02/07/2025
ကလေးမကြိုက်တဲ့ အစားအစာ
ကျွန်မကို မေမေတွေလာပြောကြတာရှိပါတယ်။ ကလေးလေးက ဒီအသီးအနှံမကြိုက်ဘူး၊ ဒီဟင်းသီးဟင်းရွက်မစားဘူး၊ အသားမစားဘူး၊ ကြက်ဥမစားဘူး၊ ငါးမစားဘူး စသဖြင့်ပါ။
Toddler age ကို စတင်ဝင်ရောက်တဲ့အခါ လသားအရွယ်တုန်းကလို ဘာကျွေးကျွေးစားတာမျိုး မဟုတ်တော့တာဟာ ကလေးငယ်ရဲ့ ဖွံ့ဖြိုးမှုပဲ ဖြစ်ပါတယ်။
သူတို့ကြိုက်တာ မကြိုက်တာ သိလာတာ၊ အရသာခံတတ်လာတာ၊ ဂျေးများတတ်လာတာ ဒါတွေအကုန်လုံးက သူတို့ရဲ့ ဖွံ့ဖြိုးမှုပါ။ ကလေးတစ်ယောက်နဲ့တစ်ယောက်မတူတာကြောင့် အချို့က (၁)နှစ် (၂)နှစ်ဝန်းကျင်မှာဖြစ်ကြတယ်၊ အချို့က (၃)နှစ်လောက်မှာဖြစ်တယ်၊ အချို့ကတော့ လုံးဝဂျေးမများအကုန်စားတယ် စသဖြင့် ကွာခြားမှုတွေရှိပါလိမ့်မယ်။ နောက်ဆုံးအချက်ကတော့ ကလေးငယ် မူကြိုတက် ကျောင်းတက်လို့ သူငယ်ချင်းရလာတဲ့အခါ သူတို့သူငယ်ချင်းစားတာမှစားမယ်၊ သူငယ်ချင်းမစားတာသူလည်းမစားတော့ဘူး စသဖြင့် အမျိုးမျိုးအထွေထွေကာလတွေလည်း ကျွန်မတို့မေမေတွေဖြတ်သန်းရပါဦးမယ်။
ဒီဆောင်းပါးမှာတော့ (၁)နှစ်ကနေ (၃)နှစ်ကျော်
ဝန်းကျင်ကလေးငယ်တွေအတွက်အဓိကရေးလိုပါတယ်။
ဒီအရွယ်ကလေးလေးတွေ အစားရွေးတာ၊ အစားဂျေးများတာနဲ့ ကြုံရတဲ့အခါ မေမေတွေကို အကြံလေးပေးလိုတာကတော့-
-ကလေးငယ်လေးတွေဟာ ငယ်စဉ်မှာ အကြိုက်အလွန်ပြောင်းတတ်ပါတယ်။ သူတို့ကို ကိုယ်က မကြိုက်ဘူးလို့ခေါင်းစဉ်မတပ်ပါနဲ့။
မေမေတို့ ကြိုးစားရတာခက်ခဲမှန်းသိပါတယ် ကျွန်မကိုယ်တိုင်လည်း အလွန်စိတ်ညစ်ရလို့ပါ။ သမီးလေးက ၂နှစ်အောက်ထိ ထောပတ်သီးနဲ့ ကန်စွန်းဥကို အလွန်ကြိုက်သူပါ။ (၂)နှစ်ကျော်လာတော့ လုံးဝမစားတော့ပါဘူး။
-မကြိုက်လို့မကျွေးတာထက် ဟိုနည်းနည်း ဒီနည်းနည်းပါအောင်ကျွေးပါ။ အရသာကို လုံးဝ စိမ်းသက်မသွားအောင်ကျင့်ပေးပါ။
