22/03/2022
#د ژوند ١٣ رازونه چې باید زده یې کړئ!
لیکوال: لېوېنکسټون
ژباړن: حمید الله حمیدي
#د ژوند ١٣ رازونه چې باید زده یې کړئ؛ د روزنیزې ارواپوهنې د هغه کتاب نوم چې لېوېنکسټون لیکلی او د ګرانه هېواد ځوان او تکړه لیکوال حمیدالله حمیدي پښتو ژبې ته ژباړلی دی. جهان اسلام خپرندویې ټولنې د چاپ په ګاڼه سمبال کړی او د کتاب مینوالو او د علم د لارې لارویانو ته یې په پښتنه مینه او پوره درنښت وړاندې کوي.
کتاب په ټوله کې په ٨٨ صحفو کې لیکل شوی دی.
نوموړی کتاب په ډېر ساده او روانه ژبه او خواږه نثر سره لیکل شوی دی.
- افغان ولس کلونه کلونه جګړو ځپلی او قربانۍ یې ترې اخیستې دي، نو ځکه ډېری وخت د ژوند له رازونو بې خبره پاتې شوي دۍ، نو د دې کتاب په لوستلو سره به د ژوند له دغو رازونو څخه تر یو حده خبر شئ.
- ځان وپېژنه چې خدای وپېژنې! دغې جملې ته که ښه ځېر شو، نو شاید لوستونکی ووایي: چې دا نو څه مانا لري؟ زه خو خپل ځان پېژنم، نور یې څه ډول وپېژنم؟
دغه جمله په خپل ځای کې ډېرې ماناوې لري، د دغې جملې څخه زموږ موخه د خپل وجود د وړتیاوو پېژندل دي، ترڅو د دغو وړتیاوو په مرسته وکولی شو، د خدای تعالی مخلوق ته د یو څه خیر رسولو جوګه شو. نو د دغه کتاب په لوستلو سره به د ژوند له هغه رازونو څخه خبر شئ، چې د هغه په پلي کولو سره به خپلې وړتیاوې را وسپړئ.
- د ژوند ١٣ رازونه چې باید زده یې کړئ؛ په دغه کتاب کې د ژوند هغه دیارلس رازونه راوړل شوي، چې که موږ د خپل ژوند په بهیر کې ترې ګټه واخلو، نو د ډېرو بریاوو، لاسته راوړنو، د خوشاله ژوند په تېرولو او په همدې ډول د خپلو وړتیاوو په کشفولو که به زموږ سره ډېره مرسته وکړي.
دغه کتاب له موږ سره مرسته کوي، چې هغه ناسپړل شوې خزانې را وسپړو او ګټه ترې واخلو، چې تر نن ورځې مو مهمې نه ګڼلې او یا هېڅ ترې خبر نه وو.
- کتاب موږ ته مسوولیت منل را زده کوي؛ یعنې دا چې د خپلې ماتې پړه یا مسوولیت په نورو خلک ور ونه چوو، نور خلک د خپلې ماتې اصلي فکټورونه ونه بولو او ویې نه رټو، بلکې د خپلې ماتې مسوولیت ومنو، او بیا ځلې هڅه وکړو.
- کتاب کې موږ دا زده کوو؛ چې په خپل ژوند کې باید هدف لرونکي واوسو، هغه که اوږد مهاله هدفونه وي او یا لنډ مهاله هدفونه.
موږ ټول باید په خپل ژوند کې هدف ولرو، ځکه دا هدف دی چې ژوند ته مانا ورکوي، بې هدفه ژوند هېڅ مانا نه لري.
- کتاب موږ ته را زده کوي چې ماته ونه منو او تسلیم نشو؛ هدف ته د رسېدو په لار کې مو که ماته وخوړه نو ماتې ته دې یوې تجربې او یا یوه استاد په نظر وګورو او هېڅکله تسلیم نشو، هغه څه وایي: "بنویس بنویس تا شوی خوشنویس." نو خپل هدف ته د رسېدو په لار کې له ماتې څخه وېره لرل باید د دې لامل نشي چې هېڅ هدف ونه لرو.
- د کتاب له لوستلو وروسته به مو د ماتې په اړه
په فکر او په لیدلوري کې په بشپړ ډول بدلون راغلی وﻱ؛ ماتې ته باید د یوه فرصت په توګه وکتل شي نه د تسلیمۍ د پیلامې په توګه.
- کتاب کې به ولولو چې که ښه ژوند غواړئ نو ښه ټاکنه باید وکړو. ژوند د هغه ټاکنو ټولګه ده چې تاسو یې کوئ. تاسو چې څومره غوره او پر ځای ټاکنه کوئ، په ډېر احتمال به مو ژوند هم غوره او له خوښیو څخه ډکوي.
- په همدې ډول په کتاب کې به دا هم زده کړو چې باید د ملګرتیا لپاره ښه ملګري وټاکو، ځکه چې زموږ ملګري زموږ د شخصیت ښکارندویي کوي.
هر څوک د ملګرتیا لایق او وړ ونه بولو.
- موږ باید تل د زده کړې په لټه کې واوسو، که چېرته موږ له زده کړې لاس په سر شو، نو ژوند به ډېر راته سخت شي.
او په همدې توګه هېڅ ډول پوهه بې ارزښته ونه بولو، ځکه تاسو چې هره ورځ کوم څه زده کوئ، نو یوه ورځ مو حتمن په درد خوري او ګټوره درته ثابتېږي.
- که غواړئ چې په ژوند کې مو غمونه را ګیر نه کړي، نو سفر وکړئ.
د سفر کولو څخه مې منظور بل هېواد ته نه دی، بلکې زموږ د هېواد نورو سیمو، ولایتونو، ولسوالیو او نورو په زړه پورې ځایونو ته لاړ شئ، چې ستړیا مو در ختمه کړي.
- په دې کتاب کې به ولولو چې له مصرف مخکې سپما وکړئ؛ یعنې دا چې باید د سبا ورځې غم درسره وي.
سپما یوازې د نقدو پیسو ساتلو ته هم نه وايي، بلکې هر هغه شی چې نن یې وساتو او سبا ترې ګټه واخلو او ژوند مو مخ ته پرې لاړ شي سپما ده.
- کورنۍ ته مو ارزښت ورکړئ؛ په یاد مو وي چې کورنۍ تر هر څه ډېره ارزښتمنه ده. د یو بل په خوا کې ژوند تېرول هغه څه دي چې د کورنۍ بنسټ قوي کوي.
د ژوند ١٣ رازونه چې باید زده یې کړئ کتاب کې دا او دې ته ورته ډېرو مهمو موضوعګانو ته اشاره شوې او په اړه یې معلوماتو وړاندې شوي دي، هر کس اړ دی چې د ژوند رازونه ولولي او په خپل ژوند کې د عمل جامه ور واغوندي، ترڅو په دې وکولی شي چې د خپل وجود وړتیاوې کشف او د خدای تعالی مخلوق ته ګټور تمام شي.
د حمیدي صېب دې کور ودان وي چې دا کتاب یې پښتو کړی دی، خدای تعالی دې د لا ښو او ګټورو اثارو د لیکلو او پښتو ژبې ته د ژباړلو توفیق ورکړي.
د جهان اسلام خپرندویې ټولنې دې هم کور ودان وي چې "د ژوند ١٣ رازونه چې باید زده یې کړئ" نومی کتاب یې د چاپ په ګاڼه سمبال کړی دی.
