15/05/2026
“Эрдэнэт үйлдвэр” дахин 70 жил ажиллах нөөцтэй бөгөөд Оюутын ордыг эдийн засгийн эргэлтэд оруулна
"УУЛ УУРХАЙ БА СЭТГҮҮЛЗҮЙ" уулзалт хэлэлцүүлэг хоёр дахь өдрөө үргэлжилж байна. "Эрдэнэт үйлдвэр" нь зөвхөн төсвийн орлогын 7-8%-ийг бүрдүүлээд зогсохгүй, Монгол Улсын нийгэм, эдийн засгийн томоохон төслүүдийг (жишээ нь, эрчим хүчний хөнгөлөлт, мега төслүүдийн санхүүжилт) шууд болон шууд бусаар дэмждэг "эдийн засгийн зүрх" юм.
Геологи хайгуулын ажлыг эрчимжүүлж, нөөцийг олон улсын JORC стандартын дагуу дахин үнэлснээр Эрдэнэтийн овоо ордын насжилтыг дахин 60-70 жилээр тогтоосон байна. Өмнө нь үйлдвэрийн нөөцийг 40 орчим жилээр төсөөлдөг байсан бол орчин үеийн технологи болон нарийвчилсан хайгуулын үр дүнд ийнхүү хугацаа нь уртасжээ.
Илтгэлийн нэгэн чухал хэсэг нь Оюутын орд байлаа. Тус ордын нөөцийг нарийвчлан тогтоож, ТЭЗҮ-ийг боловсруулах ажил дуусах шатандаа орсон байна. Оюутын орд ашиглалтад орсноор:
• Үндсэн ордын зэсийн агуулгын уналтыг нөхөх;
• Үйлдвэрлэлийн хүчин чадлыг жилд 35-40 сая тоннд тогтвортой барих;
• Түүхий эдийн нөөцийг нэмэгдүүлэх стратегийн чухал ач холбогдолтойг онцлов.
Улсын төсвийн гол багана “Эрдэнэт үйлдвэр” ТӨҮГ нь жилд дунджаар 3.5 - 4.0 их наяд төгрөгийн борлуулалтын орлоготой ажиллаж, улс болон орон нутгийн төсөвт 2 орчим их наяд төгрөгийг татвар, хураамж хэлбэрээр төвлөрүүлж байна. Энэ нь тус үйлдвэр Монгол Улсын эдийн засгийн аюулгүй байдал, төсвийн тогтвортой байдлыг хангахад шийдвэрлэх үүрэг гүйцэтгэсээр байгаагийн илрэл юм.
Бага агуулгатай хүдрийг баяжуулах технологи нэвтрүүлсэн нь өмнө нь "ашиггүй" гэж тооцогддог байсан нөөцүүдийг эдийн засгийн эргэлтэд оруулах боломжийг олгожээ. Ингэснээр үйлдвэрлэлийн өртөг зардлыг хэмнэж, ашигт ажиллагааг нэмэгдүүлж байгааг Г.Ёндон захирал илтгэлдээ дурдлаа.
JOY.MN
