08/01/2026
අම්මා හැමදාම පාන්දර 4ට නැගිටින සද්දේ මට ඇහෙනවා. කුස්සියේ වළං ගැටෙන සද්දේ, පොල් ගාන සද්දේ, තෙල් දාන සුවඳ මගේ කාමරේට එනවා. අම්මා ඒ තරම් උදෙන් නැගිටින්නේ මම ඔෆිස් යන්න කලින් මට බත් එක බැඳලා දෙන්න ඕන නිසා.
"පුතේ... පරිප්පුයි, හාල්මැස්සෝ තෙල් දාලයි හදලා තියෙන්නේ. අද බත් එක හරි රහයි..." අම්මා මගේ අතට බත් පෙට්ටිය දෙන්නේ හරිම ආසාවෙන්.
ඒත් මම ඔෆිස් ගියාම සිද්ධ වුනේ වෙන දෙයක්. මගේ ඔෆිස් එකේ ඉන්න අනිත් හැමෝම දවල්ට කන්නේ KFC, Pizza හරි සුපිරි රෙස්ටොරන්ට් වලින් ගෙන්නලා. ලන්ච් රූම් එකේ හැමෝම එකට වාඩි වෙලා ඒ "පොෂ්" කෑම කද්දි, මට මගේ බත් පෙට්ටිය අරින්න ලැජ්ජා හිතුනා.
"ෂික්... මම මේක ඇරියොත් හාල්මැස්සන්ගේ ගඳ එයි... මුන් මට හිනා වෙයි..." කියලා මට හිතුනා. ඒ නිසා මම අම්මා දීපු බත් එක ඔෆිස් එකේ කුණු බක්කියට දාලා, මාත් යාලුවෝ එක්ක එකතු වෙලා පීසා කෑවා.
"අද කෑම එක රසයිද පුතේ?" හවසට ගෙදර ගියාම අම්මා අහනවා. "ඔව් අම්මේ... මරු..." මම බොරුවට උත්තර දුන්නා. අම්මා ඒක අහලා සතුටු වුනා. එයා දන්නේ නෑ එයා පාන්දර නැගිටලා, නින්ද පූජා කරලා හදපු කෑම එක කුණු බක්කියට ගියා කියලා.
දවසක් අම්මාට තදටම උණ ගැනුනා. එයාට ඇඳෙන් බැහැගන්නවත් පණ නෑ. එදා මට ඔෆිස් ගෙනියන්න බත් එකක් තිබුණේ නෑ. මම පුරුදු විදිහටම කඩෙන් කෑවා. දවසක් කෑවා, දෙකක් කෑවා. තුන්වෙනි දවස වෙද්දි මට ඒ කෑම එපා වුනා. මට ගැස්ට්රයිටිස් හැදුනා. බඩ දන්න ගත්තා. කඩේ කෑම වල තියෙන අජිනමොටෝ රහ මට තිත්ත වුනා.
මට එදා මතක් වුනේ අම්මා උයන පරිප්පු හොද්දේ රහ. ඒකේ තිබුණේ පුදුම සුවයක්. මම එදා ගෙදර ගිහින් අසනීපෙන් හිටපු අම්මා ළඟ වාඩි වුනා. "අම්මේ... මට සමා වෙන්න..."
අම්මා අමාරුවෙන් ඇස් ඇරලා බැලුවා. "ඇයි පුතේ?" "මම ඔෆිස් එකේ අය ඉස්සරහා පොර වෙන්න, අම්මා දීපු බත් එක කෑවේ නෑ... ඒත් අද මට තේරෙනවා ඒ බත් එකේ තිබිලා තියෙන්නේ හාල්මැස්සෝ විතරක් නෙවෙයි, අම්මගේ ආදරේ කියලා."
අපි හිතනවා "පොෂ්" වෙනවා කියන්නේ ගෑරුප්පුවෙන් පීසා කන එක කියලා. නෑ යාලුවනේ. ලෝකේ තියෙන වටිනාම, පිරිසිදුම සහ ගුණම කෑම එක තියෙන්නේ ඔයාගේ අම්මා ඔතලා දෙන ඒ පත්තර කොල කෑල්ල ඇතුලේ. ඒකේ ගෑවිලා තියෙන්නේ අම්මා ඔයා වෙනුවෙන් කැප කරපු නින්ද සහ මහන්සිය.
ඔයා ඔෆිස් එකේ බොස් වුනත්, ලැජ්ජා වෙන්න එපා අම්මා දෙන බත් එක ලන්ච් රූම් එකේ දිග ඇරලා අතින් අනගෙන කන්න. කවුරු හරි ඒකට හිනා වෙනවා නම්, ඒ හිනා වෙන්නේ ඔයාට නෙවෙයි, අම්මා කෙනෙක්ගේ ආදරේ රස නොදන්න ඒ හිඟන මිනිස්සුන්ටමයි.
හෙට ඉඳන් අම්මා දෙන බත් එක ආසාවෙන් කන්න. මොකද දවසක ඒ අතින් කෑමක් උයලා දෙන්න අම්මා නැති වුන දවසට, ඔයා රහ බලන්න ආසම කෑම එක ඒක වෙන්න පුළුවන්.
~ Chanuka Jeewantha
