04/03/2023
کاسکێت چیە و ئیشی چیە (واشەری کەوەر،گاسکێت) Head Gasket ؟ هۆکار و نیشانەکانی لاوازبوون و خراپبوونی کاسکێت چیە؟
گاسکێتی کەوەر بەزمانی باوی بازار ناسراوە بە کاسکێت یاخود واشەری کەوەر، ڕۆڵێکی زۆرگرنگ و بایەخداری هەیە لەناو بزوێنەردا و وەکو لکێنەرێک لە نێوان سلندەر بلۆک و کەوەر دادەنرێ بۆ پڕکردنەوەی بۆشایی نێوان ئەم دوو بەشە سەرەکیەی بزوێنەر و ڕێگری کردن لە لێچوون و دزەکرنی هەریەک لە گازی ناو ژووری سووتان، ئاو و ڕۆنی بزوێنەر و هەروەها پارێزگاریکردن لەمانەوەی هەریەک لەوانە لەشوێن و ڕێڕەوی تایبەت بەخۆیان لەناو بزوێنەردا.
کاسکێت بەشێوەیەکی کرداری چەندین ئەرکی گرنگ بەجێدێنێ لەناو بزوێنەر کە راستەوخۆ گاریگەری گەورەیان دەبێ لەسەر دروست ئیشکردن درێژکردنەوەی تەمەنی بزوێنەر:
１. رێگربوون لە دزەکردن و چوونی ئاوی سیستەمی ساردکردنەوەی بزوێنەر بۆناو سلندەرەکان یاخود بەشی دەرەوەی بزوێنەر
２. رێگربوون لە دزەکردن و چوونی ڕۆنی بزوێنەر بۆناو سلندەرەکان یاخود بەشی دەرەوەی بزوێنەر
３. رێگریکردن لەتێکەڵ بوونی ئاو و ڕۆنی ناو بزوێنەر و هێشتنەوەی هەریەکێکیان لەڕێڕەوی خۆیدا
４. رێگربوون لە دزەکردن و چوونی گازی سلندەرەکان بۆ ناو یەکتری یاخود بۆناو ڕێرەی ئاو ئەمەش واتە پارێزگاریکردن لە مانەوەی پەستانی ناو سلندرەکان (ژووری سووتان) بە دروستی
کاسکێتی کەوەربەهۆی هەستیاری شوێنی لەناو بزوێنەردا کە ڕووبەرووی چەندین فشار دەبێتەوە وەکو پەستان و پلەی گەرمی بەرز هەروەها لەرزین و لەرینەوەی بزوێنەر بۆیە زۆر پێویستە کە بەشێوەیەکی تایبەتی دیزاین کرابێ و بەرهەم بهێنرێت بەجۆرێک کە بەرگەی هەموو ئەو فشار و بارودۆخانە بگرێت، بەڵام لەگەڵ ئەوەشدا بەتێپەڕبوونی کات و زۆری تەمەنی بزوێنەر زیاتر ئەگەری سووتان و درزبردنی کاسکێت هەیە لەبزوێنەر.
بەگشتی هۆکارەکانی لاوازبوون و خراپبوونی کاسکێت:
１. بەرزبوونەوەی پلەی گەرمی بزوێنەر (هەستانی حەماوەی ئۆتۆمبێل)
２. ڕوودانی حاڵەتی نۆکین (دیلکۆ لێدان)
３. بەکارهێنانی کاسکێتی کوالێتی نزم و تەقلید
４. هەڵە دانانی کاسکێت لەکاتی گۆڕینی دا
نیشانەکانی خراپبوون ولاوازبوونی کاسکێتی کەوەر:
１. بەرزبوونەوەی پلەی گەرمی بزوێنەر (هەستانی حەماوەی ئۆتۆمبێل)
２. کەم بوونەوەی ئاوی ناو ڕادێتەر و سیستەمی ساردکردنەوەی بزوێنەر
３. تێکەڵبوونی ڕۆن و ئاو کە دەبێتە هۆی گۆڕانی ڕەنگی ڕۆنی بزوێنەر بۆ ڕەنگێکی شێوە شیری
４. سەررێژبوونی ئاوی ڕادێتەر و خەزانی لاوەکی هەروەها دروستبوونی بڵقەبڵق و کوڵانی ئاو لەناو ڕادێتەردا
５. دەرچوونی دووکەڵی سپی بە بەردەوامی لە ئەکسۆزی ئۆتۆمبێل
６. دروستبوون و دەرچوونی دووکەڵی سپی لە سەر قەباغی ڕادێتەر لەکاتی کردنەوەیدا
７. دابەزینی ئاستی توانای بزوێنەر و کەمبوونەوەی کێشی ئۆتۆمبێل هەروەها ناجێگیری ئۆتۆمبێل لە حاڵەتی سلۆری
８. دزەکردنی ئاو و ڕۆن بۆ بەشی دەرەوەی بزوێنەر (مەکینە)
９. هەندێکجار پیس بوونی پلاکەکانی بزوێنەر
１０. هەڵبوونی گڵۆپی بزوێنەر لە داشبۆر
تێبینی/بۆئەوەی ڕونتر تێبگەیت سەیری وێنەکەبکە
