Dawei bookbar-A²KM

10/07/2025

26/10/2024

စိတ်ပါမှ ရွေ့တယ်
ရင်ဘတ်တူမှ ပေါင်းတယ်..၊

ဈေးပေါတာမှန်ပေမဲ့
အောက်တန်းစားဆန်ပြီး မဖားတတ်လို့

မိတ်ဆွေဆိုတာ ရွှေလိုရှားပါတယ်
ဆရာမောင်ချောနွယ် စကားယူသုံးရရင်

"လူကြိုက်နည်းတဲ့ကောင်"ပါ။

#ရိုးတံ

25/08/2024

ငါတို့ အရွယ်ရောက်ဖို့
အရမ်းစိတ်လှုပ်ရှားခဲ့ကြတယ်---"

ဒါပေမယ့် အခုငါတို့ကိုကြည့်ပါဦး---"

ပင်ပန်းတယ်၊ လမ်းပျောက်တယ်
အနာဂတ်အတွက် စိတ်ရှုပ်နေတယ်---"

24/07/2024

ထွက်သွားရင်လဲ နေခဲ့ရုံပါပဲ
ရုန်းလေ နစ်လေတဲ့ ကိုလှဖေ

ကျွန်တော် ချစ်ပဲ ချစ်ချင်ပါတယ်
မနစ်ရက်ပါဘူး..။

ပျော်ရာကို ပျံပါစေ
သာရာကိုင်းမှာ နားပါစေ
ကျွန်တော့် အချစ်တွေ အပြစ်မဖြစ်ချင်တော့ဘူး။

12/07/2024

မီးခံသေတ္တာ ကျောထောက်နောက်ခံနဲ့ သူတွေသာ
အချစ်ပြီးရင်း အချစ် လုပ်နိုင်ကြမယ်
ငါ့မှာတော့ မည်ကာမတ္တ ချစ်သူတစ်ယောက်နဲ့။

ဒီမြို့က ကမ်းခြေမှာ ဘာစင်ရော်မှလည်း ပျံမနေဘူး
သူတို့ ရိုမန်တစ်တွေနဲ့ရောပြီး ဖျော်နေကြတဲ့
ကော်ဖီဆိုတာ
အပေါစား ရယ်ဒီမိတ်ထုပ်တွေကို ပြောတာ။

ရေအိုးစင်မှာ ခွက်ကို သံကြိုးနဲ့ ချည်ထားတယ်
ဒါ ခေတ်က တောင်းဆိုတဲ့ တပ်ဆင်မှုအနုပညာ။

ဒီနှစ်လည်း
အာရှမှာ အကောင်းဆုံး ဘဝသရုပ်ဖော်ဆုကို
ငါတို့ပဲ ရဦးမှာ။

တကယ်တမ်းကျ
ကဗျာရေးရင်း
ခွေးဟောင်တာ ထထကြည့်နေရ။

#မောင်ယုပိုင် (တကယ့်ကဗျာ)

01/07/2024

၁၃။
ဘာဖြစ်လဲ
ဘာမှမဖြစ်ပါဘူး။
မီးခိုးများ
မှန်ကွဲစများ
သေနေသောကားများ
ကျောင်းနှင့်ဝေးကွာသွားသောကျောင်းသားများ
သွေးစက်များ
ဒါဖြစ်ခဲ့တယ်။
ရန်ကုန်မြို့မှာ ဖြစ်ခဲ့တယ်။

အောင်ချိမ့်
(တစ္ဆေ)

11/06/2024

မိုးမည်းမည်းမှ ညထူထူသို့
ဘယ်သူမှ မလိုက်လျော
ဘယ်သူမှ သဘောမတူ
"ဟေ့လူ၊ တဆိတ်ဗျာ..."
ဆေးလိပ်မီး အတောင်းခံရတတ်တယ် ။

- အောင်ချိမ့်
- ရိုမန့်တစ်ခေတ်ကဗျာများမှ

Credit..

