03/12/2024
ລວມ 7 ນະໂຍບາຍ ທີ່ລັດຖະບານ ວາງອອກເພື່ອປັບປຸງຄຸນນະພາບການສຶກສາມີດັ່ງນີ້:
1. ຫຼຸດຜ່ອນການສິດສອນຫ້ອງຄວບ, ສະໜອງຄູສອນໃຫ້ພຽງພໍຕາມມະຕິ09/ລບ ດ້ວຍການນໍາໃຊ້ໂຄຕາທີໄດ້ຮັບໃນປີ 2025 ແລະ ໂຄຕາທະຫານພັນທະ 2,000 ຄົນ ໃຫ້ຄູອາສາສະ ໝັກຢູ່ເຂດຊົນນະບົດຈາກກະຊວງປ້ອງກັນປະເທດ (ເຊິ່ງປັດຈຸບັນມີຄູອາສາສະໝັກ 4,460 ຄົນ), ຄູສອນທີ່ຄົບອາຍຸບຳນານ ທີ່ຍັງແຂງແຮງສິດສອນໄດ້ໃຫຫ້ສືບຕໍ່.
2. ເອົາໃຈໃສ່ດູແລຊີວິດການເປັນຢູ່ຂອງຄູໃຫ້ດີຂຶ້ນ, ໂດຍສົມທົບການປະ ຕິບັດນະໂຍບາຍອຸດໜູນຈາກລັດຖະບານ ແລະ ການປະກອບສ່ວນຂອງອົງການປົກຄອງທ້ອງຖິ່ນ (ໃນປີ 2024 ລັດຖະບານໄດ້ຈັດສັນງົບປະມານອຸດໜູນຄູອາສາສະໝັກ ຈໍານວນ 90 ຕື້ກີບ. ໃນນັ້ນ ງົບຈາກລັດຖະບານ 76 ຕື້ກີບ, ທະນາຄານພັດ ທະນາລາວ 14 ຕື້ກີບ).
3. ສືບຕໍ່ສ້າງຄວາມເຂັ້ມແຂງໃຫ້ແກ່ຜູ້ບໍລິຫານການສຶກສາທຸກຂັ້ນທາງດ້ານວິຊາການ, ການບໍລິຫານ, ສະໜອງວັດຖຸອຸ ປະ ກອນ ແລະ ງົບປະມານທີ່ຈຳເປັນໃຫ້ພຽງພໍ.
4. ສືບຕໍ່ປັບປຸງຫຼັກສູດການຮຽນ-ການສອນ ແລະ ວິທີການສິດສອນຂອງຄູ, ວິທີຮັບເອົາຄວາມຮູ້ ຂອງນັກຮຽນໃຫ້ສອດ ຄ່ອງກັບເປົ້າໝາຍ ແລະ ຈຸດພິເສດຂອງແຕ່ລະທ້ອງຖິ່ນ.
5. ປັບປຸງ ແລະ ຂະຫຍາຍພື້ນຖານໂຄງລ່າງສະຖານການສຶກສາ, ສະໜອງອຸປະກອນການ ຮຽນ-ການສອນໃຫ້ພຽງພໍຂັ້ນພື້ນຖານ.
6. ດໍາເນີນມາດຕະການຈຳກັດສິ່ງແວດລ້ອມຕ່າງໆທີມີຜົນກະທົບທາງລົບ ແລະ ລົບກວນຕໍ່ ການສຶກສາເປັນຕົ້ນໃນເວລາຮຽນ.
7. ສືບຕໍ່ປະຕິບັດຕາມກົດໝາຍ ແລະ ລະບຽບການໃຊ້ຈ່າຍງົບປະມານທີ່ກຳນົດໄວ້ໃຫ້ເຄັ່ງຄັດ ແລະ ຊຸກຍູ້ການຊ່ວຍເຫຼືອຈາກຄູ່ຮ່ວມພັດທະນາ ເພື່ອໃຫ້ມີຈຸດສຸມຕາມເປົ້າໝາຍຂອງການພັດ ທະນາການສຶກສາ 5 ປີ ໃນແຕ່ລະໄລຍະ.
ທິງໝົດນີ້ເປັນມາດຕາການທີ່ ທ່ານ ສອນໄຊ ສີພັນດອນ, ນາຍົກ ລັດຖະມົນຕີ ແຫ່ງ ສປປ ລາວ ໄດ້ຂຶ້ນຊີ້ແຈງ ທີ່ເປັນຄໍາຊັກຖາມຂອງສະມາຊິກສະພາແຫ່ງຊາດ ຢູ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 26 ພະຈິກ 2024 ທີ່ຫໍສະພາແຫ່ງຊາດ.
ທີ່ມາ: ປະເທດລາວ, Lao National Radio
#ຂາດແຄນຄູ
