Ես նկարչուհի եմ, սիրում եմ իմ գործը և նկարում եմ հիմնականում ինչ-որ զգում եմ՝ մարդկանց, բնությունը և այն աշխարհը, որը գոյություն ունի իմ ուղեղում։
Սիրում եմ երեխաներին և երազում էի ստեղծել մի բան երեխաների համար, որը որակապես կփոխի նրանց խաղային աշխարհն՝ այն ավելի ջերմ ու գունեղ դարձնելով։
Բոլոր մայրիկների նման ես էլ շարունակ խաղալիքներ եմ գնում իմ չորս տարեկան աղջկա համար։ Վերջերս մտածեցի, որ
բոլոր այդ խաղալիքները հիմնականում պլաստիկից են, և չնայած որ բավական կիրառական են ու գունավոր, բայց մի տեսակ անկենդան են։ Որոշեցի որ ինքս մի հետաքրքիր բան կպատրաստեմ աղջկաս համար։ Այդպես վերցրեցի տանը եղած պաղպաղակի փայտիկները և սկսեցի միացնել իրար ու այդպես պատրաստեցի առաջին փոքրիկ մահճակալը, որտեղ աղջիկս մինչ այսօր էլ ամեն օր քնացնում է իր սիրելի տիկնիկին։
Այսպիսով որոշեցի հիմնել փայտե խաղալիքների փոքրիկ արտադրամաս։ Գուշակեք, թե որն էր հումքը․․․ ուրեմն՝ գնացի դեղատուն և գնեցի կոկորդի ստուգման փայտիկներից մի տուփ, սոսինձ, փայտի ներկ և մի քիչ էլ կտորեղեն՝ տիկնիկների սպիտակեղենի համար։ Այսպես ամեն օր աշխատեցի, մեծ, շատ մեծ սիրով և նվիրումով։ Երբեմն այնքան էի տարվում իմ պատրաստած խաղալիքներով, որ շարում էի սենյակի անկյունում ու մի կուշտ խաղում։
խաղալիքները բնական փայտից են, որոնք էկոլոգիապես մաքուր են և անչափ ջերմ ու հեքիաթային։
Ուզում եմ հայրենականան արտադրության խաղալիքների իսկական մեծ կայսրություն ունենալ, որոնց հետ երեխաները բարի, խաղաղ ու ջերմ կմեծանան։
