20/06/2024
بدك تحب صلاتك؟ ♥
امشي بمبدأ أنو صلاتك مو شغلة روتينية ومجبر تعملها.. على فكرة انت رايح تقعد مع ربك شوي. 😊
تقعد خمس دقايق.. كتير على اللي عطاك كلشي؟
استعد للصلاة كأنك رايح تقابل حدا بتحبه كتير
روح وأنت متلهف.. وإذا حدا سألك لوين: قول رايح اقعد مع ربي شوي 😍 خليه احساس داخلي جواتك
أول ما ترفع إيدك وتقول: الله اكبر.. ابتسم ابتسامة مشتاق.. قولها وجواتك صوت ( اجيتك ياحبيبي وقف بين ايديك).. انسى الدنيا كلها
اقرا الفاتحة بكل راحة واسمع جواب ربك بعد كل آية..
وبالاعتدال من الركوع لما تقول _ سمع الله لمن حمده
احمده انت بطريقتك.. قول الحمدلله يارب على كل النعم اللي عطيتني ياها 😊' الحمدلله حمدا طيبا مباركا كما ينبغي لجلال وجهك ولعظيم سلطانك '
وهلئ وصلت للسجود 😍 تذكر انو أقرب ما يكون العبد لربه وهو ساجد.. لما تهمس ببطن الأرض وبيسمعك من في السماء... سبح ربك واحكيله كلشي بقلبك قول يارب انا بحبك يارب ( خليك معي بالمحنة هي) .. ( يارب انا محتار دخيلك تساعدني) .. احكي وفضفض ماحدا رح يفهم عليك متل اللي خلقك
لما تحكي مع ربك مافي حواجز.. معلش احكي بالعامية ربك بيفهم عليك كيف ما حكيت. هو اعلم بحالك منك بس بيحب يسمع صوتك.. يمكن تتلبك وتخربط بكلامك بس ربك عم يسمعك.. ومعلش ابكي شوي..
♥((لانو البكاء لله عز ولغير الله مذلة))♥ وصدقني قد ماكان مشكلتك كبيرة.. بآخر كلامك رح تبتسم وترتاح لانك سلمت امرك لرب العباد 🤗
بعد ماتخلص صلاة..سلم عليه.. مو السلام التقليدي
لانك عم تسلم على حبيبك.. تخيل انك عم تقول (راح اشتقلك يارب ♥ ايمتا راح تجي الصلاة الجاية لارجع اقعد معك لسة في كلام كتير بقلبي حابب احكيلك ياه ياحبيبي)
صدقني راح تروح بعدها وانت حاسس انو مافي متلك بهالدنيا.. مو تكبر وغرور. لكن راحة وطمأنينة لانك كنت قاعد مع ربك. مع حبيبك.. وسلمتو امرك وتوكلت عليه ولانو لما تواجهك اي مشكلة بيومك مارح تهزلك شعرة. بتعرف ليش! لانك راح تروح بالصلاة اللي بعدها تحكي لربك وتطلب منو يساعدك.. ♥
نيال اللي عرف معنى الوصل مع رب العالمين..♥⚘
