04/12/2022
Belgian Café/Bar "Grand Place" 💅
ფალიაშვილის 33ა ნომერში ერთი სასწაული გოგო ცხოვრობდა.... გოგო-თქო ვამბობ, მაგრამ სინამდვილეში ასაკით არც ისე პატარა იყო 🙈თუმცა არიან ადამიანები, რომლებიც სიბერეშიც კი ინარჩუნებენ სინარნარეს, სილამაზეს და სიკოხტავეს.....
ზუსტად ასეთი იყო რუსიკოც: დიდი, ლამაზი, ცისფერი თვალებით, აპრეხილი ცხვირით, მოკლედ შეჭრილი თმითა და ულამაზესი აბრეშუმის შრიალა მოსაცმელით, აი ოთახიდან ოთახში რომ გადიოდა და ზღვასავით მოჰქონდა სილაღე, სილამაზე, სიშრიალე.... მაგრამ რუსიკო მხოლოდ ლამაზი არ ყოფილა, ნახევარი ჩემი თინეიჯერობა მასთან ავრბოდი როცა კი თავისუფალი დრო მქონდა უნივერსტეტიდან და ისიც ყოველთვის საუკეთესო ყავით მიმასპინძლდებოდა, რომლის მსგავსს მსოფლიოში კი არადა მთელ გალაქტიკაში ვერავინ ამზადებდა.... ვგიჟდებოდი მასთან სტუმრობაზე, მასთან საუბარზე და ზუსტად ვიცოდი თუ რატომ უყვარდა რეზო ბაბუს ის ასე გამორჩეულად..... იმიტომ რომ გამორჩეული ქალი იყო, სასწაულად გამორჩეული და სხვანაირი.....
რუსიკო უკვე დიდი ხანია ჩვენთან აღარ არის, თუმცა როცა კი ავუვლი და ჩავუვლი ხოლმე ფალიაშვილის 33ა-ს ჩემდა უნებურად მეღიმება, რადგან სულ მახსენდება მასთან გატარებული დრო და ყავტეხილები 💅 და როგორი ბედნიერებაა იცოდე, რომ არის სადღაც ადამიანი, რომელსაც დღის რომელ მონაკვეთშიც არ უნდა მიადგე, მაინც გამონახავს შენთვის დროს.....
ჰოდა, მე მჯერა სამყაროში არსებული ენერგიის და სიყვარულის მარადიულობის და მგონია რომ არც ისაა შემთხვევითი რომ ფალიაშვილის 33-ში "ბელგიური კაფე" გაიხსნა, ბელგიური ვაფლებით, ყავით, ლუდითა და ნამდვილი ბელგიური შოკოლადით..... არ ვიცი რატომ გადაწყვიტეს იმ ფართში დაბინავება, სადაც ოდესღაც აზიური რესტორანი იყო, მაგრამ მე რომელსაც მგონია რომ შემთხვევით დამთხვევები არ არსებობს, ესეც ასეთად მეჩვენება.....
ასე მგონია, სადღაც, რომელიღაც სივრცეში რუსიკომ და ჯოჯომ (რომელსაც იდეაში არავინ ევასებოდა, მაგრამ რუსიკო მასაც კი მოხიბლავდა) გადაწყვიტეს ამგვარად მოეცათ მინიშნება იმისა, რომ სიყვარული მარადიულია, სამყაროში არაფერი არ იკარგება და რომ ადამიანები მანამდე არიან ცოცხლები, სანამ ჩვენ ისინი გვახსოვს.....
ჰოდა დიდი ადამიანებისა იყოს, ადამიანებისა, რომელთაგან ზოგი ისტორიაში რჩება და იმ ადამიანებისა, რომლებიც ბევრ მოსაგონარს გვიტოვებენ.....
სხვათაშორის ისიც არ უნდა იყოს შემთხვევითი, რომ ამ კაფეში ნებისმიერი ცხელ სასმელთან ერთად (ესპრესო, ამერიკანო, კაპუჩინო, ლატე) ბელგიურ შოკოლადსაც გაძლევენ საჩუქრად, იმიტომ რომ რუსიკოს ყოველთვის ჰქონდა ჩუმად გადამალული რეზო ბაბუს ჩამოტანილი შოკოლადები ყავაზე მისაყოლებლად......
