07/05/2026
BÚRHANDILIN FYLLIR 170 ÁR 🎂 🇫🇴
13. mai 2026 fyllir Búrhandilin í Skopun 170 ár. Búrhandilin hevur verið ein trúfastur partur av bygdarlívinum í Skopun øll hesi árini. Søgan gongur heilt aftur til 1856, og síðan tá er handilin gingin í arv. Í dag er tað Kristoffer Poulsen sum eigur og rekur handilin saman við Karin Norðberg Eið. Sostatt er tað fimta ættarliðið, sum nú rekur handilin.
NATÚRLIGT SAVNINGARSTAÐ
Øll hesi árini hevur Búrhandilin verið nógv meira enn bara eitt stað at fara til handils. Hann hevur verið eitt natúrligt savningarstað, har fólk hittast, práta og fylgja við í tí, sum gongur fyri seg í bygdini, á oynni og kring landið. Her verða bæði stór og smá mál umrødd, og nógv av tí, sum fyllir í gerandisdegnum, fær sítt pláss í einum práti yvir diskin.
NÝGGJAR AVBJÓÐINGAR VIÐ SANDOYARTUNLINUM
Men tíðirnar broytast. Tá Sandoyartunnilin kom, gjørdist tað lættari hjá fólki at leita sær til Havnar at keypa, og tað hevur givið nýggjar avbjóðingar. Kortini er tørvurin á einum bygdarhandli framvegis stórur, serliga fyri tey, sum ikki hava møguleika at ferðast langt. Eldra ættarliðið setur stóran prís upp á hendan møguleikan.
TÆNIR FLEIRI OYGGJUM
Samstundis røkkur handilin víða. Fólk úr grannabygdum og eisini úr oyggjum sum Hesti og Skúvoy venda sær til Búrhandilin. Tað vísir, hvussu nógv hann merkir – ikki bara fyri bygdina, men fyri eitt størri øki.
Búrhandilin er sostatt ikki bara ein handil, men ein trygd fyri oyggjarfólkið. Og vónin er, at onkur fer at taka við, so søgan kann halda fram.
