24/09/2025
今次超強颱風樺加沙迫近香港🌀，大家都好貼心盡力喺打風前做好準備，幫助流浪動物及待領養動物。今次颱風來勢洶洶，實在令人擔心在外嘅動物....希望大家喺打風時如遇動物入屋暫避，請唔好驅趕，俾佢哋避過呢個颱風呀！ ☂️
除咗唔驅趕佢哋之外，我哋仲可以做到啲咩呢？ 假如遇到以下情況，大家都可以做多步，以免令動物受傷、甚至失救至死。
1️⃣留意動物醫院診所開放安排🏪
喺颱風嚟之前，建議大家可以先留意各動物診所同醫院嘅診症安排－假如遇到動物不幸受傷時，大家可以盡量喺安全情況下帶有需要嘅動物求醫。
2️⃣安排動物到室內位置☔
郊區地方有好多俗稱嘅「貨倉狗、車場狗狗」，佢哋同樣都係一條生命，如果打風時，請各位動物照顧者或熱心市民，提供一個安全嘅室內地方俾佢哋暫避，以免佢哋喺室外受盡風吹雨打。
3️⃣注意路面情況🚗
在大風大雨下，唔少動物都會受驚而亂跑⚡，假如大家需要駕車出門(當然今次真係唔建議)，喺大風大雨下請減慢車速，以免撞到路面上嘅動物。如在馬路上遇到有需要幫助嘅動物，亦懇請大家伸出援手，以免動物失救至死。
4️⃣遇走失動物請伸出援手🐶🐱
唔止係流浪動物，有時已入屋嘅動物都有機會因大風大雨而唔小心走失，假如大家遇上走失動物時，請暫時安置動物於室內空間，並可於網上平台發文尋主人，或於安全情況下去到就近動物醫院或診所掃晶片尋主人。
#打風 #流浪動物 #社區動物 #動物醫院 #動物診所 #樺加沙 #超強颱風
