08/11/2024
کچھ لوگ سموگ کی سنگین صورتحال کو نظرانداز کرتے ہوئے حکومتی اقدامات کا مذاق اڑا رہے ہیں اور اپنے بچوں کو گھروں میں محفوظ رکھنے کے بجائے اُنہیں بازاروں میں گھما رہے ہیں، جو کہ ان معصوموں پر ظلم ہے۔ حیرت کی بات ہے کہ معقول اور سمجھدار لوگ بھی زہریلی فضا کے نقصانات کو سمجھنے کے بجائے جہالت بھرا رویہ اختیار کر رہے ہیں۔
سموگ نہ صرف سانس کی بیماریوں کا باعث بنتی ہے بلکہ دمہ، پھیپھڑوں کے کینسر اور دل کے امراض کو بھی جنم دیتی ہے۔ عالمی ادارہ صحت (WHO) کے مطابق سموگ والے علاقوں میں بچوں کی ذہنی نشوونما متاثر ہوتی ہے، اور ایسے علاقوں میں رہنے والے افراد کی اوسط عمر میں کمی آتی ہے۔ اس کے علاوہ، سموگ میں موجود ذرات سانس کے ساتھ خون میں شامل ہو کر جسم کے ہر حصے کو نقصان پہنچا سکتے ہیں۔
خدارا اپنے اور اپنے بچوں پر رحم کریں، اور جس وجہ سے سکول بند کئے گئے ہیں، اُس کی سنجیدگی کو سمجھیں۔ یہ وہ مہلک مسئلہ ہے جس کی وجہ سے چین جیسے ملک میں بھی سکول بند کئے جاتے ہیں۔ زندگی سے بڑھ کر کوئی چیز نہیں، اس بات کو سمجھیں اور اپنے پیاروں کے لیے بالخصوص بچوں اور بزرگوں کے لیے حفاظتی اقدامات کریں.
اللہ ہم سب کی حفاظت فرمائے آمین
