30/04/2026
𝐌𝐞𝐞𝐪𝐪𝐞𝐫𝐢𝐯𝐢𝐢𝐭 𝐦𝐚𝐥𝐢𝐧𝐧𝐚𝐚𝐧𝐞𝐪 𝐚𝐣𝐮𝐥𝐞𝐫𝐚𝐚𝐧𝐠𝐚𝐭𝐚, 𝐢𝐥𝐚𝐪𝐮𝐭𝐚𝐫𝐢𝐢𝐭 𝐞𝐪𝐪𝐮𝐠𝐚𝐚𝐬𝐚𝐫𝐩𝐮𝐭
Oqaatsit uku tusartuarpagut: Meeqqat tassaapput siunissagut. Taakku atugarisaat pitsanngorsarneqartariaqarput. Toqqissisimanissaat aningaasaliiffigineqartariaqarpoq.
Apeqqulli tassaavoq: piviusoq oqaatsinut naapertuunnerpa?
𝐀𝐣𝐨𝐫𝐧𝐚𝐫𝐭𝐨𝐫𝐬𝐢𝐮𝐭 𝐦𝐞𝐞𝐪𝐪𝐞𝐫𝐢𝐯𝐢𝐮𝐩 𝐦𝐚𝐭𝐮𝐚𝐭𝐚 𝐤𝐢𝐥𝐥𝐢𝐧𝐠𝐚𝐧𝐢 𝐮𝐧𝐢𝐧𝐧𝐠𝐢𝐥𝐚𝐪
Meeqqerivinni sulisut amigaraangata kingunerisai meeqqerivinniinnaq atuunneq ajorput.
Angajoqqaat ullup suliffiup ingerlanerani sianerfigineqartarput. Meeqqat siusinnerusukkut aaneqartariaqartarput. Meeqqeriviit tamakkiisumik ingerlanneqarsinnaajunnaartarput imaluunniit ammasarfii allanngortinneqartarlutik. Ilaasortagut sapinngisartik tamaat iliuuseqarniartarput – sulinertik ingerlappaat, meeqqaminnillu akisussaaffimmik tigusillutik. Kisianni aaqqissuussaq iluamik ingerlanngippat, taakkua tassaasarput annertunerpaamik pilliuteqartuusartut.
𝐔𝐥𝐥𝐮𝐩 𝐢𝐧𝐠𝐞𝐫𝐥𝐚𝐧𝐞𝐫𝐚 𝐧𝐚𝐚𝐭𝐬𝐨𝐫𝐬𝐮𝐮𝐭𝐢𝐠𝐢𝐬𝐚𝐦𝐢𝐭 𝐚𝐥𝐥𝐚𝐚𝐧𝐞𝐫𝐮𝐠𝐚𝐚𝐧𝐠𝐚𝐭
Takorlooruk ullaakkut suliartortussaallutit. Meeqqat suli napparsimasoq. Kisianni napparsimatitsilluni suliffeqarfiup akilertagaa ulloq siulleq atoreersimavat. Sulinngitsoorsinnaanngilatit – suleqatitit ulapputeqarmata, suliffimmilu pisariaqartinneqarputit. Meeqqat meeqqerivimmut tunniunneqarpoq. Allamik periarfissaqanngilatit. Ilutigalugu meeqqerivik nammineq ilungersorpoq. Sulisut amigarput. Meeqqamut napparsimasumut immikkut pisariaqartitaanut piffissaqanngilaq. Ullup ingerlanerani sianerfigitipputit. Meeqqat suli napparsimavoq, meeqqerivimmiissinnaanngilaq - aaneqassaaq. Suleqatit anersaarulupput – ajortumik isumaqaratik, kisianni ulapaarneq annertuvoq. Marloqiusamik ajuusaalersarputit - suliffimmut meeqqamullu.
"𝐴𝑛𝑔𝑎𝑗𝑜𝑞𝑞𝑎𝑎𝑡 𝑚𝑒𝑒𝑞𝑞𝑎𝑛𝑖𝑘 𝑛𝑎𝑝𝑝𝑎𝑟𝑠𝑖𝑚𝑎𝑠𝑢𝑛𝑖𝑘 𝑚𝑒𝑒𝑞𝑞𝑒𝑟𝑖𝑣𝑖𝑚𝑚𝑢𝑘𝑎𝑟𝑡𝑖𝑡𝑠𝑒𝑟𝑢𝑠𝑢𝑛𝑛𝑔𝑖𝑘𝑘𝑎𝑙𝑢𝑎𝑟𝑝𝑢𝑡, 𝑘𝑖𝑠𝑖𝑎𝑛𝑛𝑖 𝑎𝑙𝑙𝑎𝑚𝑖𝑘 𝑝𝑒𝑟𝑖𝑎𝑟𝑓𝑖𝑠𝑠𝑎𝑞𝑎𝑣𝑖𝑛𝑛𝑔𝑖𝑙𝑙𝑎𝑡," Dina Olsen oqarpoq.
Inersimasut angerlarsimallutik napparsimasinnaatitaasarput. Kisianni piviusumi meeqqat pisinnaatinneqanngillat.
