30/06/2025
كتير بنسأل نفسنا امتي السن المناسب عشان نبدأ تعليم اطفالنا؟ 🤔
قصدك يعني امتي الولد يمسك القلم ويكتب؟ ✍️
لا لا الموضوع اعمق من كدة بكتير . التعليم بيبدأ من وقت ما بيكون الطفل جنين لسة بيتكون في بطن مامته. 🤰
لا دة الظاهر ان الموضوع عميق بجد. طب ازاي جنين وازاي هايتعلم؟
بص يا ستي.. الجنين بداية من للاسبوع الثالث للاسبوع الثامن القلب والمخ عنده بيبدأو يتشكلوا وبداية من الاسبوع السادس يبدأ القلب في النبض.❤️
ومن الاسبوع التاسع للاسبوع العشرين بتتكون الاذن الداخليةو بيبدأ الجنين يسمع الاصوات حواليه. خصوصا صوت الام يعني لو بتقرأ قران او بتسمع موسيقي بتغني او بتزعق كل دة الجنين بيسمعه وبيتخزن في ذاكرته السمعية. 👂
في دراسات بتقول ان بعض الاطفال بيهدوا لما بيسمعو موسيقي معينه نتيجة لانه كان بيسمعها وهو في الرحم. فنبطل مهرجنات بقي ونسمع حاجة هادية عشان ذوق اطفالنا الموسيقي في خطر 🤣🤣
من الاسبوع العشرين للاسبوع الثلاثين بيبدأ الجنين في استخدام حواس زي التذوق والشم يعني مثلا بعض الاطفال بتفضل انواع معينة من الاطعمة لانه فاكرها من وهو لسة جنين لما كانت نكهتها بتوصله عن طريق السائل الامنيوسي في الرحم. 👅
يعني مثلا لو الام بتحب اكل معين زي الجزر مثلا وبتاكله كتير وهي حامل في احتمال ان الطفل لما يكبر يطلع بيحب الجزر. 🥕
كمان الجنين بيتعود علي اللغة اللي مامته بتتكلم بيها لما بيسمعها بتتكلم او بتغني ودة بيسهل عليه بعد الولادة انه يتعلم اللغة بشكل اسرع.
فببساطة، الرحم مش بس مكان للنمو الجسدي... ده كمان أول فصل في كتاب تعليم الطفل.
دي كانت الحلقة الاولي في سلسلة تعليم الطفل لو عجبتك المعلومات اعملنا لايك وشير وتابعنا عشان نكمل باقي السلسلة....