08/06/2024

မကောင်းနိုင်တဲ့သူတွေနဲ့ ကင်းအောင်နေပြီး
မကင်းနိုင်သူတွေပေါ် ကောင်းအောင်နေထိုင်ပါတယ်..။

လူတစ်ကိုယ် စိတ်တစ်မျိုး
ရင်ခုန်သံတွေ အမျိုးမျိုးပါ တူဖို့မလိုပါဘူး။
စိတ်ရင်းစေတနာကို အခြေခံတဲ့ဆက်ဆံရေးတွေမှာ
အကြိုက်တွေရော စရိုက်တွေ မတူလဲရပါတယ်..။

ငါတို့ဟာ ကိုယ်သေရင်လိုက်သေမဲ့လူတွေမလိုဘူး။
ကိုယ်မသေအောင် စောင့်ရှောက်မဲ့ သူတွေသာလိုရဲ့..။
🙏
#ရိုးတံ
3.6.2024

30/05/2024

အရူး တကာ အရူးထဲမှာ

ဥစ္စာရူးနဲ့အာဏာရူးတွေကအဆိုးဆုံးပဲ

ငါက အချစ်ရူး သိပ်ကိစ္စမရှိဘူး။

-ဆန်းကျော်စွာဝင်း

23/05/2024

ပျော်ရွှင်ခြင်း
-------------------
လမ်းဘေးကလေးတယောက်ကို
စာရေးတတ်အောင် သင်ပေးဖူးတယ်။

