Dhamma Review

Name: Dhamma Review
Address: Mandalay-Larshio Road, Maymyo, 05085, MM
Telephone: +959772977682

Home
Myanmar
Maymyo
Dhamma Review

A blog which will be refers to the Buddha's Dhamma, the Lord Buddha's discourses and collection of B

08/02/2024

ပုဂံမှာ ကျွန်တော်တို့ ဘာတွေ မှားခဲ့သလဲ.......................................................

ပုဂံကို ခရီးသွားကြမယ့်သူ အများစု ဂရုတွေထဲမှာ အမေးများကြတာက...
- ပုဂံကို ဘယ်လိုသွားရမလဲ။
- ဘယ်မှာတည်းရမလဲ။
- ဘယ်မှာစားလို့ အဆင်ပြေလဲ။
- ရှုခင်းဘယ်မှာ ကြည့်လို့ရလဲ။
- ကုန်ကျစရိတ် ဘယ်လောက်ရှိလဲ။
- ဓာတ်ပုံလှလှ ဘယ်သူရိုက်ပေးတတ်လဲ။..... စသဖြင့်။

ပုဂံကို အပန်းဖြေ အလည်အပတ်ခရီး သဘောမျိုး သွားကြတာမို့လို့ အများစု ဒီလိုမေးခွန်းမျိုးတွေ မေးတတ်ကြတာ သဘာဝကျပါတယ်။ ဒါပေမယ့် ပုဂံက အပန်းဖြေ အလည်အပတ် ခရီးသပ်သပ်ဆိုတဲ့ ရည်ရွယ်ချက် တစ်ခုတည်းနဲ့ သွားသင့်တဲ့ နေရာမျိုးလောက်ပဲလား။ ကျွန်တော်တို့ ပြန်စဥ်းစားကြဖို့ လိုပါတယ်။

ပုဂံက မြန်မာ့ယဥ်ကျေးမှု အမွေအနှစ်၊ သမိုင်း အမွေအနှစ်၊ ဘာသာ သာသနာ ထွန်းကားမှု ပြယုဂ်တွေ တစ်နေရာတည်းမှာ စုစည်းတည်ရှိနေတဲ့ နေရာဖြစ်လို့ ကျွန်တော့်အနေနဲ့ ပုဂံကို သွားတဲ့အခါ လည်ပတ် အပန်းဖြေယုံ (ဘုရားလည်ထွက်ယုံ) လောက် အခြေအနေမျိုးနဲ့ မသွားစေချင်ပါဘူး။ဘုရားလည်ဆိုတာ ကျွန်တော်တို့တွေ ဘုရားသွားတယ်.. ဝင်တဲ့အပေါက်က ဘုရားရှေ့မှာ ဦးချတယ်၊ ဘုရားကို တစ်ပတ်ပတ်တယ်၊ ဘယ်နေရာလေး ဓာတ်ပုံရိုက်လို့ အဆင်ပြေမလဲရှာတယ်... ဓာတ်ပုံရိုက်တယ် ပြီးတော့ ဟိုနားဒီနားကြည့်တယ်၊ ပြန်ဆင်းတယ်...အဲ့ဒါကို ဘုရားလည်တယ်လို့ ခေါ်တယ်။

ဘုရားမှာ လေ့လာစရာ ဘယ်နေရာတွေရှိလဲ၊ ဘုရားရဲ့ သမိုင်းကြောင်းက ဘာလဲ၊ ပါးစပ်ရာဇဝင်... မှတ်တမ်းရာဇဝင် ဘယ်လိုတွေရှိလဲ စသဖြင့် သိပ်စိတ်မဝင်စားကြဘူး၊ အချိန်လည်း မပေးချင်ကြဘူး၊ သိချင်စိတ်လည်း သိပ်မရှိကြဘူး။ အဲ့တော့ ရလာဒ်က ဘယ်လိုဖြစ်လာလဲဆိုရင် ပထမအဆင့်အနေနဲ့ ကိုယ်ရောက်ခဲ့တဲ့ ဘုရား ဘယ်ဘုရားမှန်း မသိဘူး၊ ဘယ်သူက ဘာရည်ရွယ်ချက်နဲ့ တည်လို့ တည်ခဲ့မှန်းလည်း မသိဘူး၊ ဘုရားသမိုင်းကြောင်းနောက်ခံက ဘယ်လိုရှိမှန်း မသိဘူး၊ စေတီတည်သူ ပြုပြင်ခဲ့သူတွေက ကောင်းမှု အပြင်...သူ့ဒါနကို ဖျက်ဆီးမယ့်သူတွေအတွက် ကျိန်စာတွေ ထားရစ်ခဲ့သလား ဘာလား ဆိုတာကိုလည်း မသိဘူး။ ဒုတိယအဆင့်အနေနဲ့ ဗုဒ္ဓဘာသာဝင်တစ်ယောက် ဘုရား စေတီ ပုထိုးတွေ ရောက်ရှိချိန်မှာ ဖြစ်သင့်ဖြစ်ထိုက်တဲ့ လက္ခဏာရေး ၃ ပါး ကို ဆင်ခြင်တာ (ဥပမာ... ဘုရားတွေသည် အရင်တည်ဆောက်စဥ်အချိန်က အရမ်းကြီးကျယ်ခမ်းနားခဲ့လိမ့်မယ်.. ဒါပေမယ့် အခု နှစ်ပရိစ္ဆေဒတွေ ကြာမြင့်လာတဲ့အခါမှာ တဖြည်းဖြည်းယိုယွင်း ပျက်စီးသွားခဲ့ပြီ.. ထိုနည်းတူစွာ ငါ့ခန္ဓာသည်လည်း နေ့စဥ်နဲ့အမျှ ယိုယွင်းလာနေတယ်... ဒါ အနိစ္စသဘောပဲ စသဖြင့်...)၊ အနိမ့်ဆုံးအဆင့် မေတ္တာဘာဝနာပွားများတာတို့ ဆိုတာတွေက အဝေးကြီးမှာ ကျန်ခဲ့ပါပြီ။

ဂရုထဲမှာ မကြာခဏ တွေ့ရတဲ့ အလှဓာတ်ပုံတွေကို ကြည့်ရင်း တစ်ခါတစ်လေ ဘုရားရဲ့ အဆုံးအမတွေကို ငါတို့ ကျောပေးထားသလို ဖြစ်နေခဲ့တာ ဘယ်လောက်တောင် ကြာခဲ့ပြီလဲလို့ တွေးမိတယ်။ မြတ်စွာဘုရားရဲ့ တရားတော်တွေက သတ္တဝါ တွေကို ရှိခိုးဦးချတတ်ဖို့၊ အလှူအတန်းပြုရုံလောက်နဲ့ တော်ဖို့ လမ်းပြခဲ့တယ်လို့များ ယူဆကုန်ကျပြီလား။

နောက်တစ်ပိုင်းက ပုဂံဘုရားတွေရဲ့ သမိုင်းကြောင်းတွေ ခိုင်မာမှု ရှိခြင်း မရှိခြင်းကို ခဏဘေးဖယ်ပြီး ပါးစပ်ရာဇဝင်ကိုပဲ အထိုက်အလျောက် လေ့လာကြည့်ရင် သိပ်စိတ်ဝင်စားဖို့ကောင်းတာ တွေ့ရပါတယ်။

ပုဂံပြည်ကို ဗုဒ္ဓသာသနာ ဘယ်လို ရောက်လာသလဲ။
အနော်ရထာ ဘယ်ဘုရားတွေ တည်ခဲ့သလဲ။
ရွှေဂူကြီး ဘုရားမှာ ဘယ်လို သမိုင်းတွေ ရှိသလဲ။
အလောင်းစည်သူ ဘယ်လို နတ်ရွာစံခဲ့ရသလဲ။
နရသူ ဘယ်လောက်ထိ ရက်စက်ခဲ့သလဲ။
ဓမ္မရံကြီး ဘုရားကို ဘာကြောင့်တည်ခဲ့သလဲ။
ဓမ္မရံကြီးဘုရားရဲ့ မြောက်ဘက် အာရုဏ်ခံအတွင်းထဲက ကျောက်စာမှာ ဘာတွေရေးထားလဲ။
မြစေတီကျောက်စာမှာ ဘာထူးခြားချက်တွေရှိလဲ။
နရပတိစည်သူက ဘယ်လိုမင်းမျိုးလဲ။
အနန္တသူရိယအမတ်ရဲ့ မျက်ဖြေလက်ာက ဘယ်လောက်ထိ အကျိုးသက်ရောက်ခဲ့သလဲ။
ဘာလို့ အလိုတော်ပြည့် ဘုရားလို့ ခေါ်သလဲ။......
မေးခွန်းပေါင်းများစွာ ... သိချင်စရာပေါင်းများစွာ...

ဒါပေမယ့် ဒီအပေါ်က မေးခွန်းတွေကို ပုဂံရောက်သူ အများစု ဘယ်သူမှ အခုတ်တရမေးတာ မတွေ့ရပါဘူး။

တိုက်တွန်းချင်တာ တစ်ခုက ပုဂံကို သွားဖြစ်တဲ့အခါ အလည်အပတ်အနေနဲ့လည်းသွားပါ။
အပန်းလည်းဖြေပါ။ ဓာတ်ပုံလှလှတွေလည်း ရိုက်ခဲ့ပါ။
ပုဂံရဲ့ သမိုင်းနဲ့ ပုဂံမင်းအဆက်ဆက်မှာ ကောင်းမွေ၊ ဆိုးမွေတွေ ဘယ်လိုလက်ဆင့်ကမ်းခဲ့ကြတယ် ဆိုတာကိုလည်း လေ့လာကြည့်ခဲ့ပါ။
ကိုယ့် သားသမီးတွေ အတူပါခဲ့ရင် သူတို့တွေကိုလည်း ကိုယ့် ဘိုးဘွားတွေ ဘာလုပ်ခဲ့ကြတယ် ဆိုတာကို အကျဥ်းလောက် သိခွင့်ရဖို့ ဖန်တီးပေးကြပါ။

အပေါ်က မေးခွန်းတွေ အကျဥ်းလောက် သိခွင့်ရဖို့ စာအုပ်တစ်အုပ်လည်း ကျွန်တော် အောက်မှာ မိတ်ဆက်ပေးထားပါတယ်။ အချိန်ရခဲ့ရင် ဘုရားထဲ မဝင်ခင် သမိုင်းကြောင်းဖတ်ဖို့ ၅ မိနစ်လောက် အချိန်ပေးကြည့်ပါ။ ပြီးမှ ဘုရားဝင်ဖူးပါ။ အပြည့်အစုံကြီး မဟုတ်ပေမယ့် အရင်ရောက်ခဲ့ဖူးတဲ့ အခြေအနေနဲ့ ကွဲပြားခြားနားတဲ့ ခံစားချက်ကို တွေ့ရပါလိမ့်မယ်။

အဲ့ကမှ တဆင့် သံသရာဝဋ်ဆင်းရဲက ဘာလဲဆိုတာ ကျွန်တော်တို့ နောက်တစ်ဆင့်သွားကြတာပေါ့။

Dhamma Review created by Bone Par Par
1250 AM
080224

08/02/2024

ပုဂံက အရင်နဲ့ မတူတော့ပါဘူး။ ...........................................

