ပါတယ်။
မရှိတာလည်း ရှိအောင်လုပ်ရင် ရှိနိုင်ပါတယ်။ မသိတာလည်း သိအောင်လုပ်ရင် သိနိုင်ပါတယ်။ မလုပ်တာကတော့ ဘာမှမဖြစ်နိုင်တော့တာမို့ အခက်အခဲဆုံးလို့ပြောပါတယ်။ ဒီလိုဆိုရင် စာဖတ်ပြီး သိသွားနိုင်ပါတယ်။ အသိနဲ့အလုပ်လုပ်မည်ဆိုပါက သေချာပေါက်ရှိလာမှာပါ။
ဘဝမှာ ကိုယ်ဘာသိချင်သလဲ စာဖတ်ပါ။
ဘဝမှာ ကိုယ်ဘာရှိချင်သလဲ စာဖတ်ပါ။
ဘဝမှာ ကိုယ်ဘာလုပ်ချင်သလဲ စာဖတ်ပါ။
စာဖတ်ခြင်းဟာ သင့်ကို ဗဟုသုတနဲ့ ပြည်ဝတဲ့သူတစ်ယောက် ဖြစ်စေတယ်။ ဉာဏ်ကောင်းသူတစ်ယောက်ပေါ့။ သင်ဉာဏ်ကောင်းချင်ရင် စာများများဖတ်ပါ။
စာရေးခြင်းဟာ သင့်ကို တိကျသေချာတဲ့သူတစ်ယောက် ဖြစ်စေပါတယ်။ နှုတ်တစ်ရာ စာတစ်လုံးဆိုတဲ့ စကားပုံကို သင်ကြားဖူးမှာပါ။
တွေးတောကြံဆခြင်းကတော့ သင့်ကိုပြီးပြည့်စုံတဲ့သူတစ်ယောက် ဖြစ်စေပါတယ်။ လိုလျှင်ကြံဆ နည်းလမ်းရဆိုသလိုပေါ့။
တွေးတတ်ဖိုဆိုတာကလည်း သင်စာများများဖတ်မှ တွေးတတ်မယ်ဆိုတာ သင်ငြင်းချင်သေးလား။???
နောက်ဆုံးပြောချင်တာကတော့ မိမိကိုယ်ကိုယ်ချစ်ရင်ကောင်းကောင်းစာဖတ်ပါ။ သင့်ကိုယ်သင် မချစ်ရင်တော့ စာမဖတ်ဘဲ နေချင်သလိုသာနေလိုက်တော့။ စာမဖတ်ခြင်းက သင့်ဘဝကို နိမ့်ကျစေမှာဖြစ်ပြီး စာဖတ်ခြင်းကတော့ သင့်ဘဝကို
တောက်ပစေမှာဖြစ်ပါတယ်။
