20/02/2024
ရန်ကုန်ကို လာမယ်ဆိုရင်
အပေါ် လမ်း ကပဲ လာလာ
အောက်လမ်း ကပဲ လာလာ
သခင်မြပန်းခြံ ကို ရောက်မှာ ဖြစ်ပါတယ် ။
အဝေးပြေးကားနဲ့ လာလာ
လေယဥ်နဲ့ လာလာ
ရောက်တာနဲ့ လှိုက်လှဲ ပျူငှာစွာ ကြိုဆိုပြီး
အထုပ်တွေ အတင်းဆွဲ ကားနဲ့ အိမ်အထိလိုက်ပို့မယ့်
သူတွေ ရှိ ပါတယ်
တောင်းသလောက် တော့ ပေးရပါမယ် ။ Taxi
တည်းခိုမယ် ဆိုရင်လဲ တည်းခိုခန်း အများစုက
တနာရီ section လား
၃နာရီ section လား
တနေ့လုံးတည်းမှာ လား
သေချာပြောတည်းလို့ ရပါတယ် ။
ဘုန်းကြီးကျောင်း လား
အသိအိမ် တည်းမှာလား
ဘယ်မှာတည်းတည်းဧည့်စာရင်းတိုင်ရပါတယ် ။
ရွာမှာလို လော်စပီ ကာသံတွေ
ငှက်အော်သံ တွေ ကြားရမှာမဟုတ်သလို
စျေးသယ် တွေ ရဲ့ ဘာရောင်းမှန်း မသိအောင်
အော်ရောင်း နေတဲ့ လည်ရောင်း နေတဲ့ အသံတွေ ကို
ဆယ်မိနစ်တခါ ကြားရပါလိမ့်မယ်
ရန်ဖြစ်နေတယ် ထင်ရင် ထွက်မကြည့်ပါနဲ့
စျေးသယ် နှစ်သယ်
ဆုံအော်နေတာ ဖြစ်ပါလိမ့်မယ် ။
အပြင်ထွက်လို့ ကိုယ့်ကို အုပ်လိုက်ကြီး
ဝိုင်းကြည့်နေရင် သွေးမပျက်ပါနဲ့
ဆိုက်ကား ဆရာနဲ့ Taxi ကားသမားတွေ ပါ ။
တိုက်ခန်းတွေ က ညဖက် မအိပ်ကြဘူး
မီးတွေ ထွန်းထားပြီး
ဟိုချောင်း ဒီချောင်း လုပ်နေရင်လဲ
မစိုးရိမ်ပါနဲ့
ရေတင် မလို့ စောင့်နေကြတာပါ ။
စနေ။ တနင်္ဂနွေ ဆို
လဖက်ရည်ဆိုင်က ဟေးကနဲ ဝါး ကနဲ အော်ရင်လဲ
မထိတ် လန့်ပါနဲ့
ဘောပွဲ ကြည့်နေကြတာပါ ။
အသံ အရမ်းကျယ်ကျယ်အော်ရင်
မန်ယူ နိုင်တယ် လို့မှတ်ပြီး
တိတ်ဆိတ်နေရင်တော့
ဆိုက်ကားဂိတ် မီးလောင်နေပြီ လို့ မှတ်ပါ ။
ရန်ကုန် မှာ ဘုရား ဖူးသွားရင်း
လက်ခုပ် တီးခေါ်ရင် မသွားပါနဲ့
အဆောင်တခု ရပြီး မြွေစာ ကျွေးခဲ့ ရမှာပါ ။
သပ်သပ်ရပ်ရပ် ဝတ်ထားတဲ့ သူဆို ရှောင်ပါ
ပေတိပေစုပ်နဲ့ တလောကလုံး သူ့လုပ်စာစားတဲ့
မျက်နှာ နဲ့ လူက လူကောင်းပါ ။
အရေးအကြီးဆုံး တခုမှာချင်တာက
တိုက်တွေ ကိုမော့ကြည့်ပြီး လမ်းမလျောက်ပါနဲ့
ပလက်ဖောင်းပေါ်မှာ ပလစတစ်ခင်း ရောင်းနေတဲ့
မျက်မှန်တွေ နာရီ တွေ တက်နင်းမိရင်
တသက်လုံး လျော်လို့ ဆုံးမှာမဟုတ်ပါ ။
ကားမှတ်တိုင်မှာ အလုပ်လုပ်မလား မေးတဲ့ ကောင်မလေး တွေ ရှိ ပါတယ် ။
အလုပ်ရပြီ ဆိုပြီး လိုက်မသွားပါနဲ့
ကိုယ်ကပိုက်ဆံ ပြန်ပေးခဲ့ ရမှာပါ (ကိုယ်တွေ့)