ပုဂံကို နောက်ဆုံးရောက်ဖြစ်ခဲ့တာ ပြီးခဲ့တဲ့ ဇန်နဝါရီ ၂၆ ရက်နေ့ကပါ။ ကိုယ့်မိသားစုချည်းပဲဆိုရင် ပုံမှန်အားဖြင့် ပုဂံမှာ ၃ ညအိပ် ၄ ရက်လောက်ထိ နေဖြစ်ပေမယ့် ဒီ တစ်ကြိမ်တော့ ၂ ညအိပ်ပဲ နေဖြစ်ခဲ့ပါတယ်။ အမြန်လမ်းမှာ Lock down မရှိတော့လို့ ညမအိပ်ဘဲ မောင်းခဲ့တာ နောက်နေ့မနက် ပုဂံရောက်ပါတယ်။ ပုဂံမှာ သမိုင်းနဲ့ချီတဲ့ ယဥ်ကျေးမှု အမွေအနှစ်လက်ရာ ဘုရား စေတီ ပုထိုးတွေ၊ လည်ပတ်စရာ နေရာတွေ၊ ရှုခင်းကြည့်နေရာတွေ အင်မတန်ကိုများလို့ ၂ ညအိပ်ယုံနဲ့ နေရာအားလုံးစုံ၊ ဘုရားအားလုံး ဖူးနိုင်ဖို့ဆိုတာ ဘယ်လိုမှ မဖြစ်နိုင်ပါဘူး။

အခု ဒီစာရေးရခြင်းရဲ့ ရည်ရွယ်ချက်က ပုဂံကို မိမိအစီအစဥ်နဲ့မိမိ Budget ခရီးသွားချင်သူတွေ၊ Guide သီးသန့် မငှားဘဲ ကိုယ့် မိသားစုနဲ့ကိုယ် သွားချင်သူတွေ၊ ရက်တိုအတွင်းမှာ အဓိကရောက်ရှိ ဖူးမျှော်သင့်တဲ့/ လည်ပတ်လေ့လာသင့်တဲ့ နေရာတွေကို တိုတိုနဲ့ လိုရင်း မျှဝေချင်လို့ပါ။ မကြာခင်ရောက်လာမယ့် ကျောင်းပိတ်ရက်ရှည်ကာလတွေ၊ သင်္ကြန်ရုံးပိတ်ရက်တွေမှာ ပုဂံကို ခရီးသွားကြမယ့်သူတွေ အချိန်တိုအတွင်း စုံစုံလင်လင်လည်း ရောက်ဖြစ်အောင်၊ တကယ် အစားအသောက်ကောင်း၊ တည်းခိုလို့ အဆင်ပြေတဲ့ နေရာတွေကိုလည်း သိရအောင်၊ အမှန်တကယ် စိတ်ရင်းစေတနာကောင်းကောင်းနဲ့ ဝန်ဆောင်မှုပေးနေတဲ့ ဆိုင်တွေ၊ တည်းခိုခန်းတွေလည်း ဒီ့ထက်ပိုပြီး ရောင်းကောင်းလာအောင်၊ ဧည့်သည်ရအောင် ကိုယ့်အတွေ့အကြုံ စစ်စစ်အပေါ် အခြေခံပြီးပဲ ပြောပါ့မယ်။

ကျွန်တော် ပုဂံရောက်တိုင်း Google Maps နဲ့ပဲ သွားပါတယ်။ မသွားခင် တစ်ရက်မှာ ကိုယ်နေမယ့် ရက်အပေါ် မူတည်ပြီး ဘယ်မှာတည်းမှာလဲ၊ ဘယ်နေရာတွေ သွားမှာလဲ၊ ဘယ်ဘုရားတွေ ဖူးမှာလဲ ဆိုတာ အကြမ်းဖျဥ်း စာရင်းထုတ်ပါတယ်။ နောက် ကိုယ်တည်းမယ့်နေရာ အတည်ဖြစ်ပြီဆိုရင် အဲ့နေရာနဲ့ အနီးဆုံး သွားလို့ရမယ့် ဘုရား၊ စေတီ၊ ပုထိုး၊.... တွေကို ရက်အလိုက် ဘယ်နေရာပြီးရင် ဘယ်နေရာဝင်မလဲဆိုတာ လမ်းကြောင်း စီစဥ်ပါတယ်။

ကျွန်တော့် မိသားစု တည်းခဲ့တာ Delight Guest House https://goo.gl/maps/ZW12ZJVaDwR422Bf7 ပါ။ တည်းခိုဖို့နေရာရွေးတာ တစ်ယောက်နဲ့တစ်ယောက် စံသတ်မှတ်ထားပုံခြင်း မတူနိုင်ပါဘူး။ ကျွန်တော့် မိသားစုရဲ့ စံကတော့ ဈေးသင့်ရမယ်၊ သန့်ရှင်းသပ်ရပ်ရမယ်၊ မနက်စောစော ဘုရားတက် ပဋ္ဌာန်းပူဇော်နိုင်ဖို့ ကိုယ်သွားမယ့်ဘုရားနဲ့ နီးစပ်တဲ့နေရာမှာ ရှိရမယ်၊ ဈေး/ စားသောက်တန်းတွေနဲ့ မဝေးတဲ့နေရာ ဖြစ်ရမယ် ဒီလောက်ပဲ။

ကျွန်တော်တို့အတွက် အခန်းတွေ နင်းကန်ကျယ်ဖို့ မလိုဘူး၊ ဟိုတယ်ထဲမှာ ဓာတ်ပုံပတ်ရိုက်ဖို့ လာတာမဟုတ်လို့ View တွေ နင်းကန်လှနေဖို့လည်း မလိုဘူး၊ အေးအေးချမ်းချမ်း တိတ်တိတ်ဆိတ်ဆိတ် နေရတာ ပိုသဘောကျတာမို့လို့ Bar တွေ၊ တီးဝိုင်းတွေ ရေကူးကန်တွေလည်း မလိုဘူး၊ ဟိုတယ်ပိုင်ရှင်က မမလှလှတို့ ကိုကိုဖြောင့်ဖြောင့်တို့ ဖြစ်ဖို့လည်း မလိုဘူး 😁။ Delight မှာ တစ်ည ၂၅၀၀၀ တည်းနဲ့ နံနက်စာကို ပြည့်ပြည့်စုံစုံ အရသာရှိရှိ စားရတယ်၊ သန့်သန့်ရှင်းရှင်း သပ်သပ်ရပ်ရပ် တည်းရတယ်၊ အင်တာနက် Speed ကောင်းတယ်၊ လိုအပ်ချက်တိုင်းကို မိသားစုလို ကူညီပေးတယ်၊ ဒါပေးရင် ဒါရမယ်... ဒါလိုချင်ရင် ဒီလောက်သုံးရမယ် ဆိုတဲ့ ငွေမျက်နှာပေါ် အခြေမခံဘူး။ အဓိကအလိုအပ်ဆုံး ရိုင်းပင်းကူညီပြီး စာနာနားလည်တတ်တဲ့ မြန်မာ့စိတ်ရင်း သူတို့တည်းခိုခန်းမှာ တွေ့ရတယ်။ ကျန်တဲ့ တည်းခိုခန်းတွေ၊ ဟိုတယ်၊ မိုတယ်တွေလည်း သူတို့ဟာနဲ့ သူတို့တော့ အထိုက်အလျောက် ပေးရတဲ့ဈေးနဲ့တန်တဲ့ ဝန်ဆောင်မှု ရှိကြပါလိမ့်မယ်။ အကုန်အစုံ မတည်းဖူးတော့ အတိအကျ မပြောတတ်ပါဘူး။ Review ကောင်းတာတွေထဲမှာ Bagan Land Motel https://goo.gl/maps/fEBTTamicFNXDJW57 တို့ ဘာတို့လည်း ရှိတယ်။ ပြဿနာက Review ကောင်းလွန်းသွားပြန်ရင်လည်း ကိုယ်တည်းချင်တဲ့ရက်၊ ကိုယ်လိုချင်တဲ့အခန်းရဖို့ ခက်ပါတယ်။

ပုဂံမှာ အရင်က ဘုရားတွေသွားရင် လမ်းအများစုက ဖုန်တသောသော၊ အလုအယက် ဈေးသည်နဲ့ နင်းကန်ရှင်းပြချင်နေတဲ့ Local Guide တွေ နေရာစုံမှာ တွေ့ရပေမယ့် အခုတော့ အဲ့လိုမဟုတ်တော့ဘူး။ လမ်းအများစုက ကတ္တရာလမ်း၊ ဈေးသည်တွေကလည်း ကိုယ့်တန်ဖိုးနဲ့ ကိုယ်၊ Guide တွေလည်း စေတနာကြေးထက်ပိုတဲ့ ဝန်ဆောင်မှုတွေနဲ့ ကမ်းလှမ်းလာတာ တွေ့ရတယ်။ အဲ့လိုပဲ ဖြစ်စေချင်ပါတယ်။

