15/06/2026
Vanaand staan ek met trane van dankbaarheid in my oë.
Na 5 jaar van A&I Fynbos het ek 'n mylpaal bereik waarvan ek jare gelede net kon droom. Vanaf Julie 2026 tot Mei 2027 is elke maand reeds met ten minste een troue bespreek (behalwe Maart, sover).
As iemand my vyf jaar gelede gevra het of ek ooit hier sou uitkom, sou my antwoord waarskynlik "nee" gewees het. Daar was tye van twyfel, onsekerheid, teleurstellings en baie harde werk. Daar was jare waarin ons slegs 'n handjievol troues gehad het, en dae waar ek gewonder het of alles die moeite werd is.
Maar vandag kyk ek terug en besef dat elke uitdaging, elke traan en elke opoffering deel was van die pad wat my hierheen gelei het.
Ek het hierdie besigheid van die grond af opgebou. Daar was mense wat getwyfel het, mense wat afguns gehad het en mense wat geglo het ek sal nie sukses behaal nie. Vanaand voel ek trots, nie omdat ek iets aan iemand hoef te bewys nie, maar omdat ek kan sien hoe ver ons gekom het.
Ek kan ook nie vanaand hier staan sonder om my ma, Annamarie, te bedank nie. Sy was van die begin af langs my, en elke keer wanneer ons 'n nuwe uitdaging aangepak het, het ons saam nuwe talente en vermoëns ontdek. Sonder haar ondersteuning, harde werk en geloof in hierdie droom sou A&I Fynbos nie wees waar dit vandag is nie.
Vandag staan ons op 'n plek waar maande vooruit vol bespreek is, waar daar soms twee troues in een naweek is, of selfs meer as een troue in 'n maand. Dit is iets waarvoor ek ongelooflik dankbaar is.
My grootste dank gaan aan die Here. Sonder Sy genade sou niks hiervan moontlik gewees het nie. Hy het deure oopgemaak waar daar geen deure was nie en drome waar gemaak wat ek nooit gedink het moontlik is nie.
Dankie aan elke kliënt wat A&I Fynbos vertrou het om deel van julle spesiale dag te wees. Julle ondersteuning beteken meer as wat woorde ooit kan beskryf.
Drome word waar. Moet nooit ophou glo in dit waarvoor jy werk nie. 🌸🤍
