01/01/2017
2016 # ( قصيدة الختام ) .
إسمحولى ..
أسرد الحكايات ب طولى ..
أيوة عادى هحكيهالكم
" بس هحكيها ب ميولى "
بما فيها .. وبما عليها
بكُل لحظة العُمر فيها
وبما أستمر من مشاهد .
" هحكى عنها لإنى شاهد "
السنة ...
كانت عظيمة بكل شئ فيها إبتدا .
السنة ...
كانت عظيمة بكل شئ فيها إنتهى .
السنة فيها وفيها
حتى لو راح وقتها ..
ف تعالوا نسرد الاحزان
( حُزن – حُزن )
البداية ..
بنت كنت ليها حضن .
بس سابت قلبى تاه .
كان يادوب أول يناير .
والبرد كان أسلوب حياة .
بس هى إستخلصت
من جوه قلب البرد ( البرود ) ..
بس هى لخصت
المشاعر ف الفراق ..
والنهاية عُمرها مابتلتزم بوعود
كل شئ وقت الوادع
يا بشر بيكون سواء..
كنت يمكن ليها حالة .
خط نور أخره ( شُعاع )
ترجمت كل الحكاية .
لما قررت الوداع .
واللى شارى حضن منها .
هى بايعاه ع المشاع ...
( عدت شهور ) .
حالة تانية م الحياة
كت نصيبى وقسمتى ..
كان نصيبى م الحظوظ
مش مكمل فكرتى ..
حلمى حتى مكتملش
إسمى راحلوا قالوا لسه ..
الحياة محتاجة منه ..
100 حكاية والف قصة ..
بس لسه ..
إجتهادى والمعافرة
خلوا منى حد أقوى ..
فى أمور ف الدنيا كافرة
صعب تلقى ليها مآوى ..
بس لسه كمان مكمل
حتى لو اودامى سور .
كل يوم من عمرى عدى
راح مسيره يلقى نور ..
( مع إقتراب نهاية السنة )
" مشاهد متنوعة " .
تدينى كام ؟
تدينى سنى
ولا شيشة مأصلة .
تدينى سنى ولا قهوة ب وش مانو
" أم البنات ب جارة ليها موصلة "
وصلة قناة ( عشان تشوف حال اللى خانوا )
عجلة الإنتاج خلاص
" جابت أخرها من القماش "
والواد خلاص أصبح ثرى .
والأقتصاد ؟ مالو بصحيح ؟
طب جيه ؟ مجاش ؟
طب واللى باع لقىَ مُشترى ؟
والسياحة الروس زارونا
ولا لسه مقموصين ؟
والضمير العربى صحصح ؟
" للى حاصل ف فلسطين "
طب والجواز " بقا منه فايدة "
والدهب بقا سعره كام .
كام واحدة لسه م البنات
لسه طالبين إهتمام . ؟ .
طب والجماهير
رجعت الاستاد ؟
طب مِسكوا جاسوس
شغال لـ موساد ؟
والإستعباد .. " أخباره اية " ؟
والدوا أخباره إية ؟
والدولار أخباره إية ؟
طب والدينار أخباره إية ؟
والرغيف أخباره اية ؟
والغلابة أخبارهم إية ؟
والديابة أخبارهم إية ؟
والجزيرتين قوللى لية ؟
والقضاة " أحوالهم إية " ؟
والفساد واصل لإية ؟
والصحة والتعليم يا بيه ؟
واللى عشمتونا بيه ؟
قوللى ليه قوللى ليه ؟.
( ملخص ومجمل الاحداث )
" نظرة أمل " .
يا بشر عايشين حياتكم بالسنة ..
عيشوا حياتكم بالسنين ..
كل اللى فاتكم من سنة
هيجى لازماً باليقين .
ولو عايشين هموم باتت " تعالوا نجدد النية "
ومتملوش فُرص فاتت " نعوضها السنة جاية " ..