ရတဲ့ရက်အတွင်းမှာ ရောက်သင့်ရောက်ထိုက်တဲ့ နေရာတွေ ရောက်ဖို့ဆိုတာက လည်ဖို့ပတ်ဖို့အချိန် ခန့်မှန်းထားဖို့လည်း လိုပါတယ်။ အကြမ်းဖျဥ်းအားဖြင့် တည်းခိုခန်းအများစုက မနက်စာကို ၇ နာရီမှာ ကျွေးတတ်ပြီး ညနေ ၆ နာရီ နောက်ပိုင်းဆို ဘုရားဖူးဖို့ သိပ်အဆင်မပြေနိုင်တော့လို့ နေ့တစ်နေ့အတွက် လည်ပတ်ချိန်ကာလက ကျွန်တော်တို့မှာ ပျမ်းမျှ ၁၁ နာရီ ဝန်းကျင်ရှိပါတယ်။ အဲ့ ၁၁ နာရီထဲကနေ မနက်စာစားချိန် နဲ့ နေ့လည်စာစား၊ ရေချိုး ခဏနားချိန် ၂ နာရီလောက် နှုတ်ရင် ၉ နာရီဝန်းကျင်ပဲ လည်ချိန်ရပါတယ်။ ဘုရားတစ်ဆူ တစ်ဆူကို အသေး/ အကြီး၊ လေ့လာစရာ အနည်းအများ၊ ဘုရားဖူးချိန်၊ ဓာတ်ပုံရိုက်ချိန်၊ လက်ဆောင်ပစ္စည်းဝယ်ချိန်၊ စတာတွေပေါ် မူတည်ပြီး ၁၅ မိနစ်နဲ့ နာရီဝက်ကြား ကြာတတ်လို့ လမ်းခရီးကြာမြင့်ချိန်နှုတ်အပြီး တစ်နေ့ကို ဘုရား ၁၅ ဆူ နဲ့ ၂၀ ကြား လောက် ဖူးလို့ရနိုင်ပါတယ်။ စကားမစပ် ပုဂံမှာ အရင်ကလို ဘုရားပေါ်တက်ပြီး Sunset ကြည့်ခွင့် ဘယ်ဘုရားမှ မပေးတော့ပါဘူး။ (ခိုးတက်ရင်တော့ မသိပါ)

ခုနောက်ဆုံး သွားခဲ့တဲ့ အချိန်မှာ ၂ ည အိပ်နဲ့ အဓိကနေရာ ၅၀ ဝန်းကျင်လောက်သွားဖို့ လျာထားခဲ့ပေမယ့် အရင်ကနဲ့မတူဘဲ အစားအသောက် ကောင်းတဲ့ ဆိုင်တွေ တစ်ခုပြီး တစ်ခုတွေ့နေတာကြောင့် နေရာ ၄၀ လောက်ပဲ ရောက်ဖြစ်ခဲ့ပါတယ်။ ကျွန်တော်တို့ မိသားစု သွားခဲ့တဲ့ လမ်းကြောင်းနဲ့ နေရာ စာရင်းကို Google Map Locations နဲ့ တွဲပြီး တင်ပေးထားပါတယ်။ PDF file ကို Google Drive မှာ တင်ပေးထားပါတယ်။ https://drive.google.com/file/d/10DGPmyXegiMFOFOn1_KQixnxPa2SPor6/view

သွားချင်တဲ့ နေရာကို Click ပေးလိုက်ပြီး Google Map ပွင့်လာရင် Direction တောင်းယုံနဲ့ လက်ရှိနေရာကနေ ဘယ်လိုသွားရမယ်ဆိုတာ ပြမှာပါ။ တစ်ခါတစ်လေ Google Map လမ်းကြောင်းက ၁၀% လောက်တော့ Error ရှိတတ်ပါတယ် (ဥပမာ... ဆိုင်ကယ်ပဲ သွားလို့ရတဲ့လမ်းကို ကားသွားလို့ရတယ်ဆိုပြီး ပြတာမျိုး)။

အစားအသောက်ဆိုရင် အရွက်သုပ်၊ အစုံသုပ်တွေအတွက် ဒေါ်လှသန်း အသုပ်ဆိုင် - https://goo.gl/maps/ydncFsqKVV52o8sy6 က လက်ရာကောင်းပြီး စားရတာတန်ပါတယ်။ အိမ်မှာလည်း မြန်မာထမင်းဟင်းက နေ့တိုင်းစားနေကျမို့လို့ ခရီးသွားချိန်မှာ မြန်မာထမင်းဟင်း မစားချင်ပေမယ့် ပုဂံက ရွှေမြန်မာ ထမင်းဆိုင် - https://goo.gl/maps/reNdvajATaL3amrRA က ၅၀၀၀ နဲ့ အင်မတန်စားလို့ ကောင်းပါတယ်။ အကြော်ဆိုင်ဆို ဇီးရိပ်လို့ လူပြောများပေမယ့် သူ့ဆီ မစားဖြစ်ခဲ့ဘဲ ရွှေဆံတော် ဘုရားဘေးနားက ရွှေယွန်းသူ အကြော်ဆိုင် - https://goo.gl/maps/jNwB5mTHfeSuLmij6 မှာ စားဖြစ်ခဲ့တယ်။ ဇီးရိပ် ကောင်းတယ်လို့ လူပြောများပေမယ့် ရွှေယွန်းသူ ကလည်း နေရာထိုင်ခင်းကျယ်ဝန်း၊ သဘာဝလေကောင်းလေသန့်ရပြီး အကြော်စုံပူပူကို သဘာဝ မန်ကျီးချဥ်ရည်နဲ့ စားလို့ရတဲ့ ဆိုင်ကောင်းပါလို့ ကျွန်တော် ညွှန်းချင်တယ်။

ပုဂံကို လည်ပတ်ဖို့ ဆုံးဖြတ်ထားရင် နောက်ဆုံးတစ်ခု အကြံပြုချင်တာ ဘုရား စေတီအလိုက် သမိုင်းကြောင်းလေးတွေ ဖတ်ထားဖြစ်ရင် ပိုကောင်းပါတယ်။ လူဝင်များတဲ့ ဘုရားတွေမှာ ပုဂံဘုရားသမိုင်း စာအုပ်တွေ ရောင်းတာရှိသလို၊ ပြည့်ပြည့်စုံစုံ ရှင်းပြတာ နားထောင်ဖို့ ဆန္ဒရှိရင် တကယ် စေတနာကောင်းတဲ့ Local Guide တွေလည်း ရှိနေပါတယ်။ သူတို့တွေကို ပံ့ပိုးပေးပါ။

သိပ်အပြည့်အစုံကြီး မဟုတ်ပေမယ့် ဒီလောက်ဆို ဘယ်တွေလည်ရပတ်ရမယ်၊ အချိန်ဘယ်လောက်ပေးရမယ်ဆိုတာ ခန့်မှန်းလို့ ရနိုင်လောက်ပါပြီ။ အားလုံး ပျော်ရွှင်စရာ ပုဂံခရီး ဖြစ်ကြပါစေ။

Dhamma Review created by Bone Par Par
01022024
1140 AM

13/08/2022

ဂါထာတော်များ၏ အကျိုးတရားနှင့် ဗုဒ္ဓဘာသာဝင်များ၏ သက်ဝင်ယုံကြည်မှု
---------------------------------------------------------------------
ကောဇာသက္ကရာဇ် ၁၃၈၄ ခုနှစ်
သာသနာသက္ကရာဇ် ၂၅၆၆ ခုနှစ်
ဝါခေါင်လပြည့်ကျော် ၂ ရက် စနေနေ့

ဗုဒ္ဓဘာသာဝင် တစ်ယောက်အဖြစ် ကြီးပြင်းခွင့်ရလာတဲ့ လူအများစုမှာ ငယ်စဉ်တောင်ကျေး ကလေးဘဝကနေ လက်ရှိအသက်အရွယ်ထိ ဂါထာ တစ်ခု မဟုတ် တစ်ခု နဲ့တော့ ရင်းနှီးကျွမ်းဝင်ခဲ့ဖူးကြပါလိမ့်မယ်။ ဂါထာလို့ ပြောလိုက်တာနဲ့ အများစုပါးစပ်ဖျားမှာ ကြားရနိုင်တာ ...

(၁) သမ်ဗုဒ်ဓဂေါထာ
(၂) သဗ္ဗဇယမင်္ဂလာ (ခေါ်) ဒိဝါတပတိဂါထာ
(၃) စိန်တာမဏိဂါထာ
(၄) နမောတေဂါထာ
(၅) အဌာနမေတံ (ခေါ်) သက်တော်မြဲဂါထာ
(၆) ဇလွန်ပြည်တော်ပြန် ဓမ္မခဏ်ဂါထာ
(၇) ... စသဖြင့် ရှိပါလိမ့်မယ်။
(ဂါထာအမည်တွေကို စာလုံးပေါင်းထားတာ မှားနေတယ်လို့ထင်ရင် ကျွန်တော်မှားတာ မဟုတ်ပါဘူး။ ပတ်ဆင့်အမှန်အတိုင်း ရိုက်ပေမယ့် Save လုပ်လိုက်ချိန်မှာ သူ့ဘာသာ တလွဲဖြစ်သွားတာပါ။)

ဂါထာတော်တွေကို ရွတ်ဖတ်ပူဇော်ခြင်းဟာ ဆိုင်ရာဆိုင်ရာ အကျိုးစီးပွား ကိုသော်လည်းကောင်း၊ ဘေးအန္တရာယ်ကင်းဝေးစေခြင်းကိုသော်လည်းကောင်း၊ မိမိလိုလားတဲ့ ရာထူး ဂုဏ်သိမ် စည်းစိမ်ချမ်းသာ အမျိုးမျိုးကိုသော် လည်းကောင်း ရရှိနိုင်စေတယ်လို့လည်း ဗုဒ္ဓဘာသာဝင် အများစု လက်ခံယုံကြည်ကြပါတယ်။

လက်ခံယုံကြည်တဲ့အတိုင်းလည်း ဆိုင်ရာဆိုင်ရာ အကျိုးရလဒ်တွေကို ရရှိစေခဲ့တဲ့ အဖြစ်အပျက် သာဓကတွေလည်း အများအပြား ရှိခဲ့ပါတယ်။ မည်သို့သော ရည်ရွယ်ချက်နဲ့ ရွတ်ဖတ်ပူဇော်ကြသည် ဖြစ်စေ ဂါထာတော်များ ရွတ်ဖတ် ပူဇော်ခြင်းနဲ့ ပတ်သက်ပြီး ဗုဒ္ဓဘာသာဝင်များ အခြေခံအားဖြင့် သိရှိနားလည် ထားသင့်တဲ့ အခြေအနေတစ်ချို့ရှိပါတယ်။ အဲ့တာကတော့ ဂါထာတော်များရေးသားထားရခြင်းရဲ့ ရည်ရွယ်ချက်ပါ။

ဗုဒ္ဓဘာသာဝင် အများစု ရွတ်ပွားပူဇော်ကြတဲ့ ဂါထာအများစုကို လေ့လာကြည့်မယ်ဆိုရင် အခြေခံအားဖြင့် ရည်ရွယ်ချက် (၃) မျိုးနဲ့ ရေးသားထားတာကို တွေ့ရနိုင်ပါတယ်-

(၁) ရတနာမြတ်သုံးပါးရဲ့ ဂုဏ်တော်/ကျေးဇူးတော်ကို ချီးကျူးပူဇော်လိုခြင်း
(၂) ရတနာမြတ်သုံးပါးရဲ့ စစ်မှန်မှုကို သစ္စာပြုတိုင်တည်ပြီး မိမိလိုလားချက် အောင်မြင်စေရန် အဓိဌာန်ပြုလိုခြင်းနဲ့
(၃) သံသရာဝဋ်ဆင်းရဲမှ လွတ်မြောက်စေဖို့အတွက် နည်းလမ်းများ ညွှန်ပြလိုခြင်း ....