သူကြိုက်တဲ့ တစ်ခုခုနဲ့ရောကျွေးတာမျိုး၊ ပုံစံပြောင်းကျွေးတာမျိုး၊ မုန့်လုပ်ရင်ထည့်ကျွေးတာ၊ ဖျော်ရည်ထဲထည့်ဖျော်တာ စသဖြင့် တစ်ပတ်ကို (၃)ခါလောက် ကျွေးကြည့်တဲ့အကျင့်လုပ်ပါ။
ကျွန်မသမီး မကြိုက်တဲ့အစားအစာတွေကို ဒီလိုပဲ ကျွန်မလုပ်ကျွေးပါတယ်။ အခုဆို အချို့အစားအသောက်တွေပြန်စားနေပါပြီ။
-ထမင်းစားမှ အာဟာရပြည့်တာမဟုတ်တာကြောင့် ထမင်းမစားလည်း အခြားအာဟာရပြည့်ဝတဲ့အစားအစာတွေကျွေးလို့ရပါတယ်။ ကလေးငယ်တွေအတွက် အစာအုပ်စုအကြောင်းတွေကျွန်မဆောင်းပါးထပ်ရေးပေးပါမယ်။
-(၁)နှစ်ကနေ (၃)နှစ်အရွယ်ကလေးငယ်တွေဟာ စကားမပြောတတ်သေးပေမယ့် အလွန်တရာစူးစမ်းပြီး အတုခိုးလွယ်ပါတယ်။ နောက်ပြီး လူကြီးတွေကိုလည်း စမ်းသပ်တတ်ပါတယ်။ လူကြီးတွေက အရှေ့ကနေစားပြတာမျိုးလုပ်ပေးပါ။ လူကြီးတွေကသူတို့အရှေ့မှာ ဒီ အစားအစာကို ကလေးကမကြိုက်ဘူး မကျွေးတော့ဘူး ဆိုတာမျိုး ပြောလေ သူတို့က မစားလေပါ။
သူတို့မကြိုက်ကြောင်းပြရင် လူကြီးက မကျွေးတော့ဘူးဆိုတာမျိုးကို သူတို့က မှတ်ထားပါတယ်။
-နောက် စိတ်ချမ်းသာစရာ အချက်လေးထည့်ပေးပါ့မယ်။ ကိုယ်က မကြိုက်ဘူးမှတ်ထားပြီး မကျွေးပေမယ့် ကြုံကြိုက်လို့ပြန်ကျွေးဖြစ်တဲ့အခါ စားနေ၊ ကြိုက်နေတာမျိုးပါ။
ဒါကြောင့် ကလေးငယ်လေးတွေရဲ့အကြိုက်ကို တစ်သမှတ်တည်း ယူဆပြီး မိဘအုပ်ထိန်းသူကိုယ်တိုင်က အကျင့်လုပ်ပစ်လိုက်တာမျိုး မဖြစ်ပါစေနဲ့။
ကြီးလာရင်လည်း စားချင်တာစားမယ့်အတူတူ ကလေးတစ်ယောက်အစားအသောက်အတွက် ဒီလောက် စိတ်ရှုပ်ခံစရာလားလို့ စဉ်းစားမိနိုင်ပါတယ်။ ဒါပေမယ့် ကျွန်မတို့မိဘတွေ အနေနဲ့ သူတို့ကျန်းမာကြံ့ခိုင်ဖို့အတွက် အာဟာရပြည့်ဝတဲ့အစားအသောက်တွေကို တစ်နှစ်လောက်ပိုကျွေးလိုက်နိုင်ရင်ကို ဒါဟာအလွန်ကြီးမားအကျိုးရှိတဲ့ အောင်မြင်မှုပါပဲ။
အားလုံးအဆင်ပြေကြပါစေရှင်။
Dr. ရတနာမျိုးညွန့်
#လွတ်လပ်စွာမျှဝေနိုင်ပါတယ်တဆင့်ကူးယူတင်ပြခြင်းခွင့်မပြုပါ
