20/07/2025
“ငရဲ နဲ့ မခြောက်ပါနဲ့”
>< >< >< >< ><
ကလေးတွေကို ငရဲ နဲ့ကြောက်အောင် ခြောက်လှန့်ဆုံးမတာ တကယ်ရော အကျိုးရှိရဲ့လား။
မေ့သက်ဝေကတော့ ကလေးတွေကို ကြောက်အောင် ခြောက်လှန့်ဆုံးမတာက လွဲမှားတဲ့ ဆုံးမနည်း ဖြစ်ပြီး သူတို့လေးတွေ နားလည်လက်ခံလာအောင် ကျိုးကြောင်းပြ ဆုံးမတာကပဲ မှန်ကန်တဲ့ နည်းလမ်းလို့ ယုံကြည်ပါတယ်။
ငရဲနဲ့ကြောက်အောင် ခြောက်လှန့်ဆုံးမတာက ရေတိုမှာတော့ အလုပ်ဖြစ်တယ်လို့ ထင်ရပေမဲ့ ရေရှည်မှာတော့ ကလေးအတွက် ဆိုးကျိုးတွေပဲ ဖြစ်လာပါလိမ့်မယ်ရှင်။ ဘာကြောင့်လဲဆိုတော့ ငရဲ နဲ့ ကြောက်အောင် ခြောက်လှန့်ပြီးဆုံးမတဲ့အခါ ကြောက်စိတ်ကပဲ Drive လုပ်သွားတာ ဖြစ်တဲ့အတွက် ကောင်းတာဆိုးတာကို ခွဲခြားနားလည်တာမဟုတ်ဘဲ လူကြီးကဖြစ်စေချင်တဲ့ ရလဒ်အတိုင်း ဖြစ်ပေါ်စေလို့ပါပဲရှင်။
အဲဒီလိုမျိုး ကျိုးကြောင်းမဲ့ ကြောက်စိတ်ကို ဦးစီးပြီး ပြောင်းလဲစေတာကနေ ဖြစ်ပေါ်လာတဲ့ အဓိက ဆိုးကျိုးကတော့ “စိတ်ပိုင်းဆိုင်ရာ ထိခိုက်မှု” ပဲ ဖြစ်ပါတယ်ရှင့်။ ကလေးတွေဟာ အလွန်အမင်းကြောက်ရွံ့လာတဲ့အခါ သူတို့ရဲ့ စိတ်နုနုလေးတွေမှာ စိုးရိမ်လွန်ကဲမှုတွေ ဖြစ်လာတယ်၊ အဲဒီကမှတစ်ဆင့် စိတ်ဖိစီးမှုတွေလည်း ဖြစ်ပေါ်လာ စေပါတယ်ရှင်။ ဒီလိုနဲ့ အိပ်မက်ဆိုးတွေမက်တာမျိုး၊ အဲဒီအကြောင်းကို အမြဲလိုတွေးပြီး ကြောက်ရွံ့နေတာမျိုး ဖြစ်လာနိုင်ပါတယ်ရှင်။
နောက်တစ်ဆင့်ကတော့ “စိတ်ဓာတ်ကျဆင်းလာတာ” ပဲ ဖြစ်ပါတယ်ရှင်။ ငရဲနဲ့ အလွန်အကျူး ခြိမ်းခြောက်ဆုံးမတဲ့အခါ ကလေးဟာ သူ့ကိုယ်သူ အပြစ်ရှိတယ်လို့ ခံစားလာရမယ်။ ပြီးရင် အပြစ်အတွက် ပြစ်ဒဏ်ခံရမယ်လို့လည်း တွေးလာပါလိမ့်မယ်။ အဲဒီနောက်မှာတော့ သူ့ကိုယ်သူ ထိန်းချုပ်နိုင်စွမ်း နည်းပါးလာပြီး သူ့ကိုယ်သူ ယုံကြည်မှုလည်း နည်းပါးလာနိုင်ပါတယ်ရှင်။
