07/03/2026
Warbixin: Dowladda Federaalka oo Qorsheyneysa Mashruuc Dahab Qodis ah oo ka Bilaabanaya Deegaanka Milxo
Warar soo baxaya ayaa sheegaya in Dowladda Federaalka Soomaaliya ay qorsheyneyso mashruuc cusub oo lagu horumarinayo qodista dahabka ee gobollada waqooyi-bari dalka, gaar ahaan deegaanka Milxo. Sida wararku tilmaamayaan, dowladda ayaa iskaashi la sameyneysa laba shirkadood oo caalami ah oo fadhigoodu yahay Singapore iyo Turkiga, kuwaas oo ka shaqeyn doona sahminta, qodista iyo farsamaynta dahabka laga helo aaggaas.
Deegaanka Milxo ayaa sannadihii u dambeeyay noqday goob si weyn loogu qodo dahabka, iyadoo kumannaan qof oo ka kala yimid gudaha Soomaaliya iyo dalal kale ay halkaas u tageen raadinta macdanta. Mashruucan la qorsheynayo ayaa la filayaa inuu nidaamiyo qodista macdanta, kordhiyo dakhliga dowladda, isla markaana abuuro shaqooyin cusub, inkastoo ay weli jiraan caqabado la xiriira maamulka, sharciyeynta iyo ammaanka gobolka.