22/12/2025
ԿԱԹՈՂԻԿՈՍԱՐԱՆԻ ՏՊԱՐԱՆԷՆ ԼՈՅՍ ՏԵՍԱՒ ՊԷՊՕ ՍԻՄՈՆԵԱՆԻ ՆԱՄԱԿԱՆԻՆ՝ ԵՐԿՈՒ ՀԱՏՈՐՈՎ
Մեծի Տանն Կիլիկիոյ Կաթողիկոսութեան Մայրավանքի տպարանէն լոյս տեսաւ գրող, գրաքննադատ, խմբագիր, կրթական, կուսակցական ու հասարակական գործիչ Պէպօ Սիմոնեանի նամականին՝ երկու հատորով, խորագրեալ «Նամականի՝ առաքուած եւ ստացուած նամակներ», խմբագրութեամբ Գէորգ Նաթալիի (Եազըճեան):
Յառաջաբանին մէջ խմբագիրը կը բացատրէ, որ հատորը ջանք մըն է մոռացութեան վտանգէն փրկելու Սիմոնեանի վաստակն ու ժառանգութիւնը, որոնք «Նամականի»ին մէջ կը հանդիսանան 1950-ականներու վերջէն մինչեւ 2010-ականներու սկիզբը՝ նամակագրութեան տիպի տակ: Ան կը բացատրէ, որ կարգ մը մարմիններու՝ արխիւներու պահպանման պարտն ու պատշաճը չկատարելուն հետեւանքով, ինչպէս նաեւ Սիմոնեանի՝ ողջութեան ժամանակ հասկնալի պատճառներով նամակներուն կրկնօրինակները չպահելուն համար, մեզի հասած են միայն 67 անհատներու եւ 11 կառոյցներու առաքուած նամակներ, իսկ ստացած նամակները կը հաշուեն 107 միայն: Խմբագիրը կ՚աւելցնէ, որ եթէ նկատի ունենանք անհատներու, կառոյցներու եւ անոնց ենթակառոյցներուն առաքած նամակները, տոմսերը եւ զանազան գրութիւններ, թիւը կը մօտենայ 600-ի, որ նոյնպէս չի ներկայացներ իսկական պատկեր մը: Խմբագիրը նաեւ կ՚անդրադառնայ աշխատանքի ամբողջացման մարտահրաւէրներուն եւ անել կացութիւններուն:
Զոյգ հատորները 1190 էջերու մէջ կը պարունակեն նաեւ Պ. Սիմոնեանի կենսագրականը, ինքնակենսագրականը, անձնանուններու, տեղանուններու եւ կառոյցներու ցանկերը:
Սիմոնեանի «Նամականի՝ առաքուած եւ ստացուած նամակներ»ը կրնաք ձեռք ձգել Կաթողիկոսարանի գրատունէն, նաեւ՝ կայքէն.- www.ciliciabookstore.com։