ဆိုပြီး ယေဘုယျအားဖြင့် အမျိုးအစား ၃ မျိုး ကွဲပြားတာကို တွေ့မြင် နိုင်ပါတယ်။

ဗုဒ္ဓဘာသာဝင်တွေအနေနဲ့ ဂါထာတော်တွေကို ရွတ်ဖတ်ပူဇော်ရာမှာ မိမိနှစ်သက်ရာ နှစ်သက်ရာ ဘယ်ဂါထာကို ရွတ်ဖတ်ပူဇော်သည်ဖြစ်စေ ဂါထာတော်များ ရေးသားဖွဲ့စည်းထားခြင်းရဲ့ ရည်ရွယ်ချက်ကို သိရှိနားလည်ထားဖို့ အထူးလိုအပ်ပါတယ်။ ဂါထာတော်များကို ရွတ်ပွားပူဇော်ရာမှာ အကျိုးတရား ရလိုမှုကို ဦးစားမပေးဘဲ ရေးသားခြင်းရဲ့ ရည်ရွယ်ချက်ကို သိမြင်နားလည်ပြီး ရတနာမြတ်သုံးပါး အပေါ်မှာ စိတ်နှစ်ပူဇော်ခြင်းက မိမိလိုလားတဲ့ အကျိုးတရားကို ချက်ချင်းမပြည့်စုံစေနိုင်ခဲ့ရင်တောင် သံသရာအတွက် အကျိုးကျေးဇူး များစေပါတယ်။

လူစိတ်ဝင်စားစေဖို့ အကျိုးတရား ဗန်းပြတဲ့ စကားလုံးတွေနဲ့ ပုံဖော်ထားတဲ့ ဂါထာတော်တွေရဲ့ ခေါင်းစဉ် (ငွေဝင်လာဘ်ရွှင်/ အကြွေးကျေ/ စာမေးပွဲအောင်/ ပညာဉာဏ်ထက်/ အခြံအရံပေါ) ကို ဖတ်ပြီး မျက်စိလည်မသွားမိပါစေနဲ့ .. ဘယ်ဂါထာ ရွတ်ရင်ကောင်းမလဲလို့လည်း မတွေဝေမိပါစေနဲ့။ ဘယ်ဂါထာကို ရွတ်ရမလဲဆိုတာ ကိုယ်ကဘာဖြစ်ချင်တာလဲဆိုတဲ့အပေါ် မူတည်ပါတယ်။ ကိုယ့်လိုလားချက်က မင်္ဂလာရှိချင်တယ်၊ ရာထူး ဂုဏ်သိမ် စည်းစိမ်ချမ်းသာတွေကို လိုလားတယ်၊ ဆိုင်ရာဆိုင်ရာ အကျိုးစီးပွား တွေအတွက် အထောက်အပံ့ဖြစ်ချင်တယ်၊ လောကီအာရုံ ကာမဂုဏ်ကို တွယ်တာပြီး သူနဲ့ပတ်သက်တဲ့ အထောက်အပံ့ကို ရလိုတယ်ဆိုရင် အပေါ်မှာ ဖော်ပြခဲ့ပြီးတဲ့ ရည်ရွယ်ချက် (၁) နဲ့ (၂) အမျိုးအစား ဂါထာတော်တွေကို ရွတ်ပါ။

တကယ်လို့ ကိုယ်က အောင်မြင်မှုတွေ၊ ကျော်ဇောမှုတွေ၊ ပြည့်စုံကုံလုံမှုတွေ ထက် သံသရာဝဋ်ဆင်းရဲက လွတ်ချင်တာမျိုးဆိုရင်တော့ ရည်ရွယ်ချက် (၃) အမျိုးအစားမှာပါတဲ့ ဂါထာတွေကို ရွတ်ပါ။ ဒါပေမယ့် ဒီနေရာမှာ တစ်ခုသိသင့်တာ ရည်ရွယ်ချက် (၃) အမျိုးအစားထဲဝင်တဲ့ ဂါထာတော်တွေဟာ ရွတ်ပွားယုံတင်မက ကိုယ်တိုင်ကျင့်ကြံ အားထုတ်မှုရှိမှ ပိုပြီးအကျိုးထူးတယ်ဆိုတာ နားလည်ထားဖို့ပါ။ အောက်မှာ ဂါထာတော်တွေရဲ့ အနက်အဓိပ္ပါယ်ကို လေ့လာနိုင်အောင် စာအုပ်တစ်ချို့ စုစည်းပေးထားပါတယ်။

(၁) ဂါထာပေါင်းချုပ်
http://www.kbrl.gov.mm/book/details/003666?categoryId=29

(၂) ဂါထာတစ်ထောင်
http://www.kbrl.gov.mm/book/details/004246

(၃) ပညာအလင်းပြဗုဒ္ဓပရိတ်တော်နှင့် အန္တရာယ်ကင်းဂါထာ ပေါင်းချုပ်
http://www.kbrl.gov.mm/book/details/003868

(၄) နန်းစဉ်သုံးဂါထာမန္တန်ကျမ်း
http://www.kbrl.gov.mm/book/details/003882

(၅) ပဗ္ဗာဇနိယကမ္မဝါစာနှင့် အန္တရာယ်ကင်းဂါထာ အမျိုးမျိုး ပါဌ် အနက်
http://www.kbrl.gov.mm/book/details/003946

(၆) ပိဋကတ်ကျမ်းဂန်တော်လာ အစွမ်းထက်ဂါထာပရိတ်တော်များ
https://spsuygn.edu.mm/book/bud65/detail

(၇) ဂါထာပရိတ်တော်များနှင့်ကိုယ်တွေ့ဖြစ်ရပ်များ
https://spsuygn.edu.mm/book/bud64/detail

(၈) ဂါထာမန္တန်ပေါင်းချုပ်
https://spsuygn.edu.mm/book/bdhhgen-55/detail

အနှစ်ချုပ်အားဖြင့် ဆိုရရင် ဂါထာတော်တိုင်းဟာ သူ့အကြောင်းနဲ့သူ ထူးခြားတဲ့ ဝိသေသလက္ခဏာရပ်လေးတွေ ရှိပါတယ်။ သူ့ရဲ့ ထူးခြားချက်က ဘာဆိုတာကို နားလည်ပြီး သဒ္ဓါအားကောင်းကောင်းနဲ့ ရွတ်ပွားပူဇော်ယုံနဲ့ ပြည့်စုံတဲ့ ဂါထာလား၊ အားထုတ်ရမယ့် ကျင့်စဉ်တွေကိုပါ ဖော်ပြထားတဲ့ ဂါထာလားဆိုတာ သေချာကွဲပြားအောင် လေ့လာပြီး ရွတ်ဖတ်ပူဇော်ခြင်း + လိုက်နာကျင့်ကြံအားထုတ်ခြင်းအားဖြင့် မိမိတို့လိုလားကြတဲ့ လောကီ၊ လောကုတ္တရာ နှစ်ဖြာသောအကျိုးကို ရရှိနိုင်ကြပါစေလို့ ဆန္ဒပြုဆုတောင်းလိုက်ရပါတယ်။

''ဘုရားတပည့်တော်သည် ဤ ဆောင်းပါးအား သာသနာတော်၏အကျိုး ချီးမြှောက်ထောက်ပံ့နိုင်ပါစေခြင်း အကျိုးငှာလည်းကောင်း၊ မဂ်ဥာဏ် ဖိုလ်ဥာဏ်အား လျင်မြန်စွာ သိမြင်နိုင်မည့် ဝိပဿနာဥာဏ်အလင်း ဖြစ်ထွန်းပေါ်ပေါက်စေခြင်း အကျိုးငှာလည်းကောင်း ရည်စူးမျှဝေပါ၏။''

Dhamma Review.
၁၃. ဩဂုတ်. ၂၀၂၂
၂၀၅၈ နာရီ။

17/04/2022

ဒုလ္လဘ ရဟန်း/သာမဏေ ဘဝဖြင့် ကုသိုလ်ရှာဖွေခြင်း
---------------------------------------------------------------------
ကောဇာသက္ကရာဇ် ၁၃၈၄ ခုနှစ်
သာသနာသက္ကရာဇ် ၂၅၆၆ ခုနှစ်
တန်ခူးလပြည့်ကျော် ၂ ရက် တနင်္ဂနွေနေ့

ရဟန်းခံရှင်ပြု အလှူတော်မင်္ဂလာဆိုတာ နှစ်ကူးအခါသမယမှာ ဗုဒ္ဓဘာသာဝင် မြန်မာလူမျိုးများ ဆောင်ရွက်လေ့ရှိတဲ့ အလှူမင်္ဂလာ တစ်မျိုးပါ။ ရခဲလှတဲ့ လူ့ဘဝမှာ ပြုခဲကြုံခဲလှတဲ့ ဖြစ်တောင့်ဖြစ်ခဲ ရဟန်း/သာမဏေဘဝကို ခေတ္တခဏဖြစ်ဖြစ် ဝင်ရောက်ခွင့်ရတာဟာ တကယ်ကိုပဲ မွန်မြတ်လှပါတယ်။

