04/28/2023
بسم الله الرحمن الرحيم
والصلاة والسلام على خاتم المرسلين سيدنا محمد صل الله عليه وسلم.
وبعد:
أهنئكم بالعيد وكل عام والشعب السوداني بخير والأمة الإسلامية بخير.
وربنا يرحم شهدائنا و موتانا ويصبر ذويهم ويلهمهم الصبر والسلوان ويربط على قلوبهم.
الناس العاوزة تسافر مصر:
- المطار حاليا شغال إجلاء للأجانب فقط.
- الباصات شغالة والتذاكر اسعارها مرتفعة.
الوضع في المعبر في الجانب السوداني:
وضع مزدحم جدا وكمية من الإخوة موجودين ما بس من السودان كمان من سوريا وفلسطين والأردن...الخ
- الاكل سعروا مرتفع واحتمال ما تلاقيهو بسبب الكثافة الوصلت المعبر.
- الإجراءات الأمنية مشددة على الطرفين اكتر من الاول بسبب إطلاق المساجين بالخرطوم.
-
- مافي منظمات حاليا وصلت من الجانب السوداني المعبر للمساعدة الطبية والإغاثة الإنسانية ممكن يفيدنا اكتر الاخ عمار حمزة اعلام الولاية الشمالية.
الجانب المصري:
- الإجراءات الأمنية مشددة.
- المنظمات بكل فئاتها وصلت بما فيهم وزارة الصحة والاسكان المصرية، الهلال الأحمر ...الخ.
-. سعر الدولار ما بين 48 جنيه مصري و 50 جنيه مصري واحتمال يزيد اكتر.
بعض النصائح اذا حتسافر مصر:
- شيل ليك حاجات خفيفة كيك وبسكويت ومربى وجبنة وكم عيشة عشان احتمال تقعد يومين تلاته في المعبر.
- حاول انك تكون هادئ بقدر الإمكان.
- حاول انك تربط الحزام على نفسك شوية.
- خلي اطفالك جمبك وفي حضنك .
- كتر شرب موية.
اهم نقطة :
- انت اذا عاوز تسافر مصر معناها لازم تعرف انك داخل على حياة جديدة محتاج تتعب وتشتغل وعادي ممكن تسمع كلام عنصري من دا ومن دا وممكن تلاقي ناس طيبين وعاقلين وممكن تلاقي امورك ميسرة وتلاقي ناس فتحو ليك باب رزق مصر بلد شغل شغل شغل شغل.
- اذا عاوز تسافر وعندك قروش لازم تكون عارف انو قروشك دي لازم تكفيك أقل شيء 6 شهور زي ما قالت الأستاذة Omnia Alsayed
وعي مالي وتكون مقتصد وتوفر بقدر الامكان لحد ما تلاقي شغل وتقف على رجلك او اذا عندك قدرة تأسس شغل لازم تصبر ثم تصبر ثم تصبر.
حاجة اخيرة في مصر بيتم معاملتك كانك مصري في اي معاملة ياهو جوازك يكون ساري واقامتك سارية ودا عن تجربة.
وما تشيلك الهاشمية وتعمل مشكلة في اي كلام عنصري لازم تتعلم تبلع وما تخلي الشيطان يغلبك المصري اذا عاوز تغلبوا وتسكتوا وهو معاك في شغل لتفوق وانجح والتميز عليه
وما بس المصري اي جنسية أخرى
بالتوفيق وربنا يسلم الجميع ويرد الأهل طيبين وينعم علينا بالسلام والآمان
