29/04/2024
မိတ်ဖုထွက်တဲ့ကလေးငယ်
••••••••••••••••••••••••••
နွေရာသီမှာ ပူပြင်းလွန်းတာကြောင့် ကလေးတွေမှာ မိတ်ဖုတွေထွက်လာတယ် ဘာလိမ်းပေးရမလဲဆိုပြီးမေးကြပါတယ်။ ဒါကြောင့် မိတ်ဖုဘာကြောင့်ဖြစ်ရတယ်ဆိုတဲ့အကြောင်းလေးရေးသားပေးချင်ပါတယ်။
🌿မိတ်ဖုဘာကြောင့် ဖြစ်ရသလဲ?
မိတ်ဟာ ပူနွေးပြီးစိုစွတ်တဲ့ရာသီဥတုမှာ အဖြစ်များပါတယ်။ ရာသီဥတုအလွန်ပူတဲ့အခါ ချွေးထွက်များလာပါတယ်။ အရေပြားမှာရှိတဲ့ ချွေးဂလင်းတွေကနေ ထွက်လာတဲ့ ပြွန်လေးတွေမှာ ချွေးထွက်များလွန်းတာကြောင့် ပိတ်သွားပါတယ်။ ဒီအခါ ချွေးတွေဟာ ပတ်ပတ်လည်က တစ်ရှူးတွေဆီပျံ့သွားပါတယ်။ ဒီအခါမှာ Irritation လို့ခေါ်တဲ့ မတည့်သလိုပြဿနာဖြစ်လာပါတယ်။ အရေပြားကို စမ်းကြည့်တဲ့အခါ အဖုဖုလေးတွေကိုထိတွေ့မိနိုင်ပါတယ်။
🌿ဘယ်နေရာတွေမှာအဖြစ်များလဲ?
▪️ကျောကုန်း
▪️ဗိုက်
▪️လည်ပင်း
▪️ရင်ဘတ်အပေါ်ပိုင်း
▪️ပေါင်ကြား
▪️ချိုင်းတို့မှာအဖြစ်များပါတယ်။
🌿မိတ်ဖုဖြစ်ရင်ဘယ်လိုကုသမလဲ?
ကုသနည်း standard treatment ရယ်လို့တော့မရှိပါဘူး။ ချွေးထွက်များပြီး အစိုပြန်လွန်းလို့ဖြစ်တဲ့အတွက် ကိုယ်ခန္ဓာအေးမြသွားရင်သက်သာပါတယ်။
ကလေးတွေမှာ မိတ်ဖြစ်တဲ့အခါ ရေပုံမှန်ချိုးပေးပါ။ အဝတ်အစားကို ပွပွနဲ့ လေဝင်လေထွက်ကောင်းတာဝတ်ပေးပါ။ တတ်နိုင်သလောက် မကုတ်မိအောင် တားပေးပါ။ ကုတ်ရင် အသားပဲ့ပြီး ပိုးဝင်တတ်ပါတယ်။ မယားအောင် Calamine Lotion လိမ်းပေးနိုင်ပါတယ်။ Hydrocortisone 1% Cream ကိုတော့ ဆရာဝန်ညွှန်ကြားပါက လိမ်းနိုင်ပါတယ်။ မိမိသဘောနဲ့မိမိတော့မလိမ်းသင့်ပါ။ ပန်ကာ/အဲကွန်းနဲ့နေခြင်း၊ လေဝင်လေထွက်ကောင်းအောင်ထားပေးခြင်းတို့ကလည်း မိတ်ကိုသက်သာစေပါတယ်။
ချွေးပေါက်ပိတ်စေတဲ့
▪️ပေါင်ဒါ
▪️Ointment
▪️အနံ့ပါတဲ့Lotionများ
▪️Petroleum နဲ့ Mineral Oils ပါတဲ့ Lotion များကိုရှောင်ပေးပါ။
🌿ဘယ်အခြေအနေမှာ ဆေးခန်းပြမလဲ?
▪️တစ်ပတ်ကျော်တဲ့အထိမပျောက်ရင်
▪️မိဘကိုယ်တိုင်ကစိုးရိမ်ရင်
▪️ပိုးဝင်တဲ့လက္ခဏာများ ( ဥပမာ - ဖျားခြင်း၊ မိတ်ဖုပတ်ဝန်းကျင်မှာ နီရဲရောင်ရမ်းနေခြင်း၊ ပြည်တည်ခြင်း) များရှိရင် ဆေးခန်းပြရမှာဖြစ်ပါတယ်။
အားလုံးကျန်းမာပျော်ရွှင်ကြပါစေ။
မောင်(ဆေး-၁)မာမီ
✅စာများကို လွတ်လပ်စွာ share နိုင်ပါတယ်။ ခွင့်ပြုချက်တောင်းရန်မလိုပါ။
❗️တစ်ဆင့်ပြန်လည်ကူးယူခြင်းမပြုရန်မေတ္တာရပ်ခံပါတယ်။
#ကလေး
#မိတ်ဖု
#မိတ်