ဒါပေမယ့် ဘာသာတရားရဲ့ အဆုံးအမကို နာယူကျင့်သုံးခွင့် နည်းပါးလာကြတဲ့ ကျွန်တော်တို့ ဗုဒ္ဓဘာသာ မြန်မာလူမျိုးများဟာ ယနေ့ခေတ်အချိန်အခါ ဒုလ္လဘရဟန်း/သာမဏေ ဝတ်ခွင့်ရတာကို မိရိုးဖလာလုပ်ငန်းစဥ်သဘော၊ ကုသိုလ်/အကုသိုလ် ဖလှယ်တဲ့ သဘောလောက်နဲ့ ပေါ့ပေါ့တန်တန် သဘောထားပြီး လုပ်ဆောင်ကျင့်သုံး လာကြတာကို ဝမ်းနည်းဖွယ်ရာ တွေ့မြင်လာရပါတယ်။

ရဟန်း/သာမဏေဆိုတာ ဒုလ္လဘပဲဝတ်ဝတ်၊ တစ်သက်တာပဲဝတ်ဝတ် သာသနာ့တာဝန်ကို ထမ်းဆောင်ကြတာဖြစ်လို့ လိုက်နာရမယ့် ဝိနည်းစည်းကမ်းဆိုတာကလည်း အခြေခံအားဖြင့် တစ်မျိုးတည်းပါပဲ။ ဒုလ္လဘ ရဟန်း/သာမဏေ ဝတ်ကြမယ်လို့ ရည်ရွယ်စိတ်ကူးမိတဲ့အခါ စင်ကြယ်မွန်မြတ်တဲ့ ရဟန်း/သာမဏေဘဝမှာ နေထိုင်မှုဖြစ်စေဖို့ မဝတ်ခင်ကတည်းက ဒီ ဝိနည်းစည်းကမ်းတွေကို ကြိုတင်လေ့လာထားသင့်ပါတယ်။ အဲ့ဒီလို လေ့လာဖို့အတွက် အောက်မှာဖော်ပြထားတဲ့ မေးခွန်းတွေကို ဒုလ္လဘမဝတ်ခင် ကိုယ့်ကိုယ်ကိုယ် မေးထားသင့်ပါတယ်။

(၁) ရဟန်းနဲ့ သာမဏေ ဘာကွာသလဲ။
(၂) သာမဏေတစ်ပါး လိုက်နာစောင်ထိန်းရမယ့် ဝိနည်းစည်းကမ်းတွေက ဘာတွေလဲ။
(၃) ရဟန်းတစ်ပါး လိုက်နာစောင်ထိန်းရမယ့် ဝိနည်းစည်းကမ်းတွေက ဘာတွေလဲ။
(၄) မြတ်စွာဘုရားရှင် က ဒီဝိနည်းစည်းကမ်းတွေကို ဘာကြောင့် ဟောကြားပညတ်ခဲ့သလဲ။
(၅) ရဟန်းဘဝရဖို့ ဘာကြောင့် သိမ်တက်ရသလဲ။
(၆) သိမ်ထဲမှာလုပ်ရတဲ့ လုပ်ငန်းစဥ်တွေက ဘာတွေလဲ။

ဒီမေးခွန်းတွေကို ကိုယ်ဘယ်လောက်ထိ နားလည်ထားပြီးပြီလဲဆိုတာ ဒုလ္လဘမဝတ်ခင်ကတည်းက ကြိုတင်ပြင်ဆင်ထားရပါမယ်။ ဒီမေးခွန်းအတွက် အဖြေတွေကို ရဟန်း/သာမဏေဘဝရောက်မှ လေ့လာမယ်ဆိုရင် ကိုယ်ဝတ်တဲ့ အခိုက်အတန့် ကာလအတွင်းမှာ ရမယ့် ကုသိုလ်နဲ့ အကုသိုလ်ဟာ အချိုးမညီ ဖြစ်ရပါလိမ့်မယ်။ တစ်ချိန်က ဒီအဖြေတွေဟာ ဘုန်းကြီးကျောင်းသွားမှ ဒါမှမဟုတ် ဝိနည်းသိက္ခာပုဒ်ကို နားလည်ကျွမ်းကျင်တဲ့ ဆရာတော်တစ်ပါး အနားမှာရှိမှ သိနည်းလည်နိုင်စရာ ရှိပေမယ့် ဒီနေ့အချိန်မှာတော့ မေးခွန်းရှိခဲ့ရင် အဖြေရှာဖို့ရာ မခက်ခဲတော့ပါဘူး။ အောက်မှာဖော်ပြထားတဲ့ စာအုပ် ၄ အုပ်ကို ဖတ်ကြည့်ပါ။

(၁) ဗုဒ္ဓအလိုတော်ကျ ရှင်ပြုရဟန်းခံနည်း_ဦးကုမာရ၊ မြတောင်စာသင်တိုက်၊ ပန်းတနော်မြို့
http://www.kbrl.gov.mm/book/details/003839?categoryId=37

(၂) ဒုလ္လဘ ရဟန်းသစ်များအတွက် အထွေထွေ သြဝါဒကထာ_မဟာစည်ဆရာတော်ဘုရားကြီး
http://dhammadownload.com/File-Library/MahasiSayadawUSobhanaMahathera/MahasiSayadaw-DonLapAwwWada.pdf

(၃) ဘုရားဥပဒေတော်ကြီး_အရှင်ဇနကာဘိဝံသ
http://dhammadownload.com/File-Library/Ashin-Janakabhivamsa/books/others/Buddha's%20Law.pdf

(၄) ရဟန်းကျင့်ဝတ် နှစ်ရာ့နှစ်ဆယ့် ခုနစ်သွယ်_ရှင်ဓမ္မရက္ခိတ (ချောင်းဦးမောင်စန္ဒာ)
http://www.kbrl.gov.mm/book/details/003556?categoryId=37

(၅) ရဟန်းတော်တို့အတွက် ဘုရားဥပဒေတော်များ_သာမဏေကျော်
http://www.kbrl.gov.mm/book/details/003948?categoryId=37

ဒီစာအုပ်တွေကို ဖတ်ပြီးသွားရင် တခဏဆိုပေမယ့် ဘဝတစ်သက်စာသာမက ဘဝအဆက်ဆက်မှာပါ အကျိုးပေးနိုင်မယ့် ကုသိုလ်တရားကိုပါ ရရှိနိုင်ပြီး အဲ့ဒီကနေမှတဆင့် ဘဝလွတ်မြောက်ကြောင်း တရားကိုပါ သိရှိနားလည်ခွင့် ရနိုင်ပါလိမ့်မယ်။

''ဘုရားတပည့်တော်သည် ဤ ဆောင်းပါးအား သာသနာတော်၏အကျိုး ချီးမြှောက်ထောက်ပံ့နိုင်ပါစေခြင်း အကျိုးငှာလည်းကောင်း၊ မဂ်ဥာဏ် ဖိုလ်ဥာဏ်အား လျင်မြန်စွာ သိမြင်နိုင်မည့် ဝိပဿနာဥာဏ်အလင်း ဖြစ်ထွန်းပေါ်ပေါက်စေခြင်း အကျိုးငှာလည်းကောင်း ရည်စူးမျှဝေပါ၏။''

Dhamma Review.
၁၇. ဧပြီ. ၂၀၂၂
၁၄၅၀ နာရီ။

11/04/2022

ဓမ္မ၊ အဓမ္မနှင့် မတူညီမှုများ အားပြိုင်ခြင်း
---------------------------------------------------------------------
ကောဇာသက္ကရာဇ် ၁၃၈၄ ခုနှစ်
သာသနာသက္ကရာဇ် ၂၅၆၆ ခုနှစ်
တန်ခူးလဆန်း ၁၁ရက် တနင်္လာနေ့

မတူညီတဲ့ အယူအဆဆိုတာ ဆန့်ကျင်ဘက်နှစ်ခုမှာ ရှိနေကြတဲ့ လူတိုင်းရဲ့ စိတ်ထဲမှာ စွဲတည်တတ်ကြစမြဲ။
ဘယ်သူမှန်တယ် ဘယ်သူမှားတယ် ဆိုတာကိုလည်း သူတို့ နှစ်ဘက်စလုံးက တစ်ယောက်နဲ့ တစ်ယောက် လက်ညှိုးထိုးပြီး ငြင်းခုန်တတ်ကြစမြဲ။

အမှားနဲ့ အမှန်ကို တစ်ယောက်နဲ့ တစ်ယောက် သက်သေပြဖို့ ကြိုးစားကြရင်း....
ကိုယ်မှန်ပြီး သူမှားကြောင်းကို သမိုင်းမှတ်ကျောက် တင်ခံနိုင်ဖို့ ကြိုးစားကြရင်း နှစ်ဘက်စလုံးလည်း ထိခိုက်တတ်ကြစမြဲ။

နှစ်ဘက်စလုံးမှာ ရပ်နေကြသူတွေရဲ့ ယုံကြည်မှုတွေ ဘယ်လောက်ပဲ ကွဲပြားကြပါစေ...
နှစ်ဘက်စလုံးမှာ ရပ်နေကြသူတွေရဲ့ ခံယူချက်တွေ
ဘယ်လောက်ပဲ ခြားနားကြပါစေ...
ခင်ဗျားတို့ ကျွန်တော်တို့ သူတို့အားလုံးမှာ ဘုံတူညီချက်တွေ ရှိကြပါတယ်။

ကျွန်တော်တို့အားလုံး
- ရှင်သန်နေထိုင်ခွင့်ရချင်ကြတယ်။
- ချစ်ရသူတွေနားမှာ မခွဲမခွာ နေချင်ကြတယ်။
- ဘဝကို အေးချမ်းပျော်ရွင်စွာ ဖြတ်သန်းကုန်ဆုံးချင်ကြတယ်။

