30/12/2023
ဆောင်းဝင်လာတာနဲ့ ကလေးတွေဝမ်းပျက်ဝမ်းလျှောပြန်ဖြစ်နေကြတယ်။ ဒီအချိန်ဆေးရုံဆေးခမ်းတွေမှာ ကလေးလူနာတစ်ဝက်လောက်က ဝမ်းပျက်ဝမ်းလျှောဖြစ်လို့လာပြကြတာပါ။ ဆရာ ဆောင်ရန်ရှောင်ရန်တွေကို အကျဥ်းချုံးပြောပြပါမယ်။
- ဆောင်းရာသီမှာဖြစ်တတ်တဲ့ ဝမ်းပျက်ဝမ်းလျှောခြင်းတွေရဲ့ ၈၀% ဟာ ရိုတာဗိုင်းရပ်စ် (Rota Virus) ကြောင့်ဝမ်းပျက်ကြတာဖြစ်ပါတယ်။ ရိုတာဗိုင်းရပ်စ်ကြောင့် ဝမ်းပျက်တဲ့အခါ ကလေးငယ်ဟာ ဝမ်းလျှောဝမ်းပျက်ခြင်း၊ အန်ခြင်း (အရပ်ခေါ် အထက်လန်အောက်လျှော) ခံစားရပါတယ်။ ရောဂါဖြစ်ပွားချိန်ဟာ သုံးရက်မှ တစ်ပတ်အထိကြာတတ်ပါတယ်။
- ရိုတာဗိုင်းရပ်စ်ဟာ ဗိုင်းရပ် (Virus)ပိုးနွယ်ဝင်ဖြစ်တာကြောင့် ပိုးသတ်ဆေး (Antibiotics) တိုက်ပြီး ပိုးသတ်လို့မရပါဘူး။ ခန္ဓာကိုယ်ရဲ့ ကိုယ်ခံအားစံနစ်ကပြန်တိုက်ပြီးနိုင်သွားတဲ့အခါမှာ ရောဂါပျောက်ကင်းသွားမှာဖြစ်ပါတယ်။ ဒါကြောင့် ဆရာဝန်ညွှန်ကြားချက်မရှိဘဲ ကိုယ့်သဘောနဲ့ကိုယ်ပိုးသတ်ဆေးမတိုက်ပါနဲ့။ တိုက်ရင် ကလေးနုံးတာပဲအဖတ်တင်ပြီး ကလေးပိုနွမ်းပါလိမ့်မယ်။
- ဝမ်းပျက်ဝမ်းလျှောရင် ဓာတ်ဆားတိုက်ပါ။ အန်ရင်လည်းတိုက်ပါ။ BPI ဓာတ်ဆားလိုအငန်ဓာတ်ဆားတိုက်ပေးပါ။ ရေဓာတ်ခမ်းတဲ့အခါ ကလေးကရေ/ဓာတ်ဆား ပိုတောင်းပါလိမ့်မယ်။ တောင်းသလောက်တိုက်ပေးပါ။ မိခင်နို့တိုက်တုန်းဆိုရင် ဆက်တိုက်ပါရပါတယ်။ ဓာတ်ဆားနဲ့အတူ/ ဓာတ်ဆားမရှိရင် ကြက်စွပ်ပြုတ်၊ ငါးစွပ်ပြုတ် တိုက်လို့ရပါတယ်။ ဘာမှမရှိရင် ရေသန့်ရေကျက်အေးတိုက်ထားပါ ရပါတယ်။ ညရေးညတာ ဓာတ်ဆားမရှိလို့ ရှိတဲ့အချိန်ထိမစောင့်ပါနဲ့။ တိုက်လို့ရတဲ့အရည်လေးတွေတိုက်ထားပေးပါ။
- ဝမ်းလျှောတဲ့အချိန်သီးစုံဓာတ်ဆား၊ အချိုဓာတ်ဆား၊ အားကစားသမားသောက်တဲ့ ဓာတ်ဆား မတိုက်ပါနဲ့။ အချိုကြောင့်ဝမ်းပိုလျှောပါမယ်။ အားကစားသမားသောက်တဲ့ ဓာတ်ဆားကအငန်ဆိုပေမယ့် ချွေးထွက်လို့ကုန်တဲ့ဆားဓာတ်နဲ့ ဝမ်းလျှောလို့ကုန်တဲ့ဆားဓာတ်မတူတာကြောင့် အဆင်မပြေပါ။ တစ်လီတာနဲ့ဖျော်ရတဲ့ဓာတ်ဆားအငန်တိုက်လို့ရတယ်၊ ဖန်ခွက်နဲ့ဖျော်ရတဲ့ကလေးဓာတ်ဆားတိုက်လို့ရတယ်၊ ကလေးဓာတ်ဆားတိုက်မယ်ဆိုရင်တော့ ဝမ်းအရမ်းလျှောနေရင်တစ်ထုပ်နဲ့မလောက်ပါ။ ထပ်ထပ်တိုက်ပေးရပါမယ်။
- Probiotics အမှုန့်ထုပ်တွေဖြစ်တဲ့ Kidlac၊ Innolac ၊ Bioflor အစရှိတဲ့အထုပ်တွေကို ဝမ်းပျက်ဝမ်းလျှောတဲ့အခါတိုက်လို့ရပါတယ် တိုက်ပါ။ ဒါပေမယ့် ဒါတွေကိုဓာတ်ဆားနဲ့မမှားပါနဲ့။ နယ်ဘက်တွေမှာ အတော်များများက Probiotics အထုပ်တွေကို ဓာတ်ဆားလိုဖျော်ပြီးကလေးတွေကိုမှားတိုက်နေကြတာတွေ့ရတယ်။ အဲဒီအခါကျတော့ တကယ်လိုအပ်တဲ့ဓာတ်ဆားမဝင်တဲ့အခါ ကလေးပိုထိခိုက်ပါတယ်။ Probiotics လဲတိုက်ချင်တိုက်ပါ။ ဒါပေမယ့်ဓာတ်ဆားတော့ဝင်အောင်တိုက်ပါ။
- တအားအန်နေတာမဟုတ်ရင် အစားမဖြတ်ပါနဲ့။ နည်းနည်းနဲ့ခဏခဏကျွေးပါ။ အချဥ်အစပ်နဲ့အရွက်တွေရှောင်ပါ။ ကလေးကြီးတွေ စားနိုင်ရင် ထမင်းဆီဆမ်း၊ ကြက်ဥပြုတ်၊ ငါးကြော် အဲဒီလိုလေးတွေကျွေးလို့ရပါတယ်။ အချိုကဲတဲ့မုန့်တွေမကျွေးပါနဲ့။
- ဝမ်းပျက်ဝမ်းလျှောတာဟာ
ဆက်တိုက်အကြိမ်ရေများလွန်းပြီး ကလေးမှိန်းရင် မျက်တွင်းချိုင့်ဝင်ရင် တစ်နှစ်ခွဲအောက်ကလေးငယ် ငယ်ထိပ်ချိုင့်လာရင် ရေတအားငတ်လာရင် အဖျားကြီးတာနဲ့တွဲနေရင် ခဏခဏအန်နေရင် ဝမ်းပျက်ဝမ်းလျှော မဟုတ်တဲ့ အခြားရောဂါလက္ခဏာတွေနဲ့တွဲနေရင် ဆေးခန်း၊ဆေးရုံပြပါ။
ကျန်းမာကြပါစေ။
Dr. စိုင်းမြတ်သူ