လိုင်းကားကို ဦးတည်ချက်မရှိ
ဂိတ်ဆုံးထိ လိုက်စီးဖူးတယ်။

ပန်းတွေပေးဖူးတယ်
ပန်းတွေ ရဖူးတယ်။

အရုပ်ဝယ်ပေးဖူးတယ်။

ကြယ်တွေကို
ကုလားထိုင်နဲ့ ထိုင်ငေးဖူးတယ်။

နေမကောင်းသူကို
ဆေးရုံ မောင်းပို့ဖူးတယ်။

ခွေးကလေးတကောင် မွေးဖူးတယ်။

အင်းလေးကန်ကို
တောင်တွေပေါ်ကနေ မြင်ဖူးတယ်။

ပအို့ဝ် ရိုးရာ အက ကဖူးတယ်
ထင်းရှုးတောထဲ လမ်းလျှောက်ဖူးတယ်။

ကိုဗစ်ကူးနေတဲ့အဘွားကြီးကို
ချီပိုးပြီး ဆေးရုံကားပေါ်တင်ဖူးတယ်။

တို့ကတော့ တို့ကတော့ လို့
အိမ်ဝေးသူတွေစုပြီး ဆိုဖူးတီးဖူးတယ်။

ထမင်းဘူး လဲစားဖူးတယ်။

မုန့်ဖိုးငါးဆယ်နဲ့
ကြာဆံကြော်တပွဲရဖူးတယ်။

လက်ဖက်ရည်ဆိုင်မှာ ဘောပွဲမကြည့်ပဲ
ကြက်ဥကာကျက် ထိုင်စားနေဖူးတယ်။

လိုချင်နေတဲ့
ကတ်ဦးထုတ်လေးတလုံး
နမ္မတူဘက်မှာ ဝယ်ခဲ့ဖူးတယ်။

တောင်ပြာတန်းများကိုကြည့်ရင်း
ဘဝကို တန်ဖိုးထားဖူးတယ်။

နွေဦးပုံပြင်ကို
အသိတယောက်ဆိုချင်တယ်ပြောလို့
နှခါဆက်တိုက် တီးဖူးတယ်။

အသိတွေနဲ့
နှစ်တွေကြာပြီးမှ ပြန်တွေ့ဖူးတယ်။

ချိုးကူသံနဲ့
အိပ်ယာနိုးဖူးတယ်။

အရှုံးပေးဖူးတယ်
အနိုင်ရဖူးတယ်။

လက်ကျန် ပိုက်ဆံ ၂၀၀နဲ့
မုန့်ဟင်းခါးတပွဲစားဖူးတယ်။

နိဗ္ဗာန်ဈေးမှာ
မုန့်ကောင်းကောင်းကျွေးတဲ့ မဲနံပါတ်ရဖူးတယ်။

အမေ မုန့်ဟင်းခါးခွံ့ကျွေးဖူးတယ်၊

အဟောင်းဆိုင်ကနေ
နေဝင်းမြင့်ရဲ့ နက်စ်ကော်ဖီပါတဲ့
ဝတ္ထုတိုစာအုပ်လေး ရဖူးတယ်။

ချယ်ရီပန်းတခက် ရဖူးတယ်။

" မျှော်လင့်ခြင်းတွေ ဘယ်ဆီမှာ " လို့ကြားတိုင်း
တိမ်တွေကို ကြည့်ဖူးပါတယ်။

#ဆပ်ရိပ်
Credit🙏

16/05/2024

ရန်ကုန် ဟာ ကျဥ်းပါတယ်
ဒါပေမယ့် မဆုံနိုင်တော့ဘူး🤐

02/05/2024

#ငါလွမ်းတဲ့အကြောင်း

#လင်းခါး

လွမ်းတဲ့အကြောင်းဟာ
လက်ထိပ်ကြီးနဲ့ဆိုတော့ မသင့်လျော်၊
သတင်းဌာနတွေကလည်း
ခေါင်းကဒဏ်ရာတွေကိုပဲ ကြေညာပြီး
နှလုံးသားက လွမ်းတဲ့အကြောင်းကို
ပုဂ္ဂလဖိုင်ထဲပဲ ညှပ်ထားတယ်။

ငါလွမ်းတုန်းက
အဖိနှိပ်ခံ ငတ်ပြတ်သူတွေကြားထဲဆိုတော့
ငါ ပြောမထွက်ဘူး။

ငှက်ဖျား အပြင်းအထန်ထနေတဲ့ လူနာရှေ့
လေစိမ်းမိပြီး ဖျားတာလောက်ကို မညည်းချင်သလိုပေါ့။

ငါလွမ်းလို့ ကောင်းနေတုန်း
တပ်နီတွေက ခရီးရှည် ချီတက်
ရုရှတွေက ဇာဘုရင်ကို တော်လှန်နေကြတယ်။

ငါဟာ နိုင်ငံတော်ပဲ
လူဝီဘုရင်ပြောတော့
ပြည်သူတွေက စိတ်ဆိုး
ငါက ထောင့်တစ်နေရာမှာ လွမ်းနေ၊
ကောင်းကင်ပြာကြီးကို ကြည့်
ငါ့မှာ ရော်ရမ်းတမ်းတ လွမ်းတုန်း
ကောင်းကင်မှာ မှိုပွင့်ကြီးတွေထလာ
အဲဒါ ဟီရိုရှီးမားနဲ့ နာဂါစာကီပေါ့။

ချာနိုဘိုင်း ပေါက်ကွဲမှုကြီးဖြစ်တော့
ငါဟာ လမ်းဆုံမှာ လွမ်းလွန်းလို့ တရှုံ့ရှုံ့ငိုနေ။
၈၈ အရေးတော်ပုံမှာတော့
ငါဟာ လွမ်းနေရက် ပါဝင်ခဲ့ပါတယ်။

နောက်တော့လည်း ဒီမိုကရေစီကို လွမ်းရသလို
ငါ ဆက်လွမ်းရတာပဲ။
လွမ်းတဲ့အကြောင်းတွေဟာ
များသောအားဖြင့် လူခြေဆိတ်ရာဆိုတော့
လူသိနည်းလှပါတယ်။
ဒါပေမယ့်ကွယ် လူသိများချင်လို့ လွမ်းတာမှ မဟုတ်ရဘဲ။

လွမ်းတဲ့အကြောင်းဟာ
လွမ်းသူအတွက်သာ ကြီးကျယ်ပြီး
ကမ္ဘာကြီးအတွက်တော့ ဆန်ကုန်မြေလေးရုံရှိတာ ငါသိပါတယ်။

ဒါပေမယ့် ငါလွမ်းမိပါတယ်
လောကကြီးကို အံတုပြီး
တစ်ကိုယ်ကောင်းဆန်စွာ ငါဟာ လွမ်းမိ။

လွမ်းမိ လွမ်းမိ ငါဟာ လွမ်းမိ
လွမ်းစရာမရှိမှတော့
လူ့ဘဝဟာ ဘယ်အဖိုးထိုက်တော့မလဲ။

ဒါကြောင့် ငါဟာ စူပါပါဝါနဲ့ လွမ်းမိ
ပြည်တွင်းငြိမ်းချမ်းရေးကို ထိပါးတဲ့အထိ လွမ်းမိ
လယ်သမားတွေ လယ်စိုက်စရာမရှိတော့အောင် လွမ်းမိ
ကလေးအလုပ်သမားတွေ ပေါများလာအောင် လွမ်းမိ
လွမ်းမိ လွမ်းမိ လွမ်းမိ
အသုံးမကျ လူညွှန့်တုံးသည်အထိ
ငါဟာ လွမ်းမိ ။