ဘုံဆန္ဒတွေ တူညီကြပေမယ့် အဲ့ဒီတူညီမှုတွေကိုမျက်ကွယ်ပြုပြီး မတူညီမှုတွေကိုဘဲ ကျွန်တော်တို့ဘာလို့ မျက်နှာမူနေကြတာလဲ။

တချို့လည်း ပြောကြတယ် ဓမ္မ ကို အဓမ္မ က ဘယ်တော့မှ အနိုင်မရဘူးလို့။ တကယ်တော့ ခင်ဗျားတို့ ကျွန်တော်တို့ သတိမထားမိကြတာပါ။

ဘဝဆိုပြီး အစပြုလာကတည်းက ဓမ္မနဲ့ အဓမ္မမှာ အဓမ္မက အလေးသာခဲ့ပြီးသားဗျ။

- ဘယ်မိဘရဲ့ ရင်သွေးအဖြစ် မမွေးဖွားချင်ဘူးလို့ ကျွန်တော်တို့ ရွေးချယ်ခွင့်မရှိဘူး။
- ဘယ်ရောဂါ မဖြစ်ချင်ဘူးရယ်လို့ ကျွန်တော်တို့ ငြင်းဆန်ပိုင်ခွင့် မရှိဘူး။
- ဘယ်လိုအခြေအနေမျိုးနဲ့ ဘဝကို ကုန်ဆုံးချင်ပါတယ်လို့ ကြိုတင်သတ်မှတ်ပိုင်ခွင့်လည်း မရှိဘူး။

ကျွန်တော်တို့ မလိုချင်တဲ့ အဓမ္မတွေ ကြီးစိုးမလာဖို့နဲ့ ကျွန်တော်တို့ လိုလားကြတဲ့ ဓမ္မတရားက အလေးသာနေဖို့ဆိုတာ မတူညီမှုတွေကို ရှင်းလင်းလိုက်ယုံနဲ့ တူညီမှုအဖြစ် ပြောင်းလဲသွားနိုင်တာမျိုး မဟုတ်ပါဘူး။

ဓမ္မဆိုတဲ့ အတွေးအမြင်ကို လူတိုင်း သိမြင်နားလည်မှသာ အဓမ္မတရားတွေ ဆိတ်သုန်းပြီး ဓမ္မတရား ထွန်းကားမှာပါ။ အဲ့ဒီအတွက် မြတ်ဗုဒ္ဓရဲ့ သားတော် တစ်ပါးဖြစ်တဲ့ အင်္ဂုလိမာလ ရဟန္တာအရှင်မြတ်ရဲ့ ဆုတောင်းလေးတစ်ခု ရှိပါတယ်။

(ပါဠိ)

‘‘ဒိသာပိ မေ ဓမ်မကထံ သုဏန်တု၊
ဒိသာပိ မေ ယုဉ္ဇန္တု ဗုဒ္ဓသာသနေ။
ဒိသာပိ မေ တေ မနုဇေ ဘဇန္တု၊
ယေ ဓမ္မမေဝါ ဒပယန္တိ သန္တော။"

(ဘာသာပြန်)

ငါ၏ ရန်သူတို့သည် တရားနှင့်စပ်သော စကားကို ကြားနာနိုင်ကြပါစေကုန်သတည်း၊
ငါ၏ရန်သူတို့သည် မြတ်စွာဘုရားသာသနာတော်၌ အားထုတ်နိုင်ကြပါ စေကုန်သတည်း၊
ငါ၏ရန်သူဖြစ်ကုန်သော ထိုလူတို့သည် သူတစ်ပါးအား တရားကို ဆောက်တည်ကြစေသည့်သူတော်ကောင်းတို့ထံသို့ ချဉ်းကပ်နိုင်ကြပါစေကုန် သတည်း။

မဇ္ဈိမနိကာယ်၊ အင်္ဂုလိမာလသုတ်
https://suttacentral.net/mn86/my/pmt?reference=none&highlight=false

မိမိက ကောင်းနိုင်ဖို့ ကြိုးစားနေပါလျက် မိမိအပေါ် မကောင်းသူတွေ ကြုံရတဲ့အခါ၊ ဓမ္မကို အဓမ္မက လွှမ်းမိုးနေပြီလို့ စိတ်ထဲမှာ ခံစားလာရတဲ့အခါ အပေါ်မှာ ဖော်ပြထားတဲ့ ဆုတောင်းလေးကို မြန်မာပြန်နဲ့တွဲပြီး ထပ်ခါတလဲလဲ ရွတ်ကြည့်ပါ။

- ဓမ္မနဲ့ အဓမ္မရဲ့ ခြားနားချက်ကို နားလည်လာပါလိမ့်မယ်။
- အဓမ္မကို အောင်နိုင်မယ့် တစ်ခုတည်းသော အရာသည် ဘာဆိုတာ နားလည်လာပါလိမ့်မယ်။
- ဓမ္မနဲ့ အဓမ္မကြားမှာ နေနေကြတဲ့ သူတို့နဲ့ ငါက အားလုံး အတူတူပါပဲဆိုတာ ဘယ်သူ့ကိုမှ မေးစရာမလိုဘဲ နားလည်လက်ခံလာပါလိမ့်မယ်။
- နောက်ဆုံး ငါကိုယ်တိုင်သည်ပင်လျှင် ငါမဟုတ်ဆိုတာကို လက်ခံသဘောပေါက် လာပါလိမ့်မယ်။

''ဘုရားတပည့်တော်သည် ဤ ဆောင်းပါးအား သာသနာတော်၏အကျိုး ချီးမြှောက်ထောက်ပံ့နိုင်ပါစေခြင်း အကျိုးငှာလည်းကောင်း၊ မဂ်ဥာဏ် ဖိုလ်ဥာဏ်အား လျင်မြန်စွာ သိမြင်နိုင်မည့် ဝိပဿနာဥာဏ်အလင်း ဖြစ်ထွန်းပေါ်ပေါက်စေခြင်း အကျိုးငှာလည်းကောင်း ရည်စူးမျှဝေပါ၏။''

Dhamma Review.
၁၁. ဧပြီ. ၂၀၂၂
၁၃၀၈ နာရီ။

06/02/2022

မြန်မာ့အလေ့အထနှင့် မဟာသမယသုတ်တော်များ
---------------------------------------------------------------------

ကောဇာသက္ကရာဇ် ၁၃၈၃ ခုနှစ်
သာသနာသက္ကရာဇ် ၂၅၆၅ ခုနှစ်
တပို့တွဲလဆန်း ၆ရက် တနင်္ဂနွေနေ့
၂၀၂၂ ခုနှစ် ဖေဖော်ဝါရီလ ၆ ရက်

ဗုဒ္ဓဘာသာ မြန်မာလူမျိုး အများစု နေ့စဉ်ရွတ်ပွားပူဇော်ကြတဲ့ တရားတော်တွေကို ပြန်သုံးသပ်ကြည့်ရင် ပဌာန်း၊ ပရိတ်တရား၊ ဓမ္မစကြာနဲ့ ဂုဏ်တော်အပါအဝင် အခြားအခြားသော တရားဒေသနာတော် အချို့လည်း ပါဝင်တာ တွေ့ရပါတယ်။

အဲ့ဒီ့ တရားဒေသနာတော်တွေရဲ့ကြားမှာ ခုနောက်ပိုင်း အများစု စိတ်ဝင်စားမှု ပိုမြင့်လာပြီး တစ်ယောက်နဲ့ တစ်ယောက် ရွတ်ပွားပူဖော်ကြဖို့ တိုက်တွန်းတတ်ကြတဲ့ တရားဒေသနာတော် တစ်ခုက "မဟာသမယသုတ်" ဆိုတဲ့ တရားတော်ပါ။

တရားတော်ကို ဘာမှန်းမသိ ကြားဖူးနားဝ မရှိတဲ့ သူတွေကိုတောင် ဒီတရားတော်က ခေါင်းစဉ်ကြားရုံနဲ့ စွဲဆောင်နိုင်ပါတယ်။ အကြောင်းက ဒီ "မဟာသမယသုတ်တော်" ကို ရွတ်ဖတ်ပူဇော်ရင် နတ်တွေက ရွတ်ဖတ်ပူဇော်သူကို နှစ်သက်ချစ်ခင်တယ်၊ ကာကွယ်စောင့်ရှောက်တယ်၊ စောင်မကြည့်ရှုတယ် ဆိုတဲ့ ယုံကြည်မှုပါ။ ဒါ့ကြောင့်သူ့ကို "နတ်တို့ချစ်နှစ်သက်အပ်တဲ့ သုတ်တော်" လို့ လည်းခေါ်ဆိုကြပါတယ်။

ဘယ်လိုရည်ရွယ်ချက်နဲ့ ပူဇော်ကြသည်ဖြစ်စေ တရားတော်ကို ရွတ်ဖတ်ပူဇော်ခြင်းဟာ ကောင်းမွန်တဲ့ လုပ်ဆောင်ချက် ဖြစ်တယ်လို့ သတ်မှတ်နိုင်ပေမယ့် တချို့ တချို့သော ပူဇော်သူတွေဟာ မဟာသမယသုတ်တော် ဟောကြားရခြင်းရဲ့ ရည်ရွယ်ချက်၊ မဟာသမယသုတ်တော်နဲ့ ဆက်စပ်ပြီး တဆက်တည်း မြတ်စွာဘုရားရှင် ဟောကြားခဲ့တဲ့ သုတ်တော် ၆ ခုအကြောင်း၊ အဲ့ဒီ့သုတ်တော်တွေနဲ့ မဟာသမယသုတ်တော်ရဲ့ ကွာခြားချက်တွေကို မသိရှိကြတဲ့အပြင် ကြားဖူးနားဝတောင် မရှိကြသေးတာ ဝမ်းနည်းဖွယ်ရာ တွေ့မြင်ကြားသိရပါတယ်။

