08/07/2026
“စာတန်းမထိုးသော ရုပ်ရှင်များ”
တစ်ဝက်တစ်ပြတ်မက်တဲ့ အိပ်မက်ထဲကဓားနဲ့
ငါ့ရဲ့တစ်နေ့တာ ကိုခုတ်မိလိုက်တော့
နေ့တွေအလယ်ကနေ သွေးစိမ်းရှင်ရှင်
ထွက်လာတယ် သူငိုတယ် ပြီးတော့
ငါငိုတယ် အကြောင်းအရင်း တစ်ခုခု
ရှိပုံရတယ်။
တစ်စတစ်စ နဲ့တီးခေါက်ကြည့်မိတော့
ရွာနေတဲ့မိုးဟာ ကြယ်တွေအဖြစ်ပြောင်းသွားတယ်
ငါ့ခန္ဓာကိုယ်အနှံ့မှာ ကြယ်တွေစီးကျကုန်တယ်
အိပ်ယာဝင်တေးတွေငြီးဆိုရင်း
အထီးကျန်နေတဲ့ အိပ်ယာဝင်ပုံပြင်တွေမှာ
မျက်ရည်တွေနဲ့။
ချဲ့ကားပြီးကြည့်လိုက်ယုံနဲ့
သုံးဖက်မြင်လောကရဲ့ အဓိပ္ပာယ်မဲ့မှုကို
မင်းရင်ဆိုင်ရလိမ့်မယ် ကော်ဖီခွက်ထဲ
သကြားထည့်ဖျော်တတ်တဲ့ ဝိရောဓိမှာ
မင်းရဲ့ရှင်သန်မှု မိုင်နှုန်းဟာ
ကြားညှပ်သွားလိမ့်မယ်။
တစ်ခါတစ်ရံ ရောဂါဘယရန်တွေကြောင့်
တစ်ခါတစ်ရံ သဘာဝကပ်ဆိုးတွေကြောင့်
တစ်ခါတစ်ရံ ဘေးဒုက္ခတွေကြောင့်
တစ်ခါတစ်ရံ လူသားချင်းစားသုံးမှုတွေကြောင့်
လက်ပတ်နာရီထဲက စက္ကန့်တံ တွေမှာ
ကမ္ဘာမြေတစ်ခုလုံးရဲ့ဝန်ထုပ်ကို ချိတ်ဆွဲပြီး
ဆက်၍ဆက်၍ လည်ပတ်နေလိမ့်ဦးမယ်။
ဂယက်ထခဲ့တဲ့ ပြောင်းလဲမှုတွေရဲ့
နှလုံးခုန်သံ အပါအဝင် ငါတို့ပေါက်ခဲ့တဲ့
ဗလာမပါကံစမ်းမဲတွေကိုမှိုစွဲစေတဲ့ဘဝရဲ့ကပ်ပါး
အပူချိန်နဲ့စိုထိုင်းစတွေမှာ အသက်ရှည်တယ်
ငါခဏခဏရောက်ဖြစ်တဲ့ အိပ်မက်ထဲကနေရာ
ငါမသွားဖြစ်တော့တဲ့ လက်တွေ့ဆီက နေရာ
ဘာများကွာခြားသွားမလဲ။
တန်ဖိုးတွေရောင်းဝယ်နေကြတယ်
ပစ္စည်းအစားထိုး အစားအသောက်ကုန်စည်တွေနဲ့
ပန်းရောင်းသူတွေ ဘာများကွဲပြားမလဲ
မသိခြင်းများနှင်းအတူ ဆက်၍လျှောက်ခဲ့ရပါသည်
ရောင်းသူဝယ်သူတွေရဲ့မျက်နှာတွေဟာ ဗလာတွေ။
အတွေးထက် လက်နှစ်ဆစ်ပိုနှက်တဲ့
ချောက်ထဲရဲရဲကြီးခုန်ချခဲ့ကြတယ်
ပြန်ခုန်တက်စရာ ဘာစောက်ကြောင်းမှမရှိ
နေမဝင်မီ တောင်စွယ်အရောက်ပို့ရမယ့်
အရိုးစုတွေ မနည်းမနော
စာမမှီနိုင်တဲ့မျက်ရည်တွေရဲ့ သောကမြစ်
သေချာမသိခင်မှာတင်ပဲ ဒီရုပ်ရှင်ပြီးခဲ့တယ်။
ပီလွန်း