𝐈𝐬𝐮𝐦𝐚𝐬𝐬𝐮𝐢𝐧𝐢𝐬𝐬𝐚𝐪 𝐢𝐧𝐢𝐬𝐬𝐢𝐢𝐬𝐚𝐫𝐟𝐢𝐢𝐧𝐧𝐚𝐫𝐭𝐮𝐭 𝐦𝐢𝐬𝐢𝐠𝐢𝐧𝐞𝐪𝐚𝐥𝐞𝐫𝐬𝐢𝐥𝐥𝐮𝐠𝐮
Angajoqqaat amerlasuut misigaat meeqqeriviit ilaanni piffissap ilaani ilungersorneq ima annertutigisoq, qanilaarneq suliniutillu salliunneqarsinnaajunnaartarlutik. Tamanna annernarpoq.
Meeqqat meeqqerivimmut tunniunneqartarput nakkutigineqaannarnissaat pinnagu. Paarineqarnissaat, ineriartornissaat toqqissisimanissaallu naatsorsuutigineqartarput.
Meeqqeriviit taama ilungersunartorsiulertigineranni inissiisarfittut misigineqalersillugit, meeqqanut, angajoqqaanut sulisunullu sunniuteqartarpoq.
𝐀𝐚𝐪𝐪𝐢𝐢𝐬𝐬𝐮𝐭𝐢𝐭 𝐩𝐢𝐠𝐢𝐧𝐞𝐪𝐚𝐫𝐩𝐮𝐭 – 𝐩𝐢𝐮𝐦𝐚𝐬𝐬𝐮𝐬𝐞𝐪 𝐩𝐢𝐮𝐩𝐩𝐚𝐭
"𝑀𝑒𝑒𝑞𝑞𝑎𝑡 𝑠𝑖𝑢𝑛𝑖𝑠𝑠𝑎𝑟𝑖𝑔𝑖𝑣𝑢𝑡 𝑡𝑢𝑠𝑎𝑟𝑡𝑢𝑎𝑟𝑝𝑎𝑟𝑝𝑢𝑡. 𝐾𝑖𝑠𝑖𝑎𝑛𝑛𝑖 𝑡𝑎𝑎𝑚𝑎𝑎𝑝𝑝𝑎𝑡, 𝑚𝑒𝑒𝑟𝑎𝑟𝑡𝑎𝑙𝑙𝑖𝑡 𝑎𝑡𝑢𝑔𝑎𝑎𝑡 𝑢𝑙𝑙𝑢𝑚𝑖𝑘𝑘𝑜𝑟𝑛𝑖𝑡 𝑎𝑛𝑛𝑒𝑟𝑡𝑢𝑛𝑒𝑟𝑢𝑠𝑢𝑚𝑖𝑘 𝑠𝑎𝑙𝑙𝑖𝑢𝑛𝑛𝑒𝑞𝑎𝑟𝑡𝑎𝑟𝑖𝑎𝑞𝑎𝑟𝑝𝑢𝑡. 𝑇𝑎𝑎𝑚𝑎𝑎𝑛𝑛𝑔𝑖𝑝𝑝𝑎𝑡 𝑜𝑞𝑎𝑎𝑠𝑖𝑖𝑛𝑛𝑎𝑎𝑠𝑠𝑎𝑝𝑝𝑢𝑡," - Dina Olsen oqarpoq.
Inuiaqatigiinneq ataqatigiinneq piussappat assiliaq tamakkiisumik isigilertariaqarparput.
Atorfillit Kattuffianni massakkoqqissaaq aaqqiissutigineqarsinnaasunik siunnersuuteqarpoq.
❤ Assersuutigalugu erninermi sulinngiffeqarnerup sivitsorneqarnissaa, taamaalilluni meeqqat mikinerpaat atugaat eqqarsaatigalugit meeqqerivinni ilungersunartumik inissisimaneq annikillisinneqarsinnaammat.
❤ Aamma meeqqamik napparsimatitsisarnermut tunngavoq. Ullumikkut pisinnaatitaaffiit piviusumut naapertuutinngillat, taamaattumik napparsimatitsilluni akissarsiat pigiinnarlugit ullut aappaat pingajuallu pisinnaatitaaffigineqarnissaat Atorfillit Kattuffianniit piffissami sivisuumi piumasarineqarsimagaluarpoq.
❤ Aamma suliffinni eqaatsumik periarfissaqartitsinissaq pisariaqartinneqarpoq – soorlu piffissami aalajangersimasumi nalunaaquttap akunnerini ikinnerusuni sulinissamut periarfissaq, aningaasatigut annaasaqaataanngitsumik. Tamanna inuulluataarniutaannaanngilaq – ilaqutariilli atugarissaarnerunissaat pillugu pisariaqartitaalluni.
Angajoqqaat suaartarput, apeqqulli unaavoq: 𝒊𝒏𝒖𝒊𝒂𝒒𝒂𝒕𝒊𝒈𝒊𝒊𝒕𝒕𝒖𝒕 𝒕𝒖𝒔𝒂𝒓𝒏𝒂𝒂𝒓𝒑𝒖𝒈𝒖𝒕?
