05/06/2026
ខ្ញុំគិតលឿនពេក ឬគិតងាយពេក?
ខ្ញុំធ្លាប់គិតថា បើខ្ញុំមានស្នេហា ខ្ញុំប្រាកដជាច្បាស់លាស់ចំពោះទំនាក់ទំនង ស្រឡាញ់មនុស្សតែម្នាក់ ចង់កាន់ដៃគេរហូតដល់ចាស់មិនថាមានរឿងអ្វីក៏តស៊ូ ពុះពារទៅជាមួយគ្នា ... ជាក់ស្ដែង ខ្ញុំក៏បានជួបនឹងមនុស្សម្នាក់នោះ ជាមនុស្សដែលខ្ញុំស្រឡាញ់ ច្បាស់លាស់ ដូចអ្វីដែលខ្ញុំធ្លាប់បានប្រាថ្នា ... ខ្ញុំស្រឡាញ់គាត់ មិនថាមានរឿងអ្វីក៏ខ្ញុំប្រឈមមុខ មិនថាសុខ ឬទុក្ខ ក៏តស៊ូដើម្បីគាត់ ឱ្យតែមានគាត់រួមដំណើរជីវិតជាមួយ គ្មានអ្វីដែលមកបំបាក់យើងបានឡើយ ... !
ខ្ញុំគិតលឿនពេក គិតថាឱ្យតែយើងស្រឡាញ់គ្នា យើងច្បាស់ជាអាចជម្នះបានគ្រប់យ៉ាង តែខ្ញុំមិនបានគិតទេថា គេគិត និងចង់បានដូចខ្ញុំឬអត់? ខ្ញុំគិតងាយពេក គិតថា អនាគតមួយសាងឡើងវាមិនពិបាកទេ ឱ្យតែយើងមានដៃគូច្បាស់លាស់ ពិតប្រាកដ ចង់បានអីក៏បានដែរ ព្រោះយើងមានគ្នានៅក្បែរ យើងមានមនុស្សជាទីស្រឡាញ់នៅកំដរដើរទៅមុខជាមួយគ្នា ... ប៉ុន្តែ គេមិនបានចង់សាងអនាគតនោះឡើយ ...!
ខ្ញុំគិតតែម្នាក់ឯង ខ្ញុំខ្វល់តែម្ខាង ខ្ញុំចង់បានអនាគត ភាពច្បាស់លាស់ ទើបខ្ញុំចង់សាងគ្រប់យ៉ាងឡើងមក ព្រោះខ្ញុំបានជួបគេ ទើបខ្ញុំចង់បានជីវិតមួយដែលល្អប្រសើរ ... តែដំណើរជីវិតស្នេហាមួយនេះ វាកើតឡើងលឿនពេក ហើយវាជាការចង់បានតែម្ខាង ទើបធ្វើឱ្យគ្រប់យ៉ាងមិនអាចទៅមុខបន្ត គេក៏បានបោះបង់ ហើយចាកចេញ ចំណែកខ្ញុំដែលជាអ្នកគិតស្រមៃដល់ថ្ងៃអនាគត គឺនៅតែខ្ញុំម្នាក់ឯង ...!!! #លីមបញ្ញា