Self confidence နည်းပါးလာတဲ့နောက်မှာ မသိမသာ ဖြစ်ပေါ်လာတဲ့ ပြောင်းလဲမှုတစ်ခုက ကလေးဟာ ငရဲကို ကြောက်၊ အပြစ်ကျူးလွန်မှာကို အလွန်အမင်းကြောက်လာတာကြောင့် သူ ဘာလုပ်လုပ် အပြစ်ကင်းဖို့ကိုပဲ လိုတာထက်ပို အာရုံစိုက်လာတာမျိုး ဖြစ်ပါတယ်ရှင်။
လူအများစုကတော့ ကိုယ့်ကလေးက အပြစ်ကင်းအောင်နေတတ်တာ ကောင်းတာပဲလို့ တွေးကြမှာပါပဲ။ ဒါပေမဲ့ အဲဒီစိတ်ရဲ့နောက်မှာ ရဲရင့်တဲ့စိတ်တွေအတွက် ကြီးမားတဲ့ အဟန့်အတား ဖြစ်ပေါ်လာစေပါတယ်။ ရဲရင့်တဲ့စိတ် မရှိရင် အမှန်တရား၊ တရားမျှတမှု၊ ကိုယ်ခြင်းစာမှု၊ စတဲ့အရာတွေအတွက်လည်း ခက်ခဲလာပါမယ်။
ကြောက်စရာကောင်းတာကတော့ ရဲရင့်တဲ့စိတ်မရှိရင် ကလေးဟာ မေးခွန်းပြန်မထုတ်တတ်တော့ပါဘူး။ မေးခွန်းပြန်မထုတ်တတ်တော့တဲ့အတွက် သူ့ရဲ့အသိဉာဏ်နဲ့ စဉ်းစားဆင်ခြင်နိုင်စွမ်းကိုလည်း ကန့်သတ်လိုက်သလိုဖြစ်လာပါလိမ့်မယ်ရှင်။ ပြီးတော့ တီထွင်ဆန်းသစ်နိုင်ခြင်းလည်း ချို့တဲ့လာမှာပဲ ဖြစ်ပါတယ်ရှင်။ အဆိုးဆုံးကတော့ ဘာသာရေး၊ လူမှုရေးနဲ့ ကိုယ်ကျင့်တရားပိုင်းဆိုင်ရာ မေးခွန်းတွေကို ပြန်မမေးရဲတော့တာ ဖြစ်ပါတယ်ရှင်။
ဒါကြောင့် ကလေးတွေကို “ငရဲနဲ့ကြောက်အောင် ခြောက်လှန့်ဆုံးမမဲ့အစား” “ချစ်ခြင်းမေတ္တာနဲ့၊ နားလည်မှုကို အခြေခံပြီးတော့ပဲ ပဲ့ပြင်ဆုံးမသင့်ပါတယ်။” “အပြစ်ကျူးလွန်တာ မဟုတ်ဘဲ အမှားလုပ်မိတာ၊ အမှားကနေ သင်ခန်းစာယူပြီး အမှန်ကိုပြင်နိုင်တာ” ဆိုတဲ့ လမ်းညွှန်ပြုပြင်မှုမျိုးပဲ ပြုလုပ်ကြဖို့ မေ့သက်ဝေက တိုက်တွန်းလိုက်ပါရစေရှင်။
"မေ့သက်ဝေ" က ချစ်ခင်ရတဲ့ မေမေတွေ၊ အိမ်ရှင်မတွေအတွက် အသုံးဝင်မဲ့ အကြောင်းအရာလေးတွေကို မျှဝေပေးနေတာမို့ Like & Follow လေး လုပ်ပေးသွားကြဖို့ ဖိတ်ခေါ်အပ်ပါတယ်ရှင်။
မေ့သက်ဝေရဲ့ အားထုတ်မှုလေးတွေကို အသိအမှတ်ပြုခြင်းအားဖြင့် Copy ကူးယူခြင်းမပြုဘဲ Share button လေး နှိပ်ပြီး Share ပေးကြရင် ပိုပြီး ဝမ်းသာမိမှာပါရှင့်။