မြတ်စွာဘုရားရှင် ကိုယ်တော်မြတ်ဟာ သက္ကတိုင်း ကပိလဝတ်မြို့အနီးမှာရှိတဲ့ မဟာဝုန်တောကြီးထဲမှာ သာကီဝင်မင်းသားဘဝကနေ ရဟန်းပြုလာကြပြီး တရားအားထုတ်ကြလို့ ရဟန္တာအသစ်ဖြစ်လာကြတဲ့ ရဟန်းတော် ၅၀၀ နဲ့အတူ သီတင်းသုံးနေတုန်း မြတ်စွာဘုရားနဲ့ အရဟတ္တဖိုလ် ရောက်ပြီးခါစ ရဟန္တာ ၅၀၀ ကို ပူဖော်ဖို့ ရောက်လာကြတဲ့ နတ်ဗြဟ္မာတွေကို ကျွတ်ထိုက်သူတွေ ကျွတ်တမ်းဝင်ဖို့ရာ၊ ကျွတ်တမ်းဝင်ဖို့ အချိန်မတန် သေးသူတွေကိုလည်း ပါရမီအနုအရင့်အလိုက် ထိုက်သင့်တဲ့ တရားကို နာကြားခွင့် ရစေဖို့ရာ မဟာသမယသုတ်တော်နဲ့ အတူ ဆက်စပ်တရားတော် ၆ ပုဒ် (စုစုပေါင်း တရားတော် ၇ ပုဒ်) ကို ဟောကြားခဲ့ပါတယ်။

စိတ်ဝင်စားဖို့ ကောင်းတဲ့ အချက်က ပထမဆုံး ဟောကြားတဲ့ မဟာသမယသုတော်မှာ ပူဇော်ပွဲဆီ ရောက်လာကြတဲ့ နတ်ဗြဟ္မာတွေရဲ့ အမျိုးအနွယ်နဲ့ နာမည်တွေကို အဓိကဟောကြားထားပြီး တကယ်ဟောကြားလိုတဲ့ တရားရဲ့အနှစ်သာရက နောက်ထပ် ဆက်စပ်ဟောကြားတဲ့ တရားတော် ၆ ခုမှာ ပိုပြီး နက်နက်နဲနဲပါဝင် နေတာကို တွေ့ရတာပါ။ သုတ် ၁ ခုခြင်းစီကလည်း သူ့ရည်ရွယ်ချက်နဲ့သူ ရှိနေပြီး အမေးနဲ့ အဖြေပုံစံ ဟောကြားတော်မူတဲ့ တရားတော်တွေဟာ တရားနဲ့ အလှမ်းဝေးနေသူတွေ၊ တရားရဲ့ အနှစ်သာရကို မေးခွန်းထုတ်လိုသူတွေအတွက် တန်ဖိုးမဖြတ်နိုင်လောက်အောင် အကျိုးရှိလှပါတယ်။

ပါဠိဘာသာနဲ့ ရေးသားမှတ်တမ်းတင်ထားခဲ့တဲ့ တရားတော်တွေဟာ ကျွန်တော်တို့အတွက် ဖတ်ရှုနားလည်နိုင်ဖို့ အလှမ်းဝေးသလို ဖြစ်နေပေမယ့် အဲ့ဒီ့ကွာဟချက်ကို ကျေးဇူးတော်ရှင် မဟာစည်ဆရာတော် ဘုရားကြီးက သမ္မာပရိဗ္ဗာဇနီယသုတ်၊ ကလဟဝိဝါဒသုတ်၊ မဟာဗျူဟသုတ်၊ စူဠဗျူဟသုတ်၊ တုဝဋကသုတ် နဲ့ ပုရာဘေဒသုတ် ဆိုပြီး လူအများ နားလည်နိုင်အောင် အကျယ်ချဲ့ ပြီး ဟောကြားပေးတော် မူခဲ့ပါတယ်။ ဟောကြားပြီးသား တရားတော်ကို စာအုပ်အနေနဲ့လည်း ဖြန့်ဝေတော်မူခဲ့ပါတယ်။

၁။ နတ်ဗြဟ္မာတွေရဲ့ အမျိုးအနွယ်နဲ့ အမည်နာမတွေကို ဖော်ပြဟောကြားတဲ့ ... မဟာသမယသုတ် (ပါဠိတော် မြန်မာပြန်)
http://dhammadownload.com/MP3Library/MahaTharMaYa/MaHaTharMayaThaot-Book.pdf

၂။ ရာဂစရိုက်ရှိသူ - ရာဂများသူတို့အတွက် ရည်ရွယ်ဟောကြားတဲ့ ... သမ္မာပရိဗ္ဗာဇနီယသုတ်
http://www.dhammadownload.com/File-Library/MahasiSayadawUSobhanaMahathera/MahasiSayadawUSobhana-Thamarpayetzsaniyathote-nautesattwe-tayar-discuss.pdf

၃။ ဒေါသစရိုက်ရှိသူ - ထစ်ခနဲရှိ ဒေါသထွက်တတ်သူတွေအတွက် ရည်ရွယ်ဟောကြားတဲ့ ... ကလဟဝိဝါဒသုတ် (ဤ ၁ အုပ်တွင် ကလဟဝိဝါဒသုတ်၊ မဟာဗျူဟသုတ် နှင့် စူဠဗျူဟသုတ် - ပေါင်း ၃ သုတ်ပါဝင်သည်)
http://www.dhammadownload.com/File-Library/MahasiSayadawUSobhanaMahathera/MahasiSayadawUSobhana-Maha-Thamaya-thone-thoke.pdf

၄။ မောဟစရိုက်ရှိသူ - အမှားအမှန်ကို မခွဲခြားနိုင်ဘဲ အမြဲလိုလို မေဟဖုံးလွှမ်းနေတတ်သူတွေအတွက် ရည်ရွယ်ဟောကြားတဲ့ ... မဟာဗျူဟသုတ်

၅။ ဝိတက္ကစရိတ်များသူ - ဝိတက်များသူတို့အတွက် ရည်ရွယ်ဟောကြားတဲ့ ... စူဠဗျူဟသုတ်

၆။ သဒ္ဓါစရိုက်ရှိသူ - သဒ္ဓါများသူတို့အတွက် ရည်ရွယ်ဟောကြားတဲ့ ... တုဝဋကသုတ်
http://www.dhammadownload.com/File-Library/MahasiSayadawUSobhanaMahathera/MahasiSayadawUSobhana-Tuwatakathote.pdf

၇။ ဗုဒ္ဓိစရိုက်ရှိသူ - ပညာများသူတို့အတွက် ရည်ရွယ်ဟောကြားတဲ့ ... ပုရာဘေဒသုတ်
http://www.dhammadownload.com/File-Library/MahasiSayadawUSobhanaMahathera/MahasiSayadawUSobhana-PuraBayda-Sutta.pdf

အဲ့တော့ တရားတော်လည်းရှိတယ်၊ တရားတော်ကို နားလည်အောင် ရှင်းပြထားပြီးသားလည်းရှိတယ်၊ ဟောကြားထားတဲ့ တရားတော်ကို မှတ်တမ်းတင်ထားပြီးသား စာအုပ်လည်းရှိတယ်၊ တရားစာအုပ်ကို အွန်လိုင်းပေါ် အများသူငှာ ဖတ်လို့ရအောင် တင်ထားပေးသူလည်း ရှိတယ်၊ ဘာများလိုပါသေးလဲ။

ကျွန်တော်တို့ ဖတ်ကြဖို့ပဲ လိုပါတယ်။
ကိုယ် ကိုးကွယ်တဲ့ ဘာသာတရားကို ကိုယ့်ဘာသာကိုယ် ဘောင်ခတ်မထားဘဲ ဘောင်အပြင်ကနေ ဆန်းစစ်ကိုးကွယ်ကြရအောင်လား။ ဒါမှလည်း သန္ဒိဌိက ဆိုတဲ့ တရားရဲ့ ဂုဏ်တော်ကို ကျွန်တော်တို့ သေချာတွေ့မြင်နိုင်မှာပေါ့။

ပညာအလင်းပြ-မဟာသမယသုတ်၇သုတ်-ပါဋ္ဌိတော်အသံထွက်
http://dhammadownload.com/File-Library/chanting/PyinNyarAhLinPya-ParLiAhthanHtut.pdf

၉ စောင်တွဲ ဝတ်ရွတ်စဉ် (ပရိတ်ကြီး၊ ပဋ္ဌာန်း၊ ဓမ္မစကြာ၊ မဟာသမယသုတ်၊ ဓာရဏပရိတ်တော်၊ ပရိမိတ္တဇာလသုတ်၊ အဘိဏှသုတ်)
http://dhammadownload.com/File-Library/chanting/chanting-9SetsPraying.pdf

''ဘုရားတပည့်တော်သည် ဤ ဆောင်းပါးအား သာသနာတော်၏အကျိုး ချီးမြှောက်ထောက်ပံ့နိုင်ပါစေခြင်း အကျိုးငှာလည်းကောင်း၊ မဂ်ဥာဏ် ဖိုလ်ဥာဏ်အား လျင်မြန်စွာ သိမြင်နိုင်မည့် ဝိပဿနာဥာဏ်အလင်း ဖြစ်ထွန်းပေါ်ပေါက်စေခြင်း အကျိုးငှာလည်းကောင်း ရည်စူးမျှဝေပါ၏။''

Dhamma Review.
6-2-2022

26/11/2021

ရွှေတိဂုံစေတီတော် မှာ မဟာပဌာန်း ပူဇော်ပွဲရှိတယ်။ မြတ်စွာဘုရားရှင်ရဲ့ အရိပ်အာဝါသဟာ သာသနာနှစ်ပေါင်း ၂၆၀၀ ကျော်ခဲ့တာတောင် ကွန်းခိုသူတိုင်းအတွက် အေးမြနေစေတုန်းပဲ။

ဗုဒ္ဓမြတ်စွာ သာသနာ ရောင်ဝါနေသို့ လင်းပါစေ။
ရန်သူတွေပဲ ဖြစ်ပါစေ မြတ်စွာဘုရားရှင်၏ တရားတော်အား နာကြားခွင့် ရကြပါစေ။
ရန်သူတွေပဲ ဖြစ်ပါစေ မြတ်စွာဘုရားရှင်၏ တရားတော်အား လိုက်နာကျင့်သုံး ဆောက်တည်ခွင့် ရကြပါစေ။
ရန်သူတွေပဲ ဖြစ်ပါစေ မြတ်စွာဘုရားရှင်၏ တရားတော်အား လိုက်နာကျင့်သုံး ဆောက်တည်လျက်ရှိကြကုန်သော သူတော်စင် သူတော်မြတ်များနှင့် တွေ့ဆုံခွင့် ရရှိကြပါစေ။

