16/02/2023
Fevralın 14-də Bakı şəhəri Qala qəsəbəsi, Zeytun Savxozu 3 küçəsi 126H ünvanında ölkədə tam yeni konseptdə fəaliyyət göstərən “Amart” şəbəkəsinin ilk mağazasının açılışı baş tutmuşdur. Tədbirdə Xəzər rayon İcra Hakimiyyətinin nümayəndələri, “Aqrar İnnovasiya və Təchizat Şirkətinin”, eləcə də tərəfdaş şirkətlərin rəhbər və işçi heyəti, həmçinin rayon ictimaiyyətinin üzvləri iştirak etmişlər.
Şirkət rəsmilərinin verdiyi məlumata görə, “Amart” bugünədək fəaliyyət göstərən mağaza şəbəkələrindən öz yeni konsepsiyası ilə fərqlənir. Belə ki, “Amart” mağazalarında inşaat, xırdavat və digər təsərrüfat malları ilə yanaşı həm də ailə təsərrüfatları və digər kənd təsərrüfatı subyektlərinin ehtiyaclarını tam şəkildə təmin edə biləcək aqrokimyəvi vasitələr, toxum və tinglər, suvarma və istixana sistemləri, heyvandarlıq texnikası, yemlər və yem əlavələri və s. vətəndaşlarımıza təqdim edilir.
“Amartın” fəaliyyəti bununla da məhdudlaşmır. Respublikamızın regionlarında açılacaq şəbəkənin orta və böyük ölçülü mağazalarında kənd təsərrüfatı ilə məşğul olan müştərilərə aqronom məsləhəti xidmətləri, aqrar kreditlər, aqrotexniki vasitələrin satışı və s. xidmətlərin təşkili nəzərdə tutulur. Bununla da “Amart” öz müştərilərinə təsərrüfat ehtiyaclarını təmin edə bilmələri üçün 360 dərəcə xidmət göstərməyi hədəfləyir.
Qeyd edək ki, “Amart” mağazalar şəbəkəsi “Aqrar İnnovasiya və Təchizat Şirkəti” ASC-yə məxsusdur.
