10/08/2025
ပစ္စည်းတွေဝင်ဖို့ကြာပါအုံးမယ်ခင်ဗျာ ဒီနှစ်ထဲပစ္စည်းသွင်း
ရတာလမ်းတွေအရမ်းကိုကြပ်ပါတယ် အရင်တာချီလိတ်လမ်းကလဲ အခုထိပိတ်နေတုန်း ၊ အခုမူဆယ်လမ်းပါထပ်
ပိတ်သွားပါပြီ ဒီအခြေအနေတွေကြောင့် ပစ္စည်းတွေ Waiting Time ကြန့်ကြာတာကိုတော့ နားလည်ပေးကြဖို့မေတ္တာရပ်ခံပါတယ်နော် ၊ ဒီလိုတွေခဏခဏကြုံနေရပြီး ပစ္စည်းမှာရင် ကြာတတ် တာတွေကြောင့် Admin လဲငွေအပြည့်မယူပဲ စရံငွေလေးနဲ့ Order တွေကို ငွေစိုက်ပြီး လက်ခံပေးတာပါခင်ဗျာ ဒါကြောင့်မလို့ Waiting Time ကြာတာကိုတော့ စိတ်ရှည်သည်းခံပေးကြပါခင်ဗျ 🙏
မူဆယ်လမ်းကြောင်း ဂျူတီမဲ့ကုန်များ သယ်ခွင့်ပိတ်ပင်၊ ကုန်ကားအချို့ ရပ်နားမည်
မဲခေါင်၊ သြဂုတ် ၁၀
မူဆယ်ဘက်မှ မန္တလေးဘက်သို့ တရုတ်ထွက်ကုန်များကို သယ်ဆောင်ရာတွင် ကုန်သွယ်ခွန်-ဂျူတီဆောင်ပြီးကုန်များသာ သယ်ယူနိုင်တော့မည်ဖြစ်ပြီး ပါဆယ်ခေါ် လူမပါသည့် မည်သည့်ကုန်ပစ္စည်းမျှ သယ်ဆောင်ခွင့်မရတော့ကြောင်း ယာဥ်လိုင်းများနှင့် ဂိတ်များက ပြောသည်။
ကုန်သွယ်ခွန် - ဂျူတီမဆောင်ထားသည့် ကုန်များကို မူဆယ်အထွက် စစ်တပ်ဂိတ် ၃ ဂိတ်က သယ်ယူခွင့် လုံးဝမပြုတော့ကြောင်း၊ အကယ်၍ ဂျူတီမဲ့ကုန်ပါလာပါက ကုန်များ၊ ကားများကို သိမ်းဆည်းသာမက လိုအပ်ပါက လူကိုပါ အရေးယူခံရမည်ဟု ပြောထားကြောင်း မူဆယ်ကုန်တင်ကားယာဉ်မောင်းများက ပြောသည်။
“ပန်းသီးတဖာတောင် မရဘူး။ ငွေပေးရင် ရတယ်ပြောပေမယ့် ပေးရတာနဲ့ မတန်ဘူး။ တောင်းတာများလို့ စျေးဆစ်ရင်ပဲ စျေးမဆစ်နဲ့ စျေးရောင်းနေတာမဟုတ်ဘူး၊ မပေးနိုင်ရင် မလာခဲ့နဲ့၊ လှည့်ပြန်လို့ ပြောတာ။ လမ်းဂိတ်တွေလည်း ဒီအတိုင်းပါပဲ။ မပေးနိုင်ရင် မသွားနဲ့ ရပ်ထားပဲ။ ခေတ်က အင်မတန်ကို ဆိုးရွားနေပါပြီ” ဟု မူဆယ်သွား ကားသမားတစ်ဦးက မဲခေါင်သို့ ပြောသည်။
လမ်းတွင် ပေးရသည့် ဂိတ်ကြေးများပြားလာသည့်အတွက် ကားသမားများအနေဖြင့် ရရှိသည့် တန်ဆာခနှင့် မကိုက်သဖြင့် ကုန်ကားအချို့ ရပ်နားမည်ဖြစ်ကြောင်း ကုန်တင်ယာဉ်ဂိတ်များထံမှ သိရသည်။
မူဆယ်မှအထွက် မည်သည့်ပစ္စည်းမျှမရတော့သည့်အတွက် မူဆယ်မှ မန်းလေး တန်ဆာပစ္စည်း လက်ခံခြင်းအား ရက်အကန့်အသတ်မရှိ ရပ်ဆိုင်းထားမည်ဖြစ်ကြောင်း၊ ပြီးခဲ့သည့်ရက်ပိုင်းမှစ၍ ယာဉ်ငယ်များအတွက် ပါဆယ်တင်ဆောင်ခွင့် မရှိတော့ခြင်းဖြစ်ကြောင်း ဟိန်းရာဇာ အဆင့်မြင့်အမြန်ယာဥ်ငယ်အသင်းက ဆိုသည်။
သစ်သီးသယ်ဆောင်ရာတွင်ပင် တရုတ်ပြည်မှလာသည့် အသီးများ သယ်ဆောင်ခွင့်မပြုတော့သည့်အတွက် တရုတ်မှလာသည့် ပန်းသီးဖာများကို အပေါ်မှ နာနတ်သီးများဖြင့် အုပ်သွားရကြောင်း၊ နာနတ်သီးမှ အရည်ထွက်သည့်အတွက် ပန်းသီဖာများ ပျက်စီးရကြောင်း တပိုင်တနိုင် ကုန်သည်တစ်ဦးက ဆိုသည်။
တရားမဝင်ကုန်သွယ်မှု တိုက်ဖျက်ရေးအတွက်ဟုဆိုကာ အာဏာသိမ်းစစ်ကောင်စီမှ နယ်စပ်မှ ကုန်သွယ်ခွန်မဆောင်ထားသည့် ကုန်များကို တင်းတင်းကြပ်ကြပ်ဖမ်းဆီးနေသော်လည်း ကုန်သွယ်ခွင့်တရားဝင် လျှောက်ထားရာတွင်လည်း မချထားပေးသည်က များကြောင်း ကုန်သည်များထံမှ သိရသည်။
ပြီးခဲ့သည့် သြဂုတ်လ ၄ ရက်က ရှမ်းပြည်မြောက်ပိုင်းမှ ကုန်စည်သယ်ဆောင်လာသည့် ကုန်တင်ယာဉ် အစီး ၁၀၀ ဝန်းကျင်ခန့်ကို မန္တလေးတိုင်း မြစ်ငယ်ကားကွင်းတွင် အခွန်မဆောင်ထားဟုဆိုကာ တရားမဝင်ကုန်စည်အဖြစ် သတ်မှတ်ဖမ်းဆီးထားသည်။
မဟာ
#တရားမဝင်ကုန်စည်
#နယ်စပ်ကုန်သွယ်ရေး
#ဂိတ်ကြေး
#မူဆယ်
#ရှမ်းမြောက်