Dhamma Review.
26. 12. 2021

03/08/2021

ဗုဒ္ဓဘာသာဝင်တစ်ဦး၏ ဘာသာခြားတစ်ဦးအပေါ် ထားရှိရမည့် အမြင်များ
-----------------------------------------------------------------------

ကောဇာသက္ကရာဇ် ၁၃၈၃ ခုနှစ်
သာသနာသက္ကရာဇ် ၂၅၆၅ ခုနှစ်
ဝါဆိုလပြည့်ကျော် ၁၁ရက် အင်္ဂါနေ့

ကမ္ဘာပေါ်မှာ နေထိုင်ရှင်သန်ကြသူ လူပုဂ္ဂိုလ်တိုင်းမှာ သူတို့ယုံကြည်ကိုးကွယ်ရာ ဘာသာတရားဆိုတာ ရှိကြသလို ဘယ်ဘာသာကိုမှ မယုံကြည် မကိုးကွယ်ကြသူတွေဆိုတာလည်း ရှိကြတယ်။ တကယ်တော့ ဘာသာတရားတိုင်းဟာ ယုံကြည်ကိုးကွယ်သူတိုင်းအတွက် အေးချမ်းမှုကို ပေးနိုင်တယ်လို့ ကျွန်တော် ယုံကြည်ပါတယ်။

လူတိုင်းဟာ မွေးဖွားလာချိန်ကတည်းကနေ သေဆုံးချိန်အထိ ဘဝတစ်လျောက်လုံး သောကပရိဒေဝလို့ ခေါ်တဲ့ အပူမီးအမျိုးမျိုးကို တစ်နည်းမဟုတ် တစ်နည်းနဲ့ ကြုံတွေ့နေကြရတာမို့လို့ ဘယ်သူမှ အပူပေးတဲ့ ဘာသာတရားကို ကိုးကွယ်ချင်ကြမှာ မဟုတ်ပါဘူး။ ဘာသာတရားလို့ သတ်မှတ်ပြီး လူအများစု ယုံကြည်ကိုးကွယ်ကြတယ် ဆိုကတည်းက ဒီဘာသာတရားဟာ ယုံကြည်ကိုး ကွယ်သူကို တစ်နည်းမဟုတ် တစ်နည်းနဲ့ အေးချမ်းမှု ပေးစွမ်းနိုင်လို့ ယုံကြည် ကိုးကွယ်ကြတာပဲ ဖြစ်ပါလိမ့်မယ်။

ကိုးကွယ်ရာဘာသာတရားတွေနဲ့ ပတ်သက်ပြီး လေ့လာသူအမျိုးမျိုးက သုံးသပ်ချက်အမျိုးမျိုး ရေးကြတာတွေလည်း ရှိပါတယ်။ သူတို့သုံးသပ်ချက်တိုင်းက အဲ့ဒီဘာသာတရားအပေါ် တကယ်ထင်ဟပ်မှု ရှိ/မရှိဆိုတာကလည်း အတည်ယူမှတ်လို့ မရပါဘူး။ လူဆိုတာ အတ္တစွဲရှိကြတာကိုး။

ဗုဒ္ဓဘာသာဝင်တစ်ယောက်အနေနဲ့ ဟိုးအရင်တစ်ချိန်က ကိုယ့်ဘာသာအကြောင်း မကောင်းပြောတာကြားရင် မကြိုက်သလို လူအများစု လက်ညှိုးထိုးကြလေ့ရှိတဲ့ ဘာသာဝင်တွေအကြောင်း ကြားမိရင်လည်း သူတို့ကိုးကွယ်တဲ့ ဘာသာတရားက တကယ်ပဲ မကောင်းတော့သလို အဲ့ဒီ့ဘာသာကို ကိုးကွယ် သူတိုင်းက လူဆိုးလူမိုက်တွေလိုလို စိတ်ထဲမှာ မြင်ခဲ့မိပါတယ်။ အထူးသဖြင့်တော့ မီဒီယာပေါ့လေ။ မီဒီယာမှာ မကောင်းမှုလုပ်ဆောင်သူတွေကိုပြ၊ နောက်ပြီး အဲ့ဒီ့ မကောင်းမှုလုပ်ဆောင်သူတွေရဲ့ ယုံကြည်ကိုးကွယ်ရာကို နောက်ကနေ ယှဉ်တွဲပြတဲ့အချိန်မှာ ဒီလူတွေက မကောင်းဘူး။ ဒါ့ကြောင့် သူတို့ ယုံကြည်ကိုးကွယ်တဲ့ ဘာသာတရားကလည်း မကောင်းဘူးလို့ ဒီလို မြင်မိခဲ့ပါတယ်။

တကယ်တော့ ဒါဟာ မှားယွင်းတဲ့ အမြင်မှန်း ဗုဒ္ဓဝါဒကို ထဲထဲဝင်ဝင် စတင်လေ့လာချိန်မှ သဘောပေါက် နားလည်ခဲ့ပါတယ်။ ဘာသာခြားတွေရဲ့ ယုံကြည် ကိုးကွယ်မှုကို နားလည်သဘောပေါက်နိုင်ဖို့ သူတို့ဘာသာကို နားလည်အောင် အရင်လေ့လာရလိမ့်မယ်လို့ တစ်ချိန်က ယူဆမိခဲ့ဖူးတယ်။ ဒါပေမယ့် တကယ်က ဘာသာခြားတွေရဲ့ ယုံကြည်ကိုးကွယ်မှု၊ ကိုးကွယ်ရာ ဘာသာတရားများရဲ့ ကွာခြားချက်၊ လောကသဘာဝဖြစ်စဉ် အားလုံးကို နားလည်နိုင်ဖို့က မြတ်ဗုဒ္ဓ ဟောကြားခဲ့တဲ့ ဓမ္မစာပေထဲမှာပဲ အလုံးစုံရှိပါတယ်။

ဘယ်ဗုဒ္ဓစာပေတွေကို ဖတ်ရင် ဘာသာခြားတွေနဲ့ သူတို့ ယုံကြည်ကိုးကွယ်ရာ ဘာသာတရားတွေကို နားလည်စေမလဲလို့ ကျွန်တော့်ကို မေးလာရင် ကျွန်တော် ညွှန်းချင်တဲ့ စာအုပ် ၅ အုပ် ရှိပါတယ်။

(၁) အဘိဓမ္မာ မြတ်ဒေသနာ (ပထမတွဲ)
http://dhammadownload.com/File-Library/Dr-Nandamalabhivamsa/Dr-Nandamalabhivamsa-AbidhammaMyatDayThaNar-PaHtaMaTwel.pdf

(၂) အဘိဓမ္မာ မြတ်ဒေသနာ (ဒုတိယတွဲ)
http://dhammadownload.com/File-Library/Dr-Nandamalabhivamsa/Dr-Nandamalabhivamsa-AbidhammaMyatDaythanar-2.pdf

(၃) အခြေပြု ပဋ္ဌာန်းတရားတော်
http://dhammadownload.com/File-Library/Ashin-Janakabhivamsa/books/others/Pathana_Dhamma.pdf

(၄) ပဋ္ဌာန်းမြတ်ဒေသနာ
http://dhammadownload.com/File-Library/Dr-Nandamalabhivamsa/Dr-Nandamalabhivamsa-PaHtanMyatDayThaNar.pdf

(၅) ပဋိစ္စသမုပ္ပါဒ် ကို ပဋ္ဌာန်းနည်း ဖြင့် လေ့လာသုံးသပ်ခြင်း
http://dhammadownload.com/File-Library/Dr-Nandamalabhivamsa/Dr-Nandamalabhivamsa-PaRateSatThaMotePatKoPaHtanNeePhyintLatLarChin.pdf

ဒီစာအုပ် ၅ အုပ်ကို နေ့စဉ်အချိန်တစ်ခုပေးပြီး ဖတ်ကြည့်ပါ။ စာအုပ်အားလုံး ဖတ်ပြီးချိန်မှာ ကိုယ်နဲ့ ကိုးကွယ်ရာ ဘာသာမတူပေမယ့် -

- သူတို့ကို နားလည် လာပါလိမ့်မယ်။
- သူတို့အပေါ် မေတ္တာထားတတ် လာပါလိမ့်မယ်။
- သူတို့နဲ့ ငါက အားလုံး အတူတူပါပဲဆိုတာ ဘယ်သူ့ကိုမှ မေးစရာမလိုဘဲ နားလည် လက်ခံလာပါလိမ့်မယ်။
- နောက်ဆုံး ငါကိုယ်တိုင်သည်ပင်လျှင် ငါမဟုတ်ဆိုတာကို လက်ခံသဘောပေါက် လာပါလိမ့်မယ်။

‘‘ဒိသာပိ မေ ဓမ္မကထံ သုဏန္တု၊ ဒိသာပိ မေ ယုဉ္ဇန္တု ဗုဒ္ဓသာသနေ။
ဒိသာပိ မေ တေ မနုဇေ ဘဇန္တု၊ ယေ ဓမ္မမေဝါ ဒပယန္တိ သန္တော။"

''ဘုရားတပည့်တော်သည် ဤ ဆောင်းပါးအား သာသနာတော်၏အကျိုး ချီးမြှောက်ထောက်ပံ့နိုင်ပါစေခြင်း အကျိုးငှာလည်းကောင်း၊ မဂ်ဥာဏ် ဖိုလ်ဥာဏ်အား လျင်မြန်စွာ သိမြင်နိုင်မည့် ဝိပဿနာဥာဏ်အလင်း ဖြစ်ထွန်းပေါ်ပေါက်စေခြင်း အကျိုးငှာလည်းကောင်း ရည်စူးမျှဝေပါ၏။''

Dhamma Review.
၃-၈-၂၀၂၁
၁၉၂၉

Address

Mandalay-Larshio Road
Maymyo
05085

Telephone

+959772977682

Website

https://www.techsectors.net/

Alerts

Be the first to know and let us send you an email when Dhamma Review posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Dhamma Review:

Shortcuts

Want your business to be the top-listed Shop in Maymyo?

Dhamma Review

08/02/2024

08/02/2024

13/08/2022

17/04/2022

11/04/2022

06/02/2022

26/11/2021

03/08/2021

Address

Telephone

Website

Alerts

Contact The Business

Shortcuts

Share

Category